قصة رعب دمية المزادات
من فترة كده صفحة من صفحات المزادات نشرت صورة العروسة دي ... عروسة معروضة في مزاد لأعلى سعر ، بمجرد ما شفت صورة العروسة اترعبت ، اترعبت لأنها فكرتني بقصة قراتها من فترة قصة حقيقية حصلت مع شخص ما .
اسمحولي احكي القصة من علي لسانها .
كان عندي عروسة جيالي هدية من فترة طويلة ...
عروسة عادية قعدت معايا سنين ملاحظتش فيها أي شيء غريب ... أو بمعنى أدق مجاش المخلوق الي يحسسني إن العروسة دي مش مجرد عروسة عادية ، وإن فيها حاجة مش مفهومة
محدش شايفها غير المخلوق ده .
المخلوق ده كان كلب ... كلب صغنن لطيف لونه أبيض من فصيلة الجريفون ، جبته وكان عمره مجرد أيام وكبر عندنا في البيت وسميناه فلافي لأنه كان هايش زي قطعة القطن .
فلافي كبر ، ولما وصل عمره ست شهور كان أول تنبيه ليا يعمله عن العروسة دي .
كنت بتفرج على التليفزيون في رسيبشن بيتنا وانا نايمة على الكنبة الكورنر الي بحب استريح عليها ... عيني راحت في النوم وقمت مخضوضة على فلافي وهوا بينبح ... بينبح وهو واقف عند الكنبة الي عليها العروسة ... واقف برجله الي ورا وايديه الاتنين على الكنبة وبيحاول يقرب من العروسة ورافع ودانه ... زعقتلو لأنه خضني ومحطيتش في دماغي أي حاجة .... .
بدأت ألاحظ إن فلافي بيكون نايم ، وفجأة يبدأ يزوووووم وهو نايم ، يرفع ودانه علامة الترقب والاهتمام ويجرررري ناحية العروسة وينبح عندها ...
الموقف ده اتكرر عشرات المرات وكل مرة اتخض من إن الموضوع حصل بشكل مفاجئ لحد ما نفسي شالت من العروسة الي بدأت الاحظ إن وضعها اتغير عن الوضع الي انا حاطاها بيه على الكنبة ... ف لفيتها في كيس وحطيتها في شقة مهجورة لينا مش بنستخدمها في نفس الدور بتاعنا ...
في يوم من الأيام أحد معارفي اهداني سبحة كانت تخص قريبته وكانت ست تقية من بتوع زمان وشدد عليا احافظ عليها واسبح بيها ..
سبحة من الخشب العتيق الي معمول باليد وكنت محافظة عليها جدا ، وفجأة السبحة دي اختفت ومرضيتش اقول لصاحبها علشان ميزعلش وقلت اكيد وقعت هنا ولا هنا وهلاقيها ...
فوجئت بالشخص ده بيكلمني وبيقول لي إنه حلم بالسبحة وإن حد من عوالم أخرى مفيش داعي لتفسيرها هو الي اخد السبحة ،
وحلم ازاي يسترد السبحة واتقال له كمان في الحلم هيلاقيها فين في بيتنا .
انا بصراحة ولا كنت مصدقة أي حاجة بس اكيد استغربت هو عرف منين اصلا إن السبحة ضايعة ... وفعلا الشخص ده زارنا في البيت وطلب الاختلاء في مكان لوحده يقرأ قرآن ويدعي بالادعية المعينة ويقول ورد معين ويكرره كتير جدا لحد ما تيجي له الإشارة أنها رجعت ...
والشخص ده على فكرة له بصيرة في علوم الماورائيات من صغره .
دخل بلكونة في غرفة ابني اختلى فيها عدة ساعات لدرجة اني نسيت اصلا إنه موجود ، وابني كان قاعد في غرفته والباب مقفول على الشخص ده ، وانا قاعدة بره في الرسيبشن قافلة نور البيت كله ومشغلة التليفزيون في ليلة شتاء شديدة البرودة من الليالي الي بحبها ،
وفلافي نايم تحت رجلي
وأقسم بالله العلي العظيم الي حصل ده وهحكيه حصل بالضبط ...
سمعت صوت بشري قال بِس بِس بِسسسسس زي ما بنبسبس لقطة ... الصوت كان واضح اوي وابتديت انتبه وببص على فلافي لقيته قام نص قومة وابتدى يزوم ويرفع ودانه
زعقت لابني وقلت له بطل تخضني واسكت ، ابني مردش عليا ...
ملحقتش انادي على ابني تاني لأن الصوت المرة دي اتكرر بعزم ما فيه بسسسس بسسسسسسس بسسسسسس وفي لمح البصر فلافي جاتلو زي نوبة جنووووون وجررررري بعزم ما فيه
لي مكان في الرسيبشن مش بقعد فيه ودايما هادي ووقف ينبح بكل جنون في ركن ضلمة في الرسيبشن
من رعبي جريت فتحت نور المكان الي كنت قاعدة فيه وخفت اروح عند المكان الي فلافي بينبح فيه
ولما تمالكت اعصابي رحت فتحت غرفة ابني وانا بزعق له وبقول له بتخضني وتبسبس لي لييييه ، حلف مليون يمين إنه ولا عمل اي حاجة وقاعد بيلعب على الموبايل بتاعه .
ولقيت الشخص الي كنت نسيت اصلا إنه موجود خارج من البلكونة وبيقول لي السبحة رجعت خلاص
قسما بالله العلي العظيم لو مكنتش شفت الي شفته بعيني ده كنت تعتقد إن الشخص ده كان مخبي السبحة وحطها لي
وكنت هلغي عقلي تماما هي اصلا وصلت له ازاي ... طيب انا شفت ايه ؟؟؟؟
رحت معاه لقيته رايح بكل ثقة ، ووقف وشاور لي من بعيد عند كرسي الصالون اللي في للركن المظلم الي فلافي كان بينبح عنده .
.. وبعيني دي لقيت السبحة متعلقة على ايد الكرسي ، الكرسي الي لا بروح ناحيته ولا بقعد اصلا في المكان ده !!!!!!!!
انتهت القصة ؟
لا منتهتش
لاني بعدها بكاااااام يوم بنضف المكان ده وجيت عند كنبة موجودة في الركن المظلم ولقيت .... لقيت .....
لقيت العروسة دي الي شيلتها بإيدي ، وحطيتها في الشقة المهجورة ، لقيتها متكومة بين الكنبة والحيطة ، وتحديدا مكان ما سمعت الصوت الي رعبني من كام يوم بس .
ودي كانت قصه انهاردة
في رعب علي الهامش
مع احمد سمير
لو عجبتك القصة اشترك في القناه وفعل الجرس علشان يجيلك اشعار بي كل قصة جديدة
