جريمة ضد مجهول من القاتل (الجزء الثالث)
الجزء الثالث......
ـ طلسم من بتوع التحضير والتسخير !!
واي اللي هيجيب الملفات اللي كانت مع الغريب دا لطلسم بتاع جن وشياطين
انا كل اللي اعرفه عن الحكاية دي ان الراجل دا راح للاماكن اللي ماتت فيها الناس بالطرق الغريبة دي وبيقولوا انه كان بيكتب ملاحظات وحجات شبه كدا
ولف علي كل مسارح الجرايم ودون كل تفصيلة
وبعدها قال انه عرف المجرمين اللي بيرتكبوا الجرايم وهيعلن عنهم
وقبلها بيوم واحد الملفات اللي كانت عنده ضدهم اتسرقت
واتقبض عليه واتعدم بعدها باسبوع بالظبط
ـ نص كلامك صح
هو فعلا راح مكان الجرايم وكتب كل تفصيلة صغيرة عن اللي شافه فيها
بس كان بيكتب اللي عيون البشر اللي زيي وزيك متشوفهاش
ـ تقصد ايه ؟
ـ كان بيشوف علامات الشياطين واثرهم في المكان ويرسمه
وبعدما ما يرسمه كان بيعزم عليه وبعدها يعرف الشيطان دا مين ويوصله ازاي
من مكان لمكان وانتهي بيه الامر انه عرف كل الشياطين اللي كانوا السبب في الحوادث الغريبة اللي كانت بتحصل دي
ـ يعني كان عارف ان اللي بيموت الناس دي جن ؟
ـ وكان بيطارد الجن دول وعايز يوصلهم
ـ مش معقول !!!! انسان بيطارد جن ؟
ـ بيطاردهم وعايز يوصلهم باي طريقة
بعد ما سجل كل علاماتهم واثرهم اللي كانوا بيسيبوه في الاماكن اللي كانوا فيها عرفهم ومن خلال العلامات اللي كانوا بيسيبوها في الاماكن دي كان هيقدر يوصلهم
ـ وطبعا العفاريت اخدوا الورق دا ؟
ـ مش العفاريت اللي اخدوا الورق ؟
ـ امال مين ؟
ـ اللي سرق الورق من بيته كان انسي زيي وزيك لان الجن مكانوش يقدروا يقربوا منه
وبعد ما سرق الورق او الملفات دي اختفي نهائيا
والراجل دا كان فاضلة تكه صغيرة ويتجنن لان الطلسم اللي بيقيد بيه الجن دول كان وسط الورق اللي اتسرق من بيته
وكان عايز يهرب بس ملحقش والحكومة مسكته
ـ وطبعا زي ما بيقولوا عدموه بعدها باسبوع
ـ عدموه ! مين قال انهم عدموه
دا هِرب ......
ـ يعني الملفات اللي الطلسم كان جواهم حد سرقهم من بيت الراجل المغربي دا وهرب ولما مسكوه هو كمان وحبسوه هو كمان هرب
ـ بالظبط !!
ـ وطبعا هرب علشان يدور علي الراجل اللي سرق الملفات من بيته
ـ ومن وقتها محدش سمع حاجة عن الراجل المغربي دا ولا عارفينه راح فين
ـ طب والملفات اللي فيها الطلسم !!
ـ الملفات دي بيقولوا ان الراجل اللي سرقها كان مأمور من شيخ انه يروح المكان الفلاني " بيت الراجل المغربي " ومن هناك يجيب صرة صفرة فيها شوية ملفات للشيخ ويرجع علطول
لكن الراجل اللي راح بيت المغربي وجاب الملفات موصلهمش للشيخ لانه كان سامع الحكايات اللي بتتردد وسط الناس عن جرايم القتل الغير معروفة وسمع الناس اللي بتقول ان اللي بيموت الناس دول هما الجن
ففكر وقال يمكن الشيخ دا هيوصل الملفات دي للجن وهيرتكبوا جرايم تاني اكتر واكتر
ففكر يحرقهم علي اعتقاد منه انه كدا هينهي الحكاية للابد
وفعلا قرر انه هيحرقهم
بس خاف يحرقهم جوا بيته فراح مكان مهجور علي اطراف البلد وحط الملفات في الضلمة وكب عليهم الجار وحط فيهم النار بس الملفات متحرقتش
ـ متحرقتش ازاي .؟
ـ النار كنت مولعة في الجاز اللي علي الورق لكن الورق نفسه محصلوش اي حاجة
لدرجة ان الراجل كان هيتجنن بعدها بيقولوا الشيخ اللي كان قايل له اسرق الملفات دي من بيت اللراجل المغربي ظهر وشق بطنه وحط الصرة اللي فيها الملفات بالطلسم جوا بطنة ودفنه في نفس المكان
من وقتها محدش سمع حاجة عن الملفات هي كمان
ـ طب والراجل المغربي اللي هرب من السجن ؟!!!
