في هذا المقال
🎀حكاية كل يوم
أمي كانت بتطلب مني أقعد معاها عشر دقايق كل يوم وأنا كنت دايمًا بقولها كلمة واحدة مش فاضي يا أمي دلوقتي.
أنا فاكر إن في فترة من الفترات كنت مشغول جدًا ما بين شغلي وحاجات تانية بحاول أخلصها وكنت برجع البيت آخر اليوم مش طايق أسمع صوت حد أصلاً.
وكل اللي كنت عايزه إني أدخل أوضتي وأقفل الباب وأمسك الموبايل أقلب في الريلز شوية لحد ما أنام.
وفي يوم من الأيام رجعت البيت حوالي الساعة 10 ونص بليل، وكنت تعبان جدًا ودخلت لقيت أمي قاعدة في الصالة قدام التلفزيون.
وكانت لابسة إسدال الصلاة بتاعها وحاطة كوباية شاي جنبها، والتلفزيون شغال على مسلسل قديم هي أصلًا حافظاه من كتر ما شافته أول ما شافتني ابتسمت وقالتلي:
- حمد لله على السلامة يا حبيبي أكلت برة زي كل يوم ولا أعملك تاكل؟

قولتلها وأنا بقلع الجزمة:
- الله يسلمك يا أمي لأ أكلت بره متتعبيش نفسك.
قالتلي:
- طب تعالى اقعد معايا شوية عايزة أحكيلك حاجة.
بصيت في الساعة وقلتلها:
- معلش يا أمي، أنا تعبان جدًا النهارده هخش أريح شوية وأجيلك.
ابتسمت وقالتلي:
- ماشي يا حبيبي ربنا يريح قلبك ويرضيك و ينولك اللي في بالك يا أبني.
دخلت أوضتي وقفلت الباب والحقيقة إني مكنتش تعبان للدرجة اللي تمنعني أقعد معاها، لأني أول ما دخلت رميت نفسي على السرير وفتحت الموبايل وفضلت أقلب في فيديوهات ملهاش أي لازمة فيديو ورا فيديو ومنشور ورا منشور لحد ما الساعة بقت 12 ونص.
وقتها قفلت الموبايل ونمت ونسيت أصلًا إن أمي كانت عايزة تحكيلي حاجة والموضوع ده مكنش بيحصل مرة ولا اتنين تقريبًا كل يوم كانت أمي تحاول تفتح معايا كلام.
مرة كانت تسألني عن الشغل، ومرة تحكيلي عن حاجة حصلت في البيت ومرة تناديني عشان تشرب معايا شاي وأنا في كل مرة كان عندي نفس الرد:
- بعدين يا أمي مش فاضي.
لحظة ادراك
لحد ما جه يوم حصل فيه موقف صغير جدًا ولكنه صعب قوي خلاني أراجع حاجات كتير في حياتي وكنت راجع من بره بدري شوية وعلى غير العادة دخلت البيت حوالي الساعة 6 المغرب.
وأنا داخل سمعت صوت أمي بتضحك من جوه الصالة استغربت، لأن البيت كان هادي ومفيش حد عندها، دخلت بالراحة لقيتها قاعدة على الكنبة وماسكة الموبايل،وبتكلم خالتي مكالمة فيديو.
كانت بتحكيلها عن حاجة حصلت معاها وهي بتشتري خضار من السوق وخالتي بتضحك وهي بتسمعها أول ما أمي شافتني قالتلها:
-محمد جه أهو هقفل معاكي وأكلمك بعدين.
قفلت المكالمة وبصتلي بابتسامة وقالت:
- إيه ده .. إنت جيت بدري النهارده؟
قولتلها:
- أيوه يا أمي خلصت بدري شوية.
قالتلي وهي بتقوم من مكانها:
- طب استنى أعملك كوباية شاي ونقعد سوا.
قولتلها:
- لا يا أمي متتعبيش نفسك أنا داخل أخلص حاجة.
وقتها لاحظت إنها سكتت ثانية، وبعدين قالت:
- ماشي يا حبيبي، ربنا يوفقك.
