الاعضاء الVIP
Ahmed Adel Vip Founder المستخدم أخفى الأرباح
mohamed Vip حقق

$0.53

هذا الإسبوع
أكثر الأعضاء تحقيق للأرباح هذا الاسبوع
Ahmed Adel Vip Founder المستخدم أخفى الأرباح
mohamed jagour حقق

$3.81

هذا الإسبوع
محمد علي المليجي المستخدم أخفى الأرباح
MUSTAFA Hatam حقق

$1.99

هذا الإسبوع
Azezasayed المستخدم أخفى الأرباح
Ahmed حقق

$1.10

هذا الإسبوع
MOHAMED ESSAM حقق

$1.03

هذا الإسبوع
Prince2030 حقق

$0.75

هذا الإسبوع
ايمان خشاشنة المستخدم أخفى الأرباح
shady magdy دكتور جامعي حقق

$0.72

هذا الإسبوع
قصة هدير إبراهيم الجزء التانى عمتى اسلمت

قصة هدير إبراهيم الجزء التانى عمتى اسلمت

#يُدبر_الأمر !! P2

هشتاج باقي القصص 👇
#قصص_واقعيه_لهدير_ابراهيم 💌

🎀🎀🎀🎀🎀🎀

زي م قولتلك ان بعد كل اللي حصل مع عمتي ودخولها للاسلام والعذاب اللي شافته، والدي ضيق الحصار علينا ووفاة عمتي بسبب الاسلام جننه لدرجة انه كان بيشك فيا انا واخواتي لو حد منا لِبِس لِبْس واسع شويه او طويل.. رغم اني زي م قولتلك مفيش حد من المسلمات اللي حوالينا واللي لينا علاقه بيهم محجبات اصلا.. بس هو كان بيشك م اقل حاجه ومش عاوز اللي حصل مع عمتي يتكرر م تاني...

حاولنا ندور ع عمي اللي هو توأمها بس لما غيابه مر عليه سنين الكل استسلم !

وقت اللي حصل مع عمتى كنت لسه في اولى كلية..

اللي حصل مع عمتي هزني م جوايا.. اينعم مش لدرجة اني ادخل الاسلام، بس كفايه انه حرك جوايا حاجه..
مكنتش عارفه ابدأ منين ف كنت اقعد قبل م انام واضم ايدي لبعض واقولها من فضلك تعاليلي في الحلم قوليلي اعمل ايه ؟

بس مكانتش بتيجي بردو..

انا فاكره كويس كلام عمتي لما قالتلي دوري بنفسك ع الطريق الصح والعقل  والمنطق هيوصلك ف النهاية لطريق ربنا..
كلامها مخرجش م دماغي ابدا بس بردو مش عارفه اعمل ايه ؟!!!! ابدأ منييييين !!!!

في البداية الخوف من بابا كان بيخليني اتراجع اني اعمل اي حاجه،

سنتين كاملين مروا.. وكانت حياتنا اتغيرت تماما وبقى كلها توتر وقلق وخناق دايما، وحزن مش بيفارقنا..
ومفيش حد منا دخل الاوضه اللي اتوفت فيها عمتي ابداً...

سنتين من الصداااااع
كلام عمتي كان عاملي صدااااع ف دماغي..

فكرت اقرأ ف الكتب الاسلامية بس المشكله 
اني مينفعش اروح مكتبة الجامعة لان وارد اصحابي يشوفوا الكتاب اللي ف ايدي وبابا كان ليه ناس في جامعتي اللي بيعرفوه كل خطواتي..

واصلا مكنتش عارفه انا هقرأ ولا هبدأ ب ايه اصلا !

قررت اني هروح شارع كل اللي فيه بيبعوا كتب.. بقيت اتمشى ف الشارع اعمل نفسي بقرأ ف اي كتاب وعيني بتفضل رايحه جايه تدور ع اي عنوان لكتاب ليه علاقه بالاسلام.. بس مجاتليش الجرأه اني اسأل عن اي كتاب..

استمر حالي دا اسبوعين كاملين.. 
كل يوم بعد الكليه كنت بقضي ساعتين او اكتر ف نفس الشارع بعمل نفس الحركة..
وعلشان اغطي ع رجوعي متأخر م الكلية كنت كل يوم ارجع البيت وانا شاريه اي حاجه.. وخلال الاسبوعين فلوسي كانت قربت تخلص وحججي كمان وحسيت اني تعبت ويأست وجبت اخري خلاااص..

