ام عفاف وشهادة ابو ميلاد

ام عفاف وشهادة ابو ميلاد

 

فى بيت ليس له سقف تعيش ام عفاف مع ابنتها واحفادها الثلاثة 

تبرع اولاد الحلال ليصنعوا لها سقفا من خشب 

كانت حياة ام عفاف شقاء كبير فهى الى تعول ابنتها المريضة واولادها مريم واحمد وشريف 

تقوم ام عفاف يوميا من الفجر تذهب الى السوق المجاور وتفترش الارض لتبيع بعض الخضروات البسيطة

 ثم تعود بعد ان تنتهى من يومها العصر الى البيت وتطبخ الطعام لاحفادها 

مرت عليها جارتها الحاجة منصورة كعادتها وقالت ان المدارس قربت ولازم نقدم للعيال

 قالت ام عفاف

 طيب يعنى نعمل ايه 

قالت الحاجة منصورة

 لزمن حد يروح من طرفكم يعمل شهاده مولد

 قالت ام عفاف يعنى اية شهادة مولد النبى دى 

قالت لها الحاجة منصورة 

يعنى تعرفيهم ان البت مريم اتولدت فين والساعة كام وابوها مين وامها مين وهما عايشين ولا ميتين 

قالت ام عفاف 

يعنى الحكومة مش عارفة كل الكلام دوّه 

قالت الحاجة منصورة اهو كدة رمى جتت بعيد عنك عشان يلموا فلوس

 ترد ام عفاف 

يعنى احنا حيلتنا ايه ياحسرة ايه ياخد الريح من البلاط طيب ياختى نروح نطلعها منين المولد ديه 

-من السجر المهنى 

يعنى اروح له فين عم سجر دوّه 

تروحى القسم بتاع البلد اللى فى المركز 

ايون ايون اللى متعين فيه الغفير ابن حسنين 

ايون عليكى نور وشوفى يمكن تلاقى حسنين ويدلك تعملى ايه 

هو انا لازم اروح بنفسى 

ايون ياولية يعنى بنتك اللى تروح وهى عيانه ماعارفة تتحرك 

طب السوق اعمل فيه ايه

روحى انتى بس وانا اخللى البت سعدية مرات ناصر ابو طايع تبيعلك على ماتيجى 

طيب نروح الصبح ربنا يسهل 

فى االصباح توجهت ام عفاف لقسم المركز تلفتت يمينا ويسارا تبحث عن حسنين الغفير لم تراه

 قررت بعدها اقتحام القسم 

دخلت ام عفاف وشافت ظابط على كتفه ثلاث نجوم قالت له 

يابنى يابو وش سمح انت دلنى عاوزة اعمل شهادة مولد لبنت بنتى 

قصدك شهادة ميلاد ياحاجة 

ايون مظبوط شهادة ابو ميلاد صح 

ياحاجة الشهادات بره القسم فى السحل المدنى مش هنا 

طب يابنى ماتقول لغفير او عسكرى يروح يجيبها لى انا ست كبيرة زى مانت شايف 

ياحاجه لو سمحت روحى السجل واللى انتى عايزاه اعمليه يلا 

مشيت ام عفاف وطلعت بره القسم وكل ماتشوف حد تقوله 

يابنى هو فين عم سجر ده 

معرفش ياحاجه مين ده 

وفى النهاية بعد ان سألت عسكرى قالها 

يامه اسمه سجل امشى اخر السور ده وادخلى الباب الصغير 

اخيرا دخلت ام عفاف السجل المدنى واقبلت على احدى الموظفات التى لا يقف امامها احد قالت لها 