بس المرة دي وأنا ماشي سمعتها بتقول بصوت واطي ويمكن مكنتش تقصد إني أسمعه:
- هو أنا كل ما أشوفك تبقى مشغول ليه بس؟

الجملة كانت بسيطة جدًا، لدرجة إني وقتها حتى مردتش عليها ولكن وأنا داخل أوضتي فضلت ترن في ودني وقعدت على المكتب وفتحت اللابتوب وحاولت أركز في اللي ورايا، بس كل شوية كنت أفتكر شكلها وهي بتقفل المكالمة أول ما شافتني.
افتكرت إنها سابت خالتي اللي كانت بتضحك معاها عشان تقعد معايا أنا وأنا سبتها عشان أقعد لوحدي وقتها حسيت بحاجة غريبة جوايا، قفلت اللابتوب وخرجت من الأوضة لقيتها في المطبخ بتغسل كوبايتين قولتلها:
الحل بسيط
- أمي، هو إنتِ كنتِ عايزة تحكيلي إيه؟
بصتلي باستغراب وقالت:
- إمتى يا حبيبي؟
قولتلها:
- من يومين كده لما رجعت بليل وقلتيلي تعالى أقعد معايا.
فضلت تفكر شوية وبعدين ابتسمت وقالت:
- والله يا ابني مش فاكرة.
استغربت وقلتلها:
- يعني إيه مش فاكرة ما إنتِ كنتِ عايزة تحكيلي حاجة!
نشفت إيديها في فوطة المطبخ وبصتلي وقالت:
- يا حبيبي أنا ساعات ببقى عايزة أقعد معاك وخلاص مش لازم يكون عندي حاجة أحكيها.
وسكتت لحظة وكملت:
- إنت طول اليوم بره ولما بترجع بتدخل أوضتك وأنا ببقى نفسي أعرف يومك كان عامل إيه أو حتى نقعد نشرب شاي سوا.
وقتها حاولت انكش معاها وقلتلها:
- يعني كل ده عشان كوباية شاي يا ست الكل؟
ضحكت وقالت:
- لا يا حبيبي، الشاي بشربه لوحدي عادي أنا عايزاك إنت.
مش عارف ليه الجملة دي بالذات وجعتني "أنا عايزاك إنت"، فضلت واقف قدامها ومش عارف أرد ويمكن لأني لأول مرة أفهم إن أمي مكنتش بتطلب مني أعملها حاجة ومكنتش محتاجة فلوس، ولا مشوار، ولا حد يجيب لها طلبات.
هي كانت عايزة ابنها يقعد جنبها شوية وأنا اللي كنت فاكر إن مجرد وجودي في البيت معناه إني موجود معاها، وقتها دخلت الصالة وقعدت على الكنبة وناديت عليها:
- طب يلا يا أمي اعمليلنا الشاي اللي بتقولي عليه ده.
طلعت من المطبخ وبصتلي وهي مبتسمة وقالت:
- بجد هتقعد؟
ضحكت وقلتلها:
- أيوه والله، وهسمع منك كل الحكايات اللي مأجلها.
قالتلي:
- طب استنى أجيب الشاي وشوبة فشار بسرعة قبل ما تغير رأيك.

وقتها ضحكت بس والله ضحكتي كان وراها غصة، لأن أمي وصلت لمرحلة إنها مستغربة إني هقعد معاها وكأن قعدتي معاها بقت مناسبة بتحصل كل فترة وقتها جابت الشاي وقعدت جنبي وبدأت تحكي.
حكتلي عن جارتنا اللي بنتها اتخطبت وعن واحدة قابلتها في السوق وعن أكلة كانت نفسها تعملها من كام يوم وحكتلي عن أيام زمان لما كنت صغير وبستخبى منها عشان منزلش المدرسة.
