الظل: غموض و إثارة - الحلقة السادسة
- دور كويس يا سيد أنا متأكد إنها في الأرشيف .. أنا بنفسي مسلمها هنا و احنا بنقفل القضية.
= يا وليد باشا ملف القضية بالكامل مع الأحراز موجود قدام سعادتك .. حضرتك ممكن تدور بنفسك .
- يعني إيه ؟ فص ملح و داب !! ده انتوا تروحوا في ستين داهية لو البطاقة دي مظهرتش .. انتا الوحيد هنا اللي مافيش شعرة بتعدي من تحت إيده إلا لما بيكون عارف أولها فين و أخرها فين .. هتنطق و لا لأ.
- يا وليد باشا اهدا شوية هنلاقيها أكيد …. حضرتك عارف إننا نقلنا الأرشيف من مكانه لمكان أوسع شوية و المكتب القديم أهو في آخر الطرقة و لسة في شوية ملفات وأحراز ماتنقلتش أعتقد و إحنا بننقل ممكن تكون وقعت هنا ولا هنا متقلقش إن شاء الله هنلاقيها.
___________________________________________
فلاش باك
( - .. لقينا حاجة غريبة يا فندم ..
= خير يا باشا لقيتوا إيه؟! ....
- حضرتك إحنا تممنا علي كل أفراد الجروب و كمان شوفنا بطايقهم .. بس في حاجة صغيرة حضرتك .... إتفضل شوف كدة!....
= إيه ده؟....
- دي بطاقة لقيناها واقعة و إحنا بنفتش حوالين الكامب ..
= تمام وإيه الغريب في كده يعني؟ وريني!……
ممممممممممممم البيانات و الصورة و الرقم .. كشفت عليها؟؟....
- اه كشفنا عليها يا باشا و لقينا إن البطاقة دي لسة مستخرجة من يوم واحد في معاد التجديد الدورى بتاعها .. مكان الإستخراج محافظة الأسكندرية و صورة البنت اللي عليها بتطابق الصورة اللي في البطاقة المنتهية حسب ما السجل بلغنا .. المهم بقي ياباشا إن الجروب ده لسه واصل النهاردة .. يعني صاحبة البطاقة دي لسة واصله الفيوم النهاردة .. في إحتمال إن حد يكون نساها من جروب كان هنا .... بس مافيش حد دخل أو طلع من الكامب يا باشا إلا الجروب ده .. لكن الصورة دي ماتخصش حد هنا ....".
- وليد باشا ... وليد باشا سامعني ... هي دي البطاقة مش كدة؟؟؟
___________________________________________
- البطاقة مزورة يا باشا.
= يعني إيه مزورة ؟.. تاني !! طيب وقتها و قولنا ماشي .. في شيء غامض بيعوق سير التحقيقات، و بيودينا لسراب و طريق مسدود .. و إن في حد له صلة بالموضوع بأي شكل و الحد ده كمان نقدر نقول إنه واصل جدا عشان يقدر يقفل الدنيا قصادنا بالشكل ده .. كل الظروف كانت صعبة وقتها .. انضغط علينا عشان نقفل القضية دي .. و الأصعب إننا قفلناها فعلا ً .. ما كنش في دليل واضح عن حد بعينه ممكن يكون له صلة بالجريمة دي .. حتي مي صاحبتها الأنتيم ما عرفتش أمسك عليها أي دليل إدانة بعد ما شكيت فيها بسبب تناقض كلامها مع كلام الدكتور زي ما هتشوف في ورق التحقيقات.
- اهدا يا باشا واحدة واحدة أنا لسة عندي تاني .. السجل اللي البطاقة طلعت منه لما إتحرينا عن الفترة دي و الموظفين و المعاونين اللي كانوا موجودين وقتها لقينا إن في بعضهم إتنقلوا الصعيد بعد الحادثة بيومين تقريبا ً و لما سألنا عن السبب لقينا إن في حركة تنقلات بتتم كل سنة في الوقت ده .. حوار روتيني يعني بس أنا اعتقد إن في صلة بين ده وبين القضية ...
= تمام .. وصلت لحاجة؟
- وليد باشا إنت قولتلي قبل كدة نور دي كانت شغالة إيه ؟
= موظفة إستقبال في مستشفي خاصة ... ليه؟
- ومي؟
= مي كل شغلها أون لاين .. دعاية و تسويق وكلام من ده تبع شركة إعلانات .. بس ليه يعني؟
- لأ ليه دي يا باشا محتاجة اتنين قهوة مظبوط بن تقيل عشان اللي شاكك فيه أقدر أشرحه و سيادتك تستوعبه.
