قربان إبليس الجزء الأول والثاني
*قصة قربان ابليس الجزء الأول والثاني
"قربان ابليس"
في الليلة دي كنت قاعد في المكتب وكان الجو صعب جداً وكان برد شديد ومطر ، ناهيك عن صوت الرعد اللي مش مخليني عارف انام كانت الساعه عدت واحده بعد منتصف الليل لما الممرضه هدير خبطت علي باب مكتبي وهي بتقول يا دكتور .. يادكتور .؟؟!!
قمت وفتحت الباب ولقيت هدير في وشي
خير يا هدير عايزه ايه في الوقت دا..؟!!
-في جثه وصلت تحت وفي امين شرطه عايزك تستلمها
تمام ياهدير انا هنزل وراكي
مشيت هدير وانا لبست جاكيت تقيل ونزلت اشوف في ايه وبسأل نفسي وبقول ياتري الجثه دي مخبيه ايه ..؟؟!!
كانت الساعه تجاوزت بعض الدقائق من رصيد الواحده بعد منتصف الليل والجوا بارد والناس اللي في المستشفي سواء اطباء او ممرضين كانوا منكمشين من البرد
نزلت للبدروم تحت واللي فيه قسم المشرحه واللي كان في استقبالي كالعاده عم محمود حارس المش*رحه واللي كان واقف متخشب ومتغطي ببطانيه من البرد وجسمه بيتنفض وبيقول بصعوبه: في حاله وصلت يا دكتور محتاجينك توقع علي ايصال الاستلام
تقدمت ناحية الجثه اللي ممده علي سرير وسط قاعة المشرحه وكان واقف بجوار الجثه امين شرطه باين عليه اثار البرد والارهاق وماسك في ايده ملف ورقي وقالي بصوت مهزوز بيطلع بصعوبه مصحوب ببعض البخار من الفم متأثر بالبرد: ادي الجثه يا دكتور وادي الملف الخاص بيها استلمهم واتفضل امضيلي علي ايصال الاستلام
هزيت دماغي وسكت وتقدمت اكتر ناحيه الج*ثه واللي كانت متغطيه بملايه بيضاء، مديت ايدي وشيلت الميلايه من عليها علشان الاقي نفسي قدام ج*ثه لفتاه بداية العشرين سنه من عمرها والج*ثه شبه متبهدله جر*وح وكد*مات كتيره جداً
قلت بشكل تلقائي: يا ساتر يارب ودي اي اللي حصلها دي .؟!
رد امين الشرطه وقال: منعرفش بقي يا دكتور، اللي اعرفه ان الصبح وصل بلاغ عن حاله وفاه في شقه في العجمي ولما وصلت القوه لقيت البنت دي والنيابه حولتها للطب الشرعي
قلت: تمام هات الدفتر امضي
وبالفعل مضيت علي استلام البنت وامين الشرطه لف الشال اللي علي كتفه حوالين رقبته وخرج علشان يواجهه طقس اسكندريه الغاضب الليله دي
اخدت ملف الحاله وبدات اتحرك ناحيه الباب وقلت لعم محمود: لو سمحت ياعم محمود دخل الج*ثه التلاجه وبكره هنبدأ شغل فيها بأذن الله
طلعت مكتبي وسبت الملف علي المكتب وريحت جسمي علي الكنبه ورحت في النوم
"الدنيا كانت ضلمه، انا فين.؟؟ ايه المكان ده.؟؟ بدأت اتحرك في المكان واللي كان اشبه بشقه ولكن معالمها مش واضحه من اثر الضلمه، ولكن فجأه لاحظت ان في نور بدأ يظهر بين معالم الشقه.؟!
شقه قديمه وجميله فيها لوحات كتيره علي الجدران، وكمان في كركبه في المكان، وفي دوشه وصوت مزيكا عالي وكأن في حد بيتنطط في المكان، بدات اتحرك اعمق في الشقه بس مفيش حد بس لسه صوت المزيكا عالي والتخبيط شديد ولكن مفيش اي حد ، وفجاه شوفت بنت ظهرت قدامي ومسكت رقبتي بأيديها وكانت عايزه تخنقني وكان هي هي نفس البنت اللي استلمت جث*تها من شويه، كنت بص*رخ وبحاول ابعد عن قبضة ايديها وفجأه لقيت نفسي بقع من علي الكنبه وبصحي من النوم..!"
كان كابوس مرعب وغريب جسمي كان عرقان بطريقه غريبه وضربات قلبي سريعه، قمت من مكاني ودخلت الحمام علشان اغسل وشي وانا حاسس بألم شديد في رقبتي ولما بصيت في المرايه لاحظت وجود حاجه غريبه، كانت في علامات صوابع علي رقبتي وكأن فعلاً كان في حد بيحاول انه بيخنقني مش مجرد حلم بدات اتحسس رقبتي ولكن حسيت بالم شديد
طلعت من الحمام وانا حاسس بصداع وارهاق شديد وقتها عرفت اني الجوا بتاع امبارح والبرد قدر يوهبني دور برد مظنش هيعدي معايا بسهوله
فتحت باب مكتبي وانا بقول: يا هدير، يا هدير لو سمحتي كبايه شاي من غير سكر وهاتيلي من الصيداليه تحت حاجه للبرد
هزت هدير دماغها بالايجاب ومشيت وانا دخلت اوضتي
ريحت علي الكنبه وسندت دماغي وانا بحاول اتغلب علي الصداع وطبعا ناهيك عن الزكام
سمعت صوت رنة تليفوني، قمت بصعوبه ومسكت التليفون ولقيت المتصل"الرائد ايمن بدران"
الو..؟!
ايمن: صباح الخير يا دكتور معلش اسف اني بكلمك بدري كدا
-لا يا ايمن بيه ولا يهمك طمني عليك اخبارك اي.؟!
ايمن: انا زي الفل المهم طمني وصلتك الج*ثه امبارح
-اه في جث*ه وصلتني امبارح بأسم ... لحظه يا ايمن بيه خليك معايا
قمت وجبت ملف الج*ثه من علي المكتب وكملت كلامي وقلت: ج*ثه "ملك احمد المنيري" هي تبعك.؟!
