"ليلة سقوط روما" _ الجزء ٧
*«لـيـلـة سـقـوطـ رومـا».*
*الـجـزء الـسـابـع مـا قـبـل الأخـيـر.*
بعد يومين
طلعت من مكتبها وتوجهت للطابق الارضي اللي موجود في زنزانة وحدة وعليها حراسة مشددة بسبب وجود دون
وقفت قدام العسكري المسؤول ..: افتح الزنزانة
العسكري ..: حاضر حضرة الرائد سهر
فتح العسكري الزنزانة
اطلعت عليه سهر ..: اعطينا شوية خصوصية
طلع العسكري وقفل الزنزانة وراه
وقفت سهر قدام دون ..: وين روما
اطلع عليها دون بلامبالاه..: دايما روما عاملتلك عقدة بحياتك .. وانا عارف ما رح يهنالك عيش غير ما تطلعي روحها بإيدك
سهر بغضب ..: عم اسألك .. وين روما ؟
دون: ما بعرف
عصبت سهر من بروده ..: كل عمرك بتفضلها عنا كلنا
اطلع عليها من فوق لتحت ..: مو من صالحك تفوتي معها بمقارنة .. لانو رح تطلعي خسرانة بكل شي
سهر : لا .. كل عمري احسن منها بس انت كنت دايماً مغمي عيونك ومو شايف غيرها
وقف دون وجر السلاسل ومشى لعندها ببطئ وقرب عليها ..: اثبتيلي العكس ..
توترت سهر من قربو ..: كيف ؟
قرب وهمس بإدنها ..: هربيني من هون .. واللك عليي سلمك روما بإيدي بس اطلع من هون
سهر بصدمة ..: انت عارف وين هي ؟
ابتسم دون ابتسامة جانبية ..: انا اللي مربيها على ايديي
اطلعت بعيونو ..: موافقة
تراجع دون وقعد مكانو ..: بهالسهولة .. ما بتخافي تنكشفي ؟
سهر: رح جهز كل شي وخبرك بموعد التنفيذ قبل بساعات ..
دون: لازم كون طالع من هون باقل من اسبوع .. في بضاعة جديدة كان مفروض استلمها
سهر: كيف يعني .. اساساً انت كنت رح تهرب برا البلد
اطلع عليها نظرة قسمتها نصين ..: دون ما بهرب .. كان تمويه بس ..
سهر : لا تخاف .. خلال يومين ورح كون ناهية كل شي
قربت منو وهمست جنب ادنو ..: اذا بتفكر تغدرني رح اقتلك بإيدي
قرب منها شوي شوي وبحركة سريعة رفع ايده ومسكها من رقبتها وشدها عليه …: مو دون اللي بتهدد يا سهر !!!
انرسمت معالم الخوف على وجهها ..: تتت .. تتركني
دفشها لورا ..: انتبهي لكلامك معي مرة تانية
خبطت على باب الزنزانة لحتى العسكري يفتحلها .. طلعت من الزنزانة وتوجهت للحمامات
وقفت قدام المراي واطلعت على رقبتها .. كانت ايدين دون معلمة على رقبتها .. تحسست مكان العلامة بوجع شديد .. حست كأنو لسا ماسك رقبتها .. غسلت وجهها وتوجهت لمكتبها
دخلت المكتب وطرقت الباب بكل قوة .. وقفت بنص الغرفة ما عم تعرف شو تعمل .. الغُل والحقد بياكلو بداخلها .. عيونها بتنقط سم كل ما تتذكر اسمها ..( روما)..
تمتمت باسمها ..: روووما …رح تبقي بطريقي كل العُمر .. ما رح ارتاح منك ابداً .. دايماً رح تبقي بالمقدمة وانا وراكي .. كل شي عملتلو ياه وما عم يشوف غيرك .. بس لا هالمرة انت حفرتي قبرك بإيدك .. ورح ادفنك انت وحبيب قلبك كريم ..
ابتسمت ابتسامة جانبية كلها شرّ ..
فجأة دخل للمكتب ماجد ..
اطلع عليها وشافها بتتبسم لحالها ..: شبك ؟
تفاجئت من وجودو …: انت من ايمتى هون
ماجد: هلق دخلت .. لي نزلتي عند دون .. ؟
سهر بإرتباك ..: حاولت اخد منو معلومات عن روما !!
ماجد بحيرة ..: روما ؟ مين روما !!
