صالح سليم: أسطورة لن تتكرر
الأسطورة و الأب الروحي و المايسترو، كلها ألقاب حصل عليها الكابتن صالح سليم، الذي وصفوه بالشخصية القيادية، حيث أنه أول من أطلق شعار (الأهلي فوق الجميع) برئاسته لإدارة الفريق الأول لكرة القدم بالنادي.
ويهتم الكثير من محبي صالح سليم بمعرفة تفاصيل عن حياته الشخصية، و الأشياء التي يفضلها في روتينه اليومي، و بعض المواقف الهامة في حياته، و هنا نحن لسنا بصدد الحديث عنه في كلاعب كرة قدم أو قيادي أو حتي فنان لدخوله مجال التمثيل و لكن سنتحدث عن صالح سليم كإنسان.
للمايسترو الراحل صالح سليم جملة الشهيرة:
"لا يوجد سبب واحد يجعل رجل حقيقي يخلف وعده إلا الموت" .
كان المايسترو و الأسطورة صالح سليم متعود يسافر لندن عشان يعمل كشف طبى دورى سنوى علي صحته .. و فـي سنة ١٩٩٨ راح السفرية السنوية للندن كالعادة بس المرة دى خد معاه حفيدته ( نورا هشام سليم )، و عمل التحاليل الصبح و كان المفروض هيستلم النتيجة بتاعته الساعه ٧ بالليل فرجع البيت علي الضهر و قعد مع حفيدته يشوفوا هيقضوا باقى اليوم إزاى لحد ميعاد إستلام التحاليل؟ و لأن البنت كانت أول مرة تسافر مع جدها فقال لها: اللى هتقولى عليه هنعمله.
نورا طلبت منه طلبين أولهم إنها تاكل فـي محل برجر مشهور هناك و التاني إنها تدخل فيلم معين فـي السينما و لكن بشرط إن جدها يكون معاها، فوعدها أنه هينفذ كل اللي طلبته، بس ميعاد السينما كان هيكون الساعة ٨ بالليل؛ فقالوا يبقى نعدى نجيب التحاليل الأول و نطلع بعدها علي السينما و المطعم.
فلما راحوا، البنت أنتظرت تحت في العربية و هو دخل قابل الدكتور اللى فاجأه بنتيجة التحاليل و إصابته بـسرطان الكبد اللى ظهر فـي نصف مساحة الكبد تقريباً و قال له كدة كدة لو إحنا محظوظين يبقى هتعيش لمدة ٥ سنين تانية بس، لكن خلينا نعمل اللى علينا للآخر و نبدأ خطة العلاج فوراً .
صالح إستقبل الخبر بمنتهى الهدوء؛ و لسة الدكتور هيبدأ يشرح خطة العلاج بتاعته الفترة الجاية، لقى صالح بص في ساعته و قام وقف و قال له وهو بيبتسم: ممكن نأجل الحديث عن العلاج لبكرة؟ أنا مرتبط بموعد مهم حالاً .. الدكتور أستغرب و سأله : إنها صحتك! أى موعد ! .. رد صالح: سأذهب لتناول الطعام و حضور فيلم فـي السينما مع حفيدتى لقد وعدتها.
الدكتور سأله: و العلاج ؟ .. رد صالح : أعدك أننى سأحضر فـي الغد الساعة العاشرة صباحاً لنناقش هذا الأمر.
و بدون ما ينتظر رده كان صالح قد خرج من العيادة و شاف نورا منتظراه و أول ما شافها ضحك في وشها ضحكة كبيرة و سألها : أتأخرت عليكى ؟ .. قالتله : لأ يا جدو .. و خرجوا و هيصوا و إنبسطوا و رجعوا البيت بيدندنوا الأغنية اللى كانت في الفيلم اللى سمعوه ! .
اللى يعرف صالح سليم و قرأ عنه هيعرف إنه كان شخصية قوية و قاسية و حاسمة جداً .. مراته كانت معاه فـي لندن، لما روح مرضيش يقول لها علي الخبر الخاص بمرضه عشان متنامش و هى زعلانة ! .. و الصبح بدرى و هما بيفطروا بلغها بالخبر، و نزل راح للدكتور الساعه ١٠ الصبح بالظبط لدرجة إن الكتور أستغرب لما شافه واقف قدامه و قال له: كنت أراهن نفسى أنك لن تعود؛ فمعظم من يواجهون بحقيقة مرضهم ييأسون و لا يعودون أبداً !.. ، فرد صالح : وعدت حفيدتى بالأمس و أوفيت ، ووعدتك أنت أيضاً أن أعود و أوفيت؛ فى الحقيقة لا يوجد سبب واحد يجعل رجل حقيقى يخلف وعده إلا الموت.
