هرم جيزه ترسا
الحلقه الاولى
(المصيف الملعون )
قصه حقيقه :
(ملحوظه تم استخدام اسم مستعار لبطله القصه حفاظا على الخصوصيه )
ياة اخيرا المصيف جه وحشونى اصحابى قوى الى بشوفهم كل سنه من واحنا صغيرين مواظبين على رحله مرسي مطروح خالتى وجوزها شغالين فى محافظه القاهرة متعودين كل سنه يحجزوا لينا فى نفس الفوج مع نفس الجروب وفى نفس المعاد بنجمع مع نفس العائلات... مسحيين ومسلمين عمر ما ديانه فرقتنا بناكل فى طبق واحد وقت المصيف دة بيبقى اجمل ايام بنستناها من السنه للسنه بس المرة ديه جاى معانا ضيوف قريب ماما ومراته وقرايب مراته تعالوا اعرفكم عليهم ( اخت مرات قريب ماما ست محترمه وجوزها طول بعرض حاجه كدة ضخمه بيشتغل فى وظيفه مرموقه واخته بطله القصه( هند) بنت جميله فى اول العشرينات شعرها مش طويل واسود هاديه نادر ما تتكلم وقليله الابتسامه من اول وهله اتشديت لهدوها وعنيها الى كلها حزن وكسرة اول مرة نتعرف عليها كلنا فى الرحله )
رحله الاتوبيس كانت عاديه مفيش فيها اى حاجه ملحوظه طول الطريق نغنى وفرحانين اننا قابلنا اصحابنا تانى بنشوفهم من السنه للسنه ...وصلنا بالسلامه ..احب اوضح ليكم ان المصيف كان مش فى شقق لا فى خيم من قماش على طريق الاسفلت الى بيطلع على البحر محاط بسور جوة معكسر ..ايوة انتم قريتم صح خيم والله بس بجد كانت ممتعه جدا جدا ليها حمام سيدات كبير ومطعم واحد بيجمعنا للغداء والفطار وكافتريا بنجمع فيها بالليل او بعد الغداء نغنى ونلعب طاوله ..كوتشينه
جينا بقى لتقسيمه الخيم اخو هند ومراته اخدوا خيمه لوحدهم ماما اللطيفه اقترحت انى انا وهند ناخد خيمه سوا على اساس بنات بقى مع بعض ...بصيت ليها بعينى من الجنب نظرة تدل على الاستغراب من انها احرجتنى بدون ما تاخد راى ..سكت وابتسمت وقولت ماشي وبالفعل دخلنا الخيمه طبعا علشان هيه ضيفتى سبت ليها اختيار انهى سرير تاخدة قالت الى على اليمين قولت تمام روحت اجيب ملايه من عند ماما ورجعت لقيتها فرشت الملايه بتاعتها على السرير الى على الشمال الى هو المفروض بتاعى
ايه دة هو مش انتى اختارتى الى على اليمين ؟ قالت بعصبيه لا انا هاخد دة وخبطت السرير بايدها جامد
اخدت نفس عميق وقولت فى سرى بدايه القصيدة عك يلا ان شاء الله خير ربنا يسامحك يا ماما
فرشت الملايا وبدات انظف الخيمه وزعوا لينا المقشه ولوزم النظافه قولت كنسه خفيفه كدة ولميت التراب وحاجات بسيطه فى كيس وقفلته جامد
طيب انا خارجه اجيبلك اى حاجه من الكافتريا ؟ لا شكرا يا رشا
روحت ورجعت لقيت الكيس المقفول مفتوح والتراب واقع فى كل مكان متوزع
ايه دة مين الى وقع التراب دة من الكيس بعد ما لميته ؟
معرفش ..
يعنى ايه متعرفيش هو فى حد من العيال الصغيرة دخل الخيمه ؟ لا انا لوحدى هنا يا رشا قصدك ايه انا يعنى. !!
لا مش قصدى بس عاوزة افهم ؟
روحت لماما وانا بقى على اخرى وحكيت ليها حوار الملايه وكيس التراب كانت قاعدة مع قريبنا قالى معلش استحمليها اصلها مامتها ماتت وهيه متاثرة وزعلانه عليها
فى عز غضبى اول لما سمعت الكلام دة سكت واتاثرت ولومت نفسي انى كنت متغاظه منها وصعبت عليه
رجعت الخيمه بصتلها وابتسمت سالتنى عرفتى مين رمى التراب؟ رغم تاكدى انه بفعل فاعل بس قولت اعدى الموقف علشان ظروفها ابتسمت قولت ليها عادى بقى يمكن الهواء انا هعمله تانى وبالفعل لميته تانى بس المرة دة اخدته رميته بعيد
عدى اليوم فى ترتيب حاجتنا تانى يوم روحنا البحر نزلنا كلنا المياة وفجاة لقينا هند بتدخل جوة ماما قالتلى روحى هاتيها (انا الحمد لله بعرف اعوم كويس لانى بدرب سباحه من صغرى فى نادى الزمالك )
مامتى الجميله الى عالطول مصدرانى فى اى حاجه دخلت لهند جوة كل لما اقرب منها يبقى فرق بينى وبينها متر ارفع راسي من العوم الاقيها بعدت عشرة متر اكمل تانى نفس الموضوع بيكرر وعماله تاخدنى لجوة معاها انا شكيت ان فى سحب وبعوم فى اتجاة غلط قررت اعوم من غير ما احط وشي فى المياة ..