ـ محدش عارف هو كمان راح فين ؟
ـ الحدوتو اللي احنا بنحكي فيها دي عدي عليها اكتر من 50 سنة وفي الخمسين سنة دول محدش سمع عن اي حادثة قتل كانت شبه الحوادث دي
ـ يعني ايه ؟
ـ يعني غير ان الحكاية دي ممكن تكون من اولها لاخرها مجرد حدوتة ملهاش اي اساس من الصحة في حاجة غريبة شوية
وهي انت ليه عايز توصل للملفات دي ؟؟؟ او بمعني اوضح ليه عايز توصل للطلسم دا ؟
ـ وقت الاجابات انتهي بالنسبالي زي ما وقت الاسئلة انتهي بالنسبالك والمطلوب منك دلوقتي هو انك تنفذ اللي انا عايزة منك
ـ انا مش هتحرك خطوة واحدة الا لما اعرف انت عايز الطلسم دا ليه ؟؟
وايه يفرق بينك وبين الشيخ اللي خلي الراجل يسرق الملفات بالطلسم
طالما هو كان مأمور من الجن انه يسرق الطلسم يبقي انت كمان مأمور زيك زيه بالظبط يعني لنفس الغرض
ـ لو انا وهو مأمورين لنفس الغرض ليه هو لما لقي الملفات حطها في بطن الراجل دا ومحرقهاش او اداها للجن نفسهم
المفروض بقي انا ابقي زي زيه يعني عارف طريق الطلسم دا فين !
صح ولا لا
خلص كلامه وحسيت انه كان عايز يقول حاجة تاني بس وقف علي اخر حرف
او كأنه حاسس انه مكانش ينفع يقول الكلام اللي قاله
مش عارف احساسي وقتها كان صح وقتها ولا لا بس حسيت انه غلط في كلمة اتقالت او كلمة فلتت منه كدا غصب عنه
كلمة مكانش ينفع انه يقولها
ـ زي ما اتفقنا تنفذ اللي هقولك عليه تنجي من المك
بعدها امرني اطلع برا واجي في الوقت اللي هو يطلبني فيه
قبل ما امشي قولتله
ـ انا عندي سؤال واحد
برغم اني ملقيتش الجثة في المكان اللي انت قولتلي ان الم الطلسم اللي في ضهرك هيروح فيه ولما حفرت ملقيتش الجثة ولقيت حيطة صغيرة
دا معناه ايه ؟؟؟؟
اشمعنا الالم زال في المنطقة دي والجثة مكانتش فيها ؟؟؟
مردش عليا وشاورلي امشي
مشيت وانا مش عارف افكر في اي حاجة غير الغلطة اللي هو غلطها اثناء كلامه
الحاجة اللي قالها ومكانش يننفع انه يقولها مش عارف ليه
ومش قادر افتكر كل كلامه عشان احدد بالظبط هو قال ايه
رجعت البيت وانا دماغي بتاكلني عشان اعرف اي حاجة من الكلام اللي قالها
" طالما احنا الاتنين مأمورين من الجن اشمعنا هو لقي الطلسم وخباه وانا بدور عليه "
كان يقصد ايه باالكلام دا ؟!!