فضلت اعيط، ووقفت ف البلكونه وبصيت للسماء وقعدت اكلم عمتي واقولها يرضيكِ كدا !
عاجبك حالي دا ؟
ليه دخلتي الشك جوايا والخوف م غير م تساعديني ولا حتى تجيلي ف الحلم تدليني ع الخطوه الاولى حتى !
هي حياتي هتفضل كدا لحد امتى ! انا تعبت 💔


دخلت نمت ع امل انها تجيلي ف الحلم وكالعاده ولا اي حاجه !

مر 3 ايام بعد الموقف دا ومنزلتش م البيت ولا روحت شارع الكتب..
بس بمجرد م نزلت تاني للكليه لقيت رجلي بعدها رايحه لشارع الكتب م تاني وانا بردد م جوايا ان دي اخر مره.. ي اتجرأ واسأل ع اي كتاب.. ي خلاص رجلي مش هتقرب م الشارع دا تاني..
وفي وسط م انا واقفه وبكلم نفسي لقيت راجل كبير بيشاور ب ايده.. بصيتله بلا مبالاه لقيته بيبصلي انا، ف بدأت اركز انه بيوجه كلامه ليا !

"بداية فهمي بقى واستيعابي لترتيب وتدبير ربنا كان بسبب الموقف دا !!"

لقيت عمو دا بيكلمني وبيقولي
- بقالك كام يوم مبتجيش ليه ؟

انا بصيتله بعدم فهم وفضلت ساكته..

-ملاحظ انك بقالك فتره بتيجي الشارع تجيبيه م اوله لاخره وتطلعي منه زي م دخلتي بولا كتاب !

دماغي كانت بتغلي، وصوت جوايا بيقولي يلا دي فرصتك وجاتلك يلا اسأليه
ولما فتحت بؤي علشان انطق.. لقيت نفسي بقوله اه اه ..

ابتسم وسألني لو بدور ع كتاب معين ومش لقياه وانه يقدر يجيبلي اي كتاب حتى لو ناقص !

استنيت شويه وبعدها لقيتني تلقائي بشاور ع دقنه وقولتله هو حضرتك مسلم ؟!
بص هو ع ايدي المرفوعه واللي مرسوم عليها #الصليب وقالي: 
-مسلم وموحد بالله الحمد لله.. بس بتسألي ليه ؟
ومعرفش لساني كان بيجيب الكلام دا منين بس لقيت نفسي بسأله:
= هو حضرتك مسلم مسلم؟! ولا مسلم في البطاقه بس !!

استنى هو شويه.. وكنت متخيله انه بيحاول يستوعب كلامي، ي بيقول ايه الهبله اللي واقفه قدامي دي !
لكن الحقيقة انه قال اخر حاجه كنت اتوقعها

-هو انتِ بتفكري تدخلي الاسلام او عاوزه تقرأي عنه او مجيك طول الايام اللي فاتت دي له علاقه بكتب عن الاسلام ؟!!

=هو حضرتك عرفت منين ؟!!

- مالك اتخضيتي ليه؟ انا بس بخمن..
وقف شويه وكمل..
هو انتِ فعلا بتفكري تدخلي الاسلام او بتدوري ع كتب عنه ؟!

صمت تام يَعُم المكان،
كنت ف موقف لا احسد عليه ومش عارفه انطق
بس استسلمت وقولتله

= انا معرفش لسه هدخله او لا.. انا بس عاوزه اقرأ فيه وعادي ممكن اقرأ في اي دين تاني !

- ممممم طيب تعرفي حاجه عن الاسلام ولا ابيض خالص ؟

= لا خالص ولا اي حاجه ومش عارفه ابدأ منين ؟

-طيب انتِ كدا لازم هتبدأي بكتب بتتكلم عن التوحيد..

= توحيد ؟!!

-ان ربنا واحد !

قطعت كلامه قبل م يكمل..

= اه هو حضرتك بتتريق علشان د..؟!

هو قطع كلامي بسرعه وقال
-لا خالص والله مقصدش، بس دا اول حاجه لازم اي حد بادئ يتعرف ع الاسلام يعرفها، مش تريقه والله حاشا لله..

