في هذا المقال
إلى شخص لا أعرفه
اليوم الثالث — الخميس، 19 نوفمبر
صحيت الساعة 10 تقريبًا، والمفروض كنت صاحي من 8. مش عشان عندي حاجة مهمة الساعة 8، بس كنت عامل حسابي أستغل اليوم وأخلص كام حاجة. كالعادة الحسابات كانت ممتازة، التنفيذ هو اللي فيه مشكلة.
أول ما فتحت الموبايل لقيت جروب الدفعة مليان رسايل. واحد بيسأل عن محاضرة، واحد باعت سكرين لشيت، وواحد كاتب إن الدكتور قال إن فيه تسليم الأسبوع الجاي. قعدت أقرا الرسايل وأنا لسه في السرير، وكل ما أقرا رسالة أحس إني محتاج أقوم أكتر، بس مفيش حاجة بتحركني.
في الآخر قومت عشان أمي دخلت وقالتلي:
«إنت هتفضل نايم لحد الضهر؟»
قلت: «أنا صاحي أهو.»
«طب ما تقوم.»
«حاضر.»
خرجت، وبعد دقيقتين رجعت:
«هتقوم؟»
بصيتلها وقلت: «يا ماما هو فيه كام حد في البيت بيحاسبني على قيامي؟»
قالت: «أنا لو مبصتش عليك هتفضل زي ما إنت.»
معرفش أرد على الكلام ده بصراحة، فقومت.
فطرت، وقعدت شوية مع أبويا. كان بيحكي عن واحد صاحبه في الشغل، وأنا مش فاهم القصة كلها، بس كنت بسمع. في نص الكلام سألني إذا كنت محتاج فلوس الجامعة، قلتله لا، وبعدها افتكرت إني فعلًا محتاج أشتري حاجات بس مش مستعجلة.
فضلت أفكر أطلب ولا لأ، مش عشان هو مش هيديني، بس بحس إني كل ما أطلب حاجة لازم أكون فعلًا محتاجها. في الآخر قلتله إني محتاج فلوس أجيب بيها شوية حاجات، واداني أكتر من اللي طلبته.
«خلي معاك، متفضلش كل شوية تطلب.»
قلتله: «حاضر.»
دخلت أوضتي، وبدل ما أبدأ مذاكرة قعدت أظبط في اللابتوب. كنت عايز أغير شكل الديسكتوب، ونزلت برنامج، وبعدها برنامج تاني، وبعدها لقيت نفسي بدور على خلفيات. ساعتين تقريبًا راحوا في حاجة محدش هيلاحظها غيري.
يوسف اتصل بيا وقتها.
«إنت جاي الجامعة بكرة؟»
«آه.»
«طب نخلص الشغل بتاع المشروع النهارده عشان بكرة مانقعدش.»
قلتله: «ماشي، ابعتلي اللي ناقص.»
بعتلي ملف، وبدأنا نشتغل. هو كان بيشرحلي جزء وأنا بعمل الجزء التاني، وكل شوية نختلف على حاجة ملهاش لازمة.
«يا عم سيب اللون ده.»
«ليه؟ شكله حلو.»
«إحنا بنعمل مشروع ولا بنفتح محل عصير؟»
فضلت أضحك، وغيّرنا اللون.
بعدها خرجت أجيب حاجة من السوبر ماركت. وأنا راجع قابلت طفل صغير عند العمارة كان بيلعب بكورة، والكورة دخلت تحت عربية. فضل يحاول يطلعها ومش عارف. نزلت جبتها له، فقاللي «شكرًا» وجري يلعب تاني.
افتكرت نفسي وأنا صغير، كنت تقريبًا نفس الطفل ده، بس الفرق إني كنت بعاند لو حد حاول يساعدني. مرة في المدرسة وقعت مني حاجة في الشارع، وفضلت أحاول أجيبها بنفسي لحد ما واحد أكبر مني جابها، وأنا بدل ما أشكره كنت متضايق إنه سبقني.
مش فاكر ليه كنت كده، بس واضح إن العند كان موجود من بدري.
رجعت البيت، وقعدت شوية على الكنبة. أمي كانت بتتفرج على مسلسل، فسألتها هو حلو ولا لأ. قالتلي:
«حلو، اقعد اتفرج.»
قعدت عشر دقايق، وبعدها سألتها مين الشخص ده ومين دي، واكتشفت إني دخلت في مسلسل من الحلقة 47 ومش فاهم أي حاجة.
«طب إنتِ بتتفرجي على إيه؟»
قالت: «ما إنت اللي قاعد تسأل.»
قمت ودخلت أوضتي.
بالليل خلصت جزء من المشروع، وذاكرت شوية، مش كتير بس على الأقل عملت حاجة. يوسف بعتلي إنه خلص هو كمان، واتفقنا نراجع بكرة في الجامعة.
قبل ما أنام قعدت أتفرج على صور قديمة في الموبايل. مش صور المدرسة المرة دي، صور من السنة اللي فاتت. صور خروجات، ناس كنت بشوفهم كل يوم، وأماكن كنت بروحها من غير ما أفكر.
فيه صور الواحد بيبقى فاكر إنه وقتها كان عايش يوم عادي جدًا، وبعد فترة يكتشف إنه كان يوم حلو، بس هو مكانش واخد باله.
لقيت صورة ليا أنا ويوسف، كنا قاعدين في مكان ووشوشنا تعبانة، ومع ذلك بنضحك. بعتها له.
رد: «إيه الصورة دي، امسحها.»
قلتله: «دي هتفضل دليل إنك كنت بني آدم.»
قال: «نام يا أحمد.»
هروح أنام فعلًا. بكرة عندي جامعة، ومش عايز أبدأ اليوم بنفس الحوار بتاع المنبه.
تصبح على خير.
تابع جديد Ahmed H General
اختر إشعارات الموقع أو البريد أو الاثنين. الزائر يقدر يشترك ببريده دون تسجيل حساب.
الإبلاغ عن المقال
لو لاحظت مشكلة في المحتوى، أرسلها لفريق المراجعة. لن تظهر بياناتك لكاتب المقال أو للقراء.
تعذّر إرسال البلاغ الآن. حاول مرة أخرى لاحقًا.
سجّل الدخول لإرسال بلاغ

النقاش
التعليقات (0)
فكرة تضيفها، أو سؤال يفتح حوارًا.
الرجاء تسجيل الدخول لتتمكن من التعليق