اهم المعارك الملحمية فى السينما

قطعا..هى لحظة الحسم!

هو الزمان و المكان اللى بيتحدد فيها المواجهة الاخيرة و الحاسمة ما بين الخير و الشر ..و هى دى اللحظة اللى بيستناها كل المتفرجين..ممكن تكون المواجهة بين شخصيتين ..او مجموعتين ..او حتى جيشين ..!

و انا النهاردة حختار أخرهم .. كم من المواجهات اللى اتفاعلنا معاها و احنا بنتفرج على الفيلم ..نكون متحمسين جدا للى حيفوز بالمعركة ..و لو اننا عارفين مين المنتصر ..لكن حينتصر ازاى و فين و امتى؟ ..خصوصا لما نعيش مع البطل الظلم و الهزيمة اللى هى بتبقي تلات اربع وقت الفيلم ..عشان تيجى لحظة الحسم اخر ربع ساعة ..!

يمكن فى التاريخ مفيش اكثر من اللى شافوه من حوالى 50 سنة  ..اباءنا و اجدادنا عاشوا ست سنين من هزيمة و مرار ..ست سنين كانت عمر فيلم ملحمى كبير عاشوه و شافوه لحد ما شافوا الفرج و الانتصار بعنيهم فى 6 اكتوبر..

انا هنا بالتأكيد مابقارنش التاريخ المجيد بالاسطورة عشان محدش يفهمنى غلط ..و اكيد فيه فرق كبير جدا ما بينهم ..عشان كده القايمة النهاردة ححاول تكون خالية جدا من التاريخ الحربي سواء مصرى او اجنبي .. و حختار اهم المعارك الملحمية الاسطورية ..او حتى من خيال المؤلف ..شوفناها و عشناها و احنا بنتفرج على الفيلم ..و تفاعلنا مع احداثها ..

القايمة كالتالى ..

• 1- معركة ميناس تيريس فى فيلم " the lord of the rings : the return of the king " ..هى اخر معارك السلسلة ..اللى حماة الخاتم فيها بيدافعوا عن مملكة الملوك ضد جيش مودور الساعى للعودة الى السيطرة على العالم من خلال البحث عن اقوى الخواتم ..معركة ملحمية كبيرة متتنسيش .. فيها يرجع الملك اراجون لعرش ابوه مع قتال ملحمى من جاندلف الساحر  و ليجولاس و القزم جيملى ..مع جيش الملك تيودين القادم لنجدة المملكة ....الفيلم اكتسح كل جوائز الاوسكار كلها و مسابش الا جوايز التمثيل بس .. معركة اسطورية و ابهار بصرى فى وقت ما كانش لسه ال3d  فى بال اى حد..من فرسان لناس ركبة افيال ..بيفكرك حبتين بالفرس ..  و جيش من الاشباح ..مشهد قتل  آيوين لصائد الارواح بمساعدة القزم ميرى من المشاهد المهمة .. الدفاع عن المدينة من ناحية .. و الابقاء على حظوظ فرودو فى القاء الخاتم فى فوهة البركان من ناحية تانية ..فيلم اسطورى بامتياز .. من علامات السينما حتى الان 

•  2- معركة ثانوس و الافنجرز الاخيرة فى فيلم " the Avengers : Endgame " ..معركة الدفاع عن كوكب الارض و حماية ال infinity stones  من قبضة ثانوس عشان ميحققش المخطط بتاعه ..و هو نسف نصف الكون ..مننساش طبعا اخر معارك الافنجرز .. ..ناهيك عن عودة الافنجرز من الموت واحد و را واحد ..بلاك بانتر اول و بعدين فالكون ..فدكتور سترنج ..الى ان وصلنا لسبايدر مان ..الكل بيرجع لخوض معركة الارض  مع انضمام كابتن مارفل.. و يجى فى النهاية  مشهد Iron man  الملحمى.. لسه الناس بتشوف المشهد ده و بتتأثر ..مشاهد اسطورية حتفضل فى الذاكرة لسنين طويلة..