يابنت الحلال عاوزه اعمل شهادة ابو ميلاد لبنت بنتى 

شباك ثلاثه ياحاجه 

ياعنى اعمل ايه بالشبابيك الثلاثة ديه 

يا امى شباك تلاته هناك اهوه عند الستات اللى واقفين طابور دول 

راحت ام عفاف لشباك تلاته وقفت لقيت العالم ملخبطه على بعضيها ومش عارفه تعمل اية 

سألت واحدة ست هما اللى بيقفوا هنا بيضربوه ولا اية يابنتى 

ضحكت الست وقالت لها ايوة ياحاجة لازم تاخد علقة الاول قبل ماتخلص مصلحتها 

صدقت ام عفاف سخرية الست وقالت لها بس احنا ناس كبيرة ومش حمل ضرب يابتى

ضحكت الست اكتر وقالت لها انتى عاوزة تعملى اية 

عاوزة اعمل شهادة ابو ميلاد 

خلاص اقفى فى الصف لغاية ماتوصلى للموظف ويخلص الموصوع بتاعك 

حاضر بس يابتى هايضربونى العلقة الاول ولا لما اخد شهادة ابو ميلاد 

متخافيش ياحاجة محدش يقدر يعملك حاجه 

ظلت ام عفاف فى الصف وبعد اربع ساعات ونص وصلت للموظف المسئول

ايه ياحاجة عاوزة تعملى اية 

شهادة ابو ميلاد لبنت بنتى 

يعنى انتى جاية تعملى شهادة ميلاد لابو ميلاد ولا لبنت بنتك 

معرفشى يابنى خلصنى انا معطلة حالى وبقالى واقفه على رجلى خمس ساعات 

طيب فهمينى انتى عاوزة تعملى اية 

مانا قلت لك شهادة ابو ميلاد لبنت بنتى 

طيب انتى عاوزة تعملى شهادة الميلاد ديه علشان اية 

عشان المدارس ونقدمولها ومعناش فلوس وحالنا واقف 

خلاص ياحاجه انا فهمت اسم ام البنت ايه 

عفاف 

عفاف اية 

عفاف ام محمد 

ياحاجة انا خلقى ضيق لوسمحتى 

يابنى انت زعلان ليه انا اول مرة اجى هنا واعمل الميلاد دية وبتى تعبانة متعرفش تروح ولا تيجى 

طيب اسم ابو بنتك اية 

اسمه سعد ابو وكيل 

يا حاجه اسمه سعد   -  ابوه بقه اسمه اية 

اسمه عبد الرحيم بس الناس تناديه يابو وكيل 

طيب يعنى بنتك اسمها عفاف سعد عبد الرحيم 

ايون مظبوط وانا هاعرف اكتر منكم ياحكومة 

طيب اسم زوج بتك اية 

قطيعة تاخدة ماتجيبش سيرتة بتعكننى 

يا حاجه انا خلقى ضيق لازم نكتب اسم ابو البنت فى الشهادة 

لازم يعنى ده ساب البت وطلقها لما تعبت ماسابش ولا جنية لعيالة يبقى تحط اسمه لية والله مايسوى فى

 سوق الرجالة نص جنية 

يا حاجه انا مال اهلى بالكلام دة اسمه ايه عشان اكتبة 

اسمه عاطف وابوه اسمه محمدين ابو احمد 

يعنى اسمه عاطف محمدين احمد 

ايون انا هاعرف اكتر منكم ياحكومة 

والبت اسمها ايه 

البت اسمها عفاف 

ياستى بنت بنتك اسمها اية 

اسمها مريم وبندلعها بمروة وساعات نقولها يانرجس يابت العليل 

ربنا يصبرنى يارب 

يصبرك ربنا ماتزعلش ياولدى انا ست كبيرة وعقلى قليل 

طيب اتفضلى الشهاده اهه 

طيب ياولدى ربنا يعطيك الخير كلة ولا يضيمك 

طيب شكرا ياحاجه شكرا  - يلا عشان اللى بعدك يخلص 

امسكت ام عفاف شهادة الميلاد وعادت الى البيت ثم راحت للسوق عشان تتابع تجارتها 

لقيت سعدية باعت لها كل الخضرة بتاعتها خدت فلوسها ورجعت البيت دخلت من الباب لقيت معزه الحاجة

 منصورة جارتهم جوة البيت والماعزة تاكل شهادة الميلاد اللى لسة جايباها من شوية  اخذت ام عفاف تصرخ

 وتصيح فى المعزة ماانتى لو تعرفى تعبى النهاردة يابنت الكلب ماتعملى كدة ياحزنك يام عفاف على بت بتك 

قررت ام عفاف تعيد الكرة مرة اخرى من الغد ويبدء يوم جديد بنفس الجمل ونفس الكلام  ما اشقاكى يام

 عفاف ربنا يسهلك الامور .

والى اللقاء فى قصة اخرى انشاء الله