= انا اللي اسفه، انا بس اعصابي مشدوده شويه..
-ولا يهمك، ها اجيبلك بقى كتاب عن التوحيد ؟
= اه ماشي تمام....... بس ايه دا ثانيه لا مش هينفع..
_حصل ايه بس مالك؟
=معنديش مكان اقرأ فيه 💔
- ممممم، طيب انتِ ممكن تبقي تيجي تقعدي تقرأي هنا لو مش هتعرفي تقرأي في اي مكان تاني، واهو بالمره اساعدك لو عندك اي سؤال..


ومن بعد اليوم دا وبدأت حياتي تتغير وبقيت استنى الوقت اللي اروح فيه لعمو بتاع الكتب..
كنت بقعد عنده وانا لابسه كاب ع شعري وكمامه علشان كنت قلقانه حد يشوفني بالصدفه.. ومكنتش اعرف ان بسبب الحركه دي بالذات فيه مفاجأه كبيره مستنياني لا كانت ع البال ولا ع الخاطر !

وفي يوم قولتله اني عاوزه اقرأ في السيره 
-اشمعنى السيره تحديدا،تعرفي اي معلومات فيها ولا ايه ؟
=لا مش اوي بس هو في واحد في اول الاسلام مات هو واهله بسبب اسلامهم صح ؟
-في كتير اتوفوا ف بداية الاسلام بس تقصدي عمار بن ياس..
((قطعت كلامه
=ايوه ايوه عمار بن ياسر واهله، وفي كمان عمر بن الخطاب وابو بكر صح
-فعلا صح قريتي عنهم فين؟
=لا مقريتش انا عرفتهم من عمتي الله يرحمها
-هي عمتك...؟
=اه عمتي الله يرحمها اتوفت على الاسلام بس ملحقتش اعرف منها حاجه ولا ليه اسلمت اصلا.. بس اتكلمت معايا مره عن الرسول والصحابه..
-الله يرحمها ويعفرلها وان شاء الله تكون في مكان احسن عند ربنا.. وان شاء الله انتِ كمان ربنا يدلك على الطريق الصح...


بدأنا من اليوم دا امتع فصل في حياتي وهو قرائتي في السيره.. انا كنت كل ما اتعمق فيها اكتر احس ان في حاجه قويه بتتحرك في قلبي.. اتعلقت جدا بالرسول ومواقفه.. وحب الصحابه اللي ملهوش وصف ولا حد ليه !

وكان عمو بيردد جمله معينه كل ما يتكلم عن الرسول ويقول: بأبي وأمي أنت يا رسول الله ❤
الجمله وقعها غريب ع ودني.. كانت بتإسرني من جمال معناها..
وفي يوم لقيت نفسي تلقائي برددها في سري ودا في موقف الرسول لما راح الطائف وحصله اللي حصل من اهلها..
في اليوم دا بكيت بكاء عمري م تخيلت اني ابكيه ع موقف لشخص معرفهوش وكمان مر عليه اكتر م الف سنه، كمان اني الاقي نفسي من جوايا كل م افتكر الموقف اردد : بأبي وأمي انت يا رسول الله ! 
قلبي خلاص بيتحرك ف اتجاه معين، لسه مش عارفه ايه نتيجة اللي بعمله ولا هوصل لفين؟ بس قلبي بقى في حالة سعادة وببتسم تلقائي وانا ف اي مكان وف اي وقت لمجرد ان يمر موقف للرسول والصحابه ع بالي..

وعمري م هنسى ابدا اليوم اللي قرألي فيه عمو بتاع الكتب خطبة الوداع.. ويااا وجع قلبي وبكائي ونحيبي لمدة اسبوع كامل ع وفاة الرسول وحتى الان كل م اوصل للجزء اللي فيه وفاته ببكي وكأني اول مره اقرأه 💔
هو انا ازاي اتعلقت اوي كدا بشخص من مجرد كلام عنه بس.. وابكي وفاته بالطريقه دي، وبقيت مشتاقه اني اشوفه ❤