• 3-  معركة الدفاع عن مدرسة هجوارتس فى فيلم " Harry Potter & the deathly hallows2 " ..هى اخر مواجهات هارى بوتر و فولدمورت ..مع محاولة هجوم اتباع " اللى ميتسماش" على المدرسة .و دفاع الطلبة و الاساتذة و جماعة العنقاء عنها .. اللى شاف الاجزاء السابقة لهارى بوتر كان بيقوم و ينام و يحلم بالمواجهة دى يمكن بقالو بتاع عشر سنين كده ..فتبقى معركة متتنسيش مع شخصيات عشنا معاها طفولتنا ..لحد ما كبرنا ..و هما كمان  كبروا..مننساش طبعا الالتواء الاعظم فى تاريخ الروايات من وجهة نظرى ..البروفيسور سنايب

• 4- اخر معارك باتمان فى فيلم " the Dark knight rises " ..الفيلم ده بحالو كله كده تعيش فيه  القهر اللى حس بيه بروس وين و هو محبوس فى السجن اياه اللى حطوه فيه " باين " اللى بيتضح فى النهاية انه غطاء لبنت راس الغول اول شرير يقابله باتمان فى فيلم THE BATMAN :THE BEGINING ..بيخوض بروس واين  فى زى رجل الوطواط مع الناس و المفتش جوردن و الشاب اللى حيبقي روبين فيما بعد مع قوات  الشرطة معركة الدفاع عن جوثام سيتى من البلطجة و الغوغائية و قانون الغاب اللى فرضه باين على المدينة .. بأسم الحرية .. هنا احنا بنبعد عن جو الاساطير اياه و نقرب من الواقع حبتين .....و لو ان موضوع القنبلة الهيدروجينية دى واسع شوية ..لكن المعركة بذات نفسها ناس فى العالم حتى شافتها على الحقيقة .. المواجهة و الاحداث نفسها كانت فوق الممتازة ..

• 5- نرجع تانى للخرافات و الاساطير و معركة سكان كوكب بندورا ضد قوات الاحتلال " الارضىين " ..! فى فيلم AVATAR الموقف بيتغير ..و نبقى احنا الاشرار  اللى عايزين يستولوا على اغلى معادن الكوكب لما بها من طاقة تفوق البترول و الغاز .. احنا متسلحين باقوى الاسلحة و المعدات ..اما سكان كوكب بندورا فمالهمش الا السهومة و الطبيعة بما فيها من مخلوقات  ..الجندى جيك لما بيعيش عيشة سكان الكوكب بيلمس حاجات كتير افتقدها و هو انسان ..منها الحب طبعا .. فينحاز فى النهاية .. للفضائيين ! و بيستخدم خبرته العسكرية فى المواجهة ..احنا كنا على موعد مع اول افلام ال3D  فى السينما ..يمكن ناس كتير معجبهاش الفيلم ..لكنه كان مميز جدا من وجهة نظرى ...جيمس كاميرون كان فى افضل احواله

• 6- نعمل فلاش باك شوية ..و حنرجع تانى معلش لعالم ال Avengers   بس فى اول افلامهم ..و اول مواجهاتهم مع لووكى الاخ غير الشقيق لثور و معاه جيش من الشيتاورى لاحتلال الارض ..معركة شوفنا فيها نيويورك بتتدعك فيها حرفيا ..الافنجرز بيخوضوا معركة كبيرة جدا لا تخلو ابدا من الفكاهة و الدم الخفيف كعادة افلام مارفل مؤخرا ..مننساش مشهد هالك الشهير و بيمرمط بلووكى الارض ..الفيلم ده كان بداية لمواجهة ثانوس المنتظرة فى اخر جزئين ..

• 7-  لو دخلنا حبتين تلاتة كده للواقع ..و لكن مش قوى كده يعنى .. و نبتدى نفكر ..فى السياسة !.. معركة الثوار بقيادة كاتنيس افردين  الاخيرة لدخول الكابيتول و قتل سنو الديكتاتور الاعظم فى فيلم2  the Hunger Games mockijay ..هنا السياسة بتشوفها فى القصة .. استخدام الشعوب كذريعة لتنفيذ مخططات القادة السياسيين من هنا و من هنا ..الديكتاتور سنو بيستخدمهم كدروع بشرية ضد الثوار .. و الرئيسة الما كوين ..حتقوم بتنفيذ خطة تخلى اهل الكابيتول ينحازوا لها فى النهاية و بتحسم المعركة..لكن بنكتشف ان سنو و الما واجهين لعملة واحدة ..القتال الاخير مكنش قتال كبير و لا حاجة ..كانت السياسة هى الحاكمة فى النهاية زى ما قلت ..لكن منقدرش ننسي ان افلام السلسلة دى  و احداثه كان داخل فى منعطف اخير لمواجهة الظلم و الطغيان ..اما الاحداث الاخيرة ..كانت المفاجأة الكبير ة بالنسبة لنا .. و كان بالنسبة للمؤلف افضل الحلول لعدم تكرار تجربة العاب الجوع ..

