سمعتو يعيط يا وين

سمعتو يعيط يا وين راكي هزيت السجادة والبساطات وخرجت عندو واشبيك ثقيلة هكذا فرشتلو السجادة والبساطات رحت نجري جبتلو المخايد وجيت لقيتو نحا صباطو وقعد عطيتلو المخايد دارهم تحت ذراعو شاف معايا درتي الغدا درتلو براسي ايه _روحي جيبيلي ناكل بدا يطيحلي السكر باه ندير لانسولين خرجت الكوزينة مزية درت غدا مليح موالفة نقلي غير البطاطا والبيض ناكل مرات مانديرش ڨاع زربت وجدتلو طابلة ديتلو وخرجت عندو حطيتهالو ناض قعد جبتي مغرفة وحدة برك روحي جيبي ماتكليش معايا ،لا كليت كول بصحتك بقيت واقفة وهو بدا ياكل طلع راسو راح تبقاي واقفة فوق راسي هكذا 

اقعدي  شفت كرسي ورايا قعدت عليه كالصنم لا حركة هو ياكل بعقلو هيئتو كلها هيبة وتخوف شاف معايا اهلك انتي وينهم شفت معاه ها_ركزي معايا واشبيك راني نقولك باباك وينو يماك خاوتك ،يما وخويا توفاو اكسيدو وبابا دخل غيبوبة بقا يسقسي  فيا وانا نجاوب دار معايا تحقيق نسيت ماشي هشام وليدو عندهم نفس الاسلوب مرعب يخوفو ونظراتهم كلها شك وحذر  سمعت عمك كان يحوس يزوجك لشيباني شفت معاه بخجل _بنتي راني نعرف كلش عليكم ماتقوليش جا يدي الهدرة من فمي بقيت ساكتة مالقيت مانقولو _وراجلك وينو ،خدام _واش يخدم ،ميكانيسيا _عند من  ،مع واحد صاحبو كراو ڨاراج وراهم يخدم فيه _ملا خلا شي باباه ويخدم مع الناس كنت راح نقولو لاه خليتو يخدم مع باباه وليت نضت نعيطلو ونجي خرجت لشمبرة هزيت تليفون عيطتلو ريبوندا عليا وي حبيبي ،باباك هنا ،بابا انا؟ ،ايه 

_حلي عليه الباب ودخليه لاه مخلياتو برا ،لا دخلتو _حطيلو يتغدا حتى نجي ،حطيتلو راه يتغدا _راني جاي 10 د نكون عندك كوبا رجعت عندو _وينو ،قالي راني جاي بقيت معاه حتى سمعت صوت الباب باه ريحت ماقدرتش نقعد معاه يخوف  شاف معايا نوضي راجلك جا نضت خرجت عندو وجهي صفر من الخوف دخل بالكومبليزو شاف معايا واشبي وجهك صفر_يايما باباك يخوف ضحك لاه كاش ماقالك  ،لا والو بصح يخوف غلق الباب فات عندو السلام عليكم رجعلو السلام  مرحبا بك زارتنا بركة _هيا اغسل ورواح تتغدا معايا _راني جاي فت وراه لدوش نحا الكومبيلزو غسل وانا نهدر معاه باباك علاه جا دار تخنزر فيا ماعجبكش الحال ،لا والله والو مرحبا به بصح قصدي كيفاه حتى جا _ماعلبالييش ضك نشوف مسح وخرج عندو دخلت وراه قعد معاه جيت نقعد دار عندي باباه واشبيك قعدتي نوضي جيبي المغرفة والفرشيطة 

لراجلك باه ياكل بيديه نضت خرجت ماعرف نشعني ولا هذا هو اسلوبو جبتلو وجيت قعدت شاف معايا وشاف معاه حاب نهدر معاك في موضوع عرفت ماحبش يهدر معاه بحذايا دار عندي هشام ديرلنا قهوة بين ما نخلصو خرجت للكوزينة خايفة منو ومن جيتو هنا نخاف يقنعو يطلقني كيفاه ندير درتلو قهوة درتها في بلا وخرجت دخلت عندهم هشام وجهو مايتفسرش يبان مقلق وباباه كشغول يستنا في جواب منو لقيتهم كملو غدوا هزيت البلا تاع لغدا وحطيت لبلا تاع القهوة فرغتلهم حطيت لول قدام باباه وثاني قدام هشام هز راسو شاف معايا بشفقة وحنية حكملي يدي قعدني معاه شروق راهي بالوحم شاف معاه ومعايا مبروك يتربى في عزكم ناض وقف نضنا معاه لبس صباطو نضت عطيتلو المونطو حكمو لبسو خرج وحنا وراح حل الباب دار عندنا خمم مليح في هدرتي _ماعندي مانخمم جوابي معروف _زيد خمم بلاك تعاود تولي في رايك _ماعندي مانخمم _ماتتسرعش لاه ديما مزروب _اقعد تتعشا _اواه دايمة شاف 

معايا يكثر خيرك والنعم منك درتلو براسي ايه لاح يدو جبد دراهم عطاني ، لا يكثر خيرك _احكمي ،لا مانحكمش مانيش محتاجة _علاه قتلك محتاجة احكميهم مني شفت مع هشام لقيتو يتخنزر فيا تاع بالكي تحكمي شاف معاه واش راك تتحلف فيها _لا بصح وصيتها ماتحكمش حاجة من الناس _وانا ناس ؟؟ سكت  شاف معايا هاكي احكمي راح تحشميني وانا في هذا العمر شفت مع هشام دار عندو اعطيها الاذن باه تحكمهم خليني دارلي براسو احكمي حكمتهم كثر خيرك شاف معاه ملا خالد والله ماغلط كي قال ربي رزقو بمراة  ماتتنفسش حتى تشاورو  ضحك هيا تبقاو على خير  دار خرج ولحقو هو  دخلت نلم 

فالمواعين حتى جا دخل درت عندو _واش هدر معاك بابا ،والو بقا يسقسي فيا على دارنا وعليك برك سكت _وانت واش بغا منك _والو بصح وجدي روحك غدوا نروحو لدارنا ،علاه _هذ السمانة عرس سلسبيل لازم نحضر ،روح وحدك انا مانروحش _كيفاه ماتروحيش لازم تروحي ،نسيت واش صرا _مانسيتش بصح لازم نحضر عرس ختي ،عرس ختك احضر انت انا لالا _كيفاه تبقاي وحدك هنا ،وراه المشكل تخنزر فيا والله وراه المشكل ؟؟،مهم انا مانروحش روح وحدك _شروق مانعاودش الهدرة قلت تروحي يعني تروحي صاي ،وشنوو صاي وشنوو بالسيف قتلك مانروحش إذا انت حاب تروح روح انا مانروحش _ نقصي صوتك وما نعاودش الهدرة والعشية نخلص الخدمة نجي نديك تشري واش ناقصك  الصباح نروحو ،قتلك مانروحش _   صاي هذ الموضوع غلقناه جيت نهدر شروووق قلت خلاص يعني خلاص سكت راح لبس ورجع للخدمة بقيت نشوف كيفاه نروح عندهم وين نروح كيفاه يستقبلوني كيفاه نقابلهم ونقابل ناسهم وفاميلتهم  خايفة منهم ومن هدرتهم علبالي راح نكون محط انظار عندهم ومتشوقين باه يشوف العروس لي هربت عند هشام اول لقب راح يطلقوه عليا هو الهرابة