مذكرات آدم المصري: بلا هوية - حلقة ٧

= يااااه! دي تاني مرة ألاقيك حاسبها باليوم و الساعة و الثانية .. ده ممكن أسميه إيه؟
- مش مهم تسميه إيه؟ المهم تقدر تعالجني منها؟
= أوعدك إني هعمل المستحيل آدم .. بس ساعدني
- و أنا واثق إنك هتقدر
= مالك النهاردة؟
- مفيش؟
= إزاي؟! لازم تحكي؟ طبعاً براحتك .. و أتأكد إنك هنا بإرادتك و مش مجبر إنك تحكي أي حاجة من أي نوع إلا اللي انتا عايز تحكيه .... بس برضه لازم تحكي عشان راحتك انتا
- مش عارف أبدأ منين؟
= شوف آدم .. إبدأ من أي نقطة و أي زمن يعجبك .. و تأكد إن الخيوط بتتلاقي و هتترتب في الآخر ....
- ماشي يا دكتور
= لأ مش ماشي و خلاص .. أنا قولتهالك و بقولهالك تاني .. احكي أي حاجة و بقدر الإمكان أنا هحاول أجمع معاك من غير ما أضغط عليك .. اتفقنا؟
- اتفقنا
= و أنا سامعك .. اتفضل
- كل حاجة فيا اتغيرت للعكس تماماً من يوم ما عرفتها ..
= للأحسن و لا للأسوأ؟!
- أوقات و أوقات .. بس في الغالب الأسوأ عندي بقي كتير .... كرهت الحب بسببها
= كرهته؟ انتا مكنتش عايزه؟
- أوقات فرضه عليك مكروه
= أفهم من كدة انك مبتحبهاش؟! بعد كل اللي قلته عنها ده!! مستحيل!!
- تصدقني لو قلتلك ان فعلاً ده مش حب؟!
= أكيد هصدقك .... بس اسمحلي .. أنا محتاج أفهمك أكتر؟
- أنا حاولت بكل الطرق اللي متسببلهاش أي جرح إنها تبعد عني
= و ده جاب نتيجة؟
- النتيجة إني زهقت .. و الزهق ولد غضب و الغضب وصلني للي أنا فيه دلوقتي
= طيب واحدة واحدة .. إنتا إحساسك اتغير ٣٦٠ درجة من المرة اللي فاتت للمرة دي!! اسمحلي يعني .. مش شايف إن ده غريب شوية؟!!
- هو ايه حصل المرة اللي فاتت خلاك تقول ده؟
= ايه آدم؟! مالك؟!!
- مش عارف! حقيقي مش عارف!!
= أمال مين اللي يعرف؟
- هي تعرف
= هي مين؟
- في حوار كدة .. نوع من النصوص كان معروف في مناطق كتير في العالم القديم .. النص ده قدمته بنت كانت بتمثل دور إيزيس في معبدها .. أفتكر هتلاقي إجابة السؤال ده فيه ..
= بيقول إيه النص ده؟
- وقفت البنت و قالت:
أنا الأول وأنا الآخر
أنا المبجلة وأنا المحتقرة
أنا المومس وأنا القديسة
أنا العاذبة وأنا العذراء
أنا الأم وأنا البنت
أنا العاقر وكثرُ هم أبنائي
أنا كثيرة الأعراس ولم أتخذ زوجاً
أنا الداية وأنا التي لا تلد
= أنا كدة اللي هتعب منك آدم .. انتا بتتكلم عن مين بالظبط .... كإنك بتتكلم عن واحدة غير اللي بتتكلم عليها من الأول
- بالظبط كدة
= أفهم من كدة إن هي مش واحدة؟!! و لا دلوقتي بنتكلم عن شخصية جديدة دخلت الأحداث؟!
- حاجة زي كدة
= مممممممممممم طيب كمل
- الأولي حبيتها غصب عني
= و التانية؟
- غصب عني برضه
= إزاي يعني؟ حبيت اتنين؟!!
- لأ واحدة بس
= ممكن توضح؟!
- معنديش توضيح أكثر من كدة
= إيه؟ .... يعني الأولي مثلاً بتقول إنك حبيتها غصب عنك و أكيد من كلامك إن هي دي بس اللي حبيتها ....
و التانية إيه؟! مضطر مثلاً؟! مفروض عليك تحبها؟! ....
هل أنا كدة فاهم صح؟ .... سكوتك  ده معناه إن كلامي تقريباً صح ..
- و إيه الفايدة؟
= لأ طبعاً في فايدة .. لو اتنين صحيح يبقي من خلال كلامك إن مشكلتك جزء كبير منها بسبب الأولي اللي حكيت عنها .. أما التانية دي انساها خالص .. و لا كإنها عدت عليك و لا قابلتها في حياتك .. انتا بشر .... و القدر هو بس اللي يجبرك علي حاجة خارجة عن إرادتك و ده فعلاً حصل أهو مع الشخصية الأولي .. أما إن شخص يجبرك علي حاجة انتا مش عايزها لأ .. انتا مش هتستحمل ضغط تاني و لا ايه أي لزمة دلوقتي .. و لا أي وقت تاني .... هل أنا كدة وصلت للي جواك و اللي حاصل معاك فعلاً؟ و لا لأ ....
- تقريباً 
= جميل .... يبقي تنسي التانية دي مهما كانت مين حتي لو ملاك و حتي لو كنت انتا مُغَيَّب .. انساها ....
- أنا فعلاً بنسي عشان مش عايز أبقي مجبر علي حاجة أنا مش عايزها .... كفاية عليا بجد اللي أنا فيه .. و حتي لو كان إختياري غلط .. و حتي لو كانت عيني مش شايفة إلا حد معين .... فمفيش رجوع .. و لا مفر .... مفيش هروب من المكتوب يا دكتور ....
أبداً

تابع