لا ما انا لازم افهم فى ايه؟ والناس بعدت عنا كتير وبدا كابتن الانقاذ يصفر
قربت منها لقيتها واقفه بتتكلم كلام غير مفهوم ومش باصه ليه تتجه يمين شويه شمال شويه زى ما يكون فى اكتر من شخص قدامها
هند هند هند انتى سمعانى تعالى اخرجى احنا دخلنا جوة قوى
مفيش اى رد منها باصه فى اتجاة تانى وبتتكلم كلام غير مفهوم
بايديها وكل تعابير وشها بتتحرك متفاعله جدا مع الى بتكلم معاهم
دة مش هزار دة جدا !!! كلمت نفسي باستغراب
بصيت حاوليا لقيتنى معاها لوحدى فى عرض البحر انا خوفت ولفيت ولو اقولكم انى اخدت المسافه شوط واحد عوم بسرعه رهيبه ولا بصيت حتى ورايا سالونى مرجعتش معاكى ليه
قولت ليهم هيه هناك عندكم اهيه وشاورت عليها الى عاوز يجيبها يدخل هو
خرجت من المياة وانا بنشف وفى اقل من دقيقه لقيتها جايه من ورايا
اتخضيت قطعت المسافه ازاى بالسرعه ديه؟ اتنهدت باستغراب وقولت ليها حمد لله على السلامه بلاش تدخلى جو كدة تانى ولا لمحت ليها على موضوع انها كانت بتكلم حد .
رجعنا كلنا اخدنا شاور ومعاد الغداء جه قالولى روحى شوفى هند اتاخرت ليه فى الشاور
دخلت الحمام لقيته فااااضى كل الفوج خلص وطلع على الغداء
هند انتى هنا ؟ ايوة
طيب خلصى علشان بدانا الغداء تحبى اجيبلك حاجه ؟ لا
سمعتها بتتكلم جوة الحمام زى ما يكون معاها حد
خبطت عليها ... هند انتى بخير ؟ ايوة
طيب انتى معاكى حد ؟ ايوة ماما بتليفنى
وقفت مكانى متسمرة وضربات قلبى زادت تمالكت اتزانى وقولت ليها طيب خلصى بسرعه وتعالى
وخرجت بسرعه على الغداء الى ولا كنت حاسه بطعمه بعد الغدا قاعدنا فى الكافتريا جت صاحبتى نرمين( بنت مسيحيه بموت فيها من واحنا صغيرين بنجمع كل سنه سوا اقرب صديقه ليه فى المصيف)
مالك يا روشا ؟ ها... كنتى بتقولى ايه
ياة دة انتى مش معايا خالص مالك سرحانه فى ايه يا روشا ؟
حكيت ليها كل الى حصلى مع هند من وقت ما جينا المصيف
يا روشا متكبريش الموضوع واحدة امها لسه ميته وكانت مرتبطه بيها عادى بقى تبقى كدة
تفتكرى ؟
طبعا يا بنتى يلا نلعب كوتشينه بطلى افورة
ابتسمت وقولت فى سري يمكن نرمين عندها حق وانا الى مكبرة الموضوع وقمنا لعبنا وانبسطنا
جه الليل علينا وطبعا هند قاعدة عالطول فى الخيمه على فكرة كانت مواظبه على الصلاة فى مواعدها وقراءه القران كتير
دخلت عليها لقيتها بتقرا قران ... رفعت عنيها عليه وصدقت وسالتنى بملامح ثابته ... انبسطى مع صاحبتك
سرحت ايه دة هيه عرفت منين انى كنت مع نرمين ؟؟؟ قولت يمكن عدت راحت الحمام وشافتنى
رديت بهدوء وابتسامه مصطنعه ... ايوة المرة الى جايه تطلعى معانا. هتنبسطى ...ردت لا شكرا انا كدة مبسوطه
نمت من الاجهاد بعد تفكير طويل فى الى بيحصل وعدت الليله ..
صحيت الصبح اصحيها علشان الفطار دايما الاقى جسمها سخن
هند قومى يلا علشان تفطرى هتروحى البحر؟ ردت وشكل وشها منفخ ومجهد ...لا انا تعبانه مش رايحه انهاردة ؟
طيب تحب انادى حد يشوفك ماما تكشف عليكى حساكى سخنه (مامتى دكتورة ) ؟ لا انا كويسه هقعد اقرا قران وسبينى علشان هصلى
روحنا البحر ورجعنا واتغدينا وقضينا الوقت فى الكافتريا ضحك ولعب ونزلت بلليل للخيمه لقيتها قاعدة بصالى
ايه يا هند طول الوقت حابسه نفسك ليه تعالى اندمجى معانا هتنبسطى قوى .... مفيش اى رد منها
ايه دة؟ يمكن سرحانه ؟ بس هيه بصالى كدة ليه ؟ انا خوفت
هند انتى سمعانى ؟
بصتلى بقلق وقالت ... رشا ...رديت ..نعم ..
كررتها تانى برعب رشا ... نعم معاكى يا هند فى ايه ؟
بصتلى بتبريق وتركيز مخيف
وقالت بصوت كله خوف ماما معانا فى الخيمه دلوقتى
انتظروا الحلقه القادمه ❤️