• 8-  برضه بس يعنى نرجع فى احداث سلسلة the lord of the rings  و لكن تحت مسمى the hobbit و اخر افلام السلسلة ..the battle of the five armies .. الكل هنا بيروح للجبل موطن الاقزام بعد ما بيقتلوا سموغ التنين للاحتماء و معاهم جيش الجان للحصول على الجوهرة الثمينة اللى بيرفض ثورين ملك الاقزام تسليمها و كانوا على وشك من مواجهة محتدمة لولا وصول ازوغ المسخ للانتقام من ثورين ..فتتحول المواجهة كليا لمواجهة الرعيل الاول لجيش موردور ..و على الجانب الاخر يدخل ثورين فى صراع مع نفسه ..هل حيشترك فى المواجهة دى ..و لا حيقول يا لا نفسى و يقفل على نفسه ..انا شايف ان المعركة كانت يمكن اكبر من نظيرتها فى اخر اجزاء the lord of the rings  لكن يمكن عشان شوفته الاول ..فانا تحمست له خصوصا مع احداثه ... لكن مننكرش انها كانت معركة كبيرة و اسطورية ..

• 9- نبعد عن الجد شوية ..و نخش لعالم الخرافات الكبير ..و معركة القراصنة بقيادة جاك سبارو ضد شركة شرق الهند التجارية اللى بتسعى للسيطرة على المحيطات بالكامل بمساعدة ديفى جونز المسخ الملعون من كاليبسو الهة البحر من خلال اقتناء القلب بتاعه..! ..المواجهة نفسها كانت كبيرة جدا .. معركة بحرية من اجمل ما يكون ..طبعا لم تخلو من الدراما اللى شدتنا كلنا و المفاجأة الكبيرة بموت ويل تيرنر احد اهم ابطال السلسلة ..فيلم pirates of the Caribbean : at the world’s end  كان علامة فى وقته ..مننساش ان الجزء الاول من السلسلة حقق اعلى ايردادت فى تاريخ الافلام و فضل فى التوب تن لثلاث شهور الصيف ..

•  10- و نيجى لاخر القايمة ..و نروح ل.....يعنى لو عايز تسميها شمس الزناتى ماشى ..لو عايز تسميها seven samurai معنديش مشكلة لانه يقال انه الاصل ..لكن حيفضل the magnificent seven (1960)  هو اشهر الافلام الكلاسيكية فى العالم ..يول براينر ..ستيف مكوين ..جيمس كوبرن .. تشارلز برونسن ..مش محتاج انى اقول قصته طبعا .. بتقرر المجموعة العودة للقرية المكسيكية بعد ما اتغلبوا غدر  لنجدتها من كالبيرا الشرير و عصابته ..مواجهة محتدمة فيها مكر و دهاء من العظماء السبعة ..و قتال اسطورية بينتهى بوفاة خمسة افراد منهم ..و مصرع الشرير فى النهاية ..التيمة زى ما احنا عارفين كلاسيكية جدا و اتعملت و لسه بتتعمل فى اغلب افلام الاكشن لغاية دلوقتى ..
•  
• اللى فات ده كله كان بالنسبة لى اهم المعارك و المواجهات فى السينما من وجهة نظرى طبعا .. ا..طبعا ..انا اخترت عشر مواجهات ..و لكو كان بأيدى كنت ضفت كمان معركة فيلم الجزيرة الجزء التانى ..حقيقى كان متصور حلو ..و ابداع مصرى خالص يحسب لمخرجنا الكبير شريف عرفة ..
•  
• دى كانت قائمتى من وجهة نظرى ..اللى عايز يعلق مفيش مشكلة يتفضل لو عايز يضيف اى حاجة ..
•  
• و آسف على الاطالة