تلبكت اكتر وعرفت انها وقعت حالها بمشكلة ..: ملاك .. طلع اسمها الحركي روما
ما اقتنع ماجد بكلامها ..: وكيف عرفيتي
توجهت لورا طاولة مكتبها ..: دون خبرني ..
ماجد: يعني حكى شي ؟
سهر: لا .. معلومات ما الها اهمية
ماجد: انا بمكتبي اذا احتجتي لشي
هزت راسها بدون ما تجاوب وصارت تقلب بالاوراق
طلع من مكتبها وتوجه لمكتبو
قعد عالكرسي ورجع يتذكر كلام كريم من يومين كان قاعد بمكتبو براجع شوية وراق .. رن تلفونو باسم كريم
ماجد بلهفة ..: كيفك يا صاحبي
كريم: والله مشتقلك .. زمان ما التقينا .. تعال عندي حالاً
ترك ماجد كل شي بإيدو ..: مسافة الطريق .. سلام
طلع من المكتب وتوجه لسيارتو .. ركب وانطلق بطريقو لبيت كريم ..
وصل للبيت وطلع لعندو
ماجد : والله اشتقتلك يا صاحبي
سلمو على بعض بحرارة ..
كريم : ارتاح .. رح اعمل قهوة مشان نحكي عرواق ..
دخل كريم يعمل قهوة .. اخدها وتوجه للبلكون ..قدم القهوة وقعد مقابل ماجد
كريم : شو الوضع بالفرع
ماجد: تمام .. ما رح ترجع ؟
رجع كريم ظهرو لورا..: حالياً لا .. انا انهنت وكل سنوات عملي طارت بسبب وحدة كلبة ..
ماجد : انسى .. اساساً انا ما بعرف هاي سهر كيف نقلوها لفرع مكافحة المخدرات ..
قاطعو كريم ..: لهدا السبب انا طلبت شوفك .. لازم تنتبه منها منيح ..
ماجد بحيرة ..: كيف يعني ؟
كريم : راقبها .. راقب تصرفاتها ..
ماجد بإرتباك ..: لحظة لحظة .. ما عم بفهم عليك .. انت شاكك فيها .. انها ..
سكت وما كمل جملتو بعد ما تخيل السيناريو اللي كريم قصدو عنو ..
اطلع كريم بعيونو ..: واضح انو وصلك المغزى من كلامي
ماجد: مستحيل صدق
كريم بجدية ..: رح نترك كلشي على جنب .. واني كنت مخطط لهروب ملاك .. هي كانت ضلع مهم بالقضية .. هي اساس القضية واعترافها بقتل الضباط كان رح يدين دون اكتر صح .. شو السبب اللي خلى سهر تضرب نار عليها وتقصد تقتلها.. ما في سبب مقنع غير معرفتها السابقة فيها
ماجد : هدا مو دليل
كريم : صح مو دليل بس هدا طرف الخيط اللي لازم نمسكو ونمشي وراه لنصل للعقدة .. ولا تنسى اللي عملتو معي خليه ببالك .. هي شالت حجر اساسي من وجهها
تخربطت افكار ماجد ..: وشو لازم اعمل ؟
كريم: ما لازم تعمل شي هلق .. راقبها بس .. لازم نتأكد من علاقتها بدون اول ونمسك عليها شي ملموس
ماجد بحيرة ..: واذا كانت فرضيتك غلط ؟
كريم : منكون محينا كل شكوكنا ضدها .. بس اهم شي ما تخليها تغيب عن عينك .. وللاحتياط .. حط كاميرا بزنزانة دون .. لانو انا متأكد انها رح تحكي معو وتخطط لهروبو .. كون مستعد لكل الاحتمالات ..
ركز ماجد بعيون كريم ..: بدي اسألك سؤال .. بتعرف شي عن ملاك
نزل كريم نظرو ..: اختفت وما عم لاقيلها طريق
ماجد : معقول ماتت
سكت كريم وما جاوب .. فعلاً ما كان بيعرف وين هي وحاول كتير يمحي احتمال موتها ..
ماجد: لازم نلاقيها .. لازم تساعدنا .. لسا مكان بضاعة دون مو معروف
كريم: رح حاول ..
بـــــــــاك
بسرعة فتح اللابتوب ودخل عملف تسجيل وشغل تسجيل الكاميرا بعد ما حط السماعات ..
بعد وقت سكر اللابتوب بعد ما عاد على تسجيل الفيديو اكتر من عشر مرات لحتى يقدر يستوعب اللي سمعو وشافو ..
