قصة "ليلة سقوط روما" ،مؤلفة من ٨ أجزاء- الجزء الأول
*«لـيـلـة سـقـوطـ رومـا».*🌇
*الـجـزء الأول.*
يوم الخميس الساعة ١١:٠٠ قبل منتصف الليل
بقاعة كبيرة باحدى الفنادق متواجد فيها اكبر رجال الاعمال والسياسيين بالبلد
وعلى وحدة من الطاولات كان مجتمع ثلاثة من اكبر السياسيين ومعن العقيد خالد ال***
قربت منن بنت طويلة ببشرة سمرا شعرا كيرلي بني .. حطت قدام العقيد خالد ال*** كاسة عصير برتقال ..
بعد ما شرب كاسة العصير حس بوجع خفيف بمعدتو
خالد : عن اذنكن لحظة
واحد من الرجال الي معو عالطاولة ..: في شي يا باشا !؟
خالد : لا ابداً بالاذن
دخل عالحمام وحاسس سكاكين بتقطع معدتو.. حاول يدخل على التواليت بس كلها مقفولة
وقف قدام المغسلة وغسل وجهو
رفع راسو واطلع بالمراي ، شاف النادلة الي قدمتلتو العصير وعوجهها ابتسامة صفرا
وقبل ما يلتفت عليها قربت منو وحطتت ايدها على رقبتو بحركة سريعة
حس بوجع جنب اذنو بعد ما غرزت ابرة مسمومة برقبتو
حط ايده مكان الوجع وبلش جسمو يتشنج شوي شوي
خالد بألم..: شو عملتي ؟
دفشتو عالارض .. مسكت قميصو بقوة وخلعت الازرار بحركة وحدة قوية .. طلعت من جبيتها قلم روج احمر وكتبت على صدرو بخط كبير حرف ال A .. طلعت من جيبتها خصلة شعر ورمتها على صدرو
همست بكل جحود جنب ادنو..: رحلتك خلصت معنا .. الرجاء ربط الاحزمة .. الوداع
طلعت من الحمام بسرعة ، توجهت لدرج الطوارئ .. شالت الباروكة عن شعرها ونزل شعرها الاسود الطويل على ظهرها .. طلعت منديل رطب من جزدانها ومسحت فيه وجهها لحتى بينت بشرتها البيضا .. نزعت العدسات البنية عن عيونها .. وبينو عيونها المختلفة .. كل عدسة فيها لونين نصها بني ونصها ازرق بلون السما .. لبست بنطلون جينز فوق التنورة ونزلتها بسرعة
نزلت ركض عالدرج وطلعت من الفندق بسرعة
وصلت للمتور يلي كان مركون بعد بشارعين من الفندق .. ركبت وانطلقت بسرعة عالية
رن تلفونها ..: ايوة .. تمت بنجاح .. سلام
__
بمكان تاتي
فتح باب البيت بكل تعب .. فات ورمى جاكيتو على الكنبة وتوجهه لغرفة النوم .. رمى حالو عالتخت بكل تعب وراح بسابع نومة..
نايم طب على وجههو بنفس تياب الليلة الماضية .. ما كان حاسس على شي .. تعب اسبوعين وسهر ليالي تجمعو بجسمو بس رمى حالو عالتخت ..
مرق اربع ساعات .. صحي على صوت التلفون برن بلا توقف
رفع ايده واطلع عالشاشة بنص عين وفتح الخط ..: يعني لو انك مرتي ما بتتصل هالقد .. ماجد اعطيني بس سبب ليخليك ادقلي هالقد ؟
ماجد: اللواء نزار طلب تكون موجود بالفرع خلال عشر دقايق
سكت وما رد
ماجد بصراخ..: كريم وين روحت ؟؟
كريم بنعس..: يلا اقل من نص ساعة بكون عندك
______
بعد ساعتين
وصل للفرع نزل من سيارتو ، شب باخر الثلاثينات ببشرة سمرا وملامح باردة ، طويل
دخل بكل هيبة .. توجه لغرفة اللواء
دق الباب وفات بمعالم باردة ..: احترامي سيدي
اطلع اللواء نزار على ساعتو ..: ما لسا بكير يا استاذ !
