رمسيس الثاني المعجزة العظيمة
انت اكيد بقيت كبير كفاية
عشان تفهم ليه المصريين القدماء عملوا تمثال ذى اللى ف الصورة تحت دا اللى هو تمثال رمسيس الثانى موجود فى ميت رهينة جوه متحف بطول من الراس للبطن بس ١٠ متر غير الرجلين وهو قطعة واحدة منحوته على بعضها كدا
لما اكتشفوه عرض محمد على انه يعطيه هدية لبريطانيا بس معرفوش ينقلوه وعشان كدا بنوا حواليه متحف
طبعا اكيد بقيت عارف ليه الاهرامات اللى الحجر منها يوزن ٢٠٠ طن هى كمان منفعش ان حد يهادى بيها حد والا كان زمان التمثال والاهرامات بره فى بريطانيا او دبى القدماء المصريين كانوا عارفين اننا هيجى وقت ونبيع ونهرب حاجتهم ونهادى بيها فقالوا مبدهاش نكبر فى الحاجات المهمه واهو على الاقل نضمن صعوبة نقلها وقد كان
الموضوع دا مش حفاظ على التاريخ اطلاقا خالص على فكرة الموضوع دا يخص الحفاظ على جغرافيا مصر ازاى بقي هاقولك الاهرامات هتفضل فى مكانها الجغرافى اللى اختاروا اللى بنوهم مهما يحصل من تغييرات حواليهم واكيد انت شوفت صور للنيل قرب الاهرامات زمان فاللى حصل كل حاجه اتغيرت حوالين الاهرامات لكن هى لاء
نفس الامر اللى حصل مع تمثال رمسيس دا محدش هيعرف ينقله فاحتفظ بمكانته الجغرافيا
طيب هى ايه جغرافيا اي مكان
جغرافيا اى مكان هى اربع عناصر مفيش غيرهم
الحجر ، البشر، الشجر ،المياه بالترتيب كدا اتوجدوا فى اى حته على الخريطه اتوجدت حياه وروح وجغرافيا تخص المكان دا طيب متوجدوش يبقي الانسان متعرى من جغرافيته يفضل له بس تاريخه اللى هو حافظة ودا سهل نشكك فيه ونقول مش هو اللى عامله دوول بشر تانين
بمعنى ان جغرافيا البلد اهم من تاريخها تخيل
الشجر والحجر اهم من البشر نفسهم تخيل
طيب لو بلد بتقطع الشجر بمليون حجه والناس اللى بتدافع عن دا بمليون حجه هل دا له معنى معين
اه له معنى كبير وهو ان الفطرة بتقول الانسان محب لكل ما هو اخضر كونوا يدافع عن انهاءه فى سبيل حب لشخص وتأيده يبقي البشر مبقوش هما البشر
طب والحجر الحجر هو كمان سهل تبديله وتغيره لكن بعد الشجر
طب والبشر
البشر هيتغيروا ويتاثروا بغياب العناصر التانية من شجر وحجر وميه ووقتها احنا هنبقي فى توهه تشبه توهه بنى اسراىيل
طب الصح ايه
الصح ان الناس تزعل من قطع الشجر الفطرة بتقول كدا الصح ان مش ضرورى يكون كل اللى بيتعمل صح اه بنوسع طرق سهل نزرع شجر ع طول اه بنضف العشوائيات سهل لما ننقلهم لحى جديد يكون حى اخضر جناين وشجر الناس تتضلل تحته وتعلم المكان فيه
سهل نقول اللى بيحصل دا مش صح ومن فضلكم تراجعوا عن حاجه زى دى مؤذية ومش وقتها ومش فى الجو دا
سهل نسمع صوت الناس بدون ما نخونهم بدون مانقول اننا بس اللى عارفين الصح احنا شركاء فى الارض والتاريخ والجغرافيا فلازم تسمعونا فى موضوع زى دا مش بسيط
اللى بيتكلم وزعلان خايف فعلا على البلد وبيحبها
واللى بيدافع وبيسوق مبررات بردو بيحب البلد وخايف عليها وعنده امل فيها دايما
بلاش ناخد الامور بعند وتعالى وقبل ما نقول للحكومه او اى مسئول اسمعنا نقول لبعض ونسمع بعض بشكل يليق ببشر لهم من التاريخ ٧٠٠٠ سنه حضارة وليهم نصيب منها متساوى مش منقوص
واخيرا امل دونقل بيقول
لكنني أوصيك إن تشأ شنق الجميع
فلترحم الشجر
لا تقطع الجذوع كي تنصبها مشانق
لا تقطع الجذوع فربما يأتي الربيع
والعام عام جوع
فلن تشم في الفروع نكهة الثمر
وربما يمر ببلادنا الصيف الخطر
فتقطع الصحراء باحثا عن الظلال
فلا ترى سوى الهجير والرمال
الهجير والرمال والظمأ الناري في الضلوع
كلمات سبارتكوس الأخيرة
محبتى وودى
