يوميات مهندس اتصالات مفحوت، معاناتي مع سكشن الرسم
بدات دراسة في الكلية زيي زي كل الطلبة اللي خلصت الثانوية العامة وعندها امال و طموحات في اني ابدأ حياة جديدة واكون الشلة بتاعتي بق زي الي كنا بنشوفهم في الافلام طارق كابو والشلة اللطيفة دي، وخليني اقلك ان دا اول مقلب هتاخده في دراستك في هندسة الكلية فعلا صعبة جدا ومحتاجة شغل كتير، بس تقريبا اكتر حاجة كانت معقداني في اول سنة ليا “اعدادي” وهو سكشن الرسم.
بسم الله الرحمن الرحيم انت داخل الة زمنية مش هتحس فيها بالوقت السكشن عبارة عن 4 ساعات كاملين انت بترسم وغالبا مش بتلحق تخلص المطلوب بس خلينا نمسكها واحدة واحدة عشان منتوهش من بعض.
المحاضرة:
محاضرة الرسم ماهي الا عبارة عن نوع من جلد الذات وتفضل تسال نفسك سؤال "انا ايه اللي جابني هنا؟!!!" الدكتور غالبا بيشرح مع نفسه وتبقى قاعد تسمع في طلاسم، وانت زيك زيي اكيد اخرنا في حوار الرسم دا اصلا رسمة الاهرام المثلثة وبرج القاهرة ويوم مبدأنا نبقى جامدين جسدنا حرب اكتوبر اللي كنت بتشف الرسومات من كتاب العربي اصلا بس ما علينا من النقطة دي. الدكتور بيكون معتمد ان اغلب اللي حاضرين خدوا اساسيات الرسم الهندسي او هو معتقد كدا ملناس دعوة بالكلام دا يا حسن عيب انت تقول اه وبس، وبيكمل شرح فتقريبا المستفيدين الوحيد من المحاضرة الناس اللي كانت محضرة نفسها تخش فنون تطبيقية او عمارة او الي جايين من من مدارس الصنايع ودول غالبا هيبقو عقدتك في الحياة وهنتكلم عنهم استني بس.
سكشن الرسم الهندسي ولا حول ولا قوة الا بالله:
مبدايا كدا حضر نفسك وابدأ دور على مرهم حلو للتشنجات العضلية واحجز مع دكتور عظام كويس لانك على اخر السنة احتمال تحتاجه. عبارة عن فجوة زمنية بتدخل تتهان فيها وتخرج تاني انت مبتعرفش تمسك المسطرة اصلا ولا تثبت اللوحة ومطلوب منك ترسم مجسمات وتستنج ليها المساقط الثلاثة وتحددهم وليلة كبيرة اوي سعتك. فاكر زمايلك اللي جايين من مدارس الصنايع متركزش معاهم لان غالبا دول بيخلصو مع اول نص ساعة من السكشن عقبال مانت لسا بتثبت اللوحة. بس الشهادة لله يعني لما تحتاجهم في اي حاجة بيكونو موجودين وطلبة هندسة حلوان من احسن الناس اللي ممكن تتعامل معاهم وعشان كدا لو داخل كلية الهندسة في حلوان احب ابشرك انك داخل في مكان كل ثقة بجد وزي م كانو بيقولو “ حلوان حلوة بناسها” وهتلاقي زمايلك بتساعدك.
معيد سكشن الرسم:
متستغربش ايوة ايوة دا ليه فقرة لوحده دا البوب الكبير، مبدأيا كدا هو اول مايدخل القاعة اللي فيها السكشن فانت بكل ذوق تخلع عباية الكرامة والكبرياء عندك وحطها في الشنطة، الة احباط وتهزيق حرفيا مبدايا مهما عملت فهو مش هيعجبه للاسف لان في احسن من كدا، ولو معملتش تاخد صفر طب لو عملت هتاخد بالسالب بق عشان شغلك معجبهوش. دا غير في حتة كدا من التفرقة بس صغننة خالص الحقيقة هتلاقي دايما زمايلك البنات المهندسات بيجيبو اعلى منك متسالش ليه. يحضرني موقفين الحقيقة كل مافتكرهم بضحك على حالي اووي. اولهم مرة واحدة زميلتي كانت مريضة شوية ومش مكملة الرسمة بتاعتها والمفروض في تقرير يتسلم فانا تقريبا في ربع ساعة كملته ليه اي كروتة كدا عشان تاخد اي درجة حرام يعني والجزء دا عندي تقريبا عمله في ساعة تقريبا فالمهم روحنا للمعيد عشان يصحح، اداني 5/10 واداها هي 9/10 وبيقلها شغلك اتحسن اووي يا باشمهندسة، انا كنت حاسس زي برميل تلج دخل جوا سناني وعاوز اصرخ بس ماسك نفسي ومبتسم وتاني موقف بق اللي هو جاب من الاخر وقلت مش جايبة همها، انا كنت مخلص الرسمة كاملة وزميلة تانية ليا مش عاملة نص الرسمة حرفيا جبت انا 6/10" اعلى درجة ليا حرفيا"، واداها هي 8/10 حاسين بحرقة الدم تخيلوني بق لان مفيش كلام يعبر عن احساسي ساعتها.
حاجة بسيطة بس دي يوميات انا بكتب عن حاجات حصلت معايا في الحقيقة وانا بحترم كل زمائلي وكل المهندسين اللي ساعدوني وكل الدكاترة اللي درست تحت ايدهم عشان كلامي مش يتفهم غلط.
العدالة الالهية:
طبعا بعد جلد الذات والجلد من الاخرين، وكمية “ ايه القرف اللي انت عامله دا يابشمهندس…!” اهم حاجة انه محترمني لو واخدين بالكو يعني، حاجة حصلت هو المفروض سيئة على العالم كله وسيئة عليا كمان بس لو ليها فايدة، فالحمدلله المادة دي كانت ممتدة وملهاش امتحانات غير اخر السنة وفي الترم التاني سنة 2020 حصل اكبر وباء عالمي (covid-19) كورونا ودا ادى ان الامتحانات اتلغت واتحولت ابحاث والحمد لله معلهاش درجات نجاح وسقوط وبس وعلى راي محمد سعد في فيلم “كتكوت” فلت منيهم.
بس يسيبونا في حالنا ازاي يعني …… بدل البحث ادونا بداله 4 رسومات نرسمهم ونعملهم pdf وفي ناس شيلتها برده. وراك وراك مش هسيبك وباء مش وباء همتحنك
وبس كدا ادي حكاية من حكاوي هندسة الجميلة واقابلكم في مقالة تانية بق.
