الحرب والجن والغموض الفصل الاول

هل تبحث عن قصه تثير فضولك وتكون مشوقه؟

اذاً انت فى المكان الصحيح هذه هى القصة الأكثر غموض وتشويق، اما بالنسبة لصورة فهى تعبر عن احداث القصه تابعوها حتى تعرفوا معناها.اتمنى لكم قراءة ممتعه.

التعريف بالشخصيات

اسمي مازن عندي ٢٣ لسه متخرج من كلية حاسبات.
عيلتي تتكون من امي و اختي، امي عندها ٤٠ سنه ذكية جدا جدا،معاها ماجستير فى هندسة اتصالات و شخصيتها قوية ( بس على مين ده معروف عني اني مشكله ماشية على الارض 😂).
اختي عندها ٢٠ سنه و احنا عايشين فى فيلا كبيره لان والدي كان المدير التنفيذي لشركة اتصالات كبيرة و كان مرتبه كبير و عايشين مبسوطين . تبداء القصة…

الحرب والجن والغموض(الفصل الاول)

حكايتي بدأت لما كان عندي ١٨ كنت فى أولى جامعة و والدي كان توفي من سنه و كان سايب ورث كبير على هيئة أصول و عقارات و مبلغ كبير جدا ( بس المشكله انه حتى بـ مرتبه مكنش يقدر يجمع مبلغ و لا ثروة زي دي و حوار انه كان مدير تنفيذي مكنش داخل دماغي و ده هتفهموه بعدين). المهم جبت فى الثانوية العامة مجموع كبير امي كانت عايزانى ادخل كليه هندسة بس انا رفضت و دخلت كلية حاسبات و معلومات و انا كنت اصلا واخد كورسات فى البرمجة في كل اللغات لان انا كان هدفي ابقى محترف برمجة و ابقي هكر محترف و كان عندي مشكلة نفسية اني مش عندي ثقة فى اي حد مهما كان سواء كان عشرة عمر أو لسه عارفين بعض.

 فى اول يوم فى الكلية و انا بلبس بعد م صحيت من النوم بعد م خرجت من غرفتي روحت صحيت اختي علشان تروح مدرستها صبحت على امي قولتلها صباح الخير يا ماما قالتلي صباح الخير يا زفت انا بصحي فيك من بدري و انت مش قادر تقوم مهو لو انت تبطل سرمحة طول الليل مع صحابك مكنش ده بقى حالك قولتلها كيفي كده مالكيش فيه انا سعتها حسيت ان انا هبدأ اغلط و اقول كلام مش فى وقته فى قولتلها خلاص بقى مش كل يوم نزعق على الصبح انا رايح الكلية. 

نزلت من الفيلا روحت الجراش ركبت عربيتي بالمناسبة نوعها كان مرسيدس موديل السنه و روحت الكلية كان ورايا محاضرتين حضرتهم و بعد م خلصت اعدت فى الكافتيريا اشرب قهوة و انا قاعد لاقيت واحد بيعاكس واحدة من اللي قاعدين و هي قعده ساكتة مش عافه ترد عليه و لما روحت علشان ابعده عنها زقني و راح ضربني برجله فى انا مسكت الكرسي اللي جنب البت اللي كان بيعاكسها و نزلت بيه على دماغه اللي نزل منها ددمم بعد كده الطلبه بدؤا يبعدونا عن بعض و الأمن جه علشان يخدنا للعميد بس صاحب الكفتيريا هو اللي هدى الدنيا و قدر يخلص الحوار و انا كنت زهقان فـ مشيت روحت البيت علشان الغده. 

اول م روحت كانت اختي جت من المدرسة و امي حضرت الاكل و اعدنا على السفره قومت اغسل ايدي و كملت بقيت اليوم. دخلت نمت و تاني يوم روحت محل اجهزة الكترونيه و اشتريت كاميرات صغيرة و ميكات علشان يبقى التسجيل صوت و صورة علشان احط الكاميرات فى البيت بعد م روحت لاقيت امي قاعده بتتفرج على TV لما شافتني قالتلي جيت بدري ليه قولتلها انا مرحتش الكلية اصلا لان النهاردة اجازة و ياريت متسأليش تاني فى حاجة زي دي و بطلي وجع الدماغ ده. 

دخلت غرفتي علشان ابدأ اظبط الكاميرات و انزلها البرنامج و اشغلها و لما الدنيا بقت تمام خرجت و قولتلها انا هعمل قهوة اعملك معايا قالتلي اول مره يعني تعمل انت القهوه قولتلها اعملك معايا ولا لا قالتلي اعمل.

