اغرب تجربة طبية فى العالم للتخلص من الموت الاحمر
مشهد غريب ومرعب:
تخيّل دكتور واقف وفي إيده كورة صغيرة من العجين، مش دقيق عادي، دي معمولة من قشور جلد وإفرازات وبقايا من جسم مريض بيحتضر، ويبص لمراته قبل ما يبلعها.
وهي واقفة قصاده، لا بتحاول تمنعه ولا بتصرخ، بالعكس… بتاخد واحدة زيها وتشرب وراها مية.
ده حصل فعلًا، ربيع سنة 1916، في عيادة متواضعة جنوب الولايات المتحدة، والدكتور اسمه جوزيف غولدبيرغر، والست اللي جنبه مش مجرد زوجة، دي شريكة مخاطرة.
برّه الجدران دي، الجنوب كله كان بينزف بمرض غريب: جلد بيسوّد، تقرّحات توجع، عقول بتتآكل، وفي الآخر موت بطيء سموه “الموت الأحمر”.
الكل كان متأكد إن ده مرض معدي، ميكروب بيتنقل من واحد للتاني، والحل كان دايمًا العزل والحجر والخوف.
أطباء، سياسيين، ناس عادية… الكل مصدّق، إلا غولدبيرغر، اللي كان حاسس إن في حاجة مش راكبة.
ملحوظة هامة:
وهو ماشي في المصحات ودور الرعاية، لاحظ حاجة محدش ركّز فيها: المرضى بيموتوا واحد ورا التاني، لكن التمريض والدكاترة؟
ولا واحد فيهم اتصاب، وده كان لغز، لأن أي مرض معدي معروف، اللي يخالط المريض لازم يتعدي.
هنا ابتدى يبص مش للمرض نفسه، لكن لحياة المرضى، وبالأخص… أكلهم.
لقى إنهم عايشين على دقيق درة ودبس ولحمة مملحة ناشفة، أكل يسد الجوع بس ما يديش حياة.
على الناحية التانية، الطاقم الطبي بياكل لبن وبيض وخضار وأكل طازة، فرق مش بسيط، فرق بين اللي بيعيش واللي بيموت.
غولدبيرغر غيّر أكل المرضى، والنتيجة كانت صادمة: اللي أكل كويس… خف وقام على رجليه.
بالنسبة له، الصورة بقت واضحة: ده مش ميكروب، ده جوع.
بس الاعتراف بده كان معناه الاعتراف إن الفقر نفسه قاتل، وإن نظام كامل سايب ناس تموت، وده كلام محدش كان مستعد يسمعه.
الدليل القوى:
فقال لازم دليل مايتفسرش، تجربة تسكّت أي جدال.
راح لسجن قريب من جاكسون، وقال للمساجين: تخفيف حكم مقابل نظام أكل “خاص”.
خاص يعني نفس الأكل اللي كان بيقتل الناس برّه: دقيق درة، دبس، عصيدة، ومن غير خضار ولا أكل طازة.
شهور وعدّت، والرجالة ابتدت تقع: خمول، طفح جلدي، تشوش، واحد فيهم صرخ وقال إنه شاف “ألف جحيم”.
وهى دى المشكلة:
من غير عدوى، من غير ميكروب، مجرد أكل غلط.
وبرضه اتقال إن في عدوى مستخبية، وإن نظرية الجراثيم لسه صح.
ساعتها، غولدبيرغر قال مفيش حل غير إني أكون أنا الدليل.
التجربة الصعبة:
هو ومراته جمعوا كل اللي الناس تخاف منه: دم، قشور جلد، بول، براز، إفرازات.
خلطوهم، بلعوهم، حقنوهم، شمّوهم، وقعدوا يستنوا.
يوم، أسبوع، شهر… ولا حاجة حصلت.
لا مرض، لا أعراض، لا بلاجرا.
الحقيقة ظهرت عارية: المشكلة مش جرثومة، المشكلة نقص عنصر غذائي صغير اسمه النياسين.
نشر أبحاثه، واتسخروا منه، واتهموه، لأن الاعتراف بالحقيقة كان معناه الاعتراف بالذنب.
كمّل لآخر نفس، لحد ما السرطان أخده سنة 1929 وهو عنده 54 سنة.
مات قبل ما يشوف النتيجة، والبلاجرا فضلت تحصد أرواح لحد الأربعينات، لما عدّلوا الأكل وأثروا الدقيق.
ملايين عاشوا، وهو ما شافش ولا واحد فيهم.
