شقة رقم 13

انا رامى شب عندى 22 سنه عمرى مكنت بأمن بحاجه اسمها جن او العالم الاخر عموما يمكن عشان مشفتش بعينى وصعب تصدق حاجه مشفتهاش بس بعد الى حصلى انا صدقت وعرفت انى كنت غلطان ومش محتاجين نشوف عشان نصدق"

انا عايش فى شقه لواحدى و ده طبعا بسبب شغلى بعد نقلى للفرع التانى الى فى القاهرة كان لازم اسكن قريب من الشغل عشان كان صعب عليا اسافر من القاهره لى اسكندريه كل يوم ف قررت ا أجر شقه قريبه من الشغل وفعلا اجرت شقه وكلو كان طبيعى لحد مكلمنى صاحب الشقه وقالى انه عاوزنى اسيب الشقه عشان ابنه هيتجوز فيها طبعا مكنش فى ايدى حاجه خير الموافقه وادانى مهله اسبوعين عشان اشوف شقه تانيه

فعلا فضلت ادور بس كل الشقق غليا جدا مكنتش عارف اعمل اى حكيت ل صحبى قولت يمكن يساعدنى ولا حاجه لقيته بيقولى ان فى شقه فى العماره الى ساكن فيها وصاحب الشقه طالب مبلغ صغير جدا انا اول مسمعت المبلغ فرحت وقلت ل صحبى يودينى الشقه اشوفها بس صحبى قالى مسألتش ليه الشقه سعرها قليل كده قولتله هيكون ليه يعنى قالى عشان الشقه مسكونه انا سمعت الكلمه دى وفضلت اضحك لحد مدمعت من الضحك

صحبى قالى انت بتضحك على اى هو انا قولت نكته قولتله يابنى مفيش الكلام ده كل ده شغل سينما مش اكتر رد عليا ببرود ياعم ماشي طالمه كده تعالا انهارده معايا تشوف الشقه قولتله تمام 

بعد الشغل رحنا عشان نشوف الشقه العماره كان شكلها شيك وكويس دخلنا العماره طلعنا الدور

الخامس مكنش فيه حد ساكن فى الدور خالص الشقه كان مكتوب عليها13 المهم صاحب العماره فتحلنا الشقه واتصدمت ازاى شقه ب الجمال ده مفيهاش ساكن وكمان سعرها قليل كده كل حاجه كانت جديده اكنها شقة عرسان اتفقت على كل حاجه مع صاحب العماره ودفعتله الايجار مقدم و اتفقت معاه انى هاجى اسكن فيها بكره 

رجعت الشقه وجهزت كل حاجه عشان امشى تانى يوم وكلمت صاحب الشقه وقولتله انى همشى بكره وكلو فل الفل

تانى يوم الصبح كان يوم اجازتى اخدت حجاتى وركبت تاكسى ورحت العماره ركبت الاسانسير الى لقيته لواحده اخدنى للدور الخامس قولت يمكن فيه عطل ولا حاجه محطتش فى دماغى وفتحت الشقه

ودخلت اول مدخلت الشقه حسيت ببروده غريبه فتحت الانوار وفتحت الشبابيك كلها عشان الشقه تتهوا الشقه مكنتش محتاجه نضافه خالص اكنها فيها ناس ساكنه بتنضفها على طول طلبت دليفرى واديتو العنوان نص ساعه الجرس رن رحت افتح الباب لقيت عامل التوصيل اخدت الاكل ودفعت الحساب

وقعدت اكل بس الجرس رن تانى رحت افتح واستغربت من عامل التوصيل الى واقف قدامى تانى قلتله فى حاجه الحساب فيه حاجه ولا اى بصلى بستغراب حساب اى يا فندم حضرتك لسا مدفعتش و الاكل معايا اهو قولتله ثوانى كده دخلت الصالون ملقيتش الاكل ولقيت الفلوس على الطربيزه مكانها مش فاهم حصل ازاى ده اخدت الفلوس ودفعت للعامل واخدت الاكل قولت يمكن بتخيل عشان 

جعان

المهم اكلت واتصلت على صحبى يجى يقعد معايا شويه بس هو رفض وقالى لو حابب تعالا نتقابل فى شقتى او فى القهوه بس انا ادايقت وقولتله خلاص مش مهم 