مسك تلفونو وطلب كريم ..: كلامك مزبوط .. يلا مسافة الطريق
طلع من الفرع بسرعة وتوجه لبيت كريم ..
__
سكر اللابتوب والابتسامة على وجهو ..
اطلع عليه ماجد بإستغراب ..: شبك!
كريم : يعني احساسي بمحلو طلع .. كل عمري نظرتي ما بتخيب بالعالم …
ماجد: يعني دون زرعها بينا وكان ياخد كل تحركاتنا منها
هز كريم راسو بثقة ..
ماجد: بس انت غلطتت لما قدمت استقالتك
رجع ظهرو لورا وحط ايديه ورا راسوا ..: بالعكس .. انا عملت شي منيح ..
ماجد : كيف يعني ؟
كريم : لما كنت موجد بالفرع كانت تحسب كل خطوة بتخطيها .. بس هلق بعد ما شالت الحجرة الكبيرة من طريقها بطلت تعمل حساب لشي .. ولاحظت كيف كل تصرفاتها مو محسوبة ..
ماجد: شو العمل ؟
كريم بثقة ..: لازم نسمحلو يهرب بدون ما يحس .. بالفيديو قال انو في بضاعة جديدة .. لازم تمسكو متلبس هالمرة
ماجد: وسهر ..!
كريم : نفسي اقلك تركلي ياها .. بس صراحة ما عندي وقت .. بس لازم تمسكها معو .. وانا برأيي لازم اللواء يعرف .. بس يبقى الموضوع سري جداً ..
ماجد: حاضر رح نفذ كل شي ..
كريم : وانا رح اعرف مكان ملاك ورح رجعها معنا
__
قاعدة ببيتها بعد ما سأجرتو باليونان
فكرها مشغول فيه .. ما عاد فيها تطلعو من راسها .. نفسها تشوفو او تسمع صوتو حتى .. قدر بفترة قصيرة يستحوذ على كل تفكيرها
خطرتلها فكرة خطيرة بس قررت تنفذها
حملت تلفونها وحطت على رقمو .. الرقم الوحيد الموجود عندها بالتلفون .. دقت للرقم ونطرت ..
..: الو ..
اخدت نفس ..: كيفك كريم ؟
كريم بإنفعال واضح ..: ملاك
روما بعصبية ..: قلتلك الف مرة اسمي روما
ضحك على جنونها …: انت منيحة .. وين انت .. انت بالبلد
روما: لا ..
كريم : وين انت ؟
روما: صعب قلك وين .. ما بدي اعملك مشاكل
كريم: مو مهم وين انت .. المهم انت منيحة
روما: منيحة .. كريم اشتقتلك كتير
سكت وما رد
روما: انا حبيت اطمن عليك بس .. يلا سلام
قفلت الخط بدون ما تسمع ردو
شتمت حالها بأسواء الشتايم لانها دقتلو واعترفتلو باشتياقها
قامت عن الكنبة وبلشت تكسر وتخبط وتصرخ ..: من ايمتى انا ضعيفة هيك قدام مشاعري .. من ايمتى بمشي ورا قلبي .. يا ربي انا من ايمتى عندي قلب وبدق هيك
وقفت لثواني وحطتت ايدها على صدرها جهة القلب .. : هدا لي بدق بسرعة هيك ..
