يحدث ليلا بعد النوم
انا ف كابوس مش بيخلص ولا دا واقع ولازم افهمه
كنت فاكرة انه كابوس…….لحد ما عرفت الحقيقة
انا اسمي ليان عايشة في اسرة بسيطة فيها انا وبابا وماما واخويا نادر عايشين في منطقة ريفية شوية وهي القناطر بيتنا هادي جدا وكله حب ودفا.
انا عندي 22 سنه واخويا نادر 16 سنه كنت لسا متخرجة من الجامعة وبدور على شغل وف يوم وصلتلي رسالة قبول في شغل كنت مقدمة عليه ف القاهرة كان لازم اسيب البيت وانقل القاهرة علشان اكون قريبة من مكان شغلي ف قولت لبابا وماما واقناعهم مكانش سهل الحقيقة بس هما كانو بيحبوني وبيثقو فيا.
نزلت القاهرة وبدأت ادور على شقة بسيطة يكون ايجارها بسيط
ولقيت
شقة صغيرة مفروشة في حواري وسط البلد عفشها كان بسيط بس مش مشكلة اهي اي حاجة ابدأ فيها.
اول يوم بدأت انضف الشقة و ارتب حاجتي وخلصت وقولت انزل اتمشي شوية وسط البلد حلوة بليل وانوارها مبهرة بصراحة بس زحمة ودوشة اوي وانا مش متعودة على كدا,
طلعت تاني قولت اريح شوية واهو انام بدري علشان اصحى فايقة لمقابلة الشغل.
ظبط المنبه على 6 الصبح وحطيته جنبي ونمت
معرفش نمت اد ايه بس لما بصيت على الساعة جنبي لقيتها 3:33 الفجر
مش عارفة ليه بس حسيت كأن في نفس معايا في الاوضة فضلت ابص حواليا مفيش حد بس انا سامعة وعارفة اني صاحية ومش بحلم في صوت نفس عالي
وفاجأة
الصوت سكت وسمعت حد بيهمس بصوت واطي اوي بس انا سامعاه كان بيندهلي
ليااااااااان
اتجمدت مكاني فضلت ابص يمين وشمال لكن بردو مفيش حد بس كل حاجة هديت مفيش حد بيندهلي مفيش صوت نفس بس يبقى انا اكيد كنت بحلم او بيتهيألي
شربت شوية ماية ورجعت نمت تاني
صحيت الصبح روحت المقابلة والحمدلله كل حاجة مشيت تمام كنت مبسوطة وكلمت بابا وماما ونادر وقولتلهم وفرحتهم اني اتقبلت,
قولت اكافئ نفسي واتمشي شوية على النيل هوا القاهرة حلو بردو قعدت على النيل وجبت كباية شاي وبتفرج على جمال المكان
شكلك مش من القاهرة
بصيت ورايا اشوف مين بيكلمني لقيتها ست كبيرة شكلها طيب اوي
قولتلها اه انا من القناطر وجاية هنا ف شغل
قالتلي هي حلوة بس زحمة شوية لو الناس بس تقل هتبقى احلى واحلى
ضحكت وقولتلها هي حلوة علشان اهلها حلوين
ضحكت وشكرتني
استأذنت علشان اقوم وسلمت عليها
مديت ايدي ايديها كانت ساقعة وقالتلي خلي بالك من نفسك يا ليان
ايه
انتي انتي عرفتي اسمي منين
ابتسمت ابتسامة بسيطة ومشيت وسابتني
فضلت واقفة ببص عليها لحد ما اختفت وسط الناس
روحت البيت وكنت نسيت الموضوع او اتناسيته لاني مش عايزة افكر واخوف نفسي يمكن انا قولتلها اسمي وانا مش واخدة بالي
دخلت خدت شاور وقولت ارتاح شوية قعدت على السرير ومسكت موبايلي بس فاجأة عيني قفلت ونمت صحيت مخضوضة ببص في الساعة 3:33 الفجر
طب ازاي انا نمت امتى وازاي واد ايه انا مش فاهمة حاجة
بس فاجأة…………………………………………………………………..يتبع
