بالعامية _ صدمة مو جاهز الها .....؟؟
اليوم رح احكيلكن قصة وكل واحد منكن يكملا على حياتو………..؟؟
وبشوف لأي درجة هي القصة بتلامسو , طبعا البداية عندي والنهاية عندي والتكملة عندي ولكن انت شوف نهايتها تشبهني ولا ما تشبهني….!!
بقلكم قصة شخص كتيرررر يحب الدنيا الحمد الله كل امورو بخير اهلو حوليه والناس يلي يحبهم موجودين مجتهد ويحاول قد مافيه يثبت نفسو , ومبتسم , مرح وبيقدر انو هو يملي المكان بوجودو , اجتو وحدة من الصدمات يلي ماكان جاهز الها لا عاطفياً ولا نفسياً ولا اجتماعياً وعرف من خلال هي الصدمة ان الدنيا نهائياً ما ترحم واحياناً الزمن والظروف ممكن انو يوقفوا ضدك بشكل مو حلو , انسكر , تعب , كانت ايامو كلها متشابها , ماعندو يوم يشبه التاني الا بالحزن وضيقة الخلق واللون الرمادي الى حدٍ ما…..!!
قال : اكيد بعد هالصدمة هي مارح احس بشعور بعد خلص , قلبي مستحيل بأي شكل من الاشكال يفز لأحد يكون عندو مشاعر , مستحيل بأي شكل من الاشكال يتنفس من جديد كان معصب ومتدايق كتير من نفسو , وكان يحاول بأن هو يكتم هاد الغضب بأبتسامة , وبأن هو قوي , وبأن مهما الظروف عانتو مارح ينكسر , كان قدام الناس تمام , بس بينو وبين حالو متحطم , والجرح كان كتير عميق , جرح كان حتى هو اول مرة يواجهو بحياتو , ما توقع بأن يكون في دوا , كان ينزف كلام مارح ينقال بحق حدا , كان يبكي , كان يبكي من دون دموع بس مع كل أأأخ , لحتى شاف حدا يجي فجأة ويحاول يداوي هالجرح , ماصدق !! معقولة بكل هالسواد في ناس للحين فيها خير شاف أيد عم تنمدلو وتقلو بدال ما تبكي لحالك خلينا نبكي سوى حتى لو نحنا ساكتين , شاف في شخص يبتسملو ويذكرو قديش هو منيح يذكرو قديش ابتسامتو حلوة , يذكرو قديش الدنيا ما تسوى , يذكرو انو يلي تفقدو بالدنيا هو درس الك ويلي يروح من قلبك هو مساحة لغيرو مشان يسكن فيها , صدق !! صدق مع انو ما كان بدو يصدق لحتى ستوعب انو احلى شي انك انت تقنع نفسك بالفكرة حتى تصدقها وتعيشها , بدا يصدق انو هو حزين , بدا يصدق انو هو متدايق , لحتى بلش يستوعب انو الحزن والضيقة على نفسها مو على يلي راح , ستوعب كل يلي مر فيه قوى خلاه انسان احسن , رجع لعند يلي مدلهم ايدو ومدولو ايدهم وقالهم , تصدقوا ؟ مجرد وجودكن حوليي بدون ولا كلمة الي ولا الكن , بدون ما اعبر كل يوم , بدون لا احاول اشكي الالم لي انا شفتو , كنت اعرف انو مهما ضاقت هالدنيا اظل متطمن , متطمن لانكن موجودين , متطمن لان اذا راحت كل المشاعر وقلبي على الاقل ما زلت ابتسم لما شوف قلوب عنجد انها تحبني , عيون فعلياً تراعيني , صوتي رجع مكانو , عيون رجعت تشوف الاللوان مرة تانية , اذاني صارت تسمع اغاني , حتى ذوقي رجع تعدل , وهذا كلو بسببكن…….!
من قصتو ستوعبت شي , انو نحنا لما ننصدم نخاف نخاف كتير نحس انو نحنا لحالنا وماحدا رح يحس فينا ولا حدا مر باللي نحنا مرينا فيه , نحس انو نحنا معزولين بغرفة وكانو اعدين فيها لحالنا ومافيها ولا شي , ما منصدق انو في بواب , ولا نصدق انو في حدا ممكن يقرب منا فمنكون خايفين , حتى يجينا شعور الأطمئنان لحتى نتطمن انو الابتسامة ترجع على وجوهنا مرة تانية , لحتى ما نتطمن انو الدنيا لهلق مهما سادت وسودت حتى لو صارت بلا ملامح كئيبة رح نلاقي في شخص يجي ويقول مو مقبول وممنوع ولازم تبدا ولازم ترجع توقف , انت ما تشبه الا نفسك ونفسك يلي نحنا نعرفها ما يلبق الها هاد الحزن , ستوعبت من القصة انو ورا الصدمة خوف , و ورا وجود الناس الصح بحياتنا في اطمئنان…!!
كلنا ممكن ننصدم بأي دقيقة ولكن هل قصتنا رح تكون فيها ناس نتطمن ونستند عليهن , هل فيها ادين نمسكها ونحمد الله عليها مليون مرة , اذا كنت خايف الجئ يلي فعلياً تشوف بعيونو في أمان , بقلبو أمان , تحس يعطيك عمر , عمر جديد تحسن يخليلك هالدنيا هادية مبتسمة , خلي نهايتك تكون حلوة مو حزينة .
