قصص هتعلم ابنك اللي انتِ عايزاه من غير ما يحس!!
اليكي قصة من القصص التي تعلم ابنك القيم والمبادئ والأخلاق.
قصة النحله لولي وزهرة الأمنيات🐝 (الصبر).
كان يا مكان في وادي بعيد وهادي كان فيه نحله صغنتوتة اسمها لولي؛ لولي كانت نحلة سريعة جداً بتحب تعمل كل حاجة بسرعة كبيرة جداً ؛ في يوم من الأيام كانت لولي قاعدة هي وإخواتها مع جدتهم الجدة نحولة العسولة وكانت بتحكيلهم الجدة وتقول: في قديم الزمان وفي سنة من السنين ظهرت فجأة وبدون سابق انذار وردة صفراء شكلها جميل اوي ومفيش وردة في جمالها ؛ قاطعتها النحلة لولي وقالت: طب يا تيتا يعني الوردة دي بتعمل اي يعني ولا بتظهر امتي ولا اي فائدتها؟ لتقول الجدة: ما انتِ يا لولي لو تصبري هتعرفي إجابة كل اسألتك دي فقالت لولي: ماشي يا تيتا وأنا آسفه علي مقاطعتك قالتلها الجدة: اسفك مقبول يا لولي يلا نكمل، المهم بقا يا أولاد الوردة دي اللي يلاقيها ويتمني أمنيه بتتحقق فوراً بس لازم عشان تلاقيها تدور عليها كتيييير اوي وخصوصاً إنها بتظهر مرة كل خمس سنين
لولي عينيها لمعت وقالت في سرها: ياااه ده أنا لو لقيتها هتمني إني أبقى أسرع نحلة في العالم؛ عشان تفوق لولى من سراحنها على صوت جدتها: يا لولى سرحانة في إيه عشان ترد عليها لولى: ابداً يا تيتا مش سرحانة في حاجة بس هو مكان الوردة دي بيكون فين؛ الجدة: لا دي بقى انتِ بتعرفيها لوحدك.
تاني يوم صحيت لولي حتى قبل الشمس ما تطلع وطارت علشان تدور على وردة الأمنيات، وبدأت لولي تدور وتلف وتطير عدت علي جبال وأنهار وبحار وبساتين لكن الوردة ملهاش أي أثر!! قعدت لولي فوق فرع شجرة زعلانة ومضايقه وكانت بتقول: أنا تعبت بجد! هي فين الوردة دي بقى أنا قاعده أدور بقالي كتييير اوي أنا تعبت خلاص أنا هروح البيت، وقبل ما تيأس لولي وترجع بيتها، و قبل ما تقوم عشان تروح سمعت صوت رقيق و واطي خالص بيقول: "كل حاجة حلوة بتاخد وقت".
بصت لولي حواليها لقت فراشة جميله جداً ألوانها شبه ألوان قوس قزح
قالت لها النحلة: أنا طول عمري بحب السرعة ليه لازم استني على الحاجة علشان تحصل؟
ردت عليها الفراشة بإبتسامة: أنا قبل ما أكون فراشة كنت شرنقة صغيرة؛ استنيت كتييير اوي لحد ما بقيت فراشة جميلة زي ما انتِ شايفه لكن لو كنت استعجلت وخرجت بدري عن معادي كنت هبقى ضعيفة جدا ومش هعرف أطير ولا حتى أعيش
فهمت لولي الكلام كويس جداً وشكرت الفراشة الجميلة وقالت لها: أنا خلاص اتعلمت الدرس وهبقى صبورة من هنا ورايح.
كملت لولي رحلتها في البحث عن زهرة الأمنيات..يوم ورا يوم ورا يوم من غير ما تزهق ولا تتعب لأنها عارفه إنها طول ماهي بتصبر على الحاجة اللي هي عايزاها وبتجتهد عشان توصلها هتوصل لأحلى حاجة؛ وبعد سبع أيام بالظبط لولى كانت طايرة فوق بستان أرض الأحلام وفجأه شافت حاجة بتلمع جريت بسرعة تشوف إيه ده لقت إنها واخيراً زهرة الأمنيات اللي بقالها سبع أيام بتدور عليها قربت منها وهمست وقالت: زهرة الأماني أتمني اني أكون صبورة واستمتع بكل لحظة بعيشها في حياتي..
وبكده اصدقائنا الحلوين تكون النحلة لولي الصغنتوتة اتعلمت الصبر وبقت تستنى عشان تاخد احلى حاجة ويا ترى انتوا كمان هتتعلموا الصبر زي النحلة لولي؟😃
