اول ماقالي الكلمه دي مجاش ف بالي الا مكالمة التليفون بتاع امبارح

اول يوم استلم شغلي فيه.. 

تخيلت ساعتها اني ممكن اكون بحلم او ما شابه فقعدت دقيقه كده احاول استجمع افكاري واركز اذا كان ده حقيقه ولا حلم لدرجة اني طلعت التليفون اتاكد من ان ف رقم كلمني والغريبه اني لقيت التليفون فيه الرقم بالفعل فسالت الموظف وهو واخدني للمكتب عنده انت متاكد من ان ورقي انا هو اللي عندك ولا انت مختلط عليك الامر

رد بكل ثقه لا يا استاذ انا عمري ما اتلخبطت ف اي ورقه عندي انا اقدم واحد شغال هنا وعارف كل صغيره وكبيره في المستشفى هنا وهتعرفني اكتر اول ماتشتغل وتعامل الناس وتلاقيك تلقائي جايلي انا تسالني عن اللي انت عاوز تعرفه

الراجل بيتكلم بثقه غريبه ومش طبيعيه بس انا قررت فجاه اني هكمل ف اللي انا فيه.. ولازم اعرف مين اللي كلمني ده

قعدت عنده ف المكتب شويه وهو سابني استجمع انفاسي وشاف شغله هو لحد مالقيته بيسالني - انت جاي هنا وعارف انك هتتقبل صح؟ - قولتله مش عارف ممكن اه وممكن لا قالي انا جايلي توصيه عليك ومتقلقش انا هظبطلك الدنيا وهفهمك كل حاجه

قرب اليوم ينتهي ف المستشفي فخدني لمكتب المدير عشان يمضي ع ورق التعيين بتاعي ولقيت المدير بصلي وقالي مقبول يا استاذ محمد وهتستلم الشغل انهارده جهز كل حاجه هتحتاجها وتعالا عشان معدتش هتروح للبيت

اندهشت وخوفت ازاي كل دا يحصل و ف ثواني كده انا جاي اشوف ايه الاوراق المطلوبه الاقيني بتعين كده ع فجاه بدون اي مقدمات!! 

روحت البيت اجهز شنطتي  والف سؤال جاي ف بالي ومش عارف اسال ولا سؤال منهم لاني فعلا كت محتاج الشغل ده وخايف لو سألت يشكو ف ان ف حاجه مش طبيعيه وبحمد ربنا انه الامور كلها متسهله واول ما دخلت البيت عشان اجهز شنطتي لقيت التليفون رن من نفس الرقم اللي كلمني امبارح… اول مارديت قولتله:

• - انت قفلت امبارح ليه ف وشي مخلتنيش اكمل كلامي 
• اتاكدت م اللي قولتهولك.. مبروك الوظيفه الجديده متخافش انا هبقي معاك وهعمل معاك اتفاق 
• - اتفاق؟! انت مين طيب وعارفني منين وايه اللي بيحصلي ده 
• انت المفروض بقه وثقت فيا.. سيبلي نفسك خالص ومتستعجلش ع حاجه
• - ايوه يعني انا هشو
• تيت تيت تيت

قفل السكه تاني ايه الحكايه هو بيلاعبني ولا ايه.. اصريت اني لازم اعرف دا مين ومتبعني بالطريق دي ليه وليه مبيريحنيش ف الكلام كده اتصلت بيه تاني بس اتفاجئت ان اول ما اتصلت لقيت رد الشركه ( الرقم اللذي طلبته غير صحيح) ايه!!! يعني ايه؟؟ دانا لسه قافل معاه حالا هو ايه اللي غير صحيح ازاي!! 

بقيت هتجنن وقولت لازم افهم اللي بيحصل دا ايه اخدت شنطتي وجهزت كل حاجه ممكن احتاجها وروحت ع المستشفي اول ماوصلت لقيت نفس الراجل اللي لابس شال احمر واقف وبنفس ابتسامته قدام باب المستشفي جريت عليه عشان اكلمه ولكني اغمي عليا اول ماقربت اوصله وصحيت وانا ممدد ع سرير جوه المستشفي وجمبي راجل عينيه شكلها من اغرب ما يكون

يتبع…