الظل: غموض و إثارة - الحلقة السادسة عشر
خالد إشتغل فترة في أمن الدولة بالإضافة إنه عميل لجهاز مخابرات مش سهل .. كل ده ساهم بشكل كبير في تكوين وتشكيل و تطور عقليته الإجرامية و بالتالي إنهاء عملياته بطرق إحترافية .. و كانت الرسالة اللي إتبعتت لمي و اللي بتقول إن نور عايشة هي نقطة تحول كبير في القضية .... و لحُسن الحظ فقط .. إن الباقي عند مي من ضمير صاحي خلاها تفكر إنها تبلغ و تواجهه مصيرها بعد كدة.
و طبقا ً للمعلومات اللي وصلتنا إن خالد هناك في قبرص .. و إن مي عرفت ده من الرسايل اللي جاتلها بعد كدة قررنا نبعت مي هناك كطعم نقدر نصطاد بيه خالد وخاصة ً بعد ما أبدت إستعداد تام للتعاون معانا و إنها مستعدة تعمل أي حاجة في سبيل إن نور ترجع .... دي كمان قدمت لينا المبلغ اللي أخدته بالكامل مقابل سكوتها عشان تثبت إنها فعلا ً عايزة تساعد بجد و تكفر عن ذنبها اللي إرتكبته .... و كلفنا كمان المقدم وليد إنه يسافر وراها في سرية تامة لتأمينها ....
ربنا معاه دلوقتي لإن في اللحظة اللي بنتكلم فيها دي زي ما عرفنا المقدم وليد إتصاب برصاصة في كتفه نتيجة إشتباكه مع خالد ... و فدوي ومي إختفوا ... و خالد كمان إختفي....
- يبقي يافندم ياريت نعرف أهم نقطة في العملية كلها... إزاي الجريمة دي تمت؟
____________________________________________
- موت نور بالطريقة دي فضل لغز مُحير لفترة ....قبل ما خُبرائنا بعد تشريح الجثة يوصلوا لتفسير مهم جدا ً قدرنا نفك بيه لغز مقتل نور.
و بعد ما حطينا قدامنا كل المعطيات الخاصة بالواقعة سألنا نفسنا سؤال مهم جدا و هو:
لما قوات الشرطة وصلت لمكان الحادثة و المقدم وليد بنفسه هو اللي عاين الجثة وفحصها وأكد إنها طبيعية جدا ً مافيهاش حاجة غريبة إكتشفها أو لاحظها .. حتي أهلها نفسهم أكدوا ده .... يبقي نفسر بإيه صوت الرصاصة اللي انضربت في المكان و ملهاش أي أثر في جسم الجثة أو حتي في المكان كله؟!!.
الطب الشرعي كمان أكد إن سبب الوفاة سكتة قلبية .... طب إزاي؟ و إيه ممكن يكون سببلها ده؟ .... و بعد تفكير عميق و أراء متبادلة بدأنا نحط تصورنا في النقطة دي .... وإسمعوني كويس عشان الكلام في الجزئية دي مهم جدا ً.
في البداية و إحنا بنرد علي مُعطايتنا بدأنا برضه بسؤال:
هل ظابط الشرطة لما بيفحص الجثة من حقه يفحصها بالكامل و لا لأ؟
.. وكانت الإجابة لأ .. لإن ظابط الشرطة بيفحص الأجزاء الظاهرة من الجثة بس .. أما فحصها بالكامل فده إختصاص الطب الشرعي فقط.
.. طيب هل ممكن يحصل تواطوء من جانب الطب الشرعي؟.
.. احتمال وارد.
.. ممممممممممم نور إتقتلت ؟ أيوا إتقتلت .
.. والتقرير قال إنها سكتة؟ .. اه فعلا ً
.. ومافيش أي أثر لأي جرح فيها ؟ ده حقيقة .
.. إذا ً لما نجمع النقط دي هنلاقي الآتي :
.. نور ( إتقتلت) بالسكتة!..
لما بحثنا في النقطة دي وقفنا عند بعض الجرائم الغريبة اللي حصلت علي مستوي العالم كله.... و لقينا إن مفيش غير طريقة شيطانية واحدة بس اللي فعلا ً إتنفذت بيهاالجريمة دي .... إسمها طريقة
(الإغتيال بالسكتة)....
الطريقة دي أو النوع ده من القتل بتستخدمه العصابات الكبيرة زي المافيا و أجهزة المخابرات .. و هي عبارة عن:
- أولا ً: سم من نوع خاص يستحيل تقدر تكشفه أثناء عملية التحري .. سم بيخلي ضحيته تبان إنها ماتت بالسكتة القلبية بالظبط.
ثانيا ً: مسدس من نوع خاص تم تطويره بحيث يطلق طلقة زي النبلة ويصيب ضحيته من غير ماتحس بأي ألم نهائي .... بعدها بيتم تجميد السم زي قطعة التلج في النبلة و بيطلقها المسدس بسرعة خيالية جدا ً و بيخترق جسم الضحية و يدوب فيها ومش بيسيب إلا علامة حمرا صغيرة جدا ً صعب ملاحظتها لإنها بتكون في حجم راس الإبرة .... وحتي لو شرحوا الجثة فالسم مش هيظهر عند التشريح .. و إستحالة تقدر تأكد إنها إتقتلت ... الرصاصة كمان انضربت من الضهر .. في النخاع الشوكي تحديدا ً .. عشان مفعول السم يكون أقوي و أسرع .. و ده يفسر الوقت القصير جدا اللي تمت فيه العملية .. و الندبة أو العلامة الصغيرة اللي بتسبها الطلقة ساعتها هتكون غير مرئية بشكل فعلاً كبير و بالتالي إستحالة الظابط يكشفها عند الفحص الظاهري .. و ده ممكن يثبت تورط الطب الشرعي في القضية لأنه أكيد لاقاها و إكتشفها.
إذا ً مفعول السم ده سريع جدا ً و مش بيطول و مع خطورة المنطقة اللي أصابتها الطلقة المسمومة هنلاقي فعلا ً إن ده هيخلي الجريمة تتم بسرعة جدا.