الباب خبط ودخلت هدير بالشاي وقرصين بنادول وكبايه مايه
شاورت ليها تسيب الحاجه علي المكتب وهي قالتلي الف سلامه يا دكتور وخرجت
ايمن: انا اللي كنت مع القوه اللي خرجت من القسم ناحية الشقه اللي اتقدم فيها البلاغ وكمان انا مسكت القضيه دي وقررت ابعتها ليك فورا علشان واثق في مهنيتك الشديده وقوة ملاحظتك، كفايه اني اشتغلت معاك في قضيتين قبل كدا قضية "مريم" وقضية "يوسف" والصراحه انت عملت اللي محدش يعمله
-اشكرك يا ايمن بيه دي شهاده اعتز بيها، "هاااااتشي" اسف يا ايمن بيه دور برد بقي وكدا
لا الف سلامه يا دكتور الجو فعلا قالب الفتره دي المهم اسيبك ترتاح وانا سايبلك ملف فيه كل المعلومات اللي ممكن تحتاجها عن البنت ولو احتجت اي حاجه كلمني وهستني منك تقرير بالحاله
-تمام يا ايمن بيه مع السلامه
قفلت التليفون ورحت اخدت قرصين البنادول واخدت كبايه الشاي وبدأت اشربها بنهم وكأني خلاص ادم*نت الكافين اللي في الشاي والقهوه، وول*عت سيجاره علشان كمان اكتشف اني خلاص شبه ادم*نت النيكوتين علشان ينضم للكافين
مسكت الملف في ايدي وبدات افتحه واتصفح معلوماته
وتقرير المباحث كان كالاتي
في البدايه قابلتني صوره للبنت واللي متدبسه في اعلي الملف ومكتوب تحتها الاسم"ملك احمد المنيري" السن 21 سنه، العنوان 13 شارع ابراهيم بغدادي المتفرع من شارع احمد نصر بالعجمي عماره 13 رقم الشقه 9 بالدور السادس
تم وصول بلاغ الي قسم شرطه المندره من قاطنين احد العمارات السكنيه بأن هناك صوت مزيكا صاخبه وهرج ومرج منبعثين من احدي الشقق السكنيه مسببين الازعاج لسائر ساكنين العماره وعندما وصلت قوات الامن للمكان اقتحمت الشقه وعندما دخلت وجدت نفسها امام فوضي عارمه والكثير من زجاجات الخ*مور ملقاه علي الارض وايضا هناك الكثير من الاوراق المبعثره والتي تحتوي علي رموز ورسومات غرببه الشكل، ولكن مع كل هذه الفوضي لم يجدوا احد في الشقه ولكن وجدوا ج*ثه المج*ني عليها ملقاه علي الارض وسط بركه من الد*ماء، وكانت مذب*وحه من الرقبه بشكل وح*شي وايضا يبدوا من حالة الج*ثه انها تلقت الكثير من الكد*مات وعانت من الض*رب المبرح، وقد تم نقل الج*ثه الي الطب الشرعي بمستشفي اسكندريه العام وجاري التحقيق من جانب القسم الجنائي وفي انتظار تقرير الطب الشرعي....
سبت الملف من ايدي وانا بطفي السيجاره اللي خلصت وانا مأخدتش منها ولا نفس من شده اندماجي وتأثري بالحاله
سبت الملف من ايدي واخدت اخر شويه شاي من الكبايه ونزلت في طريقي للمش*رحه
نزلت للمش*رحه واللي كالعاده كان قاعد بجوار بابها عم محمود واللي اول ما شافني قام وقال: صباح الخير يا دكتور
-صباح الخير ياعم محمود، لو سمحت طلع ليا الج*ثه اللي وصلت امبارح اللي بأسم "ملك احمد" وحطهالي علي سرير التش*ريح
عم محمود: حاضر يا دكتور
اتحرك عم محمود ناحيه التلاجه ولاحظت انه بيفتح درج رقم 13 قلت في بالي درج رقم 13 والشارع والعماره اللي لقيوا فيها الج*ثه بنفس الرقم 13 وانهارده الثلاثاء ..؟؟! اعوذ بالله هي ناقصه نحس ، لا متيسره باذن الله....!!!!
رحت اساعد عم محمود في رفع الج*ثه ووضعها علي السرير وبالفعل حطينا الجثه وطلبت من عم محمود يجهز كل ادوات التش*ريح ويدخلها جهاز التعقيم
ولكن فكرت في اني اكلم دكتوره "امل" دكتوره التش*ريح زميلتي هي كمان موجوده في المستشفي انهارده فقررت اني اكلمها بحيث تساعدني خصوصاً ان الج*ثه لبنت وهنحتاج نكشف معظم الجسد فدكتوره امل تكون معايا افضل
طلعت تليفوني وبدات ارن علي الدكتوره امل: الو اذيك يا دكتوره معلش محتاجك معايا في قاعة التش*ريح معلش هتعبك معايا ... تمام في انتظارك
دكتوره امل قالت انها دقايق وهتيجي: فقررت اقعد استناها في غرفة عم محمود وبدات اولع سيجاره وانا عمال اعطس والبرد بيزيد معايا
كنت ببص للج*ثه اللي علي السرير وانا حاسس ناحيتها بأحساس غريب، مكنش احساس شفقه زي اللي كنت بشعر بيه لما كنت بشتغل علي ج*ثه خصوصاً لو الا*ذي اللي اتعرضت ليها كان قوي، لا دا كان احساس خوف وكأن مش عايز اشتغل علي الج*ثه دي من الاساس
