يحدث ليلا بعد النوم الجزء الثالث
المرا دي كانت غير كل مرا
بس اول لما الساعة جت 3:33 الفجر
لقيت نفسي اتحركت وقعدت على السرير وعيني كانت مقفولة ابتسمت ابتسامه غريبة خوفتني من نفسي
انا عمري ما ابتسمت كدا
بعدها قومت وخرجت من الاوضة الكاميرا جيباني وانا بخرج برا الاوضة وعينيا مغمضة
دخلت الطرقة اللي بعد الصاله المكان مكانش فيه كاميرات فضلت هناك 5 دقايق وبعد كدا خرجت ورجعت تاني للسرير ونمت تاني
مبقتش فاهمة حاجة
هو انا بمشي وانا نايمة ولا دي مين
لان اللي انا شوفته في الكاميرات مكانش انا
انا كنت نايمة طول الوقت محستش اني قومت ولا اي حاجة
اخدت اجازة من الشغل وفضلت يومين مش بنام قاعدة على السرير ومستنيا اي حاجة تحصل علشان اثبت لنفسي اني متجننتش.
كلمت بابا وماما وحكيتلهم كان حلهم انهم يبعتولي اخويا يقعد معايا
وفعلا ف نفس اليوم اخويا كان عندي بس انا خلاص قررت افضل صاحية….
وفي اليوم التالت الساعه 3:33 الفجر بالظبط
النور قطع
وسمعت نفس الهمس…….بس المرا دي كان واضح
المرا دي قالت “ليه مصممة تعرفي………”
وفاجأة سمعت خبط جاي من تحت السرير
خبطة
التانية
التالتة
وبعدها صوت طفل بيضحك بس كانت ضحكة هزت قلبي دا مش ممكن يكون طفل قلبي كان هيقف مسكت تليفوني ونورت الكشاف بصيت تحت السرير بس ملقتش حاجة
وانا برفع الموبايل شوفته في انعكاس الموبايل واقف وراية اسود وطويل وملهوش ملامح والله انا مش بتخيل بصيت ورايا بسرعة بس مفيش حاجة رجعت بصيت للموبايل تاني لسا واقف طويل جدا ووشه اسود وعينه بيضا لدرجة انها بتنور فاجأة النور جه وكل حاجة اختفت
الشخص اللي كان واقف
الخبط
الهمس
كل حاجة…..
وقعت ومحستش بنفسي ولا بالوقت ولا فضلت كدا اد ايه بس من يومها مبقتش بعرف انام لاني كل ما انام اسمعهم بيهمسو
“انتي خلاص شوفتيه”
ومن بعدها بقيت بصحى الاقي رجلي مليانه تراب واوقات تانيه هدومي تبقى متبهدلة وانا مش فاكرة ايه اللي خلاني اتبهدل كدا بس المشكلة ان اخويا مكانش حاسس بأي حاجة من اللي بتحصل وكنت بخاف احكيله علشان مخوفوش وبدأت اقنعه اني كان بيتهيألي علشان المكان جديد عليا لاني مش عايزاه يتأذي مش عايزة اي حد يتأذي بسببي واتفقنا انه هيرجع لبابا وماما تاني يوم وف نفس اليوم بليل لما دخلنا ننام
اخر حاجة فكراها اني صحيت الساعه 3:33 الفجر وسمعت صوت من تحت السرير
“دلوقتي…….دوري انا اللي انام فوق”
من بعدها محدش شافني تاني اخويا اتصل بالبوليس لما دخلو الشقة لقو الكاميرا شغالة. واخر ثانية في الفيديو… كانت الكاميرا بتتحرك لوحدها تحت السرير وقبل التسجيل ما يفصل….
اتسمع صوتي وانا بهمس: "لو سمعتوا حد بيقولكم متبصوش تحت السرير... اسمعوا الكلام... لأن اللي تحت مستني حد ياخد مكانه."
انتهى
الرجاء تسجيل الدخول لتتمكن من التعليق