سانت كاترين: ملتقي الأديان الثلاثة - ج٢
يلا نكمل جولتنا جوة الدير و هنلاقي مكتبة غنية بالمخطوطات و الفرمانات النادرة منها فرمان بناء المسجد في عهد الحاكم بأمر الله الفاطمي.
هتلاقي هناك كمان شجرة شكلها غريب و الأغرب لما تعرفوا قصتها، الشجرة دي الوحيدة من نوعها علي مستوي العالم، و في محاولات كتير أنهم ياخدوا أجزاء منها و يعيدوا زراعتها سواء جوة الدير أو في أي منطقه تانية في مصر أو خارج مصر بس كل المحاولات فشلت.
للشجرة دي فروع و أغصان بس ملهاش جذع أو شكل الشجر العادي بتاعنا، فعارفين الشجرة دي شجرة ايه؟
دي شجرة العليقة أو الشجرة المباركة اللي ربنا كلم سيدنا موسي عليه السلام عندها اللي شاف نورها علي بعد وقال لأهله " اني آنست نارا ً لعلي أتيكم منها بقبس أو أجد علي النار هدي " ترك سيدنا موسي أهله وذهب باتجاه النار اللي كانت كل مايقرب منها تتحول من نار لنور لدرجه أنه لما قرب مكنش قادر يفتح عينه من شدة توهجها و هنا ربنا سبحانه وتعالي كلم موسي لأول مرة في نفس المكان اللي احنا واقفين فيه ده و أمره أول أمر، " اخلع نعليك انك بالوادي المقدس طوي"
و ده اسم الوادي اللي احنا واقفين فيه وادي طوي تخيلوا معايا عظمة المكان ده مكان ربنا كلم فيه احد أنبيائه.
جبل سانت كاترين
الجبل ارتفاعه 8563 قدم فوق سطح البحر 2637م حنطلع سوا في طريق فيه فيه اكتر من ٧٠٠٠ سلمة
أحلي مشهد لشروق الشمس هتشوفه من فوق الجبل و تقدر كمان تشوف من فوق التقاء خليج السويس بالعقبة، و كمان تشوف من بعيد الطريق اللي كان بيمشي فيه الحجاج زمان و هما رايحيين الحج وهو نفس الطريق اللي مشت فيه الأسرة المقدسة السيدة مريم و سيدنا عيسي و يوسف النجار و هما داخلين مصر.
المكان ده ملتقي الاديان التلاته مفيش مكان تاني علي وجهه الارض بيحمل كل الصفات و التاريخ ده.
محمية سانت كاترين
تقع في نهاية ملتقي وادي الإسبانية مع وادي الأربعين، علي هضبة مرتفعة تحيطها ارتفاعات شاهقة تتمثل في عدة جبال متابينة الارتفاع هي جبل سانت كاترين أعلي قمة في مصر، و جبل موسي و جبل الصفصافة و جبل الصناع و جبل البنات و جبل عباس.
المحمية تمتلك تراث حضاري فريد متمثل في دير سانت كاترين بتاريخه واهميته الدينية و بكل الجبال المقدسة اللي حواليها وبعض الاثار الدينية زي قبر النبي صالح والنبي هارون عليهما السلام.
المنطقه تم اعلانها محمية طبيعية عام ١٩٨٨ م مساحتها حوالي ٤٣٠٠ كم 2.
المحمية بتضُم محموعة من أهم النباتات النادرة علي مستوي العالم حوالي ٣١٦ نوع من الفصائل النباتية النادرة منها الطبي و منها السام.
أهمها طبعا ً أشجار الزيتون الوارد ذكره في القرآن الكريم و أشجار الشيح و العجرم و الزعتر و الحبك و فيها كمان ٤٢٠ حديقة فواكه.
كمان المحمية فيها عدة آبار و عيون زي بئر هارون و بئر الزيتونة.
وبعض الحيوانات المهمة زي الثعالب و الضباع و الغزلان و الوعول و الأرانب البرية و الفأر الشوكي و العديد من الطيور زي طائر اللقلق و النسر و الصقر والعقاب.
المحمية كمان فيها منطقه موجود فيها اقدم صخور في مصر كلها زي صخور النيس و الشيست اللي بيرجع تاريخها ل ١١٠٠ مليون سنة و الجرانيت الرمادي اللي بيرجع تاريخه ل ٨٥٠ مليون سنة و الجرانيت الوردي ٦٥٠ مليون سنة.
المنطقة هنا بتتميز بالمناظر الطبيعية الخلابة و فيها مجموعة من أجمل جبال مصر.
جبل موسي
أو جبل الطور وهو من أشهر الأماكن السياحية في المنطقة ترجع أهمية الجبل ده لأنه الجبل اللي ربنا سبحانه وتعالي كلم فيه سيدنا موسي و انزل عليه الوصايا العشر بعد ما أمره انه يصوم لمدة ٣٠ يوم و أتمناه ب ١٠ بعدها لتصل مده صيام سيدنا موسي ل ٤٠ يوم بعدها ربنا كلمه علي الجبل هنا و انزل عليه التوراه.
الجبل ده ارتفاعه ٢٢٨٥ م فوق سطح البحر و يوجد بأعلي الجبل كنيسة الثالوث المقدس لرهبان دير سانت كاترين و اللي اتبنت ١٩٣٧ م و كمان جامع يرجع للعصر الفاطمي، فالجبل مخصص للسياحة الدينية لأنه بيجمع بين الديانات الثلاثة
يوجد أيضاً طريق الخروج و ده الطريق اللي سلكه سيدنا موسي و بني اسرائيل عند خروجهم من مصر.
جبل التجلي
الجبل اللي طلب سيدنا موسي و هو واقف قريب منه إنه يشوف ربنا سبحانه و تعالي فربنا قاله " انظر الي الجبل لو استقر مكانه ستراني " و اول ماتجلي سبحانه وتعالي تغير شكل الجبل بعد مكان لون بني بقي اسود و بعد ما كان عالي انخفض في ارتفاعه لان الجبل و هو جماد مستحملش نور الله.
جبل الصفصافة
يقال ان الجبل ده اللي القي سيدنا موسي من عليه الألواح العشرة علي قومه اللي كانوا واقفين في الوادي الفسيح ده و الوادي اسمه وادي الراحة لما رجع من مناجاة الله عز وجل و لاقاهم بيعبدوا العجل.
منطقة العجل الذهبي
أيوا هو اللي جه في دماغكم دلوقتي، هو عجل بني اسرائيل أو عجل السامري كلنا طبعا ً عارفين قصة العجل من سورة البقرة.
توجد به صخرة منحوتة علي شكل عجل و هنا أكتر من قصة:
منها ان السامري و بني اسرائيل لما جم المنطقة هنا السامري شاف الصخرة منحوتة علي شكل العجل فأخد الرسمة و صنعها في العجل الذهبي ليعبدوه بني اسرائيل
و في قصة تانية بتقول ان قبل سيدنا موسي ما يرجع من مناجاة الله عز وجل و يحرق العجل الذهبي حصل سيل عظيم في المنطقة ادي ان العجل ارتطم بالصخرة فأنطبع شكله عليها.
الروايتين مالهمش سند او أساس بس ده اللي بيتقال علي الصخرة دي اللي لازالت لغز محير للعلماء لأنها مش نحت بسبب انسان بس شكل طبيعي.
كانت هذه جولة في مكان من أكثر أماكن العالم سحراً و جمالاً و قداسة.
و لما لقاء في جولات أخري بإذن الله.
تابعوني.