كنت باصص للجثه وساكت تماما ولكن شوفت دكتوره امل دخلت القاعه ووقتها طفيت السيجاره ورحت ناحيتها
دكتوره امل: ايه يا دكتور خير
-مفيش يا دكتوره بس هشتغل علي تشريح ج*ثه وصلت المستشفي امبارح والج*ثة دي لبنت وهحتاجك معايا
امل: تمام مفيش مشاكل
دخلت امل لبست الجوانتي والبالطوا والكمامه وجات وقفت جنبي بجوار الج*ثه
بدأت امد ايدي ناحيه البنت وكنت بشيل الملايه من عليها واللي كان واضح عليها انها عانت بشده
البنت كانت لابسه بنطلون اسود تماماً وتيشرت اسود وكان في ج*رح عميق في الرقبه ناهيك عن الكد*مات اللي في جسمها، كمان البنت كان علي وشها علامات الخوف والرعب وكأنها تعرضت لصدمه عصبيه حاده قبل مو*تها
امل: اي اللي حصلها دي
-معرفش بس الشرطه لقيتها مقتوله في شقه من الشقق
بدأت امل تق*ص التيشرت اللي البنت لابساه وبدأت تلاحظ وجود كد*مات علي منطقه الصدر وكمان لاحظت وجود وشم باين انه تم عمله حديثاً وكان اسفل الرقبه اعلي الجزء الايسر من الصدر وكان عباره عن دائره مرسوم في منتصفها نجمه خماسيه وبعض الارقام والحروف العشوائية
استغربت الوشم وسألت دكتوره امل عنه واللي قالت انها مستغربه زيي بالظبط خصوصا ان دا مش وشم للزينه لا دا وشم منقوش لغرض معين
بدأت دكتوره امل تكشف باقي الجسد ولاحظنا وجود نفس الوشم علي منطقه الفخذ الايسر كمان في بعض الخد*وش والكد*مات علي اماكن حساسه في البنت ويبدوا ان البنت تعرضت لأعت*داء جن*سي قب
ل مو*تها
ولاحظت ان امل طلعت تليفونها وصورت الوشم اللي علي الفخذ واللي علي الصدر ولما سألتها ليه بتعمل كدا قالتلي انها حاسه انها سمعت عن الوشم دا قبل كدا وحابه تعرف هو بيرمز لأيه بالظبط
وقتها جبت سرنجه وقررت اخد عينة د*م من البنت
وكمان فتحت فتحه في البطن وقررت اخد عينات من الامعاء للفحص
مش هكذب واقول اني كنت شغال طبيعي زي كل مره بشتغل فيها، لا بالعكس المره دي كان قلبي مقبوض وكأن في طاقه مقبضه بتحول حول البنت دي، دا حتي لاحظت نفس الشعور باين علي ملامح دكتوره امل حتي لو مكنتش مبينه دا
سبت كل حاجه وقررت اني اوقف فحص لحد ما نشوف التقرير المبدئي هيقول اي واللي بناءا عليه هنعرف نبدأ منين
طلبت من عم محمود يرجع الج*ثه للتلاجه وخرجت مع دكتوره امل وانا بقولها هحتاجك معايا يا دكتوره في الفحص التاني للج*ثه ودا بعد ما نتائج فحص عينة الد*م والامعاء ما تظهر
ردت وقالت في اي وقت يا دكتور انا موجوده انا قاعده انهارده وبكره نباطشيه في الطوارئ تحت، بعدها سكتت وقالت: بس شكل البنت وهيئة لبسها غريب مش كده
-عندك حق خصوصاً الوشم المتكرر في جسمها واللي اظن انه معمول قريب جداً واللي انا بشكل كبير ارجح انه اتعمل يوم الو*فاه، صحيح انتي متعرفيش الوشم دا معناه ايه.؟!
والله يا دكتور حاسه ان شوفت الوشم دا قبل كده بس مش عارفه فين بس الصراحه هو شكله غريب
شكرت دكتوره امل وهي راحت للطوارئ وانا رحت للكفاتريا وطلبت ان حد يطلعلي قهوه لمكتبي وطلعت للدور التاني تحديداً للمعمل
خبطت علي الباب وجاني صوت دكتور طه من الداخل بيقول ادخل وكان كالعاده بياكل
مش بتبطل اكل انت يا طه والمصيبه معرفش بتودي الاكل فين، يابني الناس بتاكل وتتخن الا انت بتاكل وتطول
ضحك طه وهو بيقول طيب اعمل اي يا دكتور مهو لو مكنتش باكل كان حصلي هبوط في المستشفي اللي تقصف العمر دي
بألف هنا يا دكتووو "هاااااتشي" معلش يا دكتور دور برد
لا يا دكتور ولا يهمك الف سلامه
اديت طه عينه الد*م وعينه الامعاء
طه: ايه دا يا دكتور.؟!
-دي عينه د*م وعينه من الامعاء لج*ثه وصلت ليلة امبارح وعايزك تفحصهم وتبلغني لو في اي حاجه غريبه لاحظتها
ساب طه الاكل وهو بيقول د*م وامعاء وكمان بتعطس حرام عليك يا دكتور انا باكل حد يجيب د*م وامعاء لحد علي الصبح كدا وهو بياكل
-طيب بزمتك يا طه انا عمري دخلت عليك المعمل ولقيتك مش بتاكل.؟!
