سيدة القصر ج/ 2
مش معقول.... أنا شايفه كويس ..... ده ابويا
معقول ابويا جاي يبوظلي شغلي ويسرق الشنطه عشان مدام ثريه تقول عليا مش أمين و ترفدني
بس الحمد لله مشافنيش .. انا ارجع لمدام ثريه واعطيها الفلوس.... ومشيت بسرعة حتي الساعة بتاعتي سبتها.
ورجعت لمدام ثريه واعطيتها الفلوس واعطتني ال 100 جنيه.. ومسألتنيس عن أي حاجه.. ورحت مشيت.
دماغي مش بتبطل تفكير.. قررت اني بكره لازم افتح الشنطه واعرف فيها ايه عشان ابويا اخدها
وبالفعل اليوم اللي بعده جه ورحت القصر عشان اقابل الست واخد منها الشنط وأقوم بالمهمة زي كل يوم
بس اتفاجأت لما قالت:
بص يا محمد... د/ عبد المهيمن اتصل وقال إني اعطيك اجازه اسبوع عشان امتحاناتك
رديت عليها: بس انا مش محتاج اجازه.. انا عايز اشتغل وبعرف اذاكر برضو وانا بشتغل
بصتلي باستغراب وقالت لأ انت خد اجازه ولما تخلص امتحاناتك تعالى واعطتني برضو يومية النهارده ال 100, جنيه.....
طبعاً مرضتش اكتر الكلام معاها عشان متشكش فيا.
اخدت ال 100 وانا مقرر اني لازم اروح المقابر ف الميعاد وأشوف مين اللي هيكون مكاني وأشوف ابويا هياخدها ولا لأ...
بالفعل رحت المقابر كان نص الليل... الجو مرعب وضلمه جداً.. بس انا لازم استنا. .. استخبيت ورا مقبره عشان لو حد جه ميشوفنيش.. انا خايف جدا... من الخوف غمضت عنيا .. كنت سامع اصوات غريبه.. انا سامع صوت فحيح افاعي.. وصراخ .. صراخ عالي جدا.. سامع برضو صوت رجلين جايا عليا وبتقرب... أنا مش قادر افتح عنيا..
كنت هموت من الرعب ..
استجمعت كل الطاقه اللي فيا وفي اللحظة اللي فتحت فيها اخدتها جري جري لحد البيت .. دخلت الاوضه ونمت ع السرير بسرعة واتغطيت.. وطبعاً الكوابيس مسبتنيش..
شوفت حادثه عربيه كان شكلها فظيع أوي.. وشوفت حد واقف بعيد .. مش قادر اشوف ملامحه.. بس سامع صوته.. بيقول ( خلي بالك من منال )
صحيت من النوم وانا بقول مين منال دي ؟
سمعت صوت خناقه بره الاوضه .. الصوت جاي من اوضة أمي.. قربت ليها .. لقيتها بتتخانق مع ابويا..
قولت انا مالي .. ولسه همشي سمعت ابويا بيقول لأمي : من ساعة ما جبناه واللعنه صابتنا .. ده وشه فقر .. انا عايز واحد من صلبي...
سمعت خطواته جايا عليا .. بسرعه جريت على اوضتي وعملت نفسي نايم... بس امي جات فتحت عليا الاوضه وحطت أيدها على راسي وقالت .. انت لعنه لعنه.. وطلعت.
ايه العيله دي.. انا ازاي عايش مع الناس دي .. المهم عدت فترت الامتحانات ع خير وانا مستني ارجع الشغل تاني عشان اعرف ايه علاقة ابويا بالست اللي انا شغال معاها.. وبالفعل رحت للست ولما شافتني قالت........
انتظروا الجزء الثالث
