الحمله الفرنسيه علي مصر

الحمله الفرنسيه علي مصر 

اسبابها و فترتها

ليه مصر بالذات؟ السر في إنجلترا!

في سنة 1798، نابليون بونابرت كان قائد شاب وطموح جداً في فرنسا. فرنسا ساعتها كانت في صراع طاحن مع بريطانيا، وبما إن بريطانيا كانت "ملكة البحار" ونادراً ما حد يقدر يغلبها في المية، نابليون فكر في فكرة قطع الاتصال بين بريطانيا و مستعمرتها عن طريق حرب البر و سبب اختيار مصر كان ان مصر  هي شريان الحياة اللي بيوصل إنجلترا بأهم مستعمراتها في الهند . 

 فرنسا كانت عاوزة تعمل لنفسها موطئ قدم قوي في الشرق الأوسط وتسيطر على البحر الأبيض المتوسط .

و كان لضعف الدولة العثمانيةدور في سهوله احتلالمصر : مصر ساعتها كانت اسمياً تابعة للعثمانيين، لكن اللي يحكمها فعلياً هما المماليك، والبلد كانت تعبانة واقتصادها متراجع.

مراحل الزحف الفرنسي لاحتلال مصر

دخل نابليون مصر من بوابة الإسكندرية بعد مقاومة بطلة من حاكمها محمد كُريّم، وبعدها اتجه للقاهرة. وهنا حصلت مواجهة من أشهر المواجهات في التاريخ: معركة إمبابة (أو معركة الأهرامات).

المماليك بفرسانهم وسيوفهم وسلاسلهم الجذابة هجموا بروح قديمة، في المقابل الفرنسيين كانوا واقفين بأسلحة حديثة وتنظيم عسكري صارم. النتيجة كانت هزيمة ساحقة للمماليك، وهروب مراد بك للصعيد(الفيوم) وإبراهيم بك للشرقية، ونابليون دخل القاهرة بكل سهوله.

اسباب اضعاف الحمله و تغير الحسابات 

معركة ابوقير البحرية : الأسطول الإنجليزي بقيادة "نيلسون" جه ومسح الأسطول الفرنسي تماماً في شواطئ الإسكندرية. بكدة نابليون وجيشه بقوا محبوسين جواه مصر ومقطوعين عن فرنسا.

ثورات القاهرة (الأولى والثانية): مقاومه المصريين أهالي الأزهر والمناطق الشعبية عملوا ثورات جبارة وضايقوا الاحتلال، ودفعوا ثمنها غالي من دماء الشهداء.

مقاومة أهالي الصعيد: أهل الصعيد استخدموا حرب العصابات(حرب الشارع) ودخوا الجيش الفرنسي في المتاهات.

سلاح في إيد.. وكتاب في الإيد التانية

اللي يميز الحملة الفرنسية إنها مكانتش عسكرية بس؛ نابليون جاب معاه أكتر من 160 عالم وفنان ورسام في كل المجالات. والنتيجة كانت:

حجر رشيد: الاكتشاف اللي غير تاريخ العالم بعد ما قدر العالم الفرنسي "شامبليون" يفك رموزه، وعرفنا نقرأ اللغة المصرية القديمة.

كتاب وصف مصر: موسوعة ضخمة وثقت كل صغيرة وكبيرة في مصر: النباتات، الآثار، العادات، والمجتمع.

تأسيس المجمع العلمي: بداية دخول الفكر العلمي والأجهزة الحديثة لمصر.

نهاية المحاوله الفاشله لاعاقه لبريطانيا 

بعد فشل نابليون في حملته على الشام وتراجع جيشه أمام أسوار عكا، قرر يرجع فرنسا سرّاً وساب القيادة للجينرال كليبر. كليبر اتقتل في القاهرة على إيد الطالب الأزهري سليمان الحلبي، ومسك بعده الجينرال مينو اللي اضطر في النهاية يوقع اتفاقية الجلاء سنة 1801 وتخرج الحملة تماماً بعد 3 سنين بس.

رغم إن الحملة الفرنسية استمرت فترة قصيرة جداً (من 1798 لـ 1801)، إلا إنها كانت الرجة اللي فوّقت مصر من نوم عميق استمر قرون تحت الحكم العثماني والمملوكي، وفتحت الباب لظهور محمد علي باشا وبناء مصر الحديثة.