اطلعت حولها وشافت المجزرة اللي عملتها بعد ما رمت كل شي عالارض ..: مجنونة .. غبية هدا من اللي عملتو طبيعي يدق هيك
توجهت للغرفة التانية .. لبست قفازات البوكس وصارت تضرب على كيس البوكس المعلق بالسقف بكل قوتها
بعد ربع ساعة حطت ايدها على قلبها وفحصت نبضاتها وابتسمت ..: ايه ايه دق هيك من المجهود .. مو مشان شي تاني .. انت موجود بس لضخ الدم مو اكتر .. لا تعملي فيها صاحب مشاعر واحاسيس ملزقة
_____
بغرفة مظلمة ما فيها غير ضو واحد نازل من السقف
كان دون قاعد عالكرسي بكل برود ومقابلو قاعد ماجد
ضرب ماجد عالطاولة …: التزامك بالصمت ما رح يفيدك .. لازم تعترف
دون بكل برود ..: بشو اعترف !! انت قبضت عليي وانا بحاول اطلع من البلد .. لا كان معي ممنوعات ولا مخدرات .. شو عم اعمل هون ما بعرف
ماجد بعصبية ..: شريكتك وين
بنفس البرود..: مين شريكتي ؟؟ ما اللي شركاء انا
ماجد: ملاك
ابتسم دون نص ابتسامة ..: قصدك على اللي كانت معي واحد منكن قوصها .. اكيد ماتت .. انا كيف بدي اعرف .. من وقت ما ضربتو عليها نار ووقعت بالبحر وانا هون معك .. كيف بدي اعرف
ضرب ماجد على الطاولة ..: مين اللي قتل اللواء نزار
دون: ملاك .. وانا عملت اللي عليي .. سلمتكن ياها بس انتو قتلتوها .. ما اللي ذنب .. وكل لواء انقتل ما اللي ذنب فيه .. كلو تنفيذ ملاك
قلب ماجد الطاولة وطلع من غرفة التحقيق
بقي دون على نفس برودو وهمس..: روما …
توجه ماجد للغرفة التانية اللي جنب غرفة التحقيق ..: احترامي .. سيدي متل ما انت شايف مو راضي يعترف بشي .. وكل التهم رماها على شريكتو .. وما في اي دليل عليه .. ما عنا غير تهمة الهروب وبس .. حتى بالقضية الاولى بعد لسا ما فيها حكم
اللواء:..
ماجد: سيدي ما في عنا غير الخطة اللي حطيناها
اللواء: …
____
بعد اسبوع
فتحت عيونها بتعب بعد نوم طويل .. اطلعت عالساعة وكانت اربعة بعد الظهر
شدت جسمها بقوة ..: اللي اخترع المنوم لازمو جائزة كبيرة
قامت عن التخت وتوجهت للحمام .. اخدت دوش دافي
بعد ما خلصت حمام .. لبست تيابها وراحت للمطبخ وعملت فنجان قهوة .. اخدتها وتوجهت للبلكون
لسا بدها تقعد تشرب قهوتها .. سمعت جرس الباب برن
قامت من مكانها وتوجهت للباب .. اطلعت بالعين الساحرة وشافت واحد لابس طقية عليها بيتزا هات ومنزل راسو
استغربت .. هي ما طلبت شي
فتحت الباب شوي شوي لحتى تقلو انه غلطان بالعنوان
فجأة دفش الباب ووقعت عالارض
دخل الشب وقفل الباب وراه
تسارعت دقات قلبها من الخوف وما خطر ببالها شي غير ( دون ) بعد ما شافتو مخبي وجهو بقطعة قماش ومو باين من ملامحو شي
قرب منها الشب وبدون اي كلمة .. مسكها من ايديها ووجعن لورا .. سحبها للكنبة ورماها
سمعت صوت تمشيط المسدس
نزلوا دموعها غصب عنها وهي عم تشوف نهايتها بهاللحظة
التفتت عليه ودموعها على خدودها ولسا بدها تحكي ..
صدح صوت ضحكة بتعرفها منيح
رفع راسو .. كشف عن وجههو .. شلح الطاقية واطلع بعيونها …: لساتك غبية
ورجع يضحك بصوت عالي
كزت على اسنانها وشدت قبضة ايدها.. قامت من مكانها بسرعة وضربتو بوكس على بطنو
ما وقف ضحك .. بالعكس زاد ضحكو اكتر
مسكتو من ياقة قميصو ..: اذا بقتلك هلق .. ما في مخلوق بعرف فيك
قرب منها شوي شوي وطبع بوسة طويلة على شفافها
بدون ارادتها تجاوبت معو..
بعد عن شفافها وحط جبينو على جبينها …: اشتقتلك كتير
لفت ايديها حول رقبتو ..: وانا اشتقتلك كتير
اطلع بعيونها ..: عيونك ما فارقوني ابداً وانت بعيدة عني
روما: بس خطر عليك وجودك معي هون
قرب من ادنها وهمس ..: بعدتي عني سنين طويلة .. ما رح اسمحلك تبعدي اكتر من هيك
اطلعت بعيونو ودقات قلبها مليون ..: كريم .. انا بحبك
اخدها بحضنو وشد عليها ..: وانا بحبك يا روح كريم
__
بعد ساعتين
قاعدة عالكنبة ساندة ظهرها عصدرو وهو محاوطها بإيده ما بدو ياها تبعد عنو ولو لحظة وحدة
التفتت عليه ..: اذا الداخلية عرفت انك عارف مكاني وما بلغت رح تتخذ معك ..