يقصد يقصد !!! الله يلعنه ويلعن قصده ويلعن اليوم اللي فكرت اروحله فيه
وفي وسط ما انا بشتم عليه حسيت بالم فظيع في ضهري وكأنة مولع نار
قمت وكنت بلف في الاوضة زي المجنون وبخبط في الحيطان من الالم وكاتم صوت بالعافية عشان محدش يسمعني
كل دا عشان اشيل الزفت الوشم
الوشم !!!!! اي علاقة الوشم باني الوحيد اللي لو روحت المكان اللي فيه الجثة اللي فيها الطلسم مفيش جن يقدر يأذيني ؟؟؟
يبقي الحكاية مش حكاية اني متحصن بقي دي حاجة تاني اكبر !!!!
طلعت بسرعة وندهت علي والدتي وسألتها علي الوشم اللي علي ضهري
حكتلي الحكاية اللي قالتهالي قبل كدا
ـ طيب مش فاكره الشيخ اللي انتي وديتيني عنده كان اسمه ايه ؟
ـ ونبي يا بني ما فاكرة الكلام دا كان ييجي من 18 سنة هفتكر ايه ولا ايه
ـ طيب مكانه حتي ؟
ـ مش عارفه بس ستك ام ابوك الله يرحمها كانت تعرفه وتعرف مكانه عشان حد من قرايبها هو اللي دلنا عليه
ـ يعني اخطف رجلي لحد الاخرة اروح اسألها واجي ؟؟
ـ انت مالك مهتم بحكاية البتاع دا ليه احنا عملناه عشان ربنا يحفظك منهم اللهم احففظنا ولحد دلوقتي انت اهه زي الفل مفيكش حاجة
ـ هه زي الفل قوي المهم مش فاكرة اي حاجة
ـ والله يابني لا كل الل فاكراه انه شيخ كدا ومتلثم ومش باين من وشه او جسمه حاجة خالص بس شوفت تحت كفة ايده علي العروق كدا وشم صغير كدا
غريب كدا زي ما يكون خروف اعور وحواليه تعبان بقرون
الله اعلم
ـ خروف وتعبان ؟؟
ـ ايوة
ـ طيب مش فاكرة شكله حتي
ـ لا فاكرة ولا بتاع انت ليه مهتم بموضوع عدي عليه اكتر من 18 سنة اكتر من اللازم كدا
ـ خلاص مفيش انا هدخل انام
دخلت الاوضة وقفلت الباب عليا عشان علي الاقل ما تسمعش صوتي وانا بتأوه من الم ضهري
اهو الوشم خلصني من عفريت عشان يرزقني باللي اسخم منه
مش عارف معلومة حلوة ولا وحشة اللي امي قالتها وهي حكاية الوشم اللي علي ايده
انا مش عارف ممكن تفيدني في ايه بس اهي حاجة عرفتها وخلاص بدل ما انا مش فاهم اي حاجة كدا وخلاص
وغمضت عيني من الالم مش من النعس
كأنه كان بيوريني الالم دا عشان يعرفني انه موجود واني هعمل اللي هو عاوزه
ليه هو عاوز الطلسم ؟
وايه الكلمة اللي قالها خلته ندم وسكت فجأة ؟؟؟؟؟؟
" احنا الاتنين مأمورين يبقي ليه هو يخبي الصرة اللي فيها الملفات والطلسم وانا ادور عليهم طالما احنا الاتنين بنخدم الجن ؟!!! "
قمت من علي السرير فجأة !! احنا الاتنين مأمورين من الجن ؟؟!!
هي دي الجملة اللي خلته خاف ؟؟؟
مش لانه قالها وهو قاصدها
لانه ساب الباب مفتوح لأكتر سؤال ممكن يتسأل في الحتة دي بالذات
هل فعلا الشيخ اللي طلب من الراجل الحرامي يسرق الملفات من بيت المغربي
ظهر للراجل وهو بيحرق الملفات بالطلسم ؟؟
وهل قتله فعلا وحط الصرة بالملفات جوا بطنة ودفنه في المكان اللي بيقولوا عليه
الاجابة الغير قابله للنقاش هي لا ؟؟؟!!!
