فضفضه لصاحبة نصيبها ✍🏻😉
متقبليش تتعاملي معاملة سيئة من "شخص" لمجرد إن روحك فيه أو بتحبيه
متتوقعيش إن اللي بيسيء ليكي وانتو لسه على البر هيتغير بعد الجواز للأحسن لأن ببساطة هو كده "مداري على عيوبه" وفي مرحلة التجمُّل وما خفي كان أعظم
متطارديش شخص معجبة بيه لإن مطاردتك ليه هاتخليه يملّ منك ويهرب من اتصالاتك ..
متقبليش تتشتمي أو تتعاملي معاملة طفلة صغيرة وتبقي مش عارفة تتكلمي وتعبري عن مشاعرك ومضطرة تبرري كل تصرف وكل غلطة ..
مافيش شخص هيحب إنك تحاوطيه طول الوقت واحترمي مساحته الشخصية وسيبيه ياخد وقته .. لو بيحبك هايرجعلك مش هيمشي .. ولو مرجعش اتأكدي إنها كانت مجرد مشاعر مؤقتة ..
متنهاليش بمشاعرك دُفعة واحدة وتحرقي كل الحجات الحلوة اللي جواكي .. أجمل حاجة في الحب بدايته عشان لعبة الاستكشاف والغموض بتزود المشاعر.. ولسه الأيام طويلة وحدة وحدة ..
البنت الضعيفة مش جميلة .. والدموع الكتير مبتجذبش المشاعر .. خليكي قوية وواثقة ف نفسك واللي يبيعك متجريش وراه تتحايلي عليه .. ساعات بنبقى هنتجنن ونعرف "ليه عملوا كده" ولو حاولتي تعرفي ومعرفتيش .. اقفلي جواكي وفي يوم هتعرفي مهما طال الزمن
متسمحيش حد يستهلكك ويستهلك طيبتك ونقائك .. الشخص اللي بيسحب رصيد كبير من عفوك و غفرانك فـ ده بيدل إنه بيغلط في حقك كتير ..
نسيان شخص بعد عنك محتاج اتّزان و قوة طالعة من جواكي إنك هتقدري تتجاوزي فـ شيلي من قاموسك كلمة "مش هقدر أبعد عنه" و "حياتي هتنهار من غيره" ..
افتكري كويس إن اللى بتآمني بيه هو اللي هايحصل ..
فخليكي مآمنة انك قوية هتتجاوزي، مفيش زرار ندوس عليه وننسى متفقة معاكي، بس افتكري انك كنتى في يوم عايشة من غيره، محدش بيموت من الفراق .. بس هي المشكلة في حرب الذكريات والتفاصيل اللى عشناهم .. يا تهزمك ياتهزميهم .. اهزميهم بإنك تشتتي أي فرصة وأي طريقة وأي لحظة هتقربك من التفكير فيه .. لحد ما تتعودي على حياتك الجديدة من غير وجوده ..
خليكى من النّاس اللي مبترمِيش كل طاقتها وبتعتمِد في سعادتها على حاجة واحدة، وزَّعي شغفك وحُبك على حجات كتير، خلي لِك هوايات و اُقعي في غرام حجات صغيّرة تصنع لك يومك، متفضليش نايمة في سريرك بتستدعي الحُزن والدموع يزوروكي كل ليلة، اسمعي موسيقى ، اقرأي، لوًني ، ارسِمي، ثقّفي نفسك، لو حطيتي سعادتك على مصدر واحد وخذلِك ..الدنيا هتسود في عينك ..
محدش هيتعدّى حدوده ويقلل منّك من فراغ، اتأكدي إنك انتى اللى بتتسببي في ده، أول مرة جرب يكسر أول حاجز للتجاوز فتحتيله الباب الأول .. مفاتيح شخصيّتك ف إيدك .. خليكي فاكرة ده ..
عمرك ما هتلاقي سعادتك مع شخص بيعاملك إنك درجة تانية، جلالة الحُب اللي وخداكي دي هتنطفي مع تكرار قسوته وإهماله ليكي لو عشتو في بيت واحد، وواقع الحياة هيطغى على المشاعر، ومش هتلاقي مبرر يخليكى تكملي معاه لان حتى "عشان بحبه" مش هتلاقيها موجودة ..
الحب إنك تختاري حد يخليكى تحبي نفسك وراضية عن نفسك، شخص يآمن بيكي زي ما انتي مآمنة بيه، شخص متصالح مع نفسه إنك لو سعيدة ومرتاحة فـ هو أسعد حد في الدنيا .. مش بالصوت العالي مش بإهانته ليكي
اختاري الشخص اللي يحترم حياتك و عاداتك و الوانك المفضلة وصحابك ومساحتك الخاصة .. طبيعي الحياة فيها بعض التخلي والتنازلات عشان اللي بنحبهم، لكن متسمحيش إنك تتحولي لشخص ميشبهكيش عشان ترضي شخص أساسًا مش شايفك ..
كرامتك قرار، وحفاظك على شخصيتك ده إجبار عليكي عشان تتحبي بجد ويتبصلك إنك شيء غالي ..
انتى اللي هتقللي من قيمة نفسك لما تتنازلي و تخلي مشاعرك مداس ..
اقعي في حُب الحنين اللي يبقى لك سند وظهر وأمان .. مش هنقضي حياتنا دموع ووجع وحيرة ووحدة
حبي نفسك واتأكدي أن ربنا خلقك جميلة وعزيزة غليها عشان تغلي في عين غيرك 👌🏻
#يوميات_فاطيما
