ضد مجهول (من القاتل؟ الجزء الثاني)
الجزء الثاني...
هتعمل كل حاجة لوحدك ، لان المكان اللي هتروحه محدش غيرك يقدر يقرب منه
ـ اشمعني انا ؟
ـ مش كل اللي هيقربوا من المكان دا محصنين زيك
ـ تقصد بالتحصين الوشم اللي علي ضهري !!
ـ بالظبط
وانا مش طالب منك كتير
الليل هييجي هتتسحب لحد هناك تدور علي المكان المرصود فيه القبر
تحفر علي القبر وتطلعه وبعدها هتلقي جثة مكفنة بكفن اسود تفك الكفن من عند الرجلين ، وحذاري تفك الكفن من علي وشها
بعد ما تفك الكفن من عند الرجلين ترفعه لحد البطن هتلقي البطن منفوخة وكبيرة
تشقها وتطلع الصرة الكبيرة اللي جواها وتجيبهالي
ـ وبس !!!!! ثانية واحدة علشان انت شكلك كدا مش مدرك انت طلبت مني ايه من تلات ثواني
انا هروح مكان انا مش عارفة المفروض وفي المكان اللي انا مش عارفه دا هدور علي قبر تحت الارض ويا عالم هلقاه ولا لا
وجوا القبر اللي واضح جدا انه من قرون فاتت دا هلقي جثة مش متعفة ولا هيكل عظمي لا دي جثة لسة زي ما هي وهفتح بطن الجثة دي وهطلع اللي جواها واجي لك بيه !!!
هو انت معملتش حساب اني ممكن ارفض ؟؟ عادي انا هستحمل الالم اللي في ضهري لكن استحاله اعمل كل دا
انا ان كنت وافقت فوافقت علي اساس ان حد هييجي معايا والموضوع كله مش هيتعدي دقيقة جوا قبر وهطلع لكن لما الامور توصل لكدا يبقي بنتحر
ـ هتوافق ....
حسيت بالنار قامت في جلد ضهري وبقيت بتلوي من الالم زي المرمي في نار جهنم كأنه ولع النار في ضهري كتحذير ليا
ـ موافق موافق .....
بعد شوية نده علي الراجل اللي شغال عنده وقاله هيوريني المنطقة اللي المفروض هروح احفر فيها وبعدين هيسيبني ويرجع ويستنوني في البيت ارجعلهم ومعايا الصرة اللي هطلعها
استنيت لحد بالليل في بيت الشيخ وبعد نص الليل طلعت ملثم من البيت ورا الراجل اللي شغال عنده
لاول مرة احس اني مشيت في طريق تاني مختلف عن اللي جيت منه
كأنه المكان كله كان غير اللي انا شوفته بالنهار
المهم مشينا مسافة ربع ساعة وبعدها وصلنا لمكان علي اطراف المدينة
منطقة كبيرة واسعة فيها اكوام زبالة وحجارة كبيرة في كل مكان
وهناك الراجل وقف وقال : هتكمل لوحدك واانا هرجع
مستناش حتي اني ارد عليه ومشي علطول
الدنيا ضلمة وانا في المكان المقطوع دا لوحدي
مش عارف ليه كل ما كانت تيجي فكرة الهروب في دماغي احس بوجع في ضهري
كأن الشيخ دا كان جوا عقلي طول الوقت وبيقرأ افكاري عشان يقيدني بالطلب اللي هو عايزه
الالم مكانش مدي دماغي اي مهلة تفكر فيها في اي حاجة
كنت محتاج افكر قبل ما اخطي خطوة واحدة جوا المكان اللي انا فيه دا بس مكنتش قادر من الالم اللي كان بيزيد كل شوية في ضهري
مكانش قدامي اي حل الا اني امشي واعمل اللي قالي عليه بالحرف الواحد
" امشي وسط الارض الميتة والمكان اللي هتحس فيه ان الالم اللي في ضهرك راح هو اللي تحفر فيه وهتلقي المراد هناك "
الالم كان متملك مني في اللحظة دي وخطيت اول خطوة في المكان ومشيت فيه بدور وسط اكوام الزبالة والحجارة
مش عارف ليه بعض الاماكن كنت بحس ان رجلي بتروح ليها بطريقة لا ارادية
حركة عفوية كدا غير مفهومة !!!