اليوم دا كان اهم يوم في حياتي..
في اليوم دا قررت مأجلش الخطوه اكتر من كدا وفي وسط دموعي قلبي ردد قبل لساني "اشهد أن لا اله الا الله واشهد ان محمدا رسول الله"
وفي الليله دي واخيييييرا عمتي مريم جاتلي في الحلم ❤
كنت مُدركه في الحلم اني بحلم.. فضلت اتنطط واقولها انا شايفاكِ بجد !
حضنتي وابتسمت.. وبعدها اتكرر الحلم اللي قولتلك عنه.. وفضلت تزورني ف احلامي هي وعمي توأمها .. اللي حتى اللحظه دي معرفش هو عايش ولا اتوفى للاسف💔

خلال الفتره اللي سبقت اسلامي كان عمو بتاع الكتب اقترح عليا انه يجيبلي كتب عن الدين بتاعي علشان اعرف الدين اللي انا بنتمي ليه قبل م افكر ادخل في دين غيره..
ف كان هو يساعدني ف الدين الاسلامي.. وانا اقرأ في البيت قدام اهلي في ديني ودا قلل جدا من شك والدي وحصاره ليا.. وبكدا قدرت افهم واستوعب..

بعد نطقي للشهاده عمو قالي ايه اللي المفروض المسلمين الجدد يعملوه من الاغتسال وغيره..
نفذت كل كلامه ومستحيل انسى اول مره وقفت اتوضى فيها وافتكرت عمتو حبيبتي وفضلت ابكي
واول سجده ليا في الاسلام دعيت ليها ولعمو توأمها ولعمو بتاع الكتب !


اتعلمت الوضوء والصلاه اللي كنت بصليها ف السر وعماله ادعي فيها ان ربنا يسترني وانه يرزقني قبل وفاتي بصلاه جهريه 💔

انا كنت بصلي في اي مكان ف البيت، وانا قاعده مكاني او احيانا بالليل اوي اصلي ف البلكونه بس وانا قاعده بردو علشان خايفه حد يشوفني،ولو مستحيل اعرف اصلي في البيت او اكون لوحدي كنت بتوضى وانام او اقعد ف اتجاه القبله المهم اليوم ميخلصش م غير م اصلي ال 5 فروض ❤

حياتي اختلفت تماما الحمد لله والصداع راح.. وكانت حياتي مستقره عدا بس ان كان نفسي البس الحجاب واغير طريقة لبسي.. وكنت بدعي ربنا انه يحققلي المعجزه دي بأي طريقه..
لحد م حصلت الصدمه ولقيت ماما بتقولي ان في شخص متقدملي وان بابا وباباه متفقين وكانوا مستنيين اني اخلص سنه رابعه علشان هتجوز ع طول 💔

في اليوم دا معرفتش انام نهائي وبقيت اكلم ربنا واقوله هو انت سيبتني؟ هو انت مش عاوزني ؟
انا عارفه ان لا يجوز زواج مسلمه من شخص غير مسلم ف كدا مفيش حل نهائي !

روحت لعمو بتاع الكتب وحكيتله، رد عليا بكل هدوء وقالي
-اللي وصَّلك لكل اللي انتِ فيه دلوقتي مستحيل ينساكِ او يسيبك، سلمي بس كل امورك لربنا وهتلاقيه بيدبرها من عنده !

وقد كان.. وحصلت حاجه غريبه فعلا،
مممم ممكن نسميها في حالتي دي #معجزة !

خطيبي كان شخص كويس جدا.. شخص محترم مهذب لبق ف الكلام وكل حاجه فيه فعلا ما شاء الله كويسه عدا بس الديانه !

كنت كل مره اشوفه افكر اني اصارحه واشوف رد فعله لاني ملقتش اصلا اي سبب مقنع او حجه اني اطفشه !
بس خلاص مفيش وقت الجواز بعد اسبوع كل حاجه جهزت.. اعمل ايه امشي ولا اعمل ايه ! دبرني يارب !
صليت استخاره ورنيت عليه بعد الفجر قولتله اني محتاجه اشوفه ضروري الصبح، رد عليا وصوته نايم تماما وسألني
-تحبي نتقابل الساعه كام ؟
= 6 الصبح
-يوستينا الساعه دلوقتي 5 ونص الصبح ؟
=اه، طيب نخليها 7 ؟
- طيب انا مش ههزر، واضح ان في حاجه مهمه جدا، ف اوك هقوم دلوقتي البس وانزل اعدي عليكِ، بس عادي تنزلي دلوقتي م البيت ؟
=ايوه ايوه عادي هستناك...

