قصة سيدنا نوح عليه السلام الأطفال
تخيلوا معايا كده... الدنيا كلها مية! مفيش أرض ولا شجر ولا بيوت.
بس في سفينة كبيرة ماشية فوق المية وفيها حيوانات من كل نوع اتنين.
مين اللي بنى السفينة دي؟ وليه؟
دي قصة *سيدنا نوح* عليه السلام. قصة صبر 950 سنة.
قصة راجل طيب فضل يقول للناس "اعبدوا ربنا" ومحدش سمعه.
يلا نحكيها سوا عشان نتعلم يعني ايه "متيأسش أبداً" 👇
من امتع القصص ال هتقرأها…...
من زمان أوي بعد سيدنا آدم بسنين كتير... الناس نسيت ربنا.
بقوا يعبدوا أصنام عاملينها بإيديهم. اسمها "ود" و "سواع" و "يغوث".
كانوا بيقولوا "دي هتحمينا وهتجيبلنا الرزق".
ربنا زعل وبعت *سيدنا نوح*. كان راجل طيب وقلبه حنين وشعره أبيض.
ربنا قال له: “يا نوح روح قول للناس سيبوا الأصنام واعبدوا ربنا الواحد”
سيدنا نوح سمع الكلام وراح للناس.
كل يوم الصبح يقولهم: "يا قومي اعبدوا الله ما لكم من إله غيره"
وبالليل يروح يخبط على بيوتهم: “تعالوا نعبد ربنا سوا”
بس الناس كانوا بيضحكوا عليه.
يقولوله: "انت مجنون؟ احنا وآباءنا بنعبد الأصنام دي من زمان"
وكانوا ساعات بيحطوا صوابعهم في ودانهم عشان ميسمعوش كلامه.
وساعات يغطوا وشهم بالهدوم.
سيدنا نوح متعبش ولا يأس.
فضل 950 سنة يدعوهم! متخيلين؟ جدك كان ممكن يكون عايش في الوقت ده.
950 سنة وهو صابر. بس قليل أوي اللي آمن معاه... كانوا 80 واحد بس.
في يوم ربنا أوحى لسيدنا نوح: "خلاص يا نوح. اللي هيآمن آمن. واللي مكفر محدش هيآمن تاني"
وزعل ربنا منهم عشان كفروا.
ربنا قال لسيدنا نوح: "اصنع السفينة"
سيدنا نوح استغرب. سفينة؟ واحنا في الصحرا؟ مفيش بحر!
بس هو سمع الكلام وبدأ يقطع الشجر ويبني.
الناس كانوا بيعدوا عليه ويتريقوا: "يا نوح بقيت نجار؟ هتركب السفينة فين؟ في الرملة؟ هه"
سيدنا نوح كان يبتسم ويقولهم: “هتضحكوا دلوقتي... وبكرة هتشوفوا”
فضل يبني سنين. سفينة كبيرة أوي من 3 أدوار.
ولما خلصها... ربنا قال له العلامة: “لما المية تطلع من الفرن... اركب بسرعة”
وفي يوم صحيت الناس لقيت المطر نازل جامد أوي.
مطر عمرهم ما شافوه. وبعدين المية طلعت من الأرض كمان!
ومن الفرن اللي في البيت طلعت مية! دي كانت العلامة.
سيدنا نوح جري على السفينة وقال: "اركبوا باسم الله"
خد معاه كل اللي آمنوا. 80 راجل وست وطفل.
وبعدين ربنا أمره: "خد من كل الحيوانات اتنين. واحد دكر وواحد نتاية"
فدخلت الحيوانات كلها... الأسد مع اللبؤة، الفيل مع الفيلة، العصفور مع العصفورة.
حتى النملة دخلت!
ابن سيدنا نوح اسمه "كنعان" كان كافر.
سيدنا نوح نادى عليه: "يا بني اركب معنا"
ابنه قال: "هطلع فوق الجبل والمية مش هتوصلني"
سيدنا نوح قال: "مفيش حاجة هتحميك من ربنا النهاردة"
وفعلاً المية عليت وغرقت الجبل... وغرقت كل الناس اللي مكانتش في السفينة.
والمية فضلت 40 يوم. الدنيا كلها بقت بحر.
السفينة فضلت ماشية وفوقيها سيدنا نوح والناس والحيوانات.
كانوا بياكلوا وبيشربوا وبيسبحوا ربنا.
وبعدين ربنا أمر السماء: "بطلي مطر"
وأمر الأرض: "اشربي المية"
والمية بدأت تنزل. والسفينة رست على جبل اسمه “الجودي”
نزل سيدنا نوح وكل اللي معاه. وبدأوا حياة جديدة.
الأرض بقت نظيفة تاني. وفضل سيدنا نوح يعبد ربنا لحد
الدروس المستفادة من القصه جميله دي...
1. *الصبر*: سيدنا نوح صبر 950 سنة. يعني لو ماما قالتلك ذاكر وانت زهقت... افتكر سيدنا نوح وصبر.
2. *السمع والطاعة*: ربنا قال ابني سفينة في الصحرا... بنى. مناقشش. عشان كده ربنا نجاه.
3. *جزاء الكفر*: اللي مسمعش كلام ربنا غرق. واللي سمعه نجى. لازم نسمع كلام ربنا وكلام ماما وبابا.
دي كانت قصة سيدنا نوح. بطل الصبر.
_سؤال ونشاط...
تحب تبقى مع مين في السفينة؟ الأسد ولا الزرافة؟ 😄
مستنية أشوف إبداعاتكم!
--
الرجاء تسجيل الدخول لتتمكن من التعليق