حك كريم راسو ..: سيدي والله الرحمة حلوة .. الي اسبوعين ما شفت تختي
نزار بتفهم ..: نحنا بمرحلة خطيرة .. يلا اشرب قهوتك والحقني عنا اجتماع مهم جداً
ضرب كريم التحية وطلع من المكتب
______
كان ماشي بالممر وسمع صوت ضحك معبي الفرع راح لجهة الصوت وكان ماجد واقف مع شرطية وعم يمزح ويضحك
وقف قدامو ووجهو ما ببشر بالخير
وبسرعة زبط ماجد وقفتو
كريم: تقضلي عشغلك .. وانت سيد ماجد شو اللي عم تعملو ؟؟
ماجد: يا رجل رح يطير عقلي.. كل يوم عم يجيبوا للفرع شرطية كل وحدة احلى من اللي قبلها
اخد كريم نفس وحاول يكتم غضبو ..:ماجد اختصر احسن
ماجد: والله تعبت
كريم: انشالله المرة الجاي اللواء نزار بشوفك
ماجد بخوف ..: اللواء نزار .. صحيح يلا نمشي عالاجتماع
مشى كريم مع ماجد وتوجهو لغرفة الاجتماعات
دخلوا وقعدوا مع باقي الضباط حول الطاولة اللي كان اللواء نزار على راسها
اللواء نزار: تم اغتيال العقيد خالد اليوم بعد حفل تكريمو
ضرب كريم عالطاولة ..: كيف هيك وشو شغل كل العساكر اللي كانو بالحفل !
ماجد: كريم اهدا شوي
نزار: نحنا اليوم قدام قاتل خطير .. عمليات الاغتيال يلي عم تصير بالبلد كلها المقصود فيها جهاز امن الدولة
كريم: لسا بكير ، هدا يلي كنت عم قولو
تجاهل اللواء كلامو ..: والتحريات بتقول القاتل هو نفسو يلي مسؤول عن عملية اغتيال اللواء حمزة
ماجد: لازم نتحرك باسرع وقت
نزار: كريم هدا ملف القضية صار معك .. شكل الفريق وباشر بالتحرك
وقف كريم ..: حاضر سيدي
اللواء نزار: بس قبل لازم تتعرف عالرائد اللي رح يشارك معك بالقضية
كريم : مين؟
اللواء نزار: حضرة الرائد سهر تفضلي
دخلت لقاعة الاجتماع صبية باول الثلاثينات متوسطة الطول بملامح عادية .. اعطت التحية ووقفت جنب اللواء
اطلع عليها كريم من فوق لتحت بملامح باردة …: ما عنا وقت للتعارف.. تفضلوا
______
بمكتب كريم
قاعد قدام مكتبو وقدامو ملف قضية اغتيال العقيد خالد ومن ضمن الاوراق كان في صور لمكان الجريمة وصور للضحية
قطع تفكيره صوت ماجد ..: وين وصلت
كريم : القاتل مرأة
ماجد: كيف عرفت؟
كريم : مو اي مرا .. خصمنا هالمرة قوي جداً ..
ماجد : بس شو الدليل انها وحدة ست
كريم: اول شي عندك احمر الشفايف .. وتاني شي الخصلة .. ركز معي..
ماجد : معك
كريم: ما في علامات عنف .. لا كسر ولا خبط .. حتى الجثة ما في عليها علامات عنف ابداً .. وهدا اسلوب وحدة ست
سهر: هدا مو دليل
اطلع عليها كريم بدون ما يجاوب
ماجد: صحيح هدا مو دليل ابداً ممكن يكون رجال وعمل هالتمويه لحتى يبان انو المجرم وحدة ست
كريم : ورا هاي المجرمة في عصابة كبيرة .. وهي بدها منا نعرف مع مين عم تشتغل .. لاحظ معي كل اللي تم اغتيالن من جهاز مكافحة المخدرات وعمليات الاغتيال بدأت من سنة تقريباً
ماجد: يعني قصدك يكون ..
كريم : ايواااا .. بدي قائمة بكل المساجين الي تم القاء القبض عليهن بتجارة المخدرات من سنة .. بدي الاسم الي بفتش عنو يكون بهالقائمة
قام ماجد من مكانو ..: ساعة وبتكون القائمة عندك
كريم: لا هدا مو شغلك .. حضرة الرائد سهر .. هاي المهمة الك.. ماجد اجمعلي كل التحريات اللي صارت ما بدي شي ناقص
ماجد وسحر ..: حاضر سيدي
______
بمكان تاني
قدام شط البحر وقفت الماتور ونزلت عنو
نزلت للشط .. وقفت وصرخت بكل صوتها
بلشت تدخل لجوات البحر والموج يضرب فيها بكل قوة
ضلت تفوت اكتر لحتى المي غطت كل جسمها وضل راسها برا
اخدت نفس عميق ولفت حالها ورجعت للشط
ركبت عالماتور وانطلقت لبيتها ..