طول الوقت كنت حاسس ان فيه عيون مراقباني
الالم مكانش بيقل ابدا ... كان بيزيذ كل ما امشي اكتر
لقيت تقريبا المكان كله لحد ما جبت اخري ومكنتش قادر امشي خطوة تاني
والالم في ضهري زي ما هو مبيقلش
وقتها حسيت بدوخة واني بفقد الوعي تدريجيا
وبقيت بشوف اكوام الزبالة والحجارة بتتحرك قدامي
بعدها اكوام الزبالة دي بقي تطلع منها ناس عريانة بتجري في المكان زي المجانين
في نفس الوقت الحجات بتتفلق ويطلع منها مخلوقات بديول وقرون وكل واحد فيهم ماسك في ايده حربة بتلات رؤوس وبيجروا ورا الناس اللي طلعت من اكوام الزبالة
وكل اللي بيلحق واحد فيهم كان بيدب الحربة في رقبتة وبمجرد الحربة ما تلمسه كان بيتحول لتمثال حجري
تمثال مخيف فاتح بوقه وبيصرخ ، بيمثل نفس الطريقة المخيفة اللي مات عليها الهلع والرعب كان مالي المكان خصوصا ان اصواتهم كانت كلها في دماغي زي االاجراس
والشياطين كانوا بيجروا بيطلعوا من كل مكان مش عارف ازاي
الصراخ كان جاي من كل حتة
والدم والحجارة المكسرة مالية الارض وفي وسط دا كله لقيت شيطان ضخم جاي من بعيد ورافع حربته وموجهه ناحيتي
جريت زي المجنون وانا بصرخ ومش عارف اروح فين
فضلت اجري لحد ما لقيت كوم زبالة كبير استخبيت وراه
قعدت مكاني شوية وبعدها بمد راسي عشان اشوفه راح فيه لقيته في وشي وبمجرد ما شافني دب الحرب بتاعته في عينيا
صرخت ووقعت علي الارض مش حاسس باي حاجة
دقايق عدت وانا مرمي علي الارض مش حاسس باي حاجة جوايا
بس لما قومت مكنتش سامع اي اصوات او مناظر من اللي كنت شايفها قبل كدا
راحوا فين ؟؟!!!
مستنيتش افكر هما راحوا فين او جم منين يدوبك استجمعت نفسي وقمت عشان اهرب من المكان
بس قبل ما اجري حسيت بحاجة غريبة جدا !!!
الالم اللي في ضهري راح فين ؟ الالم اختفي !!!
بصيت تحت رجليا ............. هو دا المكان !!!
مش عارف ليه حسيت ان كل اللي شوفته كان كوم واللي انا المفروض اعمله دا كوم تاني خالص نزلت علي الارض وطلعت السكينة اللي كانت معايا وبدأت احفر في المكان
اللي كنت مستغربله اشمعنا المكان اللي مش هحس فيه بالالم هو المكان اللي هلقي فيه الجثة اللي فيها الحاجة اللي الراجل دا عايزها
وقتها افتكرت الحتة اللي قالي فيها انت محصن !! محصن بالوشم دا ضد الجن والشياطين ؟
طب لو محصن ضد الجن والشياطين كان المفروض المكان كله يبقي مفيهوش لا جن ولا شياطين زي ما شوفت من شوية الا المكان دا
لان المكان دا هو المفروض انه مسكون بالجن وان الوشم بيقدر يوقفهم وميخليهمش يضروني
غريبة !!!
فضلت احفر في المكان لحد ما وصلت لاكتر من متر تحت مستوي الارض
ولاول مرة احس ان دماغي حرة في التفكير من غير اي قيود او الم
كأن الشيخ طلع من دماغي نهائيا في المكان دا فكنت بفكر بحرية
بس مكنتش عارف اوصل لاي نتيجة منطقية من تفكيري
يمكن الحاجة اللي حسيت انها ممكن تكون صح هي ان المكان دا مش مسكون بشياطين هيخافوا من الوشم اللي علي ضهري لا
المكان دا مفيش لا انس ولا جن ولا شيطان يقدر يقرب منه
ولما جت الخاطرة دي علي دماغي ايدي وقفت عن الحفر ؟؟؟؟!!!
