عربية العيش الجزء الاخير
#الجزء_الاخير
#عربية_العيش
ما خلص جرجرها لحد قبر كنت.انا فاتحوله ورماها جواه وردم عليها، وانا عشان راجل طيب، قولت اني هسكت ومش هفتح بوقي باللي حصل، بس كل حاجة وليها تمن.. ابوك كان قايلي انه هيستلف فلوس من كيال لأنهم كانوا عارفين بلاوي بعض، وبعد ما يستلفها كان هيديهالي، بس اديك شايف، لا كيال بقى موجود في الحارة، ولا ابوك بقى موجود في الدنيا من اصله، بس دلوقتي، انا وانت موجودين، وانا ليا حق، وحقي ده لو ماخدتوش، هبلغ وهقول عن اللي حصل وهخلي الولية عواطف تتعرف على جتة بنتها وعلى اللبس اللي كانت لابساه ليلتها واتدفنت بيه، وتخيل بقى لو اهل الحارة عرفوا اللي فيها، ابوك سيرته هتبقى عاملة ازاي، ومش بس ابوك، انت ومراتك وامك وابنك اللي طالع، شكلكوا وسيرتكوا هتبقى عاملة ازاي؟، طب بلاش، المعلم كارع لما يعرف اللي فيها، هيعمل معاك ايه، تفتكر انه هيديك الدكانة بتاعت كيال زي ما بيقول لكل الناس من الصبح، ولا هيعاملك معاملة الكلاب وهيطردك من الحارة؟!.. يااخي دي مش بعيد عواطف نفسها تاكلكوا بسنانها، ومش حبًا في بنتها، لأ، دي عشان كانت هي الفرخة اللي كل يوم بتبيضلها بيضة دهب بسبب مشيها البطال.
لما وصل لحد هنا، قومت ومسكت فيه..
-انت بتقول ايه؟!، انا ابويا...
-نزل اييدك.. ابوك كان راجل ديله نجس وقتال قُتلة، ولو ماعملتليش اللي انا عايزه، هفضحك، ومش بس هفضحك، ده انا كمان هخلي عيالي يطربقوا البيت ده فوق نفوخك.
بعد كلامه وبعد ما ربطت الأحلام اللي بشوفها بكل اللي اتقال، سكتت شوية وبعد كده سألته..
-طب وايه ده اللي انت عايزه؟!
-حُجة المطرح ده، كونتوراتوا البيت، وعدم اللامؤاخذة انت والعيِلة الكريمة، تشوفوا لكوا مطرح تاني.
-وانا اضمن منين ان كلامك صدق؟!
-تعالى معايا وانا اوريك جتة نرجس بنفسك.
واللي عرضه عليا، نفذته، نزلت معاه وروحنا المدافن واتأكدت بنفسي ان جتة نرجس مدفونة هناك، وبعد ما اتأكدت، قولتله اني هعمله اللي عاوزه، يعني هروحله لحد عنده وهديله حُجة البيت بس بالليل، اكون شوفت مطرح ليا ولأهلي، بس وانا ماشي من قرافة الإمام ومروح للغورية، كنت بكلم نفسي، طب ما انا ممكن اكدبه لو جه يفضح ابويا واقول ان هو اللي عمل كده، بس لأ، انا مش قده لا هو ولا عياله ولا قد المعلم كارع، المعلم كارع اللي لما يسأل ويتأكد ان كلام سامي مظبوط، مش بعيد يرميني في الشارع انا وامي ومراتي وابني.. ومع تفكيري في اي حلول، جه في دماغي حل واحد بس، حل هيريحني وهيريح أهلي ويخلي بالي هادي.