 روحت المطبخ عملت القهوة و خرجت ادتها القهوة بتاعتها و دخلت غرفتي و بعد ربع ساعة خرجت و ركبت الكاميرات و ربطتها بـ اللاب بتاعي و خرجت. بالليل كانت أمي صحيت و بتعمل العشاء فى المطبخ قولتلها انا خارج بعد العشاء مع صحابي ردت عليا و قالتلي هو انت لازم كل يوم تخرج تتسرمح قولتلها كيفي كده ملكيش دعوه و سبتها و خرجت من المطبخ قعد على اللاب بتاعي اخلص برمجة فى برنامج انا كنت شغال فيه بقالي فترة و بعدين خرجت اتعشيت مع امي و اختي و لبست لبس خروج و خرجت مع اصحابي من ايام ثانوي كنا شباب مع بنات عادي و بعد كده روحت البيت على الساعة ٤ الفجر. اول م دخلت البيت لاقيت امي لسه منامتش و اعده مستنياني قالتلي النظام ده مينفعش مش كل يوم تسهر و ترجع البيت بالشكل ده قلتلها انا قايلك ملكيش دعوه بيا انا حر فى حياتي قالتلي لا انت مش كده انا واختك مسؤلين منك المفروض ان انت راجل البيت بعد ابوك يا ابني لازم تبقى مسؤول.

 قولتلها بمناسبة ابويا انت طلعتي كدابه لانه مات بـ طلقة فى دماغه مش حادثه زي م انتي ما قولتي لاقيت عنيها برقت و خافت مني و رجعت خطوة لـ ورا و بتبلع ريقها و بعد كام ثانية قالتلي انت عرفت منين الكلام ده قولتلها في حاجات تانية اعرفها بس كل حاجة و ليها وقتها بلاش توجعي دماغي تاني علشان نعرف نعيش مع بعض بشكل كويس احسن ما يبقى فيه بيننا مشاكل يا كدابه لاقيتها راحت ضرباني بالكف على وشي و بعدها سابتني و مشيت دخلت غرفتها و انا لسه واقف مكاني بعدها خدت بعضي دخلت غرفتي و بعد م غيرت لبسي افتكرت الكاميرات اللي انا مركبها فتحت اللاب و بدأت اتابع الفيديوهات اللي الكاميرات سجلتها و لكن و قفت عند مقطع كانت أمي و اختي بيتكلموا مع بعض امي بتقول لـ اختي اخوكي مبقاش يثق فى حد خالص و انا مش عارفة اعمل ايه معاه اختي قالتلها سيبيه مع الوقت و هو هيتحسن غير ان دي اصلا شخصيته هو مش اجتماعي اصلا امي قالتلها يا بنتي مينفعش يعيش حياته بالشكل ده لانه كده بيدمر نفسه اختي قالتلها يا ماما م هو مش مديلنا فرصة نعرف عنه حاجة ولا نكلمه حتى من ساعة م بابا مات و هو على حاله ده ( العلاقة اصلا بين اختي و امي علاقة قويه جدا و دايما أسراره مع بعض من زمان اوي) اختي قالتلها معلش اصبري و حاولي معاه كل يوم لحد م تخليه يثق فيكي. 

قمت دخلت الحمام و بعد م استحميت دخلت غرفتي و اعدت افكر فى الكلام اللي قولتوا لـ امي و انها ضربتني ودي كانت أول مره تضربني رغم ان شخصيتها قويه الا انها مضربتنيش قبل كده بصيت فى الساعة لاقيتها سبعة و نص قومت غيرت هدومي و لبست تي شيرت اسود و بنطلون اسود مع شوز اسود و خرجت من غرفتي و نزلت تحت كانت أمي واختي مستنين انزل افطر معاهم لما شوفتهم تجاهلتهم و خرجت على طول ركبت عربيتي و رحت الكلية اول م وصلت ركنت و نزلت من العربية دخلت الكلية لاقيت الواد اللي انا ضربته بالكرسي اول امبارح لما كان بيعاكس البنت مستنيني هو و صحابه قربوا مني و بدأت الخناقة و طبعا انا اتروقت جدا و طلعوا عيني لحد م الناس بعدوهم عني و رحنا على مكتب العميد و طبعا قعد يزعق شوية و يشوف نفسه علينا لحد م قالي اسمك ايه قولتلوا مازن الخديوي لاقيت تعابير وشه اتغيرت و نظر ليا بنظرة خوف و قال اتفضلوا امشوا و استنى انت يا مازن و بعد م الناس مشيت قالي تعالي اقعد قصادي أمام المكتب و قال اخبارك ايه يا مازن قولتلوا انت تعرفني منين قالي يا ابني مش ابوك اسمه حسام الخديوي قولتلوا ايوه قالي ابوك كان صاحبي و هو السبب ان انا بقيت عميد الكلية هنا ده غير انه ساعدني فى حاجات كتير فى حياتي و خلصلي حوارات كتير و مغرقني جمايل.