دخلت عالبيت اخدت دوش طويل يهدي اعصابها .. خلصت وراحت تسطحت عالتخت وبلشت تقلب بالتلفون
فجأة رن .. جلست قعدتها وفتحت الخط ..: شووو يامعلييييم .. الاخبار طارشة الفيسبوك طرش
المعلم : شفت .. يلا خدي راحة اسبوعين وبعدها بلشي جهزي حالك للعملية الجاي .. ما بقي كتير .. اجى وقت الضربة القاضية
قلبت حلها عالتخت ..: عُلم وينفذ .. يلا بكرا بشوفك بدي انام
المدير : سويت دريم
سكرت الخط ورجعت تقلب بالتلفون والابتسامة على وجهها ..: واخيراً رح يرجع الشغل متل الاول .. ايييه رجعت ايامك يا روما
قلبت حالها على بطنها بعد ما رمت التلفون من ايدها وراحت بالنوم
_____
بعد ساعة بالفرع
فات ماجد لعند كريم ومعو سهر خانلة ملف
اخد كريم الملف منها بسرعة ، فتحو وبلش يقرأ اسم اسم لحتى وصل لعند الاسم الي بفتش عليه ..
توسعو عيونو وضرب على الطاولة ..: آسر الهاشم .. دوون
قعد ماجد عالكرسي ..: ايه لا تقولا
سهر: مين اسر الهاشم .. ومين دون ؟
رجع كريم ظهرو لورا وحط ايده على راسو وابتسامة صفرا على شفايفو ..: لا قولت وخلصت . دون .. بالزبط من سنة بلشت الاغتيالات .. ودون من سنة مشرف عنا هون ومو راضي يفتح تمو بحرف ..ومعو وحدة بتشتغل معو ومو عارفين نلقط عليها شي وما في الها أي سجل او صورة عنا
ماجد: لحظة بس ..
قاطعو كريم بسرعة بعد ما قام من ورا مكتبو .. : اللواء عباس ، الضربة الجاي رح يكون ضحيتها اللواء عباس .. قوم معي بسرعة
توجه لمكتب اللواء نزار بسرعة وشرحلو كل شي توصلو ..
نزار: بس هدا كلو ما فيه عليه دليل واحد
كريم : لازم ناخد كل شي بعين الاعتبار ولازم نحط جميع الاحتمالات
نزار: بشغلنا ما في احتمالات حضرة المقدم
كريم: اعطيني الاذن لحتى شوف دون
نزار بغضب..: طلبك مرفوض .. بتمنى ترجع تقف عالطريق الصح حضرة المقدم .. انت هيك عم تبعد عن القضية
وقف كريم وضرب التحية ..: حاضر سيدي ..< انحنى بجسمو على مكتب اللواء>.. ملف القضية معي وانا المسؤول عن نجاحها او فشلها .. وانا ماشي بالطريق الصح ..< عدل وقفتو >.. احترامي سيدي
طلع من المكتب وخبط الباب وراه
ابتسم اللواء نزار ابتسامة رضى ورجع كمل شغلو
_____
مرق كم يوم
صحيت روما من النوم كانت الساعة بعدها سبعة
تنهدت تنهيدة طويلة..: انا مكتوب عليي لا نام ليل ولا نهار غير بالمنوم
قامت اخدت دوش وبعدها عملت فنجان قهوة وقعدت بدها تشربو .. فجأة عصبت وضربت الفنجان بإجرها وحكت بقلبها ( والله مليت بدي اطلع شم شوية هوا لسا الوقت بكير )
حملت تلفونها ومفتاح الماتور وطلعت من البيت
ضلت تتفتل بالماتور لحد ما وقفت قدام كافيه
همست ( رح اشرب فنجان قهوة هون شو رح يخرب العالم من فنجان قهوة )
فاتت عالكافيه وطلبت قهوة .. كان فاضي تقريبا ما في حدا
قرب الجرسون وقدملها فنجان القهوة
رشفت منو رشفة وحكت بقلبها ( الله اطيب قهوة بدوقها بحياتي )
ابتسمت ابتسامة ساخرة ( وين فؤاد ودون يعرفو وين انا قاعدة والله لينتفوني ..)