قاطعها ..: انا ما عدت بالداخلية .. قدمت استقالتي وتركت الداخلية كلها
روما: لي؟
كريم: لانو بدي كون معك انت وبس
روما: بس..
كريم: قراري هدا ما كان الو علاقة فيكي .. بس انا هيك بدي
روما: وكيف عرفت مكاني
اطلع عليها بخباثة..: لك طول عمرك غبية ما رح تتغيري .. حدا هربان بتصل لحدا من رقمو الخاص
سكتت شوي وصارت تقلب القصة براسها
كريم بمسخرة ..: لا تتعبي مخك كتير .. من رقمك قدرت اتبع المكالمة واعرف موقعك
ابتسمتلو بحب ..: دايماً كنت الذكي وانا الغبية
كريم بمسخرة ..:الشغلة ما بدها ذكاء .. بس انت مخك ما بفكر ..
روما: وشو ناوي تعمل ؟
اطلع عليها بحب ..: تتزوجيني ؟
للحظة مخها فصل وبطل يجمع ..: شو
كريم بإصرار..: تتزوجيني ..!
لفت وجهها للجهة التانية وضربت حالها كف على وجهها
ضحك كريم على تصرفها ولفها لعندو …: لك شبك .. بقلك تتزوجيني !!
اطلعت عليه بإستغراب
كريم : اعتبر السكوت علامة الرضا؟؟
بقيت على حالتها
اخدها بحضنو ودفن وجههو بشعرها
بعد لحظات قامت من حضنو بسرعة ..: شو قلت !!
كريم بإبتسامة ..: لك شبك يا مجنونة !!
روما بصدمة … بدك تتزوجني .. انا .. لا مستحيل .. ما رح ينفع
وقف قدامها ..: لي مستحيل !!
روما بغضب …: انت مين وانا مين ..
كريم باستغراب ..: شو بتخبصي
روما: انت ضابط بالداخلية وانا مجرمة هربانة من الداخلية .. انت الك اصل وعيلة .. وانا ما اللي لا اصل ولا عيلة .. انت ..
قرب منها وقاطعها بعد ما اخدها بحضنو ..: انسي كل هدا .. وتعي نبلش حياة جديدة مع بعض
بعدت عنو بقوة وفتحت ايدها ..: وايدي الملطخة بالدم .. رح تنسى هاي كمان
مسك ايدها وطبع بوسة عليهن ..: ما بدي ابعد عنك ابداً .. حطي هدا الشي براسك
قرب لعندها .. لف ايده ورا رقبتها ..شدها عليه وطبع بوسة طويلة على شفافها اخدها معو لعالمو الخاص …
___
صحيت من النوم بعدما دخلت اشعة الشمس بعيونها
فتحت نص فتحة واطلعت عالساعة كانت لسا ٦:٣٠
اخدت نفس وزفرتو بقهر ..: لايمتى بدي ابقى هيك .. لامتى النوم بدو يبقى معاديني وما اعرف انام غير بالمهدئات
مسحت على وجهها وقامت عن التخت .. اطلعت عالشباك..: شكلو الطقس لطيف .. لازمها سباحة
طلعت من الغرفة وضربت بحدا ووقعت عالارض .. تسارعت دقات قلبها من الخوف ..
فتحت عيونها وشافت رجلين قدامها .. رفعت نظرها لفوق شوي شوي ..
توسعت عيونها بس شافتو …: كريم .. شو بتعمل هون ؟
اعطاها ايدو ..: شبك صابك فقدان ذاكرة ..
مسكت بإيدو وقامت عن الارض ..: انت ما رحت يعني ..! يعني نمت هون ؟
كريم بمسخرة ..: لا انت مو مركزة ابداً .. تعي تعي اشربي قهوة وصحصحي
توجهت للكنبة واخدت فنجان قهوة
اطلع عليها كريم من فوق لتحت ..: لي هيك شكلك؟
اطلعت عليه بطرف عينها ..: صاحية من النوم كيف رح يكون شكلي
سكت وما رد عليها
روما: انت رح تبقى هون ؟
كريم: روحي خدي دوش اول واصحي وبعدها بدي احكي معك بموضوع مهم
روما بإستغراب..: موضوع؟
كريم: اعملي متل ما قلتلك وبعدها بتحكي
__
حطتت الكاسة من ايدها .. اطلعت عليه بغرابة ..: بدك تسلمني ؟
نفخ بضجر ..: لك شبك .. صرلنا ساعتين بنحكي .. وهدا اللي استنتجتي من كل اللي حكيتو ..