عدا عليا وانا عماله افرك ف ايدي ومش عارفه اقول ايه
وعماله ادعي ربنا يدبرها من عنده

ولما فات وقت وانا ساكته قالي
- تحبي اساعدك انك تبدأي الكلام ؟
=انت مش فاه
((قطع الكلام
-عمتك مريم الله يرحمها ليه علاقه باللي عاوزه تقوليه ؟
صمت تاااااام ودهشه مجرد م نطق اسم عمتي !
= ان.. ان.. انت تقصد ايه؟
-اه ولا لا ؟!!


سكت ف رد
-يبقى اه..
=انت تعرف ايه عن عمتي ؟!
-هو مين الوسيط بينا في موضوع الجواز؟
=جوز خالتي
_ ف ها ؟
=مش فاهمه ؟
-ماما وخالتك مقربين لبعض جدا ف حكتلها عن عمتك ، وماما حكتلي بس محكتش لبابا ولا لاي حد تاني.. ودا كان السبب الاساسي اصلا في اني اتقدمتلك..
= ثانيه كدا بس علشان كل حاجه دخلت في بعضها.. انت كنت تعرفني قبل ما تتقدملي
-لا انا عرفتك الاول وبعدين اتقدمتلك
= ؟؟؟؟؟؟
-طيب هسألك سؤال وردي بصراحه ايًا كان ردك متخافيش وانا هفهمك كل حاجه
انتِ جايه النهارده تنهي ارتباطك بيا بسبب حاجه ليها علاقه بعمتك صح ؟
=انت عرفت منين ان انا اسلمت 😳

طبعا انا رديت بسرعه وم غير تفكير، بس لما لقيته سكت وتنح اكتشفت اني عكيت الدنيا ولسه هتكلم لقيته بيقولي
- هو بصراحه انا مكنتش اعرف انك خلاص وصلتي للمرحله دي..
قطعت كلامه وقولت
= ثانيه بس هفهمك
قطع كلامي ولقيته ابتسم فجأه وقالي بفرحه
- دي حاجه عظيمه جداا انتِ وفرتي عليا كتيييير

ولان كان ظاهر عليا اني مش فاهمه حاجه حكالي م البداية وكان كلامه كله مفاجئ ليا تماما !!

-وقت م ماما حكتلي عن عمتك الله يرحمها صادف اننا كنا اتقابلنا في مناسبه وشوفتك ولفتي نظري وكنتِ قاعده هاديه وواخده جنب م الكل.. بعدها حاولت اعرف عنك اي معلومات وفي مره كنت عندك في الكليه وشوفتك خارجه، حاجه غريبه شدتني اكمل مشي وراكِ لحد م وصلنا لشارع كل اللي فيه بيبيعوا كتب
واللي استغربته اكتر وخلاني اكمل وراكِ لما لقيتك بتلبسي كاب وكمامه وروحتي قعدتي جنب شخص م اللي بيبعيوا كتب وكان واضح انك تعرفيه..
قربت منكوا وكنتوا مشغولين ف الكلام ف مأخدتوش بالكوا مني وودني لقطت م كلامكوا حاجات ليها علاقه بالاسلام

=وانت تعرف حاجات عن الاسلام منين ؟
رد وهو بيضحك وقالي
-يعني انتِ سيبتي مشيي وراكِ وكل دا ومسكتِ ف معلوماتي عن الاسلام ؟
=طيب اسفه كمل
-مبدأيًا بس علشان اشيل القلق والتوتر اللي ظاهر عليكِ.. انا لما قررت اني ارتبط بيكِ، دا كان سببه ف البدايه عمتك وقولت يمكن يبقى في امل اني اقدر اساعدك تكوني زيها بس بعد م شوفتك وسمعتك يومها اتأكدت اني ف الطريق الصح خاصة ان دا كان بعد استخاره
= استخاره ؟!!! ثانيه كدا هو استخاره تقصد بيها صلاة الاستخاره ؟!! ايييه دا هو انت...
-مسلم اه الحمد لله..
=ازاي ؟!!!
- ازاي دي بقى قصة طويلة..هحكيهالك بعدين لما تحكيلي ايه اللي حصل معاكِ..

