يوميات زوج عسوول جدا😍

القصة كما يرويها الزوج 

رجعت من شغلي في حدود الساعة عشرة ونص بالليل لقيت مراتي والعيال نايمين والشقة تضرب تقلب تقريباً نوم اكتئاب.. مع العلم ان مراتي ايديها في الشقة علطول بس عندي العيال عفاريت بمعنى الكلمة انا طبعا متأكد من كدا وكمان حاسس بيها ومقدر شقاها و تعبها معاهم طول اليوم. 
صحتها من النوم أتكلم معاها لأننا كنا متخاصمين بسبب إني مبخرجمهش كتير بحكم شغلي لقتها مقفولة وبترد بالعافية قولتلها خلاص قومي نامي وفعلا  سابتنى ودخلت فورا تنام. 

لازم نحس بيهم شوية :

بعدها بشوية دخلت الأوضة اللي نايمين فيها لميت الهدوم اللي واقعة علي الأرض والألعاب وكنستها وروقتها من غير ما اصحيهم كل دا والنور مطفي كنت تعبان ومكسل كمان بس قولت ماهى طول الوقت بتعمل كدا مزهقتش ولا اشتكت ليه واستمريت 

وتتوالى الأحداث :

طلعت عالصالة "كان شبه ميئوس منها" لميت اللي علي الأرض (هدوم وألعاب وحاجات مطبخ وحاجات تانية غير معلومة المصدر) وشلت السجاد ونفضت الكنب وكنستها وروقتها والحمد لله اتظبطت  طبعا بعد عناء وجهد كبير حقيقى الله يكون فى عونها
قدام الحمام كان في شوية هدوم لأنها كانت بتغسل لميت كل دا و شيلتهم عالغسالة..
دخلت عالمطبخ لميت اللي عالأرض وكنسته وكان معايا حاجات جايبها من بره حطتها في الثلاجة وغسلت المواعين ورصتها ومسحت الأرض بمية وشغلت الراديو على إذاعة القرآن الكريم وفجأة المطبخ نور ❤️..

 

مفاجأة جايبها معايا :

كنت جايب بطاطا معايا وانا جاي غسلتها وحطتها في الفرن اول ما الريحة بدأت تنتشر بدأو يدخلوا عليا المطبخ.. البطاطا لا تقاوم ..
مراتي قامت وشها بيضحك ونفسيتها احسن بكثير " مش عارف علشان اتفاجأت بالشقة ولا علشان ريحة البطاطا 😂 " وجت علشان تساعدني بس كنت خلاص خلصت الحمد لله ولا كأننا كنا متخاصمين فجأة كدا وفى مينت كل الزعل والنكد والملل انتهى وأصبح مكانه فرحوتفاؤل  وروح حلوة فى البيت كله والدفء الأسرى حسينا بيه كلنا من تانى. 

ساعد على اد متقدر :

مش عيب إنك تساعد مراتك علي قد ما تقدر لو هتغسل حتي اطباقك اللي اكلت فيها او تنظف يوم البيت بدلها او تريحها ولو لبعض الوقت وتقول لها كل الموظفين بياخدوا إجازات ومن حقك انتى كمان انى اريحك ومش عيب انك تشكرها اتعبها وتقول لها تسلم ايديكى وكتر الف خيرك من غيرك كنا هنعيش ازاى. مش عيب انك تساعد على اد متقدر هتلاقيها معاك اتغيرت للأحسن فى كل شئ وعمرها ماهتنسى جميلك وفضلك عليها.

ختاما :

الرسول عليه الصلاة والسلام كان في خدمة اهله وقال خيركم خيركم لأهله وانا خيركم لأهلي.. وأحب الأعمال إلى الله سرور تدخله على مسلم فما بالك ان كان المسلم دا أهل بيتك..
انا مش بدعي المثالية بالعكس احنا بنتخانق يوم اه ويوم لأ بس مش كله ضرب ضرب 😂 كفاية الدنيا وقرفها
مقولكمش بقي البطاطا طلعت تحفة