فجأة دخل عالكافيه كريم وماجد
صرخ ماجد ..: ابو علي تنين قهوة وبسرعة
ابو علي: على راسي.. نور المحل
قعدو كريم وماجد عوحدة من الطاولات ..
ضربت عين ماجد على روما ..: كريم شوف القطة يلي قاعدة لحالها هناك
التفت كريم ..: انت ايمتى بدك تحترم حالك..
ماجد: خليك انت هيك عاملي فيها البني ادم الخلوق .. انا رايح اتعرف عليها
قام ماجد وتوجه لعند روما
ماجد : يسعدلي صباحك
اطلعت عليه روما من فوق لتحت ..: نعم !!
سحب ماجد الكرسي وقعد قدامها..: انا بصراحة حابب اتعرف عليكي .. من اول ما دخلت ولفتني جمالك
ابتسمت روما ابتسامة صفرا ...: ايه .. ومالو بس ممكن كاسة عصير
ماجد: على راسي ..< رفع ايده واشر للجرسون>.. ابو علي كاسة عصير لمون
روما: فريز لو سمحت
ماجد: فريش ابو علي
قرب الجرسون وحط العصير قدام روما
ماجد: ما تعرفت باسمك .. انا ماجد ...
سكت بعد ما دلقت روما كل كاسة العصير على راسو
روما: تشرفنا استاذ .. لا تنسى تحاسب عالعصير
قامت وكانت بدها تطلع بس وقفها صوت كريم
كريم: يا انسة .. يا مدام
التفت عليه روما والغضب بنقط من وجهها ..: نعم انت كمان ..
اجت عيون كريم بعيونها وضل صافن فيها
روما: هيييييي انت
انتبه كريم على حالو .. : انا اسف بالنيابة عن رفيقي .. ما كان يقصد شي ، وخلص اخد جزاتو
اطلعت بعيونو وحطت اصبعها على صدرو وشدت ...: ضلك ذكرو بهالدرس منيح .. مو كل طير بتاكل لحمو .. سلام
طلعت من الكافيه وركبت الماتور وحطت الخوذة وانطلقت .. كل هدا وعيون كريم بتراقب فيها
ماجد: عجبك ؟
طلع كريم من شرودو : شو!؟
ماجد: عجبك شو صار فيي
كريم: خرجك، قلتلك اخرتك وسخة
ماجد: مشي خلني روح بدل تيابي
كريم :يلا روح .. انا سابقك عالفرع
_____
وقفت روما الماتور عند شط البحر .. توجهت لعند صخرة ووقفت عليها ( شو كان بدي بهالشغلة انا كان ناقصني … افف اذا عرف فؤاد شو راح يعمل فيي ..كلب ولا يسوى ما رح يطلع بإيدو يعمل شي غير يفتن عليي مباشرة لدون )..
___
بعد مرور ايام
كانت روما قاعدة بغرفة القعدة وبتابع اخبار الفيسبوك
قالت بابتسامة ..: الاغتيالات مستمرة وهوية القاتل مجهولة .. سيناريو الاغتيالات يعود من جديد .. باشرت الشرطة بالتحقيقات في قضية اغتيال العقيد خالد ال***
ابتسمت بفخر ..: المفروض بحطوا صورة كبيرة اللي جنب الضحايا ويكتبوا القاتلة الجميلة تعود من جديد
انمحت الابتسامة عن وجها وقامت من مكانها وقفت قدام المراي واخدت نظرة سريعة عحالها
اخدت اغراضها وطلعت من البيت .. تفتلت شوي بالماتور وبعدها توجهت لنفس المكان المفضل بالنسبة الها
نزلت من سيارتها وقعدت على صخرة قدام البحر .. افكار كتير براسها
مدت نظرها لبعيد وحكت بقلبها..: (وبعدين عاملة متل الحمار اللي بمشي صاحبو وبدون ما يعترض على شي .. اذا انمسكت والله لروح لورا الشمس وما في الي دية .. هاي رابع عملية الي بسنة وحدة وكل مرة بقول اخر عملية وبرجع فؤاد يخبص من جديد.. لازم نخلص هالموضوع بسرعة)
رن مبايلها باسم فؤاد .. حكت بقلبها ( ابن الحرام عند ذكرو ببان )
اخدت نفس وفتحت الخط ..: والاو شو ابن حلال .. كنت فكر فيك .. عشر دقايق وبكون عندك .. سلاام
سكرت الخط ركبت الماتور وانطلق
______
وصلت للمكان الي اتفقت عليه مع فؤاد
انفتحت البوابة فور وصلولها .. فاتت وكانت فيلا كبيرة
نزلت عن الماتور ووقفت تتمعن بالفيلا
..: وانا بقول لي الفيلا نورت ، الملاك وصل
لفت وجهها وشافتو فاتح ايده لاستقبالها..: فؤاد شو هدا؟؟
