ما هو مثلث برمودا ؟؟

يطلع إيه مثلث برمودا؟

وهل هو فعلًا عرش الشيطان؟

من حوالي 105 سنة تقريبًا ظهر لغز "مثلث برمودا" اللي حير عقول الناس كلها على أمل حله، انتشرت حالة من الرعب بين الناس لدرجة إن العالم كله عجز عن حل اللغز، لحد وقت قريب اللغز كان غريب، مرعب، وغير مفهوم،اتبنى عليه قصص وأساطير وحكايات كتير، حتى إن بعض المستكشفين رجحوا إنه عرش (إبليس)، أو إنه مكان فيه مجموعة من الفضائيين، قصص وحكايات، لحد ما وصل بعض العلماء مؤخرًا لحل اللغز،،
 

جاهز تعرف الحكاية ؟

يلا بينا

مثلث برمودا هو مكان في المحيط الأطلنطي، قطعة كدا من البحر موجودة بين جزر برمودا وولاية فلوريدا وجزربورتوريكو، وعلشان القطعة دي موجودة بين 3 نقط سموها المثلث، وعلشان واحدة من النقط اسمها برمودا أطلقواعليها اسم "مثلث برمودا".

مساحة المثلث كبيرة جدًا، خليني أقول لك إنها بتوصل لمليون و125 ألف كيلو متر مربع، ولو مش قادر تستوعب المساحة ، تخيل كدا مصر؟! هي أكبر منها.

يعني لو وصلت فوقها، صعب تبعد بسهولة، وبكدا تبقى حكمت على نفسك بالموت!

سنة 1918م، سفينة أمريكية مشهورة اسمها "USS سيكلوبس" اتحركت وكانت في طريقها للميناء، الرحلة كانت المفروض تاخد 3 أيام والسفينة توصل، لكنها موصلتش، فات أسابيع، شهور، سنين، والسفينة موصلتش.

يا عزيزي دا السفينة مأرسلتش حتى نداء استغاثة، اختفت فجأة، والرئيس الأمريكي وقتها خرج وقال: "الله والمحيط وحدهما يعلمان أين اختفت السفينة".

مكنش فيه استيعاب كامل إن سبب اختفاء السفينة هو مثلث برمودا، وعلشان كدا مكنش فيه أي تحذير، في السنين اللي بعدها عدد كبير جدًا من السفن والطيارات والغواصات كان بيختفي في المنطقة دي، وسلسلة كبيرة من حوادث الاختفاء غرقت الصحف، مقالات بقى وصحفيين وإعلاميين، الدنيا اتقلبت، لدرجة إن العالم كله بدأ يتكلم عن مثلث برمودا ، ولعوا الدنيا حرفيًا، وعلى رأسهم كانت وكالة الأنباء الأمريكية (أسوسيتيس بريس)، ومجلة اسمها (Fate) اللي كانت متخصصة في النوع دا من الحوادث والظواهر الغريبة.

سنة 1945م البحرية الأمريكية خرج منها رحلة مكونة من 5 طيارات اسمها الرحلة رقم "19"، خرجوا في مهمةتدريبية، ولسوء حظهم وهمَ طايرين في الجو وصلوا لمنطقة مثلث برمودا.

اللي حصل إن الطيارات بدأت تتسحب لتحت، ومفيش قائد لطيارة منهم قدر يتحكم في طيارته، وواحد منهم بعت نداء استغاثة كان من أغرب التسجيلات اللي موجودة لحد دلوقتي، وبعدها الطيارات اختفت.

 البحرية الأمريكية بعتت طيارات إنقاذ علشان تدور عليهم، الطيارات بعد ما وصلت لمكان الرصد الأخير، انفجروافي الجو، بدون أي مقدمات!

ومن اللحظة دي، اتصنفت المنطقة اللي فيها مثلث برمودا، إنها منطقة ملعونة، وماينفعش أي إنسان يقرب منها.