طه: الصراحه لا
-وطالما هو لا وانت قلبت المعمل مطبخ بيتكم مستني مني اروح بالعينات فين "مطعم وادي النيل" بعدين ياخي طبيب شرعي هيدخل عليك المعمل ويطلب منك تعمله اختبار حمل مثلا ..؟!! اشتغل يا دكتور ربنا يهديك
طه: ماشي يا دكتور انهارده نتيجه الفحوصات هتكون علي مكتبك سيبني بقي اكمل فطاري
-فطار ايه يلا يخربيتك دا انا افتكرت نفسك اتسدت
طه: لا تتسد ايه وحياتك حتي لو جبتلي جوز كلاوي افحصهم هفحصهم وبعدها اكمل اكل
ضحتكت وانا بقوله: بالهنا يا سيدي بس المهم متتاخرش في النتائج سلام
قفلت باب المعمل وخرجت ودخلت مكتبي وبالفعل لقيت القهوه اللي طلبتها من الكفاتريا وصلت ومحطوطه علي المكتب قعدت ولعت سيجاره ومسكت قلم وبدأت اكتب التقرير المبدأي للج*ثه
يوم الثلاثاء الموافق 18/2/2019 الساعه 1:30 فجراً وصل امين شرطه وبرفقته جث*ه الي مستشفي اسكندريه العام
الج*ثه لفتاه تدعي" ملك احمد المنيري" في بداية العقد الثاني من العمر وتحديداً الحاديه والعشرون
وبعد الفحص المبدأي للج"ثه تبين الاتي
▪︎الج*ثه تبدوا في حاله مذريه ويبدوا انها تعرضت للع*نف قبل انهاء حياتها
▪︎هناك جر*ح عميق يبدأ من جانب الرقبه الايسر ويمتد الي جانب الرقبه الايمن جر*ح غا*ئر بعمق 5 سنتي ومن شدة عمقه قد اخترق القصبه الهوائيه للرقبه بثلاثه سنتي ويبدوا ان من استعمل سل*اح الجر*يمه لم يكن متمرس او كان خائفا وهو ينفذ وهذا واضح من اثر النتوء في الج*رح وهذا يدل علي ان للمنفذ كانت يده ترتعش ولا يستطيع السيطره عليها واما سبب تعمق الج*رح فهذا بسبب ان اداة الجر*يمه كانت حا*ده جداً لا بسبب تمرس ودقة من نفذ الامر
▪︎وايضاً هناك بعض الكد*مات اللتي وجدت علي وجه الفتاه وايضاً وجود وشم متكرر علي منطقه الصدر الايسر ومنطقه الفخذ الايسر والوشم عباره عن دائره بها نجمه خماسيه وبعض الارقام والاحرف العشوائيه الغير المفهومه وبعد فحص الوشم المبين اتضح انه تم نقش الوشم في نفس اليوم الذي ما*تت فيه الفتاه...
سكت شويه وسبت الكتابه مكمله ومرضتش انهي الكلام علشان اسجل باقي المعلومات اللي هوصل ليها وقفلت التقرير وحطيته في درج المكتب
ولما خلصت كانت الساعه 1 ظهرا قمت من مكاني اتوضيت وصليت الظهر واخدت بعضي ونزلت، وقررت اني اروح البيت اريح كام ساعه وبعدها ارجع المستشفي مره تانيه خصوصاً اني حاسس بتعب شديد
نزلت من المستشفي وركبت عربيتي واتحركت ناحية شقتي ونص ساعه وكنت ملقي علي السرير مش حاسس بأي شئ حواليا ومتعديش دقايق واروح في النوم
" رجليا بتاخدني لشارع مظلم بتحرك ببطئ وبطلع درجات سلالم بصعوبه، وصلت قدام باب شقه وبكل تلقائيه لقيت نفسي بدفع الباب بأيدي وبفتحه علشان اشوف قدامي مجموعه من الشباب اللي بيرقصوا.!!!
مكنتش ملامح وشهم ظاهره ومقدرتش اميز حد منهم، مفيش غير شخص واحد بس عرفته ووشه كان ظاهر بوضوح.؟!
كانت هي ملك واللي كانت بترقص بعشوائيه علي موسيقي صاخبه، لقيت نفسي بتحرك وبدخل للشقه وببص في كل مكان فيها وانا شايف وجود زجاجات خم*ره مرميه علي الارض وشايف علي الجدران في لوحات متعلقه لرسومات غريبه كلها بالون الاسود وكأنها مرسومه بالفحم
فجأه الهدوء ساد في المكان وبصيت حواليا ملقتش اي حد من اللي كانوا بيرقصوا ولكن فجأه ظهرت ملك بوجه مرعب وبدأت تخنق فيا وهي طابقه علي رقبتي بكل قوه وانا واقع علي الارض وهي فوق مني وبتخنقني وانا بص*رخ
فجأه تليفوني رن وصحيت من النوم وكأن رنة التليفون نجدتني من حلم اشبه بالواقع
قمت وانا ماسك رقبتي بصعوبه وحاسس بألم شديد واتحركت ناحيه تليفوني اللي كان علي الترابيزه في منتصف الغرفه
كان اللي بيتصل هي "اية"
ايوه يا اية خير
-فينك يا علي بقالك يومين مختفي ومعظم الوقت قافل تليفونك انتي نسيت انك خاطب وان كام شهر وهنتجوز وفي حاجات كتير المفروض نجهز ليها
معلش يا اية مشغول في الشغل شويه وحاضر يا ستي اخلص الشغل اللي معايا وهاخدلك اجازه مخصوص اعملي فيها اللي نفسك فيه، مبسوطه.؟!
-ماشي يا علي اديني معاك للأخر لما نشوف مع السلامه
بصراحه عندها حق، مفيش واحده تستحمل ترتبط بواحد معظم وقته مقضيه نباطشيات في المشتشفيات، واحد بيتعامل مع الج*ثث والام*وات اكتر ما بيتعامل مع البني ادمين العايشين، واحد معظم وقته مختفي ومشغول، بصراحه هي صبرت معايا كتير وربنا يقدرني واعوضها
بصيت في الساعه لاحظت ان الساعه 8 مساءا ووقتها قررت البس وانزل المستشفي لأني اتأخرت ويادوب سبت التليفون وخرجت من الاوضه ولكني رجعت تاني علي صوت رنة التليفون
والمره دي كان اللي بيتكلم دكتور طه وبيقول: نتيجة المعمل ظهرت يادكتور تحب ابعتلك النتيجة علي المكتب.؟!
- لا يا طه انا مش في المكتب خلي النتيجه عندك وانا ساعه زمن واكون عندك
قفلت مع طه ولبست هدومي ونزلت وركبت العربيه واخدت طريقي للمستشفي وانا بسأل نفسي سؤالين
السؤال الاول هو اي معني الحلم اللي بشوفه للمره التانيه دا وايه المكان اللي بلاقي نفسي فيه في كل مره وليه ملك بتحاول تأذ*يني في الحلم وكأنها مش عايزاني اساعدها لا دي زي ما يكون عايزاني اوقف شغل ومش عايزه الحقيقه تظهر.؟؟!
