الملاك: قصة حياة أشرف مروان
بالتعاون مع انتاج إسرائيلي هوليوودي ، و إخراج آرييل فورمين المخرج الهوليوودي - الإسرائيلي الجنسية أنتجت شركة Netflix الشهيرة فيلم في عام ٢٠١٨ إسمه The Angel.
الفيلم ده هو انتاج لكتاب وثائقي عبري يعد من الكتب الأكثر مبيعاً على مستوى العالم ليوري بار جوزيف إسمه "الملاك"، الجاسوس المصري الذي حفظ إسرائيل.
الفيلم بيحكي قصة رجل الأعمال المصري أشرف مروان اللي لو فاكرينه في ٢٠٠٧ لقوه واقع و ميت من بيته في سان جيمس بارك اللي في وسط لندن.
جدير بالذكر إن لندن اتقتل فيها شخصيات مصرية كتير كانت على علاقة بالمخابرات أو تثار حولهم الشبهة، وكلهم ماتوا بالوقوع من البلكونة، غالبيتهم من برج ستيوارت في "مايدا فالي" غرب لندن واللي سبحان الله المخابرات المصرية تمتلك شقق فيه ، و اللي سبحان الله شخصيات مصرية كتير صدفة وقعوا منه و اتقال انها انتحار زي سعاد حسني و الليثي ناصف و سبحان الله كلهم وقعوا من برج ستيوارت صدفة .
الفيلم حكي عن ازاي أشرف مروان اللي ابوه كان قائد كبير في الجيش و هوا نفسه كان بيشتغل في المؤسسة العسكرية رئيس المعامل المركزية للقوات المركزية و مساعد الرئيس جمال عبد الناصر و كان متجوز منى بنت جمال عبد الناصر يعني ، و كان من اقرب الشخصيات للرئيس السادات و المستشار السياسي و الأمني ،
و كمان المختص بالاتصالات الخارجية و كان عامل مؤثر في تسليح الجيش قبل حرب أكتوبر و اشتغل رئيس الهيئة العربية للتصنيع و عضو في لجنة الإشراف على التطوير وصناعة الأسلحة في مصر وليبيا، وعضوا في المجلس الأعلى للمشروعات الطبية في مجال الطاقة النووية ١٩٧٣ ،
أشرف مروان اللي كسب ثقة إسرائيل لما سلم نفسه للسفارة الإسرائيلية سنة ١٩٦٨ و طلب يشتغل معاهم بنفسه، و كان بيمد إسرائيل بمعلومات غاية في الأهمية لدرجة ان تقريره كان بيقراه ارفع الشخصيات الإسرائيلية بنفسهم منهم جولدا مائير و موشية ديان و ده نادرا ما كان بيحصل مع غيره و ده لأهمية أشرف مروان .
اشرف مروان اللي اشتغل في تجارة السلاح بعد كل دة ، و ظهر مع مبارك رئيس مصر الأسبق في اكتر من مناسبة ، و اللي لما مات اتقال عليه جاسوس خاين ، و اتقال عليه عميل مزدوج ، و اتعمله جنازة حضرها الرئيس و وزراءه في مصر ، و جنازة في إسرائيل ، و اللي لحد دلوقتي مش معروف هوا كان معانا ولا ضدنا ولا ايه ، معلوماته ساعدت اسرائيل في الثغرة و في الضغط على مصر و تدارك الأخطاء في نهاية الحرب ، و التعبئة في بداية الحرب ، و كان احد اسباب فشل حركة أسامة الهندي الفلسطينية ، و كان اسمه الحركي في الموساد " ،الملاك ، بابل " .
المهم ، الفيلم كان فيه تصوير لعبد الناصر ، و السادات اللي قايم بدوره ممثل إسرائيلي اسمه ساسون جاباي ، و مبارك و صفوت الشريف وغيرهم ، و حكي للأسف الرؤية الإسرائيلية للموقف، و للأسف كان فيه اهانة كبيرة لمصر يعني، و كمان كشف حاجات كتير كانت صادمة للبعض بالنسبة للجاسوسية و لأشرف مروان نفسه، اللي للعلم مصر نفت كونه جاسوس و قالت انه خدم البلد بأكثر من طريقة، بعكس إسرائيل اللي اشارت انه كان من أهم عملائها، و محدش فاهم حاجة .
عموماً، أشرف مروان قالت عليه صحيفة الجارديان البريطانية انه اخطر واكبر جاسوس ظهر في الشرق الأوسط في التاريخ و من اخطرهم في العالم كونه منكشفش ابدا لحد وقتنا ده.