قرب منها ليحضنها ..: اشتقتلك ملاكي
دفشتو عنها بقوة..: قلتلك الف مرة حركاتك هاي بلاها وانا ماني ملاك حدا .. شو هاي الفيلا ؟؟
مسكها من ايدها وسحبها وراه واخدها للطابق الارضي
فتحت عيونها بس شافت غرفة كبيرة كلها طاولات وحواسيب واسلحة.. وجنبها مكان للتدريب
سحبها من ايدها ودخلها لغرفة تانية .. فتحت عيونها علاخر وارتسمت ابتسامة عوجهها بعد ما شافت غرفة للتدريب على اطلاق النار
فؤاد: هاي مخصوص لالك ومحدا بدخلها غيرك
روما: يا ولي .. انا بموت عليك
فؤاد: مصلحجية مو بإيدك
توجهت للطاولة الي جنبها كان عليها مسدس مفكك بلمح البصر جمعتو وبلشت اطلاق نار عالهدف بكل حرفية ومهارة وكأنو لعبتها اطلاق النار
فؤاد : انا رح روح خليكي هون لتشبعي
روما : ما بشبع
طلع وتركها لحالها بالغرفة مندمجة
____
بعد ساعة طلعت من الغرفة وتوجههت للغرفة يلي بخططو فيها للعمليات
صرخت بكل صوتها بس شافت الفريق مجتمع ..: اووووووو واخيراً .. حاسة كأنو الي عُمر بعيدة عنكن .. والله كنت حاسة اني وحيدة بدون الفريق
شريف: والله الك وحشة
مؤيد : اشتقنالك
وجه فؤاد حديثو لباقي الفريق..: في حدا تاني بحب يعبر عن مشاعرو ؟؟
سكتو الكل
فؤاد: اتفضلي ست روما ..
قعدت معن عالطاولة كانو سبع شباب ومعن فؤاد ..
فؤاد: انا جمعتكن اليوم لحتى قلكن عالعملية الجديد
روما بحماس..: واخيراً
فؤاد: هالمرة ما بنفع تكوني موجودة
روما بمقاطعة..: لي
فؤاد : هاي العملية القاضية وبدها رجال
سالم : انا وخير جاهزين ومتدربين على كل شي
فؤاد: معناه رح خبرك قبل بيوم من موعد التنفيذ .. وما رح ذكركن .. يلي بنلقط بقتل حالو لانو اذا ما قتل حالو بإيدو ساعتها رح يكون موتو على إيدي ..
الشباب : مفهوم معلم
عصبت ووما كتير وقامت من مكانها وضربت الكرسي بالارض وتوجهت لغرفة التدريبات
اطلع فؤاد بطرف عينو عليها وحكى بصوت جهوري..: يلا شباب انصراف
قام فؤاد وراح لغرفة التدريبات .. ارتكى عالباب وشافها كيف بتضرب بشوال البوكس بكل غل وقهر
قرب منها بهدوء ..: روما .. هاي تعليمات دون
روما : ما بدي اسمع شي .. انا فاهمة منيح شو عم يصير
فؤاد: مو مافمة شي .. هاي العملية خطيرة وهي القاضية لالنا .. انت عارفة شو مهمتك بالعملية .. ما رح ضحي فيكي
روما : ورح إضحي بالشباب
فؤاد : ما اسمها تضحية .. نسبة نجاح العملية ٩٠٪ .. صح نسبة كبيرة بس بقي ١٠ بحالة فشلت العملية الشباب عارفين النهاية .. وانا ما بكسر كلام دون .. قال انت ما بتشاركي بهاي العملية
روما : انت عم تبعدني عن العمليات شوي شوي .. لصفي بالاخر برا
قرب عليها..: بهاي العملية رح يرجع دون .. ورح يرجع الشغل متل الاول وبدي تكوني معنا .. ولاخر مرة بقلك ، ما رح ضحي فيكي واخسرك
بعدت عنو ورجعت ضرب بالبوكس .. وبحركة سريعة ضربت فؤاد بوكس على وجهه وقعتو عالارض
قربت عليه وصارت فوقو ..: موافقة
فؤاد: يخرب بيتك هاي ايد بنت الله لا يوفقك
روما : مرسي
فؤاد: وين رايحة
روما: عثالث شي بحب اعملو بالحياة اللي ما الي فيها شي
فؤاد: ثالث شي؟
روما: ضرب النار هدا واحد ، شغلنا تنين .. وثلاث لعب البوكر ..< رفعت ايدها >.. سلااام
______
بالفرع
كان قاعد بمكتبو والاوراق بكل مكان
دخل ماجد عالمكتب
كريم: شو صار معك جبت التحقيقات
ماجد: كل اقوال يلي كانو موجودين بتقول انو في جرسونة قدمت كاسة عصير لسيادة العقيد ومن بعدها توجه للحمامات بعد الم حاد بمعدتو ..