السؤال التاني وهو يا تري ايه نتيجه العينات اللي بيكلمني عنها دكتور طه...؟؟
يتبع....…
انتظروا الجزء الثاني قريباً جداً يامرعبين
ولو انت وصلت لحد هنا متنساش تتفاعل علي القصه باللايك والكومنت الجميل كمان اعمل شير للقصه عندك ومنشن لصحابك اللي بيحبوا الرعب وقولهم في عظمه بتحصل هنا
بس كدا وانتظروا الجزء الثاني من القصه قريباً سلام ✌️
"قربان ابليس" الجزء الثاني
قفلت مع طه ولبست هدومي ونزلت ركبت العربيه واخدت طريقي للمستشفي وانا بسأل نفسي سؤالين
السؤال الاول هو اي معني الحلم اللي بشوفه للمره التانيه دا وايه المكان اللي بلاقي نفسي فيه في كل مره وليه ملك بتحاول تأذ*يني في الحلم وكأنها مش عايزاني اساعدها لا دي زي ما يكون عايزاني اوقف شغل ومش عايزه الحقيقه تظهر.؟؟!
السؤال التاني وهو يا تري ايه نتيجه العينات اللي بيكلمني عنها دكتور طه...؟؟
الطريق كان زحمه بشكل لا يوصف وكأن كل سكان محافظات مصر قررت انهم يتقيموا في الاسكندريه، اصوات العربيات كان مستمره بطريقه مؤ*ذيه، صوت الناس وهي بت*شتم بعض وكأن كل واحد شايف ان مفيش حد متقن للسواقه غيره
عدت ساعه كامله علشان اوصل المستشفي واللي كانت هي كمان مزدحمه بشكل كبير
بدأت اتحرك في طريقي للأسانسير وانا بكح وبعطس ودور البرد تاعبني جداً وقتها بدات اطلب الاسانسير ولكن مش بينزل وقتها سمعت صوت احدي الممرضات وهي بتقول، في الصيانه يا دكتور الاسانسير عطلان وبيصلحوه
بصيت للسلم واللي حسيته كأنه جبل ايفريست وانا مجبر اني اتسلقه برغم التعب اللي حاسس بيه
طلعت الدور التاني ووصلت للمعمل خبطت علي الباب ودخلت
-ايه يا طه النتيجه ايه
طه: اقعد بس استريح يا دكتور شكلك تعبان
-قعدت علي الكرسي وطه جاب ملف وقدمه ليا
طه: لاحظنا وجود نسبه عاليه من الك*حول في عينه الدم، البنت كانت في حالة س*كر شبه كامله، اما عينه الامعاء فمكنش فيها اي ماده غريبه او حتي سا*مه
-دا معناه ان اللي عمل كدا في البنت شربها وخلاها تس*كر قبل ما يخلص عليها علشان البنت متقاومش ومهمته تكون اسهل.؟!!
طه: ركز معايا يا دكتور البنت ايوه كانت في حالة س*كر ولكن دي مش اول مره تس*كر فيها
-ازاي.؟!!
طه: لما حللت عينة الدم لاحظت ان في اثار كح*ول ودي مزمنه مش عابره
-قصدك ان البنت كدا كدا كانت بتتع*اطي الكحول علي مدي طويل ومعني كدا ان البنت دي شربت وسك*رت بمزاجها مش غص*ب عنها صح.؟!
طه: الله ينور عليك يا دكتور هو ده، اظن انك قدام قضيه لشويه شباب طايشين ولد جايب بنت معاه للشقه وعايز يقضي ليله حلوه وحصل بينهم مشاكل وخلص عليها
-لا يا طه، انت بتقول اهو عايز يقضي ليلة حلوه يبقي ايه اللي يخليه يقت*لها بالشكل الب*شع دا.؟!!
اي السبب اللي ممكن يدفعه لكده.؟!!
بعدين هو مين دا اصلا، الشرطه ملقتش غير البنت في الشقه ولسه التحريات شغاله
اعتدلت في قعدتي بصعوبه ونصبت ضهري وانا بقول، البنت اتض*ربت يا طه واغت*صبت واتدب*حت بطريقه وحش*يه كمان لقيوها وسط اوراق عليها طلاسم غريبه وحاجات شكلها غريب، الموضوع مش مجرد علاقه غير شرعيه بين ولد وبنت لا في حاجه تانيه ولازم اعرفها
مديت ايدي واخدت نتيجة التحاليل وشكرت طه ورحت مكتبي
دخلت مكتبي وقعدت علي كرسي المكتب وطلعت التقرير اللي كتبت فيه الملاحظات قبل كدا واضفت اليه نتيجة المعمل
فضلت للساعه 11 مساءا في مكتبي لحد ما لقيت باب المكتب بيخبط وقلت بعفويه، ادخل
كان عم محمود داخل عليا وشكله مش طبيعي، كان قلقان وخايف وكأن في حاجه حصلت خلته مرعوب
-خير ياعم محمود مالك حصل حاجه
محمود: عايز اتكلم معاك يابني
-اوي اوي تعالي اتفضل
دخل عم محمود وقعد وهو بيتلفت حواليه والقلق مسيطر عليه بشكل غريب
هاا قولي عايز تكلمني في اي
محمود: الج*ثه اللي تحت فيها حاجه مش طبيعيه
-ج*ثه ايه مش فاهم وحاجه زي اي
محمود:ج*ثه البنت اللي وصلت امبارح يا دكتور
-ايوه مالها
محمود: من ساعة ما وصلت وانا مش متطمن وكمان بتحصل حاجات غريبه
-ايوه يعني حاجات زي اي قولي
سكت عم محمود واخد نفس عميق وقال: انا يابني بقالي سنين طويله شغال في المش*رحه وسط المي*تين والمقت*ولين ياما مر عليا جث*ث ترعب اللي محر*وق واللي مدب*وح واللي متق*طع حتت وكنت بشتغل وبساعد الدكاتره وقلبي حديد وعمري ما خوفت، ولو انا كان قلبي خفيف وبخاف مكنتش عمرت في الشغلانه دي اكتر من عشرين سنه، كمان عمري ما حصلت معايا حاجه غريبه او حتي شوفت حاجه غريبه
-طلعت سيجاره وولعتها وانا بقول: طيب فهمني يا عم محمود وقولي حصل اي علطول
محمود: من الليله الاولي اللي وصلت فيها البنت دي وانا بتحصل معايا حاجات غريبه، زي اني بكون نايم في اوضتي واسمع صوت الباب بيخبط اطلع اشوف مين ملاقيش حد
ساعات اسمع باب التلاجه بيتفتح ولما بخرج بلاقي ان الدرج رقم 28 مفتوح ودا الدرج اللي فيه جث*ه البنت، مين فتحه ولا فتحه ازاي ومفتاحه معايا معرفش
وكمان بسمع صوت كأن في بنت بتب*كي بصوت واطي ولما بطلع وادور في القاعه مش بلاقي اي حاجه
وكله كوم واللي حصل من شويه كوم تاني خالص
-حصل ايه
بلع عم محمود ريقه وحط ايده علي رقبته وكأنه بيتألم من ذكر اللي حصل وقال: كنت قاعد في الاوضه تحت وباب الاوضه مفتوح وفجأه لمحت كأن في بنت معديه قدام باب الاوضه
قمت من مكاني وخرجت اشوف مين دي وازاي تدخل هنا وبمجرد ما خرجت النور قط*ع بدأت اطلع تليفوني واشغل الكشاف وانا بقول "مين.؟؟!" وجسمي كله بيترعش
كنت سامع صوت خطوات حواليا وفجأه النور رجع مره تانيه وشوفتها.؟!!