قام من مكانو وتوجه لجنبها تحت نظرات الاستغراب منها
قعد جنبها .. واطلع بعيونها بحب ..: انت بتثقي فيي صح ..
هزت براسها بدون ما تجاوب
حاوط وجهها بإيده ..: انا مستحيل فكر بيوم اني اعمل شي يسبب اذيتك ..
روما بإستغراب ..: لكن اللي بتطلبو مني شو .. بدك مني ارجع عالبلد ..
قاطعها ..: بدي ابدأ انا وانت بصفحة بيضا .. بدي ادفن معك الماضي .. بدي تحطي راسك عالمخدة وانت مرتاحة .. بدي تنامي عادي متل ما الناس بتنام بدون مهدئات ولا ادوية اعصاب .. بدي كمل معك حياتي .. رح ننهي هالمهمة ونسافر مع بعض .. انت مو مطلوب منك شي ابداً .. بس بدنا منك تعرفي وين مستودعات دون .. وين مخبي البضاعة اللي دخلت عالبلد
روما: بس دون عندكن ..
كريم بعصبية ..: مـــلاك .. ركزي معي شوي .. دون هرب ولليوم مختفي .. بدي تدخلي انت عالخط لحتى يبلش يتحرك
نزلت ايده عن وجهها وابتسمت ..: بدك كون الطعم اللي رح تسحبو فيه دون وتوقعوه
اطلع عليها بإستغراب ..
روما : انا موافقة .. بس اللي شرط صغير
كريم بتركيز ..: قولي …
روما :…
____
رجع ظهرو لورا وشبك ايده ببعض ورا راسو ..: يعني انت ناوية تبقي بالبلد بعد ما تخلصي ؟
روما : ايه .. اولاً انا ما ممكن عيش هون او بأي مكان تاني ..
كريم: وتانياً؟؟
روما بتوتر .: وتانياً …
قرب حالو عليها واطلع بعيونها ..: شو تانياً !!!
بلش الحم يطلع لراسها من قربو ودقات قلبها مليون ..: بعِد شوي
قرب اكتر منها ..: ليش .. قربي مو حلو ؟؟
اطلعت بعيونو وغرقت فيهن ..
كريم بحب ..: انا بقلك تانياً .. بدي ابقى معك باقي العمر ..
اطلعت عليه بإستغراب .. دايماً كان عارف اللي بداخلها بدون ما تحكي
حط ايدو بين شعراتها وقربها منو لدرجة ما عاد في مسافة بينهن .. وهمس..: انت بتعرفي اني كنت ناطرك كل السنين اللي مضت .. كنت ناطرك وانا عارف انك ميتة .. بدك مني ابعد عنك هلق وانا عارف انك عايشة .. بس بدي ننهي كل الماضي مع بعض اول
تخدرت بين ايده وهمست ..: وانا معك ..
_____
بعد اسبوعين على هرب دون بمساعدة سهر ..
وصل للمكان اللي كانت موجودة فيه البضاعة على حسب الاتفاق اللي كان بينو وبين شريكو الاجنبي ..
وقف عند باب المستودع .. اطلع حولو بتوتر وتأكد انو ما في وراه حدا بلاحقو ..
دخل المستودع وقفل الباب وراه .. وقف بنص المستودع وعيونو مسلطة على البساط القديم مرمي عالارض ومو بمكانو .. طلع المسدس اللي اعطتو ياه سهر قبل ما يهرب وتوجه لعند باب بالارض .. رفع الباب لفوق شوي شوي ونزل عالسلم بهدوء .. وصل المخزن الارضي ورفع المسدس .. وقف لحظة بعد ما استنشق ريحة عطر بعرفها منيح ..
..: سربراااااااايز
التفت للصوت اللي حافظو متل اسمو وهمس…: روما ..
قربت منو روما وهي عم تصفق بإيديها بحرارة ..: كيفك يا مـــــــــــوديـــــــر !!
انرسمت معالم الصدمة على وجه دون ….
روما بمسخرة…: لي هيك وجهك .. كان المفروض تفتح ايديك وتاخدني بحضنك متل دايماً ..
دون بصدمة …: انت لسا عايشة ؟
روما: ايه .. لي مين قلك اني متت !! بعدين ما زبطت معي روح بلا ما ودعك ..
