الوحش القاسي واروي
الوحش القاسي "))🐾🥺
أروى 20 سنة، كلية آداب، دماغها كلها فضول.
طلعت رحلة جامعة 3 أيام في غابة الفيوم "وادي الريان" مع صحابها: نور، مريم، وكريم.
اليوم التاني، كريم اقترح: "نستكشف الشلال اللي ورا الجبل؟"
أروى اتحمست أكتر واحدة: "يلا بينا".
وهما ماشيين، أروى سرحت في التصوير ونسيت نفسها... لفت لورا ملقتش حد.
الصحاب كلهم بعدوا وهي تاهت في ممر شجر كثيف.
الموبايل فصل شحن. الدنيا بدأت تضلم.
أروى صوتها اتنبح وهي بتنادي: "نور! كريم! حد يرد!"
مفيش غير صوت الهوا والشجر.
وهي بتعيط من الخوف، شافت نور ضعيف جاي من كوخ خشب قديم نصه مداري بالشجر.
خبطت على الباب بإيد مرعوبة: “حد هنا؟ أنا تايهة... والنبي ساعدني”
الباب اتفتح. واقف قدامها راجل طول بعرض، في التلاتينات، دقن خفيفة، عينه عسلية حادة بس تعبانة. لابس هودي بسيط وبنطلون جينز. شكله مش بتاع غابة خالص... شكله فلوس.
بص فيها من فوق لتحت بهدوء: "إنتي مين؟ وبتعملي إيه هنا لوحدك الساعة 7 بالليل؟"
صوته هادي بس يخوف.
أروى بلعت ريقها: "أنا أروى... تايهة من صحابي. ممكن أبات عندك الليلة دي بس؟ أوعدك همشي الصبح بدري"
الراجل سكت ثانيتين، وبعدين فتح الباب أكتر: "ادخلي. اسمي عمر. بس في شرط واحد: بعد المغرب مفيش خروج من الكوخ. الغابة هنا بليل مش لعب عيال".
أروى دخلت. الكوخ من جوا صدمة: مكتبة ضخمة، لاب توب جيمينج، قهوة غالية ريحتها مالية المكان... وشاشة كبيرة عليها خريطة شركات وبورصة.
أروى بصتله وهي مذهولة: "انت... ساكن هنا؟"
عمر صب كوباية شاي بالنعناع وحطها قدامها من غير ما يبصلها: "أنا عندي شركات برا. مليارات. بس زهقت من الدوشة والوشوش المزيفة. جيت هنا عشان الهدوء يقتلني ببطء... بدل ما الناس تقتلني بسرعة".
أروى مسكت الكوباية وإيدها بتترعش: "وإنت مش خايف تعيش لوحدك كده؟"
عمر بص في عينيها أول مرة، عينه وجعتها: "كنت خايف... لحد ما انتي خبطتي على الباب".
البرق ضرب برا والشبابيك اتهزت.
عمر قفل الستاير وقال بحدة: "من هنا لحد الصبح انتي أمانة عندي. بس لو سمعتي أي صوت برا... إياكي تردي عليه".
أروى نامت على الكنبة وخايفة. بس قبل ما تنام سمعته بيهمس لنفسه وهو باصص للشباك: "أخيراً حد دخل قلبي... حتى لو صدفة
ک/ ساره حسن. الساعة 2 بالليل. الرعد بيكسر الشبابيك.
أروى صحيت مفزوعة على صوت حاجة بتخبط في باب الكوخ الخشب "طااخ طااخ" كأن حد بيكسره بكتافه.
عمر قام من مكانه في لحظة، سحبها من دراعها وحدفها ورا المكتبة: "قلتلك مفيش خروج بعد المغرب! وقلتلك لو سمعتي صوت مترديش!"
صوته كان قاسي لدرجة أروى اترعشت.
أروى بصوت مخنوق وهي ماسكة دراعها من القبضة: "بتوجعني! أنا عملت إيه؟ أنا خفت!"