قاطعو كريم..: حلو ، يلا تعال معي عنا شغل كتير
نزلو للطابق الارضي لغرفة التحقيق ..
دخل كريم عالغرفة وكان فيها شخص باخر الاربعينات بملامح حادة
سحب كريم الكرسي وحط واجرو عليه ..: دون .. او خلينا نقول آسر الهاشم واخيراً حصل اللقاء العظيم .. يلا انا سامعك
دون : المقدم كريم الراوي حصلي الشرف .. شو بتحب سمّعك ؟ حابب تعرف على مين الدور؟
كريم: وقف اللي عم يصير حالاً
دون بكل برود..: لي شو عم يصير ما وصلتني معلومات ولا تقارير
ضرب كريم عالطاولة بعصبية ..: انت عارف منيح شو عم يحاولو يعملو
دون ببرود قاتل ..: ما بقدر الخطة انحطت ورح تتنفذ قريب.. لازم تبلش من اليوم تودع اللواء عباس وتودعني انا شخصياً
دفش كريم الكرسي بكل غضب ..
دون: بس بحب اهنيك على ذكائك ، ما توقعت تكون بهالذكاء
بدون سابق انذار هجم كريم على دون ونزل في ضرب
بسرعة دخل ماجد وقامو عن دون
مسح دون الدم هن تمو ..: رح تندم .. رح تندم
حاوط دون ثلاث عساكر وسحبو عالحجز يلي كان فيه
ماجد: كريم ما بنفع هيك ممنوع تفقد اعصابك
كريم: امشي معي بسرعة
توجه كريم وماجد لمكتب اللواء نزار .. دخلوا وضربوا التحية
كريم : حضرة اللواء كل احتمالاتي صح .. لازم نكثف الحراسة على اللواء عباس .. خطة العصابة صارت واضحة .. العملية التالية رح تكون عملية تبادل بين دون واللواء عباس
نزار: معك كامل الصلاحيات .. نفذ
كريم : حاضر سيدي
_____
مرق اسبوع هادي ما في اي جديد وهدا الشي كان مخلي كريم قلقان ومتوتر لاي هجمة غير متوقعة مع انو كان ماخد كل حذرو ومأمن على اللواء متل ما لازم .. بس كان حاسس انو في حلقة مفقودة
بيوم كان قاعد بالبيت بعد نهار شغل طويل .. رن تلفونو وكان ماجد
فتح كريم الخط ..: ايه يا معلم شو فيه .. بالبيت وين بدي روح .. ايه بنروح نسهر .. يلا جمع الشباب وانا على وصول .. سلام
قام بدل تيابو بسرعة وطلع من البيت
وصل للمطعم وكان ماجد ورفقاتو ناطرينو
ماجد: واخيراً شفناك
مدحت: شو لو انو ما بنشتغلو مع بعض
ماجد: لا كريم بالشغل غير برا .. شايف هالوجه البشوش محلاه .. هدا ما بشوفو بالشغل ابداً
مدحت: الليلة بدنا نخربها
ماجد: بنخربها لعيونك
كريم: هدا العط تبعكن ما بحبو وما بفوت راسي .. بدنا نسهر سهرة عادية وكل مين يروح على بيتو
مدحت: يا رجل بدنا هيك مُزز اطري القعدة شو انا جاي اسهر على شكلك وشكلو
ماجد: كلام مدحت صح ما بكفي بالشغل ما في غير وجه اللواء نزار الخشب .. وهون كمان
كريم : اعملو يلي بدكن ياه انا ما الي بالمسخرة هاي
مدحت: ماجد اتركو هيك.. خلي يستنى صاحبة الصون والعفاف
ماجد: وبكرا بتيجي بتوقعو على وجهو طب
كريم: ايه تمسخرو تمسخرو.. اطلب العشا بلا ما اتعشى عليك انت وياه
_____
بعد يومين
بحفل تكريم للضباط كان متواجد فيه اغلب ضباط الداخلية والمخابرات .. وكان متواجد مجموعة كبيرة من الصحافة والقنوات لنقل الخبر
باخر القاعة كان واقف كريم وجنبه ماجد
كريم: كان لازم يتأجل التكريم .. الوضع بالبلد مو مستقر