حكيتله بلساني، وعقلي كان ف مكان تاني، وقلبي عمال يردد شكرا ع #معجزتك يارب ❤

ارتبطنا واعتقد اننا اول اتنين مسلمين يكون زواجهم في الكنيسة.. بس هو قالي ان اساس الزواج اشهار وبكدا زواجنا مش حرام..
وطبعا بعد زواجنا هيأنا نفسنا للسفر بره مصر.. وتم الحمد لله.. ومجرد م سافرنا اول خطوه عملتها هي اني لبست الحجاب وكان هاين عليا طول م انا ماشيه ف الشارع اشاور للناس ع حجابي واقولهم انا محجبه انا مسلمه ❤
والميزه في زوجي انه اسلم قبلي، ف معلوماته اكتر مني شويه ف بيساعدني في حاجات، يعني هو مثلا كان اتعلم التجويد ف علمهولي وبنحفظ سوا القرآن ونسمع لبعض .. واحنا الاتنين مازلنا بنكتشف وبنتعلم وبندرس سوا تعاليم الاسلام..

وطبعا بقى صعب بعد حجابي ننزل مصر،
بس سبحان الله جات الكورونا بعد فتره م سفرنا وكانت حجه كويسه اننا مننزلش اجازه.. وربنا قدرلنا #الحج بفضل منه.. وطبعا حجيت لعمتي الله يرحمها ❤

طبعا من غير معرفة اهلنا غيرت انا ومينا اسمائنا..
هو اختار اسم عُمر وانا اخترت اسم عائشة "قلبي كان متعلق بيها من وقت ما كنت بقرأ في السيره "
بعدها رُزقنا بفضل الله ببنتا #مريم اللي اتمنى تكمل اللي عمتي مريم ملحقتش تعمله.. كان نفسي تبقى لسه عايشه وتتزوج هي كمان بس اكيد لربنا حكمه وهي اكيد في مكان افضل عنده دلوقتي ❤


وطبعا لا اهلي ولا اهل جوزي ولا حد اصلا عارف اننا اسلمنا .. ولا حد يعرف بقصتنا ف حبيت اشاركها معاكم ❤

الإسلام كامل م غيرنا، بس هو اللي كملنا وطمن قلوبنا، ف يستحق اننا نهاجر ونسيب الدنيا كلها ونكمل حياتنا متغربين بعيد عن اهلنا بسببه.. ويستاهل ان عمتي الله يرحمها تتوفى وهي مُتَماسكه ومُتَمسكه بيه لاخر نفس في حياتها ❤

ودي كانت قصة اسلامي وزواجي وقبلهم قصة اسلام عمتي ❤

ادعوا لعمتي وتوأمها بالرحمه وان ربنا يجمعنا بيهم في الجنه ويتم ستره لينا في الدنيا، وادعوا لعمو الجميل بتاع الكتب اللي كان م ضمن اسباب اسلامي

#حكاوي_هدير
#هدير_ابراهيم

التعليقات (9)
mohamed ibrahim

2022-08-17 05:43:10

جميل
Laila Ibrahim

2022-08-17 13:48:07

❤️❤️
waleed waleed

2022-08-17 07:38:47

ولا اجمل
Laila Ibrahim

2022-08-17 13:48:30

أقل من كتاباتك الجميلة❤️❤️
اسلام ابراهيم

2022-08-17 10:33:33

حلوة اوي
Laila Ibrahim

2022-08-17 13:49:00

متجيش حاجة جمب كتاباتك❤️
اسلام ابراهيم

2022-08-17 13:49:53

ربنا يخليكي يارب .. 😍 و اتمني تستمري و تبدعي أكتر و أكتر
اسلام ابراهيم

2022-08-17 13:51:06

اكتبيلي دايما أرائك لو في اي حاجة عجباكي خصوصا في بعض القصص نشرتها من تأليفي، أكيد رأيك مهم
Ahmed

2022-08-17 14:51:28

👍👍👍👍
الرجاء تسجيل الدخول لتتمكن من التعليق
مقالات مشابة
...إخلاء مسئولية: جميع المقالات والأخبار المنشورة في الموقع مسئول عنها محرريها فقط، وإدارة الموقع رغم سعيها للتأكد من دقة كل المعلومات المنشورة، فهي لا تتحمل أي مسئولية أدبية أو قانونية عما يتم نشره.