في هذا المقال
# 😂 أنا وعيلتي محتاجين إعادة ضبط المصنع!
## الجزء الثاني: أبويا طلع عنده جمهور... وماما داخلة على عالم الشهرة! 😂
### أحداث القصة:
كريم كان واقف بيضحك، وأنا ببص له وببص لأبويا، وماما حاطة إيدها على بقها من الصدمة.
أبويا: أنا سألت سؤال بسيط... مين اللي عامل حساب باسمي على تيك توك؟
كريم حاول يمسك نفسه من الضحك وقال:
كريم: يا بابا، هو حضرتك عندك تيك توك؟
أبويا: أنا بسألك سؤال، رد وخلاص
ماما: طب وريني كده يا حاج، يمكن حد بيهزر معاك.
أبويا فتح الموبايل وورانا الحساب.
اسم الحساب: «الحاج عبدو الأسطورة».
مريم: 😂😂 الحاج عبدو الأسطورة؟!
أبويا بص لي بهدوء:
أبويا: في حاجة تضحك يا مريم؟
مريم: لا يا بابا، بس الاسم كبير شوية على حضرتك.
أبويا: ما هو واضح إن اللي عامل الحساب فاهم في التسويق.
كريم وقع من الضحك.
أبويا فتح أول فيديو، ولقيناه واقف في الصالة بيرقص على أغنية شعبية، بس المشكلة إن الفيديو متصور من وراه، ومش باين مين اللي بيصور.
ماما: يا نهار أبيض! ده شبهك أوي!
أبويا: شبهني إيه يا أم كريم؟ ده أنا!
سكتنا كلنا.
مريم: طب إنت كنت بترقص إمتى يا بابا؟!
أبويا: أنا؟ أنا كنت فاكر إن كريم بيصورني وأنا بشرحله إزاي يشيل الكرسي من مكانه!
كريم بدأ يضحك أكتر.
مريم: يعني حضرتك كنت بتشرحله بالرقص وازاي يشيل الكرسي ده ايه ده وحياتك؟!
أبويا: المهم إن الفيديو جايب 200 ألف مشاهدة!
طنط فوزية اللي كانت قاعدة من أول الحوار قالت:
طنط فوزية: طب ما شاء الله! يا عبدو إنت بقيت مشهور؟ أنا عندي بنتي مش فالحة غير أنه تعمل لايكات كتير، أخليها تدعمك.
أبويا: تسلمي يا فوزية، بس أنا محتاج أعرف مين اللي عامل الحساب الأول.
كريم رفع إيده وقال:
كريم: بصراحة يا بابا... أنا اللي عملته.
كلنا بصينا له.
ماما: إنت يا كريم؟!
كريم: أيوه، كنت بهزر معاه، بس ما كنتش متخيل إن الفيديو هيجيب المشاهدات دي!
أبويا بص له شوية وقال:
أبويا: طب كويس إنك قلت الحقيقة. بس عندي سؤال واحد.
كريم: اتفضل يا بابا.
أبويا: هو ليه الفيديو اللي بعده مكتوب عليه «لما مراتك تطلب منك تخرج معاها وإنت مش عايز»؟
ماما بصت لأبويا.
أبويا بص لماما.
ومريم بدأت ترجع لورا بهدوء.
ماما: يعني إيه يا عبدو؟ إنت مش بتحب تخرج معايا؟!
أبويا: يا ستي ده عنوان الفيديو، مش تصريح رسمي!
طنط فوزية: لا لا، دي محتاجة قعدة عائلية.
مريم: أنا شايفة إننا نقفل الإنترنت ونعيش على الحمام الزاجل أحسن.
وفجأة موبايلي رن.
رسالة من واحدة صاحبتي:
«يا مريم، أبوكي مشهور أكتر منك! 😂»
فتحت تيك توك لقيت فيديو جديد للحاج عبدو، وكاتبين عليه:
«لما أبوك يكتشف إنه عنده فانز أكتر من عياله».
والتعليقات كانت كلها:
«الحاج عبدو محتاج يعمل لايف».
«عايزين نشوف الحاج في الجزء الجاي».
«فين أم الحاج؟».
كريم بص لأبويا وقال:
كريم: يا بابا، الناس عايزاك تعمل لايف!
أبويا شرب الشاي وقال بكل هدوء:
أبويا: لايف إيه يا ابني؟ أنا عندي شغل بكرة.
ماما: طب ما تعمل لايف خمس دقايق.
أبويا: حاضر، بس بعد الفطار.
مريم: لاااا! هو إحنا هنعيش في بيت كله مشاهير؟!
أبويا بص لي وقال:
أبويا: إنتِ مش عايزة تشتهري معانا؟
مريم: أنا عايزة أعيش بس!
وفي اللحظة دي كريم قال جملة خلتني أعرف إن المصيبة لسه في أولها:
كريم: على فكرة يا جماعة... أنا عامل لماما حساب كمان!
ماما: إيه؟! باسمي أنا كمان؟!
كريم: أيوه، واسم الحساب…
سكت لحظة وبعدين قال:
《مرات الحاج عبدو الأسطورة الرسمية》
يتبع في الجزء الثالث: ماما دخلت عالم التيك توك... والبيت خرج عن السيطرة!
تابع جديد Mariam
اختر إشعارات الموقع أو البريد أو الاثنين. الزائر يقدر يشترك ببريده دون تسجيل حساب.
الإبلاغ عن المقال
لو لاحظت مشكلة في المحتوى، أرسلها لفريق المراجعة. لن تظهر بياناتك لكاتب المقال أو للقراء.
تعذّر إرسال البلاغ الآن. حاول مرة أخرى لاحقًا.
سجّل الدخول لإرسال بلاغ
النقاش
التعليقات (0)
فكرة تضيفها، أو سؤال يفتح حوارًا.
الرجاء تسجيل الدخول لتتمكن من التعليق