وجه علي دماغي اسئلة كتير
اهمهم اي هي الحاجة اللي الشيخ عايزها من المكان دا ؟
وليه الحاجة دي مدفونة في بطن جثة ؟
وايه علاقة الوشم بانه يدخل المكان دا من غير ما صاحبة يتضر ؟
واسئلة كتير جدا وغريبة جدا
كنت شايف ان اول خيط لكل دا هو اني الاقي الجثة اللي الشيخ قالي عليها واشوف جوا بطنها ايه
فضلت احفر لحد ما ايديا تعبت وفي الاخر لقيت حيطة صغيرة الطوب اللي فيها متأكل ومش فا ضل منه الا قالب واحد كامل !!!
حيطة !!!
بعدها لقيت الارض بدأت تبقي رطبة اكتر من اللازم وهبدا احفر في الطين
عرفت اني مش هلاقي حاجة في المكان دا
فطلعت من الحفرة ونفضت هدومي بسرعة وطلعت من المكان جري ولما بصيت علي الحفرة اللي حفرتها شفت حاجة غريبة
التراب اللي انا طلعته رجع تاني في الحفرة وردمها ورجعت الار ض زي ما هي كأن شيء لم يكن
واول ما رجلي خطت برا المكان خبطت في الراجل اللي كان جايبني
ـ هاه جبت الحاجة اللي قالك عليها مولانا
ـ ايوة بس يلا بينا بسرعه من هنا
وطلعنا نجري احنا الاتنين من المكان لحد ما وصلنا لبيت الشيخ
وقفت قدامه مش قادر اخد نفسي ولا قادر اصلب طولي
ـ فين الحاجة ؟؟؟
ـ ملقيتهاش
قام من علي الدكة اللي بيقعد عليها زي المجنون وطبق في رقبتي
ـ يعني ايه ملقيتهاش
ـ زي ما بقولك كدا روحت المكان اللي قولتلي ان الوجع هيروح فيه وبدأت احفر ملقيتش اي حاجة الي حيطة صغيرة وبعدها الارض بقيت طرية وهبدا احفر في الطين فمشيت
ـ ازاي !!! القبر لازم يبقي موجود في المكان دا بالظبط
ـ اهو اللي حصل وكدا انا نفذت اللي طلبته مني شيل بقي الوشم وريحني
ـ اريحك !!!! مش هتشوف راحة مني الا لما تلقي اللي انا بدور عليه
والالم دب فيا من تاني وخلاني وقعت علي الارض مش قادر اقوم
ـ تجيبلي اللي انا عايزه اخلصك من الوشم للابد
ـ ماهو انا مش هقدر اوصل للي انت عايزه الا لما اعرف هو ايه بالظبط
صدقني زي ما انت عايز تاخد الحاجة اللي انا بدورلك عليها انا عايز اخلص من الوشم باي طريقة
يعني حاجة قصاد حاجة وانت المستفيد ولما تقولي يمكن اعرف اساعدك واساعد نفسي اكتر
ـ يمكن !!! ليه لا
اللي انا بدور عليه بقالي زمن هو كتاب
ـ كتاب ايه ؟
ـ انت اكيد سمعت عن الحدوتة اللي بتحكي عن الناس اللي كانت بتموت قبل حرب النكسة ؟؟
ـ حوادث القتل اللي كانت بتقيد ضد مجهول في الستينات ؟؟؟
ـ ايوة ... سمعت بقي عن الراجل المغربي اللي قال انه هيعرف المجرمين ويجيبهم
ـ ايوة
ـ واكيد سمعت عن ان الراجل دا كان هيعلن للحكومة عنهم بس قبلها بيوم دليل الادانه بتاع المجرمين دول اتسرق من بيته والحكومة حبسته وعدمته ؟!!
ـ الملفات اللي كانت عنده
ـ مكانتش ملفات زي ما الناس بتقول
ـ امال كانت ايه ؟!!
ـ كانت طلسم
لا تنسي الضغط علي زر المتابعة حتي تصلك باقي القصة
