بتسألي مشيتها لي
بتسألي مشيتها لي الهانم عاملة العشا دا واختي هنا أمال أنا بسيبلها فلوس قد كدا يا ماما أنا مش ناوي أرجعها قرفتني شوفيلي واحدة تانية أتجوزها"بتسألي مشيتها لي الهانم عاملة العشا دا واختي هنا أمال أنا بسيبلها فلوس قد كدا يا ماما أنا مش ناوي أرجعها قرفتني شوفيلي واحدة تانية أتجوزها"
استنيت ردها وأنا متأكد إنها هتقول لي إني عندي حق وإن مراتي كان لازم تعمل أحسن من كدا
لكن رد أمي خلاني أسكت
“وحيات أمك؟ ومن إمتى العشا بيتعمل غير كدا؟ عايز تاكل إيه إنت وأختك يا ولاد البشوات؟”
قريت الرسالة كذا مرة ومكنتش فاهم هي بتتكلم جد ولا بتهزر
بعتلها
“قصدك إيه يعني مش فاهم؟ حتى أختي قالتلي إني صح وإن هي اللي غلط وكان لازم تعملنا عشا أحلى من كدا”
ردت عليا بسرعة
“لا والله؟ أهي أختك دي مبتعملش عشا أصلًا لجوزها وتلاقيه يا عيني أول مرة يشوف صينية واخدة كل الأكل دا إنت إيه إنت وأختك جعانين ولا إيه؟ أمال لو مكنتش أنا اللي مربياكم يا عالم معندهاش دم قوم تعالالي دا إنت يومك شبه شعر راسك معايا”
ضحكت غصب عني رغم إني كنت داخل أشتكيلها
قفلت الموبايل وروحتلها زي ما قالتلي
دخلت لقيتها قاعدة ومستنياني وأول ما شافتني قالتلي
“تعالى يا سي محمد اقعد هنا قدامي كدا”
قعدت وأنا لسه متضايق وقلتلها
“يعني إنتي شايفة إني غلطان؟”
بصتلي وقالت
“آه غلطان”
قولتلها
“غلطان في إيه بس يا ماما؟ أنا بقولك مراتي عاملة العشا بالشكل ده وأنا وأختي قاعدين”
بصتلي بصة كدا وقالت
“بالشكل ده إيه يا حبيبي؟ ده أنا لو عندي سفرة زي دي دلوقتي هقوم أزغرطلكم عليها”
قولتلها
“بس أنا كنت مستني منها تعمل حاجة أحسن”
قالتلي
“أحسن من إيه؟ دي عاملة أكل يكفيكم ويزيد كمان وإنت قاعد تدور على إيه ناقص؟”
سكت شوية وقلتلها
“بس أنا بسيبلها فلوس كتير”
قالتلي
“والفلوس دي عشان تصرف على بيتك يا ابني مش عشان كل ما تعمل حاجة تقولها أنا بسيبلك فلوس يبقى لازم تعملي كذا وكذا”
وبعدين قربت مني وقالت
“وبصلي كويس يا محمد ومتسمعش كلام أختك في كل حاجة تخص مراتك لأن أختك مش بتعمل اللي مراتك بتعمله لجوزها وأنت عارف ده كويس”
قولتلها
“بس هي قالتلي إني عندي حق”
ردت عليا
“طبيعي تقولك كدا لأنها شايفة مراتك بتعمل حاجات هي مش بتعملها فبدل ما تقولك مراتك كويسة وتتعلم منها تقوم تقولك هي غلطانة عشان تحس إنها مش أقل منها”
وبعدين هزقتها وقالت
“وبعدين يا بنتي إنتي مالك ومال مرات أخوكي؟ روحي شوفي جوزك الأول وبعدين ابقي ادي أخوكي نصايح”
ضحكت غصب عني
أمي بصتلي وقالت
“إنت يا ابني لو عايز تحافظ على بيتك اسمع الكلام ده مني كويس مراتك دي هي اللي اختارت تعيش معاك وتكمل حياتها معاك فلا كل ما تسمع كلمة من أختك أو من أي حد تيجي على مراتك وتعمل مشكلة”
وسكتت شوية وبعدين كملت
“حافظ على مراتك يا ابني وشوف تعبها قبل ما تشوف الحاجة اللي ناقصة منها ومتخليش حد يدخل بينكم حتى لو كان أقرب الناس ليك لأن أختك هتفضل أختك لكن بيتك ده إنت اللي مسؤول عنه”
بصيتلها ومردتش
قالتلي
“ولو مراتك غلطت في حاجة كلمها بينك وبينها ولو أنت غلطت اعتذرلها ومتخليش كرامتك تمنعك إنك تصلح بيتك”
وبعدين قالت وهي بتبصلي بحدة
“وآخر مرة أسمعك بتقوللي شوفيلي واحدة تانية أتجوزها عشان العشا إنت فاكر الجواز لعب عيال؟ واحدة تعبت معاك ووقفت جنبك وفي الآخر عشان أكلة مش على مزاجك تقول أغيرها؟”
قولتلها
“خلاص يا ماما فهمت”
قالت
“لأ لسه هتفهم لما تروح تعتذرلها”
ضحكت وقلتلها
“حاضر”
قالت
“وحاضر دي قولها لأختك كمان وخليها تبطل تحطك في مشاكل مع مراتك”
رجعت البيت وأنا بفكر في كلامها
ولأول مرة بصيت للعشا من غير ما أشوف إيه اللي ناقص
شفت كمية الأكل اللي اتعملت والوقت والمجهود اللي أكيد خدوه
ولما دخلت لقيت مراتي قاعدة لوحدها
بصتلي وقالت
“إنت لسه زعلان؟”
قولتلها
“لا أنا اللي كنت غلطان”
استغربت وقالت
“إيه اللي حصل؟”
ضحكت وقلتلها
“ماما هزقتني”
ضحكت وقالت
“تستاهل”
ضحكت أنا كمان وقعدت جنبها
ومن يومها بقيت لما أزعل منها أفتكر كلام أمي
مش كل حد يسمعك وهو متضايق منك يبقى عايز مصلحتك
ومش كل حد يديك نصيحة يبقى شايف الصورة كاملة
خصوصًا إن اللي بينك وبين مراتك محدش عايش تفاصيله غيركم إنتوا الاتنين
وأمي فهمتني إن الحفاظ على البيت مش إنك تثبت إنك صح
الحفاظ عليه إنك تعرف إمتى تسكت وإمتى تتكلم وإمتى تعتذر
وأهم حاجة إنك متسمحش لأي حد حتى لو كان قريب منك إنه يخلي الخلاف الصغير بينك وبين مراتك يكبر لحد ما يبقى سبب في خراب بيت كامل
please login to be able to comment