لما عم محمود وصل للنقطه دي لاحظت بحه في صوته واثر اختناق من الخوف وانا قلتله كمل ياعم محمود وبعدين شوقت ايه.؟؟!!
شوفتها في وشي يا دكتور وكان شكلها مرعب..!!!
-رديت وقلت في توتر: هي مين دي اللي شوفتها
"ملك" يا دكتور ظهرت ليا وفجأه هجمت عليا وطبقت علي رقبتي بأيديها وكانت بتخنفني وكانت خلاص هتطلع روحي ولكن فجأه الباب خبط وكان دكتور شريف وقتها كل شئ اختفي وكأن مكنش في اي حاجه
وقتها دكتور شريف شافني علي الارض بتنفض حاول يقومني ويسألني مالك وانا مش قادر اتكلم ولا عايز اقول حاجه
مشي دكتور شريف وانا بدات اتحسس رقبتي واحس بألم شديد وكأن فعلا كان في حد بيخنقني مش بيتهيألي انا متأكد مش بيتهيألي انا شوفتها زي منا شايفك دلوقتي كدا
-مش هكذب واقول اني مكنتش مصدق عم محمود لا بالعكس كنت مصدقه وحاسس بكل حرف بيقوله وقتها حركت ايدي وحطيتها علي رقبتي وافتكرت الحلم اللي انا كمان بحلمه، ولكن طمنت عم محمود وقلتله دا اكيد ارهاق من الشغل وان اكيد لما شاف حالة البنت تاثر بيها
عم محمود مصدقش كلامي وعرف ان انا بطمنه مش اكتر وقالي: انا مش عيل صغير يا دكتور تطمنه بكلمتين بقولك انا متأكد اني شوفت البنت دي زي منا متأكد اني بكلمك دلوقتي البنت دي وراها حاجه هتأذي اي خد يقرب منها او حتي يحاول يقربلها، عموما يا دكتور انا مش هبات تحت تاني ولو قط*عوا رقبتي انا هبات في قسم الممرضين تحت
قام عم محمود وخرج وسابني غرقان في خوفي وقلقي وبسأل نفسي ايه سر البنت دي وهي عايزه اي..؟!!
نص الليل كان دخل، وقتها كنت ساكت تماماً لحد ما باب المكتب خبط وطلبت مني هدير اني انزل تحت في الطوارئ اساعد الدكاتره
وبالفعل نزلت تحت وفضلت لحد الساعه 7 صباحاً وبعدها طلعت للمكتب غسلت وشي ومسكت تليفوني وطلبت رقم ايمن بدران
صباح الخير يا ايمن بيه
-صباح الفل يا دكتور
حضرتك موجود في المكتب.؟!!
-اه بايت من امبارح
تمام لو ينفع محتاج اجي اقعد معاك شويه
-اوي اوي تنور في اي وقت
تمام مسافة السكه واكون عندك
قفلت مع الرائد ايمن ونزلت ركبت العربيه واخدت طريقي لقسم شرطه المندره
الثامنه صباحاً قسم شرطه المندره الدور الثاني مكتب ايمن بدران
ايمن: ايه يا هاشم طمني وصلت لاي في التحريات بخصوص قضيه ملك المنيري.؟!
هاشم: البنت دي يا ايمن بيه كانت ملمومه علي شله عيال كدا غريبه
ايمن: غريبه ازاي.؟؟!
هاشم: اللي هما العيال اللي بيلبسوا اسود في اسود وبيسمعوا مزيكا مش مفهومه وعاليه وبيرسموا تاتوهات والعيل من دول بيكون طول بعرض شحط ولابس حلق لامؤخذه في ودنه يا ايمن بيه
ايمن: لابس حلق.؟!! عيال توتو يعني فرافير
هاشم: لا يا باشا عيال ليها في شغل التواصل الروحاني والطقوس بتاعته وان الروح بتتواصل مع حاجات مش موجوده العبط دا، هي اتلمت عليهم في الجامعه واتصاحبوا وبقوا بيتقابلو كتير هما 3 اولاد وبنت غير ملك
ايمن: عايزك تجيبلي كل المعلومات اللي تخص العيال دول، اقل من 24 ساعه وعايز اشوف التقرير الخاص بيهم علي مكتبي شد حيلك يا سياده الملازم لو القضيه دي اتحلت صح اضمنلك ترقيه محترمه وهنقولك يا سياده الرائد قريب
ابتسم هاشم وقال: بأذن الله اقل من 24 ساعه وهيكون علي مكتبك تقرير مفصل عنهم
ايمن: كمان استعجلي المعمل الجنائي عايز اعرف كل كبيره وصغيره تم ملاحظتها في الشقه دي
هاشم: امرك يا فندم
باب المكتب يخبط ويدخل عسكري ويقول: في واحد بره بيقول انه دكتور علي الطيب بيطلب يدخل يا فندم
ايمن: دخله يبني
هاشم ادي التحيه العسكريه وخرج وكمان العسكري خرج
دخلت المكتب وانا بقول صباح الخير
ايمن: اتفضل يا دكتور ايه الاخبار
سلمت عليه وانا بشكره وبقعد
ايمن: قولي تشرب ايه.؟!
