جولة في المتاحف التاريخية بالأسكندرية
متحف المجوهرات الملكية
المتحف موجود في قصر اسمه قصر فاطمة الزهراء بمنطقة جليم بالأسكندرية تم افتتاحه عام ١٩٢٣ م، في الأول القصر كان مقر لرئاسة الجمهورية في إسكندرية بعد كدة اتحول بقرار جمهوري لمتحف عام ١٩٨٦ المتحف بيضم ١١ الف و ٥٠٠ قطعة من المجوهرات والمقتنيات الملكية اللي بترجع لعصر اسرة محمد علي
القصر متقسم ١٠ قاعات كل قاعة فيها مجموعه رائعة من التحف و المجوهرات الخاصة بالأسرة المالكة مكان بسيط بس راقي كلنا حنستمتع لما نروح ونشوف الفن سواء في المبني وزخارفه وتصميمه أو في روعة المجوهرات المعروضه.
المتحف اليوناني الروماني
يقع بشارع فؤاد المتحف بيضم مجموعة رائعة من الآثار اللي تم العثور عليها سواء في إسكندرية أو المناطق المحيطة بيها معظم آثار المتحف بترجع للعصرين البطلمي والروماني بالتحديد من نشأة إسكندرية القرن التالت ق م إلي القرن التالت الميلادي
كمان المتحف بيضم آثار فرعونية تم العثور عليها في منطقة القاهرة و الفيوم زي لوحة موميياوات الفيوم .
المتحف افتتحه الخديوي عباس حلمي الثاني وكان عدد قاعاته وقتها ١١ قاعة بس
النهاردة وصل عدد القاعات ل ٢٧ قاعة.
متحف إسكندرية القومي
يقع بشارع فؤاد أيضاً و المتحف كان قصر لتاجر أخشاب واشترته هيئة الآثار و حولته لمتحف تم افتتاحه عام ٢٠٠١ م، و المتحف فيه حوالي ١٨٠٠ قطعة أثرية متنوعة كلها ترجع للعصور التاريخية المختلفة اللي مرت علي مصر زي ( العصر الروماني - البطلمي - الفرعوني - البيزنطي - الإسلامي - وصولاً للأسرة محمد علي).
المسرح الروماني
يقع في كوم الدكة و المسرح ده من أهم الآثار الرومانية في مصر يرجع للقرن الرابع ميلاديا ً
المسرح تم اكتشافه بالصدفة عام ١٩٦٠ م، و
المبني كله علي شكل حدوة حصان أو حرف U، و بيتكون من ١٣ صف من المدرجات الرخامية كلها مرقمة بأرقام و حروف يونانية لتسهيل عملية جلوس الأشخاص اللي بيوصل لحوالي ٦٠٠ شخص.
المدرجات مصنوعة من الجرانيت الوردي ويوجد أعلي المدرجات 5 مقصورات مش باقي منهم الا ٢ بس دلوقتي المقصورات دي مسنودة علي مجموعة من الأعمدة كما تستند علي جدار سميك من الحجر الجيري يحيط بيه جدار آخر والجداريين مربوطين بمجموعة من الأقواس حيث يعتبر الجدار الخارجي دعامة قوية للداخلي كما يوجد بالمسرح صالتان من الموازييك مزخرفة بزخارف هندسية رائعة و الصالة دي موجودة في المدخل الغربي للمسرح .
في النهاية نتمني أن تكون تلك الجولة القصيرة قد نالت اعجابكم و مليئة بالمعلومات المفيدة.