ماجد: انت عملت كل شي بطلع بإيدك شو بدك تعمل كمان .. الكل كان معارض .. وانت شايف اللواء نزار بلش يسحب الحراسة عن اللواء عباس وبقول كل الفرضية غلط
كريم : خلينا نروح نقعد رح يبلش التكريم
ماجد: روح انت وانا بلحقك بعد شوي
توجه كريم للمقعد المخصص لالو وفجأة خبط بصحفية بشعر خروبي طويل ونتيجة الخبطة وقعت الكاميرا منها
نزل كريم بسرعة وتناول الكاميرا ..: بعتذر ما نتبهت
..: ولا يهمك
لفت حالها ومشت
ضل كريم واقف مكانو وصافن بالفراغ يلي تركتو بعد ما تغلغلت ريحة عطرها لجوا قلبو
صحي من شرودو بعد ما سمع صوت ماجد
ماجد: مالك واقف متنح هيك !؟
كريم: ما في شي
توجهوا لمقاعدن وبلش التكريم
_____
عالطرف الثاني كانت واقفة روما بهيئة مختلفة عن هيئتها .. حاطة باروكة خروبي طويلة وعاملة مكياج خفيف .. وحاملة كاميرا وبتصور بالحفل
رن تلفونها حطت ايدها عالسماعة يلي بادنها وحكت بهدوء ..: الوضع هادي واللواء موجود .. نعم بعتت الصور.. ساعة بالزبط ونفذ
سكرت الخط وتنهدت تنهيدة طويلة ورجعت لمهمتها
____
بعد ساعة بلش الحفل يخلص والصحافة تطلع ..
قرب اللواء نزار لعند كريم ..: خلال ساعة بتكون عندي بالمكتب
وقبل ما يرد كريم مشى اللواء مع الحرس وتوجه للسيارة
فتح واحد من العساكر باب السيارة لحتى يدخل اللواء ..
اعطى اللواء اشارة للسائق لحتى بنطلق
بعد عشر دقايق لف السائق المقود بحركة سريعة ودخل بطريق فرعي .. وسيارة المرافقة ورا
نزار : لي فتت من هاي الطريق
لف السائق حسمو ورش مخدر على اللواء نزار خلى يفقد وعيه
فجأة طلعت سيارة سودا مفيمة وبلشت ضرب نار على سيارة المرافقة وانقتل كل الحراس
كملت السيارة اللي فيها اللواء نزار طريقها ..
وصلت لمستودع بعيد عن المدينة
نزل السائق واعطى اشارة للشباب لحتى يحملو اللواء ويدخلو للمستودع
دخل السائق للمستودع بعد ما دخلو الشباب ..
شلح تياب السائق والطاقية عن راسو ووجه كلامو لواحد من الموجودين..: وين فؤاد ؟
طلع فؤاد من وحدة من الغرف ..: انا هون .. شو صار معك ؟
سالم : كل شي تمام اللواء جوا مع الشباب .. يلا موعد التنفيذ
فؤاد: شريف وخير جاهزين ؟
سالم: كل شي جاهز
______
عالطرف التاني كانت روما بتجمع اغراضها بكل هدوء وصلتها مسج من فؤاد .. فتحتها بسرعة "اطلعي من المكان الموجودة فيه وانطلقي لموقعك بسرعة "
حملت اغراضها وراحت لسيارتها ركبت وانطلقت بسرعة بدون اي شوشرة
توجهت لمبنى اعلامي ووقفت سيارتها بالكراج .. وبسرعة شالت الباروكة وحطت وحدة سودا قصيرة لبست عدسات بلون اخضر وشلحت الجاكيت وبقيت بتوب ابيض .. نزلت من السيارة وراحت لشنطة السيارة .. طلعت منها علبة مخصصة لحمل الجيتارة .. اخدتها وطلعت للمبنى .. وصلت لاخر طابق فتحت شنطة الجيتارة كان فيها بارودة قنص .. ركبتها بسرعة وثبتتها بوحدة من الزواية المخفية اللي بتقدر منها تكشف الشارع بسهولة
بعتت رسالة لفؤاد"جاهزة"
___
عند كريم
كان يجهز حالو لمغادرة المكان بعد انتهاء التكريم ،فجأة رن تلفونو..