الشيخ وقتها لا ظهر ولا قتله ولا كان يعرف مكان الملفات والطلسم فين
معني كدا ان الراجل اللي بيستعملني دلوقتي دا مش عارف المكان اللي فيه الطلسم فين
يعني بيختار اماكن عشوائية وبيدور فيها عشان يلقي الطلسم ؟؟؟
الشيخ اللي كان وقتها عايز الطلسم كان عارف الطلسم دا جواه ايه وممكن يستخدمه ازاي ؟ والشيخ دا برضة عارف الطلسم دا جواه ايه ويقدر يستخدمه ازاي ؟
يعني الاتنين ممكن يكونوا مأمورين ؟؟؟!! او اكيد هما مأمورين من الجن باحضار الطلسم
يعني الاتنين كانوا بيدوروا علي الطلسم !! مش زي ما بيقول انه الشيخ بتاع زمان دا لقي الطلسم ودفنه
ياتري الطلسم دا مكتوب فيه ايه ؟!
غمضت عيني وروحت في النوم كتييييير مقومتش الا تاني يوم العصر
بصيت في الساعة لقيتها عدت 4
يالله الجااااامعة ، وطلعت انده علي امي وبقولها مش تصحيني بدري عشان الكلية
ـ سلامتك ي حبيبي ما انت روحت الكلية ورجعت بعد الضهر
ـ ايه ؟!!!!!
ـ ايه اللي ايه ؟
ـ روحت الكلية ؟؟ ازاي اومتي ؟
ـ اسم الله عليك يابني الساعة 8 دخلت الاوضة اصحيك لقيتك لأول مرة صاحي ولابس كمان
ـ وبعدين ؟
ـ ولا قبلين قولتلك تعالي افطر وطلعت ولما لقيتك اتأخرت روحت اشوفك تاني ملقيتكش موجود ف الاوضة قولت يمكن اتأخر علي محاضراته فمشي
وبعد اذان الضهر جيت من الكلية وقولت تعبان وعايز ادخل انام
بس حتي بالامارة كنت متعو..... اي دا ؟
ـ في ايه ؟
ـ انت كنت متعور في رقبتك لما جيت ؟
ـ كمان ؟!
ـ التعويرة راحت فين ؟؟؟
ـ ماما ماما ماما ماما انتي بتتكلمي جد ولا بتهزي معايا ؟
حسيت بالخوف في عيون والدتي لما ركزت في رقبتي وملقيتش التعويرة اللي بتقول عليها ووقتها اتاكدت انها مش بتهزر معايا وان كل كلامها حقيقي
يعني انا فعلا قمت الصبح وخرجت
وعشان اطمنها عملت نفسي افتكرت كل حاجة
ـ ايوة ايوة معلش اصل اليوم كان تعب ع الاخر فرجعت من برا هلكان ومش فاكر اي حاجة
ـ طب والتعويرة اللي كانت علي رقبتك ؟
ـ هههه تعويرة ايه ي حجة دا كان حبر احمر يعني معقول هنام متعور في رقبتي اقوم مفيش فيا حاجة ؟ ليه ساحر
حسيتها اطمنت شوية وحطتلي الغدا اكلت لقمتين ورجعت تاني الاوضة
مكنتش مصدق اللي حصل وكنت بلف ف الاوضة زي المجنون
قمت الصبح وخرجت ؟؟؟؟ ازاي ؟؟؟ وروحت فين ؟ والتعويرة اللي امي بتقول عليها فيه ؟؟؟ واتعورت ازاي اصلا
ياربي هو ايه اللي بيحصل ؟؟!!!! خوفت اروح اسالها تاني عن اي حاجة تقلق اكتر واكتر خصوصا انها من الناس اللي مؤمنة ان الجن ماليين العالم وممكن يظهروا في اي وقت يعني ممكن يحصل لها حاجة لو قولتلها ان اللي قام الصبح وخرج دا مكانش انا .......
الليل جة والساعه كانت تقريبا 12 وانا بلف في الاوضة عايز القي اي اجابة للمليار سؤال اللي في دماغي ومش عارف
قعدت علي السرير ساكت وكأني مستني وحي ينزل من السما يفهمني اللي بيحصل
المراية كانت قدام السرير
كنت شايف نفسي واضح جدا في المراية برغم اني مضلم نور الاوضة
الوقت كان اتأخر وحسيت براسي بتدور من الدوخة
كنت مفتح عين ومغمض التانية علي اعتاب النوم يعني وفي وسط ما انا بهز راسي عشان افوق ببص في المراية لقيت انعكاسي في المراية مبرقلي !!