قفلت مع صحبى قولت اشغل التلفزيون شويه شغلت التلفزيون ولقيت فيلم بحبه شغال ف قعدت اسمعه الفيلم خلص ببص فى الساعه لقيتها 11:55قولت ياه الوقت سرقنى انا هنام عشان الشغل دخلت الاوضه حطيت راسى على المخده ملحوظه انا نومى خفيف اوى و اقل صوت بصحى على طول 

قلقت وصحيت من النوم ببص فى الساعه لقيتها12:1 انا ملحقتش انام حاجه كنت هرجع انام تانى بس لمحت حاجه نشفت الدم فى عروقى الباب مفتوح شويه وفى حاجه بتبص من ورا الباب اديها كانت على الباب ضوافيرها طويله زى المخالب

وعنيها بتنور ب اللون الابيض وشعرها متبهدل كده كان منظرها مرعب استجمعت قوتى وقلت مين هناك انتى مين شغلت الابجوره وبلف ابص عليها لقيتها فى وشى على السرير وبتبص ليا ابتسمت بطريقه خليت جسمى اتجمد مكانه ابتسمتها كانت من الودن دى للودن دى على شكل دائرى وقالتلى ها صدقت يا حلو

قمت مفزوع من مكانى اى ده انا كنت بحلم لقيت نفسي نايم على الكنبة قدام التلفزيون استعذت بالله من الشيطان الرجيم وفصلت التلفزيون ودخلت عشان انام ببص فى الساعه لقيتها 12:5 بلعت ريقى بصعوبه ومحطتش حاجه فى دماغى ونمت رحت فى النوم بسرعه من كتر التعب

تانى يوم صحيت على زعيق ايوا فى حد بيزعق بره دماغى مصدعه مش قادر فجأه سمعت صوت طلقات ناريه جريت على بره بس مكنش فى حد دخلت اخد شاور عشان افطر وانزل شغلى خلصت كل حاجه وجهزت نفسي عشان انزل الشغل وركبت الاسانسير ونزلت عشان اروح شغلى 

وصلت الشغل وبدأت اشتغل زى كل يوم عادي الساعه 5 خلصت شغلى كنت رايح اركب تاكسى لقيت حد بينادى عليا كان كمال صحبى قالى اى يا صحبى انت زعلان منى ولا اى رديت عليه و ازعل ليه يعنى قالى يا رامى افهم الشقه دى محدش بيخشها ويطلع عايش اوى يطلع سليم بصتله بستهزاء رد وقالى يا صحبى انت مشفتش حاجه ومتعرفش حاجه انا ساكن هنا من 10 سنين وعارف كل حاجه مسألتش نفسك ليه محدش ساكن فى الشقه او ليه محدش ساكن فى الدور اصلا الى سكنو هناك مقدروش يستحملو احسنلك اطلع منها يا صحبى 

رديت عليه وقولتله انا ميتخفش عليا يا كمال وعلى فكره انا مرتاح فى الشقه دى ركبت التاكسى وسيبته غرقان فى افكاره ركبت الاسانسير و لقيته بردو طلعنى الدور الخامس لوحده دخلت الشقه فى صوت حد فى المطبخ دخلت المطبخ ملقيتش حد كل ده كان بيحصل وغرورى مكنش مخلينى اصدق ان فى حاجه فى الشقه دى لمحت اوضة مقفوله ب قفل فى الشقه اول مره اخد بالى منها فضلت ادور على حاجه اكسر بيها القفل بس ملقيتش 

طلعت الموضوع من دماغى دخلت احضر حاجه اكلها سمعت صوت باب بيتفتح ببطئ وبيعمل صوت التزيق المزعج ده طلعت اشوف فى اى لقيت الباب الى كان مقفول بقفل اتفتح لواحده بلعت ريقى بصعوبه كنت متردد اخش الاوضه ولا لا بس قررت اخش فى الاخر بدأت اروح ناحية الاوضه ببطئ فتحت الباب وشغلت الانوار و لقيتها اوضه مليانه كراكيب وصناديق كتيره على بعضها لفت انتباهى صوره كبيره على جنب قربت منها لقيت صورة راجل لابس بدله وبنت لابسه فستان فرح شكل دول الى كانو ساكنين الشقه قبلى بس ليه سايبين حاجتهم هنا 