بعد ما وصلت الحارة وطلعت البيت، قعدت مع امي ومراتي وقولتلهم ان انا خلاص، مش عايز اعيش في الحارة دي ولا في القاهرة كلها، انا هبيع البيت وهاخد فلوسه وهاخدهم، وهروح لواحد صاحبي في بني سويف، اهو منها بلد رايقة وفيها رزق وناس طيبين، وفي نفس الوقت بعيد عن المكان اللي اتقتل فيه ابويا، وكمان بعيد عن كارع وعن المشاكل اللي بنصحى عليها كل يوم والتاني، ولما امي اعترضت وقالتلي ان البيت ده فيه ريحة ابويا، قولتلها ان انا مابقتش طايق البيت ولا طايق الحارة ولا طايق نفسي طول ما انا هنا، وبعد كلام ورغي كتير، سمعت امي كلامي، ومراتي هي كمان طاوعتني وخدت انا الحُجة بتاعت البيت ونزلت للمعلم كارع، وبعد ما وقفت قدامه وقولتله ان انا مش عايز حاجة وعايز اسيب الحارة وامشي وابيع البيت، حاول يهديني ويقولي ان اللي جاي خير وانه هيقف جنبي، بس انا رديت وقولتله اني خلاص، مابقتش قادر اعيش هنا من بعد اللي حصل لابويا، وبعد ما اتكلمت معاه لفترة وشاف ان انا مصمم على في دماغي، عرض عليا انه يشتري البيت بمبلغ كويس، وفعلًا، بيعتهوله، وبعد ما بيعته بالعفش اللي فيه، خدت عربية كارو ولميت فيها الحاجات المهمة اللي تخصنا، وبعد كده خدت مراتي وابني وامي وسافرت على بني سويف، وبعد ما وصلت، روحت لواحد كنت اعرفه من ايام ما كان بيشتغل في الفرن اللي انا كنت شغال فيها، ولما ابوه مات وورث عنه حتة أرض، ساب الفرن وبقى بيزرع في الأرض واتجوز واستقر في البلد، وانا كمان، بعد ما روحتله، اشتريت حتة أرض متطرفة وبنيت عليها بيت وسيبت كل حاجة ورايا، سيبت الحارة والبيت والناس، وحتى عربية العيش، هي كمان سيبتها، ولحد النهاردة، اهلي مايعرفوش اي حاجة عن اللي حصل لابويا، بس هقول ايه، اكيد في يوم هقولهم واكيد هيعرفوا، وساعتها، هيعرفوا ان كان معايا حق لما سيبت الغورية وجيبتهم على هنا وبدأنا حياة جديدة.
**
-ولحد هنا ياابني، بتخلص حكاية مظهر، حكاية مظهر اللي حكاها لابو جدي هو وكام واحد يتعدوا على صوابع الإيد الواحدة، والكام واحد دول، هم اللي كان مصاحبهم في البلد.
-طب وأهله ياعم جاد، عرفوا باللي ابوه عمله؟!
العلم عند الله، بس انا اللي اعرفه انه عاش ومات واندفن في البلد، وطبعًا سيرة ابوه ماكانتش بتتفتح ولا طاله العار بسببها، وده من الأخر لأن الناس في البلد ماكنوش شافوا ابوه ولا اهتموا بالحكاية من أصله، طب اقولك، ده في ناس كدبته وقالت انه بيألف أي حكاية عشان يبرر وجوده في البلد وظهوره فيها وهو مش منها، بس تعرف، اللي اسمعه
يعني مع الحكاية دي، ان مظهر ده كان طيب اوي، عاش ومات وهو في حاله وعمره ما أذى حد، يلا، الله يرحمه.
-الله يرحمه ويغفرله، بس قولي ياعم جاد، انت شايف مين اللي غلطان في الحكاية دي كلها؟!
-والله ياابني معظم اللي في الحكاية ظلمة، وفي برضه مظلومين، بس خليك فاكر دايمًا، الظالم في حكاية، جايز يبقى مظلوم في حكاية تانية، واللي يبان مظلوم في حكاية، جايز اوي يبقى ظالم في حكاية تانية، اصل الدنيا كده ياابني، دواير، وطول ما احنا عايشين، هنفضل نلف فيها لحد ما نقابل وجه كريم.
-بعد الشر عليك ياعم جاد، بس بقولك ايه، الأكلة كانت طرش.
-اللهي تنطرش ما تسمع تاني يابعيد، قوم يالا، يلا، قوم خلينا نروح، القهوة ابتدت تفضى من حوالينا.
ومن بعد كلام عم جاد، ضحكنا سوا وقومنا، وبعد ما قومنا، حاسبنا القهوجي ومشينا، ولما مشينا وروحنا على البيت عندي، لأني أصريت انه يبات في بيتي ليلتها، حكالي حكاية تانية، حكاية هرجع قريب اوي وهحكيهالكوا.. واوعدكوا اني مش هتأخر، سلام ...