مع زيادة إرعاب الناس، وتصنيف المنطقة بإنها ملعونة، شخص اسمه (ريتشارد واينر) استغل الموضوع وعمل كتاب عن مثلث برمودا وسماه "مثلث الشيطان"، وبعده كاتب تاني اسمه (فينسانت جاديس) ألف كتاب تاني، وبعدهم(تشارلز بيرلتس)، فالموضوع بقى كبير جدًا لدرجة صعب استيعابها.

خرج بقى يا سيدي شوية يقولوا إن المثلث دا تحته مدينة أطلانتس، ودي لعنة أطلانتس على البشر السيئين.

مجموعة تانية قالت لا دا عرش (إبليس) موجود فوق منطقة برمودا، وبيحرق أي حد يقرب منه.

وناس تانية قالت إن الفضائيين همَ اللي بيخطفوا أي حد يقرب من المثلث لأنه مكان نزولهم للأرض ومراقبتهم للبشر.

حتى إن فيه ناس قالت إن السفن والطيارات اللي بتعدي من المثلث بتدخل في ثقب زمني بينقلهم لزمن تاني،وبالمناسبة لسه ناس كتير مصدقة الفكرة دي!

خرج العلماء اللي بيستندوا دايمًا في كلامهم على المنطق، وقالوا بس كفاية خيال علمي ووجع دماغ، كل دا كلام فاضي ، وبدأوا في عمل بحث علمي لحد ما وصلوا للنهاية.

مجموعة من الباحثين اعتكفوا على حل اللغز، دراسات وتجارب علمية وصلتهم في النهاية للحل!

وأول شيء منطقي توصلوا ليه في التجارب بتاعتهم هو "هيدرات الميثان".

الباحثين اكتشفوا كمية كبيرة جدًا من هيدرات الميثان بتخرج من القاع تحت المثلث بتركيز عالي جدًا، وبالتجارب العلمية اكتشفوا إن فقاعات الميثان تقدر تغرق سفينة بكل سهولة، لأن الغاز بيختلط مع الماء بنسبة كبيرة وبيخلي كثافة المياه تقل، وبيعمل ظاهرة كدا اسمها المياه الرغوية، ودي مبتقدرش تشيل وزن السفينة، فبتغرق.

مجموعة من العلماء في جامعة النرويج، لما عملوا بحث اكتشفوا إن فيه حفرة في قاع المثلث قطرها حوالي 500 متر، والحفرة دي ظهرت بسبب انفجار غاز الميثان، وبما إن غاز الميثان قادر إنه يصنع حفرة بالحجم دا، فالانفجاراللي تسبب فيها بيرتفع بدرجة عالية جدًا في الجو ويعمل خلل في حركة الطيارات.

فيه بقى عواصف اسمها العواصف الاستوائية، العواصف دي قوية جدًا، ممكن بكل سهولة تمرجح سفينة تيتانك وتقلبها، وبتحصل في المياه الاستوائية وموجودة بشكل كبير جدًا في منطقة برمودا.

بعض العلماء قالوا إن فيه شكوك إن المثلث فيه مجال مغناطيسي بيأثر على حركة البوصلة وسلوك الأجهزة.

ودي كلها أسباب كفيلة إنها تخلي منطقة برمودا منقطة صعبة جدًا في الملاحة البحرية أو الجوية.

تعرف إن معظم القصص اللي سمعتها عن المثلث فيها مشاكل في صحتها، لدرجة إن الباحث الأمريكي (لورانسدايفيد كوش) ألف كتاب وسماه "حل لغز مثلث برمودا"، وكان سبب في إن الناس تركز في نقطة مهمة جدًا، وهي الإعلام .

(لورانس) طلع تناقضات غريبة في القصص المتداولة بين الناس عن المثلث، وكشف للناس إن الإعلام والمؤلفين لعبوا في الموضوع بطريقة مبالغ فيها.

يعني مثلًا، فيه متسابق اسمه (دونالد كروهورتس) كان في تسابق مائي وفجأة اختفى هو واليخت بتاعه.

الإعلام والمؤلفين ربطوا قصة اختفاءُه بمثلث برمودا، مع إن كل الأدلة وقتها كانت بتقول إنه انتحر بسبب بعض المشاكل النفسية، وإنه كان بعيد عن مثلث برمودا، وإن السباق نفسه كان في مكان تاني!

