القصة المأساوية للايكا أول كائن حى غزى الفضاء فى رحلة ذهاب بلاعودة !
القصه الحقيقيه المؤسفه للكلبه لايكا..
مين مايعرفش ومادرسش عن الكلبه لايكا! أول حيوان ينطلق للفضاء خارج الأرض.. بس مين يا ترى يعرف باقي القصه المآساويه دي! خليني بس أقولك إن الإتحاد السوفيتي وأمريكا في فتره من الوقت وحتى الآن عاملين زي الضراير، وكل ضُره بتحاول تعلي عالتانيه وتثبت لباقي الناس انها أحسن، ولحسن حظنا انهم فعلاً بيطلعوا نتيجة التعليه دي بإختراعات وتكنولوجيا وتطور علمي يفيد البشريه كلها واللي من ضمنها الدخول في عصر استكشاف الفضاء ومنه الهبوط عالقمر والخروج في مدار الأرض. الإتحاد السوفيتي في 4 أكتوبر 1957 عمل أول قمر صناعي بشري وسماه "سبوتنك" وقام باعته في مدار الأرض الخارجي عشان يبقى أول قمر صناعي يتم إرساله خارج الأرض وخد ضجه عالميه جداً وأد ايه الإتحاد السوفيتي وإدارة الكرملين دول ناس عاليه جداً ومتقدمه عن أمريكا، لكن للآسف في خلال اسبوعين تلاته بطارية القمر الصناعي اللي بتحركه في مدار الأرض خلصت وبدأ يتهاوى تحت تأثير الجاذبيه الأرضيه لغاية ما وقع داخل الأرض تاني. ضرتهم المتمثله في أمريكا، استغلت الموضوع وقعدت تقول هما السوفيت كده طول عمرهم فشله ومابيقدروش يتقنوا حاجه (فيه بعض الحقيقه هنا لأنهم متسرعين فعلاً وبيعملوا كل حاجه تحت الضغط والتهديد من قياداتهم)، وبدأت أمريكا تقول استنوا مننا التقيل بقى وهنثبت للعالم إن التميز لينا إحنا. طبعًا الكلام وصل للكرملين وبدأت القيادات تضغط عالعلماء وبرنامج الفضاء السوفيتي، لو ماعملتولناش حاجه تانيه تبهر العالم كله، هتختفوا وماحدش هيعرفلكم طريق (ودا كان بيحصل فعلاً حتى الآن)، فالمهم في 3 نوفمبر نفس السنه، قرروا إطلاق "سبوتنك 2" على متنه كلبه تدعى لايكا تم الحصول عليها من أحد شوارع موسكو وبعد مجموعة كشوفات وتدريبات قاسيه من ضمنها وضعها في غرفه مبرده لمدة 3 أيام متتاليه دون أكل، قرروا يبعتوها على متن سبوتنك 2 عشان يبقى أول سبق بشري ببعث حيوان للفضاء الخارجي ويكون السبق دا من نصيب السوفيت. كعادتهم نتيجة السرعه وعدم الإتقان بسبب ضغط السلطات عليهم، كان كل همهم انهم يبعتوا المكوك أو الصاروخ الصغير دا للخارج، ومارتبوش أو وضعوا خطه مؤكده لرجوعه، المهم نبقى احنا أول ناس نبعت حيوان في المدار، وبالفعل الصاروخ كان فيه كميه كافيه من الوقود لإرساله للمدار فقط لاغير، وبمجرد مانطلق وفي خلال ساعات، من شدة الخوف واختلاف الضغط والجاذبيه عالصاروخ، مؤشرات لايكا الحيويه كلها ارتفعت لدرجة الخطوره من ضمنها ضغط القلب والدم وللآسف بعدها علطول حصل مشكله في نظام تبريد الصاروخ الداخلي بتاع الحجره اللي كانت فيها وتوقفت عملية التبريد وبدأت درجة الحراره الداخليه تزداد مع الاحتكاك في الغلاف الجوي أثناء الخروج.. كانت لايكا قاعده حرفياً في فرن بيشويها وفضلت تتألم وتعاني إرتفاع مؤشراتها الحيويه والحراره لغاية ما وصل الصاروخ للمدار، وتم إعلان السبق البشري بكون لايكا أول حيوان في الفضاء الخارجي ومدار الأرض، يليها مباشرة إعلان وفاتها. وفضلت جثتها المشويه في القمر الصناعي أو الحجره تلف الأرض 2500 مره لغاية ما دخلت الأرض تاني في ابريل 1958.. وطبعاً ماحدش نشر المصير المؤلم اللي حصلها، المهم السبق التاريخي. ولو انت ماتعرفش، تم إرسال آلاف الحيوانات للفضاء الخارجي واتسابوا هناك مارجعوش، منهم كلاب وقطط وقرده وغيره.