وأنا قاعد بسمعها، اكتشفت حاجة عمري ما كنت واخد بالي منها، أمي كانت بتضحك وهي بتحكي تفاصيل أنا شايفها عادية جدًا ولكن بالنسبة لها كانت مهمة لأنها أخيرًا لقت حد يسمعها وفي نص الكلام سألتها:
- هو إنتِ مبتزهقيش يا أمي من القعدة في البيت؟
بصتلي وقالت:
- لأ يا حبيبي، الحمد لله البيت مليان بيكم بس ساعات الواحد بيبقى وسط ناس كتير، ونفسه حد فيهم يقعد يسمعه.
الجملة دي خلتني أبص حواليّا وعلى الصالة اللي بعدي منها كل يوم وعلى الكنبة اللي أمي بتقعد عليها كل ليلة وعلى كوباية الشاي اللي كنت بشوفها جنبها ومبفكرش حتى أقعد أشرب واحدة معاها واكتشفت إني كنت عايش معاها في نفس البيت، بعدها أمي قامت تصلي العشا وأنا فضلت قاعد مكاني.
مسكت الموبايل وبصيت على الوقت اللي بقضيه كل يوم عليه، ساعات طويلة بتروح في فيديوهات ومنشورات ومحادثات وفي الآخر لما أمي تطلب مني عشر دقايق بقولها إني مشغول وقتها حسيت إني كنت بدي وقتي لكل حاجة تقريبًا إلا الإنسانة اللي عمرها ما بخلت عليا بوقتها.
افتكرت وأنا صغير لما كنت بتعب بالليل وكانت أمي بتفضل صاحية جنبي لحد الصبح ومكنتش بتقولي إنها مشغولة ولما كنت أرجع من المدرسة زعلان وكانت تقعد تسمعني حتى لو الحكاية تافه ومكنتش بتقولي إنها تعبانة.
سبحان الله، إحنا ساعات بنكبر وننشغل بحياتنا لدرجة إننا بننسى إن أهلنا كمان بيكبروا وإن الوقت اللي إحنا فاكرين إنه لسه قدامنا منه كتير ، محدش فينا ضامن منه يوم واحد ومن اليوم ده بدأت أحاول أغير حاجة بسيطة في حياتي.
مش هقول إني بقيت مثالي ولا إني مبنشغلش أو مبقصرش بس بقيت لما أرجع البيت وألاقي أمي قاعدة أحاول أقعد معاها شوية وانكشها قبل ما أدخل أوضتي.
واللي فهمته متأخر إن الحكاية نفسها مش هي المهمةء المهم إن أمي لسه موجودة عشان تحكيهالي وحقيقي من أكتر الحاجات اللي بخاف منها دلوقتي إني في يوم أدخل البيت وأبص على الكنبة اللي أمي كانت بتقعد عليها وأتمنى أسمع منها نفس الحكايات اللي كنت بتهرب منها.
بس ميكونش فيه وقت.
🎀خاتمة
لو أبوك أو أمك لسه موجودين في حياتك متستناش لما تفضى عشان تقعد معاهم، لأنك غالبًا مش هتفضى من نفسك الدنيا كل يوم هتجيبلك حاجة جديدة تشغلك ولكن هما مش هيفضلوا مستنيين للأبد.
وخليك فاكر دايمًا:
﴿وَبِالْوَالِدَيْنِ إِحْسَانًا﴾
وربنا يبارك في عمر كل أب وأم، ويرحم اللي فارقونا ويقدرنا نبرّ أهلنا قبل ما نتمنى يوم واحد يرجع بيهم..♥️
تابع جديد amira Saber
اختر إشعارات الموقع أو البريد أو الاثنين. الزائر يقدر يشترك ببريده دون تسجيل حساب.
الإبلاغ عن المقال
لو لاحظت مشكلة في المحتوى، أرسلها لفريق المراجعة. لن تظهر بياناتك لكاتب المقال أو للقراء.
تعذّر إرسال البلاغ الآن. حاول مرة أخرى لاحقًا.
سجّل الدخول لإرسال بلاغ

النقاش
التعليقات (0)
فكرة تضيفها، أو سؤال يفتح حوارًا.
الرجاء تسجيل الدخول لتتمكن من التعليق