اسأل مجرب ولا تسأل طبيب، نصائح هندسية مية مية
اول حاجة لازم تعرفها عن كلية هندسة انها فعلا من اتقل وأصعب الكليات اللي ممكن طالب يدخلها، وتعتبر اشبه بكابوس للي عاوز يدخلها وهو مش بيحبها سواء من ضغط اهل او مش عارف يدخل ايه وعشان كدا قررت اعمل سلسلة لطيفة نتكلم فيها عن يوميات مهندس اتصالات مفحوت هتكلم فيها عن كلية هندسة في العموم وعن القسم اللي دخلته بشكل خاص بحيث اقدر افيد اخواتي الصغيرين اللي ناويين يدخلو الكلية ومفيش حد يضحك عليكو.
اعرفكو بنفسي في الأول:
انا طالب في كلية الهندسة قسم الاتصالات والكترونيات وحاسبات في جامعة حلوان، دي السنة التالتة ليا لسا مخلصها وهخش السنة الجاية السنة الرابعة وحاول تركز معايا عشان اللخبطة تيجي من هنا، الكلية يعتبر 5 سنين وفي ناس مش بتعرف بالموضوع دا وبتاخدها في اكتر من كدا عادي، الحمد لله قدرت اجيب تقدير عام في السنين اللي قضيتها جيد جدا. ودا شئ الحقيقة انا فخور بيه جدا وفخور اني قدرت اعمل دا وسبتني من الناس اللي كانت تحبط فيا وتكسر فيا وفي اللي بعمله، وعشان كدا هديكو شوية نصايح النهاردة يارب تفيدكو في حالة لو دخلت هندسة او اي كلية عملية في العموم.
اسأل مجرب ولا تسأل دكتور :
بداية النصايح بق بسم الله نبدأ 😂😂
1)الثانوية العامة:
لازم في الأول تهيأ نفسك ان الثانوية العامة مش نهاية حياتك بالعكس، دي نهاية جزء صغير من حياتك بيهيأك للي هتقابله في اللي جاي، وهنا تيجي اول نصيحة لو شايف نفسك انك وحش في مواد الرياضة والفيزياء، فالاحسن ليك انك متدخلش هندسة، بحيث ان دا يعتبر راس القفص زي م بيقولو احنا لسا مبداناش دي شوية قوانين ولما تخش هنبدأ نستخدم بق الكلام دا، فأنت لو مش حاببها فالاحسن ليك تشوف حاجة تانية زي كلية الألسن لو بتحب اللغة وهكذا وفي مقالة تانية هكتبها هشرح فيها اهم بدايل لكلية الهندسة لطلبة علمي رياضة ان لم يكن دا هيتغير بعد كدا.
2) المكتبات اللي برا الكلية:
اوعي اوعي اوعي تصدق اي حد يقلك حاجة وخصوصا بق لو من المكتبات اللي برا الكلية، اصل اديني عقلك انا ببيع ملازم وملخصات “اغلبها اي كلام طبعا”، فأنا لازم اديك انطباع عام عن الكلية ان محدش بيفهم منها حاجة وصعبة ووحشة والدكاترة مش بيحبوكو ولا هيفهموكو وهكذا من الكلام الجميل دا عشان ابيع الملازم اللي عندي، ودي الجزئية الخاصة بالملازم.
في جزئية اكبر بق، طلاب ربيع المستقبل طلبة “اعدادي” اخواتنا الصغيرين اللي لسا مش فاهمين حاجة والدنيا ملغبطة عليهم، يجيلهم صاحبنا الجميل اللي لسا متكلمين عليه ويبدأ يبيعلهم اكبر سبوبة بتتعمل المسطرة حرف T والمثلثات، ويكلمهم اد ايه دا حاجة مهمة جدا جدا جدا وانك تشتري من عندي وبس ويبيعلك الحاجة ضعف تمنها الأصلي او تكون حاجة تقليد اي كلام بس عشان هو يكون باعلك صح وخلاك ترتاحله وانت تبقى مبسوط ودي احلى ضحكة وسبوبة هاتعمل عليكو، طب والحل بق انا هقلك اهو….
مبدأيا كدا الملازم متشتريهاش الا لو كان حد من المعيدين هو اللي عملها غير كدا متشتريش ولا يقلك دا واحد صاحبنا مجتهد ولا دا تنين الرياضة خدلك مش عارف ايه،،، خليك في ملازم المعيدين اللي بينزلوها مساعدة لو مفيش متشتريش احسنلك،، عندي ب الأكوام والله وتاني حاجة أدوات الرسم زي مسطرة ال T والكلام دا كله هاتها احسن من مكتبة معروفة وكلنا عارفين زي ايه بس عمرنا م نروح نقول 😂😂 ودا بيبقى مضمون جدا ويفيدك.
3) الطلبة اللي اكبر منك :
بص عشان نبقى صرحاء في الموضوع دا مفيش طالب اكبر منك هيساعدك بجد من غير م يضحك عليك إلا من رحم ربي وخصوصا في كلية هندسة ممكن ميردش عليك اصلا، اصل كل واحد متهان في حياته فمش فاضي يرد عليك مش تناكة والله😂😂.
الأحسن ليك انك تسأل المشرفين اللي في كلية والامن على اللي انت مش عارفه ولو في welcome party حاول تروحها متبقاش زيي عشان متوهش واسأل براحتك، وخليك فاكر دايما انك مسيرك تبقى في مكانهم واكبر من اللي هيخشوا بعديك فمتبقاش نسخة من اللي صعبوها عليك 😂😂😂.
دي بعض النصايح كدا ع الماشي اللي انا فاكرهم الحقيقة والمقالات معانا كتير والكلام مش بيخلص فركز معايا في اللي جاي عشان هجبلك الزيتونة ويدوب اضحكك شوية ع اد ماقدر.
