حكاية فيلم ع طريقتي

مين فينا مبيحبش التشويق والاثاره ومتابعة الاحداث وبندور ع اي مشاهد تشدنا وتكون فيها تحقيقات وبحث عن الجاني ف جريمه تكون شيقه ومثيره مع بعض من الفكاهه تشد الانتباه وتفك جو الشده ونكون مستمتعين بالاحداث من اول لقطه لاخر لقطه 

تعالو مع بعض نفصل احداث فيلم من اعظم الافلام للفنان العظيم دانيال كريج ( او زي ماعرفناه جيمس بوند) صاحب العيون الزرقاء والشعر الاصفر اللي اول مابنشوفه ع الشاشه اجباري بنوقف تقليب وبنتفرج عليه

KNIFES OUT

واحد من افضل اعمال الفنان دانيال كريج واللي قام فيه بدور محقق حر غير تابع لا لحكومه ولا لوزاره ولا شرطه ولكنه باحث جنائي مساعد لتحقيقات الشرطه بيتم دفع اتعاب له مقابل انه بحكمته وذكاؤه يقدر يتقصي الحقايق ويوصل لادله وبراهين تكشف المتهم ف تنفيذ جريمه قام بيها شخص ذكي جدا عشان ينقذ العيله من ضياع حق اسرته ف الميراث الكبير او خلينا نقول ينقذ فلوسه هو الشخصيه خلينا نبدأ الاحداث كده واحده واحده

الفيلم بيبدا بإن ف حالة انتحار تمت لكبير العيله وصاحب ثروه عظيمه عن طريق نحر عنقه بنفسه ولكن وصل للمحقق بينوا بلانك ( جيمس بوند زي ماحنا عارفينه) جواب من مجهول بمبلغ مالي ومعاه ورقة بخبر انتحاره مقطوعه من الجريده اللي نشرت الخبر عشان يتطلب منه يبدا تحقيقه ف اللي حصل ده 

طب انا هحقق ازاي ف حادثة انتحار المفروض يكون ف جريمه مش انتحار.. الا اذا كان اللي بعت الجواب ده عارف انها قتل مش انتحار واستخدم بينوا بلانك عشان يكشف الجاني فتبدا رحلة تحقيق مره تانيه من جديد مع جميع الافراد ف العيله اللي كانو موجودين وقت الوفاه عشان يكشف من خلال خبايا كلامهم حقيقة اللي حصل وقت وقوع الوفاه ويعرف هل بالفعل المليونير الكبير انتحر ولا اتقتل واللي قتله دارى قتله بتلفيق ادله تبين انها انتحار

بدأت الشرطه في سؤال كل فرد من العيله لوحده عن اللي حصل وكل واحد منهم كان فين ساعتها ودا كان بوجود فردين من الشرطه وقاعد بينوا بلانك مستمع بعنايه لكل كلامهم بدون مايصدر اي صوت بس قاعد بيسمع ويحلل ويدقق ف كل كلمه وحركه وتصرف وردة فعل ليهم بشكل احترافي وعبقري عشان يطلع من بين السطور كذبة اي حد فيهم او يمسك طرف خيط يمشي وراه ويشوف هيوديه لفين ولكن لقي ان كل الكلام متناسق ومتزن والاحداث والتوقيتات ف ترتيب كلامهم كان كله مفيش فيه الغلطه وييجي ظابط الشرطه يشرحله ويفسرله كلامهم وانهم ازاي صادقين وتوقيت وجودهم وقت الحادث كان كله مظبوط ومش عارفين يمسكو اي حاجه تدين حد فيهم

لحد مابيعرف بينوا بلانك بوجود ممرضه خاصه للمليونير كانت ف البيت ساعتها وليها كمان ظاهره غريبه بتحصلها ساعة الكذب

ياتري ايه حكايتها وهل ليها علاقه باللي حصل وايه هي الظاهره الغريبه اللي بتحصلها

دا اللي هنعرفه سوا ف المقاله الجايه تابعوني هتعرفو ايه الخبايا اللي ف كلامهم وازاي هيتكشفو كذبهم واحد واحد