التفت دون حولو بسرعة
روما : بس ما يكون عم تفتش على شي مهم
قرب منها بعد ما فهم مغزى كلامها ..: وين البضاعة
نفخت روما بالهوا ..: هففف .. بح .. طارت .. بس انا عتبانة عليك .. يعني اول سؤال بتسالني ياه بعد ما كنت مفكر اني متت وين البضاعة .. طيب اسألني شو صار معي بعد ما تقوصت .. مو انا حبيبتك ؟؟
هجم عليها والغضب بنقط من عيونو ومسكها من رقبتها ..: عم اسألك وين البضاعة ..
روما بتأتأه ..: رح تموتني .. تركني ..
شد قبضة ايده على رقبتها اكتر .: وين البضاعة
روما بعناد..: اذا موتني ما رح تعرف وينن ..
بلشت ترتخى ايده عن رقبتها شوي شوي ..
فلتت حالها منو وصارت تتمشى ..: سهر سلمتك للشرطة .. وخبرتن بالبضاعة اللي جاي تشوفها .. وهربتك وبعلم الشرطة لحتى تنمسك متلبس .. بس شوف يا الله عالصدف .. دايماً انا موجودة لانقذك .. جيت قبلك ووزعت البضاعة لحتى ما تنمسك .. وانت كيف بتردلي المعروف .. بدك تقتلني .. حتى قبل ما تعرف وين البضاعة
دون بغضب ..: اختصري .. وحاج تلفي ودوري .. قليلي وين حطيتيهن ؟؟
قربت منو لدرجة انفها لامس انفو ..: بهالسهولة؟
بلش دون يتعرق ..: خلينا نهرب .. قبل لاتيجي الشرطة
روما بهدوء ..: لا تخاف .. بعد بدن وقت ليوصلو .. وهالوقت خلينا نصفي شوية حسابات بينا ..< اشرت بإصبعها عليه وعليها >.. انا وانت وبس
دون بإستغراب ..: حسابات شو ؟؟
روما: حساب قديم ..
توسعت عيونو ورمى المسدس من ايده بس شعر بالسكين بتنغرز ببطنو ..
روما: هدا حساب خيانتك اللي
توسعت عيونو اكتر بعد ما طلعت السكين وغرزتها كمان مرة ببطنو
روما بهمس ..: وهدا حساب عدم ندمك على خيانتي ..
طلعت السكين وكانت رح تغرزها كمان مرة بس مسكها من يدها وشد عليها
دون بصعوبة…: انت مفكرة من السهل قتل دون .. لا .. دون مستحيل ينقتل .. دون مستحيل ينقتل على ايد حشرة متلك
سحب السكين من ايدها بقوة وضربها فيها .. بس بسرعة تفادت الضربة
روما بخباثة ..: كل شي تعلمتو منك خلال هالسنين رح تشوفو هلق قبل ما تموت
بحركة سريعة رفعت رجلها وضربتو على وجهو ..: كنت مفكر انك سهل تتخلص مني يا مـــودير .. انا متل السرطان .. اذا انتشرت بكل جسمك ما رح يكون الك خيار تاني الا الموت .. ورح تموت على ايدي ..
فاجئها بضربة سكين على ايدها ..: رح نشوف مين رح يقتل التاني .. بس بوعدك رح ندمك على كل شغلة عملتيها .. رح ندمك على الساعة اللي وافقتي فيها تيجي معي قبل ١٥ سنة
حطتت ايدها على كتفها مكان الجرح ..: رح نشوف مين رح يندم بالاخر ..
دون: خايف ما تلحقي تندمي يا روح المــودير …
ضربتو برجلها على بطنو مكان الطعنة خلتو يترنح مكانو ..
بس بسرعة استعاد توازنو وردلها الضربة ..
رفعت رجلها وضربتو على ايده وقعت السكين .. ورجعت دفشتو برجلها لورا ومن قوة الدفشة وقع عالارض
بسرعة جابت السكين وتوجهت لعندو .. ضربتو برجلها على وجهو وقعدت فوقو ..: اذا بدبحك هلق ما رح حدا يسأل فيك .. كلب وفطس ..
دون بتعب ..: روما خلينا نهرب انا وانت .. خلينا ننسى كل شي مضى ونبلش من جديد ..
ضحكت روما بكل صوتها ..: بموت فيك لما تترجاني اعفي عنك .. بس انا حقودة .. ما بحب سامح حدا .. انت علمتني يا مـــودير انو اللي طعنك مرة رح يرجع يطعنك تاني وتالت .. وعلمتني كمان اللي طعنك مرة .. حط السكين بقلبو وطالع روحو بإيدك .. بس انا رح اطلع عن الحكمة اللي اعطيتني ياها .. ما رح اطعنك بقلبك ..