-قهوه ان امكن
ضرب ايمن الجرس ودخل العسكري: اتنين قهوه يبني بسرعه
بصيت علي المكتب ولاحظت مكتوب "المقدم ايمن بدران" بدل الرائد قلت وانا ببتسم الف مبروك علي الترقيه يا سياده المقدم
ايمن: الله يبارك فيك ما هي دي الترقيه اللي اخدتها بعد قضية يوسف
-انت تستاهل كل خير، قولي بقي اي قصة البنت اللي بعتلي جث*تها دي
ايمن: مفيش يا دكتور انا كنت قاعد هنا في القسم لما وصلني بلاغ ان في ناس في عماره في العجمي اشتكوا من وجود صوت مزيكا عالي جاي من احدي الشقق ولما حاولوا يخبطوا علي اللي فيها محدش كان بيرد فبلغونا
وقتها اخدت قوه وطلعنا علي العنوان ولما دخلت لاحظت وجود البنت مرميه في نص الصاله عايمه في بركه من الد*م وكان المكان متبهدل وزجاجات خمره وورق كوتشينه وفي اوراق مرميه علي الارض فيها رسومات غريبه وكان واضح ان كان في حفله في المكان او حاجه شبه كده
وطبعاً اخدنا البصمات اللي في المكان واللي بعتناها المعمل الجنائي ولسه مستني النتيجه، وبعد كده بعت الج*ثه علي المستشفي زي ما انت عارف
دخل العسكري وقدم القهوه وخرج، طلعت سجايري واديت ايمن سيجاره وانا كمان ول*عت سيجاره وقلت وانا بشرب من القهوه، البنت متبهدله خالص يا ايمن بيه
ايمن: طيب انت اتطلعت علي الج*ثه واشتغلت عليها ولا لسه.؟
-ايوه
ايمن: طيب ايه تشخصيك للحاله
-اعتدلت في قعدتي وانا بقول: مبدائيا كدا البنت تعرضت لج*رح غائر في الرقبه ويبدوا من فحص الج*رح ان اللي قام بعمل الجر*ح شخص غير متمرس لأن ايده كانت بتتهز ودا واضح من دقه زاويه الذ*بح، كمان لاحظت ان البنت تعرضت لأعت*داء جن*سي قبل مو*تها ودا تسبب ليها في صدمه عصبيه قويه، كمان لاحظنا وجود اثر لوشم شكله غريب عباره دائره وفيها نجمه خماسيه وبعض الارقام والحروف الغير مفهومه، كمان انا اخدت عينة د*م وعينه من الامعاء وبعتهم للمعمل كنت محتاج اعرف هل البنت شربت ماده مضره او حتي كانت بتت*عاطي حاجه، والنتيجه وصلتني من كام ساعه
ايمن: طيب قولي طلعت ايه
-لاحظنا وجود اثر كح*ول في عينة الدم وبالنسبه للأمعاء فملاحظناش اي وجود لأي مواد غريبه او حتي سا*مه
ايمن: تقصد ان اللي قت*ل البنت قصد يشربها حاجه علشان تس*كر ويخ*لص عليها بسهوله
لا دا احتمال ضعيف لأن لاحظنا وجود اثر مزمن للك*حول في عينه د*م البنت، البنت كانت بتشرب من يجي سنه يعني البنت شربت بمزاجها مش غص*ب عنها
ايمن: مش عارف ليه حاسس ان البنت دي وراها حاجه مش طبيعيه
انا لاحظت ان في التقرير اللي كان مرافق للج*ثه مكتوب ان البنت لقوا بجوارها ورق عليه رموز وطلاسم غير مفهومه تفتكر دا معناه ايه
ايمن: اظن الموضوع دا ليه ابعاد مش طبيعيه حاجه كدا زي اللي بنشوفعا في الافلام الامريكاني
ضحكت وكملت كلامي وقلت: هي البنت دي ملهاش اهل تقدر تستوجبهم.؟!
-لا ليها طبعا، البنت دي وحيدة ابوها وامها، ابوها راجل محترم بيشتغل محاسب في احدي البنوك، وامها كانت مدرسه، ولكن من عشر سنين تفرغت للبيت واصبحت ربة منزل، اما البنت عندها 21 سنه بتدرس لغات وترجمه في جامعه خاصه هنا في اسكندريه، والبنت سلوكها كويس ودا بشهادة كل اللي يعرفوها
اتكلمت مع اهلها واللي كانوا منهارين لشدة صدم*تهم وقالوا ان بنتهم ملهاش علاقه بحد ولا ايها اي عد*اوه مع اي حد وانها كانت في حالها
كمل ايمن كلامه وقال: الشقه اللي حصلت فيها الجر*يمه مش شقة البنت لا دي شقه من الشقق اللي بتتأجر باليومين يعني ملهاش صاحب محدد دي شقه بالايجار بتتأجرها ليله اتنين وخلاص بدون عقد او ورق
رديت وقلت: تسمحلي ابقي اروح المنطقه اللي فيها الشقه دي واحاول اوصل لأي حاجه
ايمن: مفيش مشاكل ولكن خلي بالك يا دكتور
-ان شاء الله، سلمت علي ايمن واستاذنته وخرجت من المكتب ونزلت ركبت عربيتي وانا مقرر اني هتحرك ناحية المكان اللي لقيوا فيه ج*ثه البنت
وصلت للمنطقه وتحديداً للعماره اللي فيها الشقه
لاحظت ان في راجل بيغسل في عربيه قدام العماره واستنتجت ان دا البواب بتاع العماره
السلام عليكم
-وعليكم السلام مين حضرتك
انا دكتور علي الطيب طبيب شرعي وكنت بجمع معلومات عن قضيه ملك البنت اللي ليقوها مقت*وله في العماره من يومين
ساب الرجل الفوطه اللي كانت في ايده ومسح ايده في ملابسه وبصلي وسكت بعدها قعد علي دكه كانت بجواره وقالي: بس الشرطه جات واخدت كل المعلومات يا بيه
انا عارف بس انا جاي استفسر عن كام حاجه وهمشي علطول وطلعت من جيبي 100 جنيه واديتهاله وهو مد ايده وخدها فوراً وقال: اسأل يابني اسأل ادينا بنتسلي
قولي ياااا..؟!
