الظل: غموض و إثارة - الحلقة الثانية
- أمسكي نفسك يا مي .
= مش قادرة يا عمر .. مش قادرة بجد .... فُراقها قتلني .. إيه اللي حصل ده؟!!! و مين اللي عمل كده؟!!! و ليه ؟!!! و إزاي ؟!!!!
- أهدي و امسكي أعصابك كلها دقايق و الظابط هييجي ياخد أقوالك.
= صبر أهلها يارب و صبرني أنا كمان، أنا السبب .... أنا السبب .... دي عمرها ما راحت في مكان، و أول ما تسيب أهلها يقوم يحصلها كدة، و تكون أخر مرة يشوفوها فيها! .... ليه؟ ليه كدة يارب ؟ يارب بجد مش قادرة...
- مي هسيبك و هدخل عشان بينادوا عليا و اهدي بجد حرام عليكي اللي بتعمليه ده ....
= أهدي إيه ؟ أقول لأهلها إيه ؟ أنا ماسيبتهاش غير خمس دقايق ؟ أرجع ألاقيها ميتة !!! الرحمة من
عندك يارب.
___________________________________________
" كل حاجة وقتها حصلت بسرعة .... نسيت الموبايل بتاعها و رجعت تجيبه من الكابينة .. و أنا سبقتها علي البحيرة .... كان باقي الجروب هناك و كان معاد الغدا ... ياريتني ماسيبتها" .
- أنسة مي .. تعرفي نور من قد إيه؟
= يا فندم حضرتك نور بالنسبالي مش مجرد زميلة .. نور أختي بجد و نعرف بعض من و احنا صغيرين من حوالي أكتر من عشرين سنة ... عمري ما كنت أتخيل إن يحصلها حاجة زي كدة.
- معني كدة إنك تعرفي كل حاجة عنها؟….
= أكيد طبعاً.
- تمام .... التقرير الأول للمعمل الجنائي بيقول إن نور ماتت بالسكتة القلبية المفاجأة، ولما قارنا ده بشهادة الشهود لقينا إن في صوت رصاصة انضربت في المكان، لكن زي ما شوفنا مافيش أي أثر حتي و لو لجرح بسيط في الجثة و لا حتي أي أثر لمكان الرصاصة اللي انضربت ......
و كمان موبايل نور مش موجود و إنتي آخر حد كان معاها .. تفسريلنا ده بإيه؟
- مش عارفة .... مش عارفة بجد .... أنا مصدومة لدرجة إني مش عارفة أتكلم و لا أوصف اللي أنا فيه .... بس صدقني حضرتك أنا كل اللي أعرفه قولته .... أنا بس ندمانة بجد ....
أنا السبب في السفرية دي و مش عارفة أبوها وأمها لما يوصلوا دلوقتي هقولهم إيه؟
أنا اللي أقنعتهم إنها تسافر تغير جو وهما وافقوا لأنها هتكون معايا .... و عمرهم ما خلوها تسافر لوحدها في أي مكان .. ثقتهم فيا هي اللي خلتهم يوافقوا المرة دي ....
- و ليه المرة دي بالذات ؟!!!!.
= نور إتعرضت لأزمة بس غريبة شوية، الأزمة دي أثرت عليها نفسيا ً وعصبيا ً و الموضوع دخل في هلاوس و حاجات غريبة، و مكنش في غيري اللي كان بيعرف يهديها،يهديها، ده حتي الدكتور النفسي اللي كانت بتتعالج عنده ما عرفش يوصل لحل في حالتها و شاف إنها لازم تسافر تغير جو شوية، و إن ده هيفرق معاها كتير أوي، ولما عرف إني قريبة منها أوي و إنها بترتاحلي طلب مني أساعده في الموضوع ده و أروح و أقنع أهلها إنها تسافر تغير جو يمكن لما تشوف مناظر جديدة و أماكن تانية حالتها تستقر و تهدا و تتحسن.
- مكن أعرف نوع الحالة دي إيه؟
= نور و علي حسب كلام الدكتور بعد ما دور و بحث في حالتها طلعت مريضة بحاجة كدة اسمها Capgras delusion أو وهم كابجراس، و ده الأسم العلمي للحالة دي.
- يعني إيه مش فاهم ممكن توضحي أكتر؟
- بص حضرتك اللي أنا عرفته إن ده مرض صاحبه بيتخيل إنه بيشوف بديل أو شبيه ليه بيظهرله واللي عرفته إن المرض ده بيصيب الإناث أكتر من الذكور....
- ممممممممممم مرض نفسي .... شبيه .... كدة شكل الموضوع كبير فعلاً.