عينيه كانت واسعة وصاحي ولا بيتهزر ؟!!! وقتها فوقت في اقل من فيمتو ثانية من الرعب وبصيت كويس في االمراية لقيت الانعكاس عادي ومفيس اي حاجة
هو فيه ايه ؟؟؟؟؟
يمكن بيتهألي ! اكيد مش يمكن
فردت ضهري علي السرير وانا بحاول اجيب اي اجابة للاسئلة اللي في دماغي بس من غير اي فايدة تذكر وقبل ما عيني تغمض بصيت علي المراية تاني لقيتني قاعد زي ما انا
وقتها قمت من السرير مفزوع ووقفت جنبه وانا حاطط ايدي علي قلبي من الخوف
ولما بصيت في المراية تاني عشان اتأكد من اللي شوفته لقيت انعكاسي في المراية قاعد علي السرير زي ما هو رغم اني واقف جنب السرير
وقتها بدأت اترعش ورجليا مكانتش شايلاني ومكنتش قادر اسيطر علي نفسي
عايز انده علي امي مش قادر ولا حتي قادر اتحرك من مكاني من الاساس
كنت بهمس بصوت واطي جدا وبقول الحقيني ي ماما !
كان قاعد في المراية زي ما هو عينيه مش بترمش وفجأة بصلي
قلبي اتقبض وحشرت نفسي في الحيطة اكتر لما حسيت ان ضهري اتصلب فيها وانا مش قادر اخد نفسي ولا اتحرك ولا اعمل اي حاجة الا اني مستني لحظة النهاية
كان منظره بشع
قرنية عينيه سودا وواسعه جدا وعلي وشة فيه اجزاء مقطعة كانه كان مضروب بسكاكين ومناخيره كان نازل منها دم
كان مركز نظره معايا ومش عايز يحول عينيه لدرجة اني حسيت بروحي بتتسحب مني
بعدها لقيته قام في ثانية واحدة وخرج من المراية جاي عليا
محسيتش بنفسي وقتها وفقدت الوعي
ولما قومت كنت فاكر ان النهار طلع وكل حاجة رجعت لاصلها بس كنت غلطان
ومش عارف انا ازاي قمت من النوم علي صوت عقارب الساعة وهي بتدق
كأن صوت عقرب الثواني كان في عقلي مش في الساعه
كأن كان صوت جرس من اجراس الكنيسية !!!!
قمت من مكاني وبصيت في الساعة لقيتها 4 الفحر
لمحت المراية برعب واانا خايف حتي ابصلها لقيت مفيش فيها اي حاجة وطبيعية جدا جدا
مشيت عليها ومديت ايدي عليها مفيش اي حاجة بالمرة
بعدها حسيت بالم في ضهري وبطني وصدري وتقريبا في جسمي كله
رفعت الفانلة وانا واقف قدام المراية واتفزعت من المنظر اللي شوفته
جسمي كله مقطع كأني كنت بتجلد بكرباج
والدم ناشف علي الجروح كأنها من مدة كبيرة
منظر جلدي وهو عليه اثار الضرب والتعويرات والجروح كان مخيف فعلا
لانه تقريبا مكانش فيه يا جزء سليم الا الجزء اللي فيه الوشم بس
الوشم !!!!
قعدت علي السرير لحد الصبح مش قادر اغمض عينيا من اللي حصل
واول ما النهار طلع قمت مشيت علي الشيخ دا
وصلت هناك واول ما شوفته جريت عليه وبوست علي ايده وقولت
ـ انا هعمل اي حاجة انت عايزها بس خلصني من اللي انا فيه انا بقيت عايش في جحيم
ـ ايه حصل تاني ؟
ـ نعم ؟؟!!! دا علي اساس ان اللي حصلي امبارح مش انت اللي عملته
ـ عملت ايه انا مش فاهم حاجة ؟؟!!!
قلعت الفانلة ووريته جسمي وشاف الندوب والجروح اللي فيه حسيت انه اتصعق
ولما قريته تعبيرات وشه حسيت بقلبي اترعش ونوبة هلع مسكت فيا وقولت
ـ لما مش انت اللي عملت كدا ....
يبقى مين ؟؟؟؟؟؟
يتبع .....
لا تنسي الضغط على زر المتابعة حتي تصلك باقي القصة