كمان كان فيه قصة متداولة عن سفينة بتنقل بترول وضاعت في المحيط الهادي، المؤلفين والإعلاميين نسبواضياعها لمثلث برمودا، والمثلث أصلًا موجود في المحيط الأطلنطي!

(دايفيد كوش) ومجموعة من الباحثين لما راجعوا تواريخ الأيام اللي غرقت فيها السفن مع خبراء الطقس وخفرالسواحل، اكتشفوا حاجة غريبة جدًا، في الأيام دي الطقس كان قاسي جدًا والمحيط كان في قمة الهياج، ودا لوحده كفيل إنه يغرق السفن من غير فضائيين ولا عفاريت. لكن الإعلام هو اللي زيف الحقائق.

قصص الخيال العلمي اللي كانت بتتناقل عن مثلث برمودا مهولة، وغريبة جدًا، لدرجة إن المؤلفين لما سفينة"SSVE فوج" غرقت بدأوا يحكوا قصص عن إنها اختفت وبعدين ظهرت مرة تانية، بس لما ظهرت كل الأشخاص اللي كانوا عليها اختفوا ومكنش لهم أثر، إلا جثة القبطان اللي كانت موجودة في الكبينة بتاعته ميت وقاعد على الكرسي  وفي إيده فنجان قهوة سخن وبيطلع دخان!

فالمنظمة الحربية خرجت ونفت الكلام دا، وقدموا صور لحطام السفينة، وصور لانتشال الجثث من على السفينة،وأثبتوا إنها انفجرت بسبب عطل في خزان الوقود، ومكنش فيه قبطان، أو قهوة سخنة، ولا دخان، كل دي فبركة من الإعلام 

قوة خفر السواحل الأمريكية والإدارة الوطنية الأمريكية للمحيطات والغلاف الجوي، قالوا إن حالات الاختفاء اللي بتحصل في مثلث برمودا زيها زي أي حوادث بتحصل في أي مكان تاني في المحيط، ووفقًا للإحصائيات الرسمية،عدد الطيارات والسفن اللي اختفوا في مثلث برمودا، مساوي لعدد الطيارات والسفن اللي بيختفوا في أغلبالمسطحات المائية في العالم!

يعني من الآخر، إنتَ اتلعب بيك من الإعلام والكتب والأفلام، وهمَ اللي تعمدوا يكتبوا عن مثلث برمودا بالشكل المكثف دا، ويألفوا قصص وروايات، ويسيبوا باقي المحيطات اللي بيحصل فيها حوادث بنفس العدد المهول!.
 

وفي النهاية فيه مقولة بتقول:

"المثلث هو منطقة عادية في المحيط، بالإضافة إلى بعض الحظ السيء."

لازم تعرف إن أسطورة برمودا هي أسطورة مصطنعة، ولازم من اللحظة دي الأسطورة تتهدم، واللي صنعها الكتاب والصحفيين اللي معظمهم استخدم أدلة غلط علشان يزود الإثارة في حكاياته، المثلث مجرد منطقةظروفها المناخية متقلبة مع عوامل طبيعية مختلفة زي فقاعات غاز الميثان، ومافيش أي عفاريت أو شياطين أوفضائيين أو ثقب زمني.

دا حتى الطيارات اللي راحت تستكشف عن سبب اختفاء الرحلة "19" لما عملوا بعض الأبحاث على نوع الطيارات ديواللي اسمها "مارتن مارينر" اكتشفوا إن فيها عيوب في خزان الوقود ممكن يتسبب في انفجارها؟!

ولازم تعرف إن فيه سفن كتير بتعدي من مثلث برمودا كل يوم ومبتغرقش ولا بيحصل لها أي حاجة، رغم إن فيه بعض القوانين الدولية بتحذر من الاقتراب منه!
 

المثلث مسطح مائي عادي جدًا، مفيهوش أي جزر، السفن بتعدي منه، هو بس ظروفه المناخية متقلبة، بتهدد حياةاللي يقرب منه، ولكنه قطعة من المحيط عادية جدًا مفيهاش أي زيادة غير اللي اتذكرت.

أتمنى تكون استمتعت معايا بالقصة .