 قولتله انا مشفتش حضرتك معاه قبل كده قالي ابوك كان ليه صحاب كتير ده غير انه ساعد ناس كتير و انا منهم الف رحمه عليه. انا من جوايا فخور ان كل ما قابل حد كان يعرف ابويا يشكر فيه. قالي لو احتجت اي حاجة انا موجود اظن عرفت توصلي ازاي قولتلوا طبعا قالي الطلبه اللي ضربوك دول ابعد عنهم لأنهم لبش اصلا و ممكن يضروك قولتلوا متقلقش انا مش هسيب حقي العميد ابتسم و قالي زي ابوك بالضبط كان دايما اللي يجي فى طريقه يفرمه (طبعا انا قاعد و فيه حرب شوارع فى دماغي لان اللي اعرفه عن ابويا ان كان ماشي جنب الحيطة يعني فى حاله ده غير أن انا لما قولت اسمي هو خاف و في نفس الوقت بيشكر فى ابويا ) قولتلوا الف شكر انك حليت المشكله قالي انا كده كده اديدتهم فصل لمده اسبوع.

 قومت خرجت بره المكتب و طبعا لبسي اتبهدل و شكلي زفت خالص و انا ماشي علشان اخرج و اروح البيت لاقيت البنت اللي الواد كان بيعاكسها ادامي و جت ناحيتي و بدأت تكلمني ( حرفيا هي قمر زي م الكتاب بيقول حاجة جامده اوي شعرها بني و وشها تحس ان في فنان عالمي هو اللي رسمه عينها عسلي و مش تخينه). قالتلي انا عايزه اشكرك علشان الموقف اللي حصل فى الكافتيريا اول امبارح و علشان اللي حصلك بسببي قولتلها اولا لا شكر على واجب ثانيا انا عملت كده علشان كنت عايز اتعرف عليكي لان انا شوفتك اصلا فى المحاضرة الأولى و من ساعتها و انا عايز اكلمك. 

هي ابتسمت و وشها احمر خالص وبقي زي الطماطم قولتلها طب على الاقل قوليلي اسمك ايه قالتلي اسمي مي قولتلها و انا مازن الخديوي بعد كده خدنا أرقام بعض و انا مشيت روحت البيت طبعا اول م دخلت لاقيت امي اول ما شافتني اتخضت جريت عليا و بتقولي هدومك متقطعة و شكلك مضروب ايه اللي حصل انا طبعا تجاهلتها و مردتش عليها و طلعت اوضتي على طول و قفلت الباب و هي اعدت تخبط و تحاول تفتح الباب و انا مش مديها اهتمام خالص. 

الليل جه خرجت مع اصحابي و حكتلهم اللي حصل النهاردة و اتفقت معاهم ان هما هيروحوا معايا الكليه و نرد الضربة للكلاب اللي ضربوني و لما روحت امي كانت مستنياني علشان عاوزه تعرف اللي حصل و برضو مش مديها اهتمام و مش بكلمها خالص. تاني يوم صحيت و رحت الكلية و قابلت صحابي هناك بس مشيت لوحدي لحد م لاقيت الواد و صحابه جايين يضربوني تاني هنا بقى صحابي نزلوا عليهم و ادناهم العلقة التمام حرفيا. و بعد كده لما الدنيا هديت صحابي مشيوا و انا حضرت محاضراتي عادي و فى اخر اليوم قابلت مي و اعدنا نتكلم في اي حاجة و نفتح موضوع فى التاني لحد م مشينا.

 روحت البيت لاقيت امي مستنياني بس فى اوضتي انا اول م شفتها طلعت من اوضتي و انا على السلم لاقيتها جريت عليا و بتقولي انا اسفه ان انا ضربتك متزعلش مني يا ابني انا نفسي اشوفك احسن واحد فى الدنيا و تبقى شخص مسؤول قولتلها انا مش زعلان انك ضربتيني انا زعلان انك خبيتي عليا ابويا مات ازاي و مين وره الموضوع ده و ايه السبب فى انه يتقتل قالتلي ابوك قبل م يموت وصاني اني معرفكش اي حاجة خاصه بيه غير الورث الثروة اللي سابهلنا قولتها خلاص مش عايز اعرف حاجة منك انا هعرف بطريقتي قالتلي مش هتقولي ايه اللي حصل امبارح معاك خلي هدومك بايظه كده روحت حكتلها اللي حصل قالتلي يعني كان لازم تعمل فيها الشهم اديك اتروقت قولتلها عادي منا روقتهم النهاردة و كده الموضوع خلص و لو حصل حاجة تاني كده هما اللي هيزعلوا مش انا لاني مش هسمي عليهم…..يتبع…..

اسف على التفصيل الزائده ولكن كل تفصيلة من هذه التفصيل مهمه جدا فيما بعد.

موعد الفصل الثاني من قصة (الحرب والجن والغموض)

سوف نقدم لكم الفصل الثاني من القصة موعد الفصل الثاني الان.

قصة الحرب والجن والغموض الفصل الثاني