عمر لف وبص في عينيها، عينه كلها غضب بس وراه وجع: "الخوف ده اللي هيقتلك يا أروى. انتي فاكرة نفسك فين؟ فاكرة إن دي رحلة جامعة وتضحكي وتصوري؟ برا الباب ده في حاجات بتقلد صوت صحابك بالظبط عشان تطلعي وتتاكلي".
أروى عيطت بحرقة: "طب وليه جايبني هنا أصلاً؟ كنت سبني أموت برا! على الأقل هموت وأنا حرة، مش محبوسة مع واحد قاسي وبيزعق!"
الكلمة نزلت على وشه زي القلم.
عمر سكت ثانيتين. الغضب نزل من وشه واتبدل بحاجة كسرته هو شخصياً.
قرب منها خطوة، قعد على ركبته قدامها وهي قاعدة على الأرض. مسك وشها بإيدين الاتنين بس براحة المرة دي:
"قاسي؟ أيوه أنا قاسي يا أروى. عارفة ليه؟ عشان الدنيا برا علمتني إن الطيب بيتاكل. عشان كل اللي حبيتهم في حياتي سابوني ومشوا لما عرفوا إني فلوس بس. عشان آخر واحدة قالتلي بحبك... سرقتني وهربت. فبقيت قاسي عشان محدش يوجعني تاني".
أروى شهقت: "وأنا ذنبي إيه؟ أنا تايهة ومرعوبة وجاية تستقوى عليا؟"
دموعها نزلت على إيده.
عمر مسح دموعها بإبهامه، صوته وطي وبقى مجروح: "ذنبك إنك أول بنت من 5 سنين تخبط على بابي ومتهربش لما تشوف وشي. ذنبك إن صوتك وانتي بتترعشي صحاني من موت كنت عايشه. أنا مش بزعق عشان أكسرك... بزعق عشان لو طلعتي برا دلوقتي مش هلاقيكي تاني. ولو موتي برا... أنا هموت هنا".
الخبط على الباب وقف فجأة. وبعدها جه صوت نور صحبتها بالظبط من ورا الباب: "أروى افتحي! إحنا لقيناكي! افتحي يا بنتي بموت من البرد!"
نفس النبرة، نفس الضحكة، كل حاجة.
أروى جريت على الباب: "نور؟!"
عمر سبقها ومسك دراعها بقوة وشدها لورا ولبس في الحيطة. ظهره هو اللي اتخبط بدلها.
أروى صرخت: "سيبني! دي صاحبتي!"
عمر مسك وشها وغصبها تبص في عينه: "اسمعيني كويس. لو فتحتي الباب ده... لا انتي هتشوفي نور تاني، ولا أنا هشوفك. ده مش صوتها. ده صوت الغابة. الغابة بتاخد صوت أغلى حد عندك عشان تطلعي برجلك".
الصوت برا اتغير وبقى توسل: "عمر والنبي افتح... أروى بتموت... افتح".
بس المرة دي كان صوت أمه اللي ماتت من 10 سنين.
عمر قفل عينه وعض على شفايفه لحد ما دم. حضن أروى لصدره جامد عشان متسمعش: "شايفة؟ قاسي عشان بحميكي. بكرهيني بس عيشي".
أروى وهي في حضنه سمعت قلبه بيجري كأنه هيطلع من مكانه. همست في ودنه: "أنا مش هكرهك... بس متوجعنيش تاني".
الفجر جه. الصوت اختفى.
عمر سابها وقام عمل قهوة، إيده بتترعش.
حط الكوباية قدامها وقال من غير ما يبصلها: "الصبح صحابك هيلاقوكي. تاخدي شنطتك وتمشي. كأني سراب".
مسكت الكوباية ووشها نزل: "حاضر".
بس قلبها كان بيتقطع. لأول مرة تحس إنها مش عايزة تمشي.