-خدامك طلعت يا بيه
قولي ياعم طلعت هي ملك دي من سكان المنطقه هنا
طلعت: لا يابيه مش من سكان المنطقه وانا مشوفتهاش غير كام مره بتيجي هنا
-حلو بتيجي مع مين بقي
طلعت: بتيجي مع مجموعه شباب يا بيه بنتين و 3 اولاد بيجوا بالليل بيسهروا وبيمشوا وش الصبح
شكلهم طلبه يا بيه وانا في الاول كنت فاكر انهم بياخدوا درس ولا مجموعه تقويه مهو انا صحيح مبعرفش افك الخط بس اسمع ان العلام صعب قووي ولازمن تاخد فيه دروس
درس ايه ومجموعة تقويه ايه بس ياعم انت..؟!!
طيب ملاحظتش اي حاجه غريبه صدرت منهم.؟!
طلعت: حاجه زي ايه مش فاهم
-اي حاجه، فعل مش كويس كلمه غريبه سمعتها
طلعت: هما كل تصرفاتهم كانت غريبه لبسهم اسود طريقه كلامهم تحسها بالرموز حتي معظم كلامهم بالانجلبزي وحتي الكام ساعه اللي بيجوا فيها السكان بيقوا هيتجننوا من صوت المزيكا العالي اللي بيسمعوه جاي من شقتهم
-انت تعرف حد منهم ياعم طلعت
طلعت: اعرف اسمائهم لكن معرفهمش معرفه شخصيه
طلعت من جيبي ورقه وقلت ممكن تقولي اسمائهم ايه
-البنتين بنت منهم اسمها ملك وبنت اسمها مريم والاولاد ولد اسمه عمر والتاني يوسف والتالت احمد
بعدين يا بيه انا معرفش عنهم اي حاجه لأنهم يادوبك مأجرين الشقه قبل اللي حصل ب 4 ايام وبس بعدين دي شقق مفروشه يعني بتأجر بالليله بالليلتين لزوم المزاج وانت سيد العارفين يا بيه ف مش بندقق علي اوراق ولا اثبات شخصيه علشان عارفين انه كام ليله والمستأجر هيقضي غرضه وهيمشي
فاجأت طلعت وقلتله: انا عايز ادخل الشقه اللي حصلت فيها الجر*يمه
بلع طلعت ريقه بصعوبه وهو بيقول لا يا بيه مينفعش دي متشمعه بالشمع الاحمر انت عايز توديني في داهيه
طلعت من جيبي 100جنيه كمان ولكن استغربت ان طلعت بصلي وقال حيث كده انت هتجيب ورقتين كمان زي الورقه دي
300 جنيه علشان ادخل الشقه لا يا بلاش، طلعت من جيبي الفلوس وادتهاله وانا بقوله هدخل ازاي والشقه متشمعه
طلعت: سلم الخدامين طبعاً يا بيه
خدامين، دي اخرتها.؟!! زي بعضه خدامين خدامين لما نشوف اخرتها ايه
كنت عارف ان اللي بعمله غلط ولكن كان عندي احساس ملح اني لازم ادخل للشقه دي ليه مش عارف
طلعت ورا عم طلعت من سلم جانبي غير السلم الرئيسي للعماره سلم ضيق جداً تتحرك فيه بصعوبه، وبصعوبه وصلنا للشقه واللي كانت في الدور السادس
طلع طلعت من جيبه مفتاح وفتح باب صغير في الشقه وطلعت قالي هستناك بره يا بيه متتأخرش
دخلت لوحدي للشقه والباب دخلني علي المطبخ ومن المطبخ دخلت لباقي الشقه
ايه دا.؟؟! غريبه.؟!! دي هي هي نفس الشقه اللي بشوفها في الحلم هي هي بنفس شكلها وديكورها القديم هي هي بنفس اللوحات اللي علي الجدران، مكنتش فاهم حاجه ولا عارف دا معناه اي ولكن لاحظت ان في رسمه تفصيليه بالجير الابيض لج*ثة البنت مكان ما لقيوها مي*ته وكمان كل حاجه زي ما هي زجاجات الخم*ره والاوراق اللي علي الارض كمان كان فيه شمع لونه اسود مرمي علي الارض
طلعت تليفوني وبدات اخد صور لأماكن عشوائيه في الشقه ولكن لفت انتباهي شئ غريب وهو صوره مرميه علي الارض لنفس الوشم اللي كان علي جسم البنت هو هو بنفس الرموز والحروف الغريبه وفيه نفس النجمه الخماسيه
مسكت تليفوني وبدات اخد لقطات لكل الصور اللي علي الارض وبما فيهم صورة الوشم
بعدها بدات ادخل الاوض وطبعاً مكنتش بمسك اي حاجه بأيدي علشان البصمات ولكن ملاحظتش اي حاجه في الغرف
طلعت من الشقه وكان طلعت مستنيني بره ونزلنا لحد تحت وطلعت فضل يحلفني اني مقولش لحد انه دخلني الشقه لحسن هو كده هيروح في داه*يه
قطع كلامي معاه صوت رنه تليفوني والرقم كان رقم دكتوره امل
-ايوه يا دكتوره خير
انت فين يا دكتور
-انا في مشوار بره المستشفي
طيب تعالي بسرعه في حاجه لازم تشوفها بنفسك
-طيب حاجه ايه
مش هينفع في التليفون ولكن انا عرفت الوشم اللي علي ج*ثه البنت يرمز لأيه ولازم تشوف بنفسك.…
يتبع.…
انتظروا الجزء الثالث قريباً يامرعبين
ولو انت وصلت لحد هنا متنساش تتفاعل علي القصه
بس كدا وانتظروا الجزء الثالث من القصه قريباً ومتنساش تعمل فولو