شميت ريحة حاجه بتتحرق افتكرت انى سايب الاكل على النار جريت على بره لقيت معظم الاكل اتحرق بس كان فى حجات تتاكل يعنى اخدت الى ينفع يتاكل وطلعت اكل بره شغلت التلفزيون وبدأت اكل بضرب بعينى كده عند باب الحمام لقيت النور بيشتغل ويطفى اكتر من مره خفت اللمبه تتحرق ف روحت اطفيها اول مقربت من الحمام اللمبه فصلت خالص قولت شكلها اتحرقت دخلت اشغلها اشتغلت  بلف عشان اطلع والمرايا كانت فى ضهرى لقيت راجل واخد رصاصه فى دماغه وعمال ينزف وعينه كلها سوده ومجوفه ومبتسم بطريقه مرعبه كان حاطط ايدو على زرار النور وفجأه نور الحمام فصل

حاولت اطلع من الحمام بس الباب اتقفل بدأت اسمع اصوت واحده بتصرخ وراجل بيزعق وكلام مش مفهوم الصوت بدأت يعلا جامد اوى مبقيتش قادر استحمل دماغى هتتفرتك حطيت ايدى على ودنى وقعدت فى الارض وفجأه الصوت اختفى والنور اشتغل فتحت الباب لقيته فتح عادي طلعت بره بس الشقه اتغيرت شويه لقيت الطرقه مليانه صور للراجل و الست الى شفتهم فى الصوره فى الاوضه 

وسمعت الكاست شغال وصلت للصالون ولقيت الراجل الى شفته فى الحمام من شويه قاعد على الكنبه وماسك تليفونه وفى بنت جميله دخلت عليه دى نفس البنت الى كانت فى الصوره كانت مخبيه ورا اديها حاجه قالتله عملالك مفجأه ابتسملها وقلها اى هى قالتلو غمض عينك قلها حاضر ولما غمض حطت فى ايدو اختبار حمل فتح وملامح وشه كلها اتغيرت قلها اى ده قالتلو انا حامل 

قلها حامل ازاى قالتله مالك ياحبيبي انت مش مبسوط قلها طبعا مش مبسوط حملك ده معناه انك خاينه قالتوه اى الى بتقوله ده قلها ايوا عشان انا مش بخلف ردت عليه وهى بتعيط ازاى يعنى مش بتخلف امال حملت ازاى الراجل ضربها بلقلم وقلها قولى خنتينى مع مين وفضل يضرب فيها

ودخل يجرى على الاوضه بتاعته وجاب مسدسه وقلها انتى لازم تموتى يا خاينه فضلت تترجاه يصدقها ويصدق ان ده ابنه بس مفيش فايده وضربها ب الرصاص ماتت البنت انا كنت بشاهد كل ده اكنه فيلم مش قادر اصدق الى بيحصل ولا قادر استوعب 

لقيت الراجل مسك المسدس وحطه على دماغه وضرب نفسه ب النار جريت افتح باب الشقه كنت هنزل عندى صحبى اقوله يتصل على البوليس حاولت اركب الاسانسير بس مكنش بيفتح نزلت على السلم بس اى ده السلم مش بيخلص الدور بيتعاد هو هو تعبت من كتر محولاتى 

الفشله فى النزول ورجعت للشقه تانى لقيت مفيش حد فى الشقه ولا جثث ولا دم وكمان لقيت الاكل سخن والتلفزيون شغال على نفس الفيلم قعدت على الكنبه مزهول وعرفت ان صحبى كان عنده حق قررت اسيب الشقه قبل ميحصلى حاجه وفعلا لقيت شقه كويسه كانت غاليه بس مفرقش معايا انا كان كل همى اخرج من الشقه دى عرفت قد اى انا كنت غلطان كنت لازم اصدق كلام صحبى من الاول 

ملاحظه

(القصه من وحي خيالى وهدفها التوعيه) 

الكاتبه /ياسمين محمد محمد