خصام هادئ بين زوجين

الحوار بين الزوجين :

_أنتَ بتزعق ليه دلوقتي

دخل وقفل الباب جامد 

_ كمان مش عجبك، يعني اعيه ألاقيكِ بتفتحي الباب بشعرك 

حاولت أبرر موقفي رغم إني عارفة بل متأكدة إني غلطانة

_ يا" عمرو" مهو محدش غريب إلي هيجي وكمان ده معاد رجوعك 

فأكيد أنتَ 

رمى الشنطة من إيده اتكلم بصوت حاول ميكونش عالي 

_ والله وده مبرر يعني طب افرضي كان حد من الجيران؟ 

أو البواب أو حتى أنا بس معايا حد 

ليه تفتحي بشعرك يعني ي “الاء”

_ يا عمرو والله نسيت معلش 

قرب ميفرقش بينا غير خطوة 

_ معلش! يعني ايه معلش اصرفها منين أنا قلت أكتر من مرة 

متفتحيش بشعرك ولا تخرجي البلكونة بشعرك 

حصل ولا محصلش!؟ 

نزلت راسي ورديت وأنا مضايقة من نفسي  لأنه فعلًا حذرني كتير 

_ حصل 

_ ومش بتسمعي الكلام ليه ولا هو كلامي مالوش لازمه ياست هانم! 

رفعت راسي 

_ أبدًا والله بس نسيت يا عمرو

بصلي شويه وسبني ودخل الأوضة وهوا متعصب 

كنت عند "حماتي" تحت على ما يجي من الشغل والباب خبط 

ففتحت بشعري نسيت ألبس الطرحة 

وهو حذرني أكتر من مرة لكن أنا نسيت 

حضرت الغدا إلي كان عبارة عن مكرونة بشاميل 

علشان بيحبها خبطت على الباب كان خلص صلاة 

بصلي ومتكلمش 

_ الغدا جاهز يا حبيبي 

اتكلم وهو بيفتح اللاب توب بتاعه 

_ مش عايز أكل 

اتنهدت واتحركت وقعدت جمبه 

_ لو سمحت أنتَ أكيد جعان قوم اتغدى، ولو مش حابب 

أكل معاك هبقى أكل لوحدي وهسيبك تتغدى براحتك  بس لو سمحت قوم  اتغدى 

نهيت كلامي وأنا بعيط مش متعودة أنه يعلي صوته ولا 

على أسلوب كلامه مش بحبه يزعل مني جيت أقوم لكنه مسك إيدي وقعدني تاني 

_ بتعيطي ليه دلوقتي

بكايا زاد ومتكلمتش

اعتراف من الزوجة :

حوطني بإيده واتكلم وهو بيمسح دموعي 

_ أنتِي عارفة إنك غلطانه صح 

_ أيوه بس والله نسيت 

_ بعد كدا خدي بالك يا "الاء"علشان أنتِي عارفة أنه حرام وإني بغير عليكي 

_ والله حاضر أنا أسفة 

باس جبيني 

_ أنا أسف علشان صوتي علي عليكِ وخليتك تعيطي

كمل وهو بيمسح دموع على خدي 

_ وبعدين ايه هتكلي لوحدك دى من إمتى وعمرو بيعرف ياكل من غير" حبيبته" 

_ مانتَ زعلان مني ومش عايز تتغدى

_ مقدرش أزعل منك، بس عاملة غدى ايه 

ابتسمت له 😊

_ مكرونه بالبشاميل علشان عارفة إنك بتحبها 

قام وقف واتحرك علشان يخرج من الاوضة 

_ بصي أنا رجعت في كلامي أنا هاكل لوحدي 

مشيت وراه كان وصل وصل للسفرة تقريبًا جري مش مشى 

_ كدا يا عمرو، وقفت عند السفرة واتكلمت 

_ أنا ولا المكرونه يا عمرو

ساب الشوكة من إيده قبل ما ياكل واتكلم 

_ ده كلام يا عيوني، أكيد البشاميل🙂

_ والله بقى كدا 

ضحك _ خلاص بقى هتعيطي تاني أنا بنكشك بس 

عمرو مالوش حبيب غيرك  والله 

خلصنا أكل وعملت شاي بالنعناع وطلعنا البلكونة 

_ اتفضل الشاي 

_ تسلمي يا عيوني

اتكلم بعد فترة 

_ الاء  تعالى نلعب شطرنج يلا 

_ لا أنتَ بتغلبني على طول 

اتكلم وهو مركز في عيوني

_ طب مانتِ غلبتيني من أول يوم بنظرة عينك ومتكلمتش

ضحكت على حبيب عيني ده

_ لأ كدا هروح أجيب الشطرنج 

كشر 

_ يعني أنا بقولك كلام لطيف وأنتِ متروديش مش جدعنة دي .

ضحكت وأنا بديله الشطرنج 

_ يلا بس علشان تكسبني زي ما كسبت قلبي كدا ❤️❤️❤️

خاتمة :

من العقل الاعتراف بالخطأ ومحاولة اصلاحه فى الحياة الزوجية بالذات ينبغى مراعاة ذلك جيدا حتى لا تتعقد الأمور  وتتفاقم المشاكل.