حطت السكين على رقبتو ..: رح اقطع العرق وسيّح دمو
مشّت السكين على رقبتو بكل برود .. بدون ما يرفلها جفن
اطرطش الدم على كل وجهها وعلى تيابها .. بعدت عنو وصوت ضحكتها بكل القبو ..: اخرتك كانت على ايدي يا مــودير .. طلعت طالبة نجيبة يا مـــودير …
مسحت وجهها بايديها وإطلعت على الدم ..: لو لحمك حلال يا مودير كنت اكلتك .. بس انت لحمك نجس ..
حملت السكين وبعدها اخدت المسدس عن الارض ..: هدا المسدس لسهر .. يلا مو خسارة فيكي حكم الاعدام ..
وجهت المسدس على دون وضربت عليه نار بدم بارد .. مسحت المسدس من البصمات ورمتو جنب دون .. طلعت عالسلم بسرعة عملت تلفون .. خلال دقايق كانو ثلاث رجال عندها
روما : الكلب بالقبو جيبو عالمكان اللي اتفقنا عليه ..
طلعت من المستودع كلو ..
نفذو رجالها اوامرها ..
بعد وقت وصل ماجد ومعو قوات .. حاصرو المكان بسرعة .. دخلو مجموعة ومعن ماجد للمستودع .. شاف ماجد الطاقة اللي بالارض مفتوحة .. اشر بإيدو للمجموعة لينزلو لتحت
نزل ماجد للقبو وشاف بقعة دم كبيرة عالارض
انتبه واحد من رجال الشرطة للمسدس جنب بقعة الدم .. حملو بحذر وسلمو لماجد ..
اطلع عليه ماجد بتمعن ..صرخ بكل الموجودين …: بسرعة بدي الرائد سهر تكون موجودة بالفرع .. تحركوا..
بعد ما توجهو قسم من العناصر ليفتشو على سهر وقسم التاني بقي بالمستودع ومجموعة باشرو بالبحث عن شحنة المخدارت ..
_____
وصلو لمستودع بعيد كتير عن المدينة
دخلو الرجال ورمو جثة دون عالارض
اشرت روما للشباب ليطلعوا لبرا .. : روحو لبرا .. ومتل ما فهمتك جيب البنت وتعو لهون الليلة مشان نبلش الشغل
قعدت جنب جثتو ..
اطلعت عليه بحرقة ..: انت اللي جبرتني اعمل هيك فيك .. انت علمتني اقتل اي بني ادم بدم بارد .. كل شي علمتني ياه وزرعتو فيي طبقتو عليك بحذافيرو .. بس انت اللي بدأت والبادي اظلم .. اسفة بس مجبورة اعمل هيك .. وما في حدا جبرني غيرك ..
طلعت جواز السفر وقلبت فيه ..: هدا اخر شي منك بقي معي .. رح اتركلك ياه هون .. ما عاد بدي منك شي
حطت جواز السفر بجيتو ..: سامحني ..
توجهت للكرسي القريب وقعدت عليه .. اطلعت عالساعة ورجعت نظرها لجثة دون ..: سامحني بس وجودنا بهالعالم صار مستحيل ..
بعد نص ساعة دخلو ثلاث رجال ومعن بنت
قربت البنت من ووما وحضنتها …: واخيراً رجعتي يا ملاك
حطت روما ايدها على وجهها واطلعت عليها بحزن ..: لسا بتقولي ملاك ..
الصبية : لساتك ملاك ورح تبقي ملاك .. بس ما قلتيلي لي طلبتينا
روما: كنت بدي ودعكن قبل ما روح .. انا مالي محل بهالدنيا
الصبية: لي لتقولي هيك ؟
فجأة طلع صوت سيارات الشرطة .. اكتر من عشر سيارات حاوطت المكان
بلشت معالم الذعر والخوف تظهر على ملامح الرجال بالمستودع
روما : رح اشتقلكن كتير ….
بـــــــــــوم
دوى صوت انفجر .. نار طلعت لفوق بالمستودع .. انفجار قوي ..
بعد ساعة ..
طفى رجال الاطفاء الحريق بالمستودع ودخل رجال من الشرطة بلبس ابيض من فوق لتحت ..
لاحظ واحد وجود خمس جثث متفحمة .. نقلو الجثث للمشرحة
#يتبع..