صوت من الطرف التاني ..: اطلع برا القاعة واي حركة غبية راح تكلفك حياتك وحياة كل فرد من افراد الشرطة
كريم: مين انت
مجهول: القاعة مزوع فيها قنابل .. خليك عاقل
طلع كريم لبرا
بهاللحظة كانت ملاك بتراقب فيه من بعيد واعطت اشارة لفؤاد انو كريم لحالو برا القاعة
وصلت رسالة على تلفون كريم من الانترنت .. فتحها وكانت فيديو
مجهول: افتح الرسالة
فتحو بسرعة وكان فيديو للواء نزار
المجهول: طبعاً انت عارف شو راح تعمل ..دون مقابل اللواء .. وكمان مرة بقلك القاعة فيها قنابل .. اي حركة غبية راح تكلفك كتير .... سلام
وقف كريم عاجز ما بعرف شو لازم يعمل .. صحي من شرودو على صوت ماجد
ماجد: لي طلعت فجأة
صرخ كريم ..: اخلو القاعة فوراً
ماجد: شو في؟؟؟
كريم: نفذ بسرعة القاعة مزروع فيها قنابل
بسرعة دخل كريم وماجد وباشروا بإخلاء القاعة فوراً .. ووصلو فريق مختص بالمتفجرات لحتى يبطلوا عمل القنابل
رن تلفون كريم بنفس الرقم المجهول .. اشر بايده لماجد
كريم: ايوة
المجهول: لا تحاول كتير .. القنابل صعب يتبطل عملها بلا الريموت ..
كريم: وين رح سلمك دون
المجهول: نحنا رح نستلمو منك..
كريم : واللواء؟
ضحك المجهول ..: لا بعد بكير .. استلم دون وبعدها بنسلمك اللواء .. ما الي مصلحة معو
كريم: اعطيني العنوان
المجهول: رح نستلمو منك بنفس المكان يلي انت موجود فيه حالياً .. وبدون اي شوشرة .. وكمان مرة اي حركة غلط رح تكلفك غالي .. خلال ساعة التسليم .. ٥٩ دقيقة .. سلام..
اطلع كريم على ماجد وشافو بأشر بإيده لحتى يكمن المكالمة
كريم: لحظة.. واللواء نزار كيف رح نستلمو ؟
المجهول: انت مفكر تلعب معي ..
فجأة انفجرت قنبلة
المجهول: خليك حذر اكثر
قفل المجهول الخط
كريم: ماجد شو صار معك ، وصلت لموقعو!
ماجد: لا ما وصلت لشي
كريم: وين موقع الانفجار ! صار في اصابات
ماجد: الانفجار صار بالغرف الخلفية للمبنى.. ما في اصابات
خبير المتفجرات: القنابل موصولة بجهاز تحكم وما بنفع نبطل مفعولا غير بالجهاز
ماجد:فهمني شو يلي عم بصير !!
كريم: دون مقابل اللواء نزار
ماجد: شووووو !! اللواء نزار انخطف ، شو العمل مستحيل نسلم دون .. انت عارف شو يعني دون يطلع من السجن!
كريم: شو بدك اعمل يعني .. وما معي وقت قربت الساعة تخلص .. روح انت وانا رح ببقى هون يلا تحرك بسرعة وانا رح اطلب الدعم
____
______
مرق ٤٠ دقيقة وماجد ما رجع حاول كريم يتصل عليه بس تلفونو خارج التغطية
مرق كمان عشر دقايق بلش التوتر يظهر على وجهو وعملية اخلاء الفندق بعدها ما تمت
فجأة صدح صوت شحط فرام قوي ووصلت سيارات الشرطة ومن ضمن السيارات كانت سيارة موجود فيها دون
عالطرف التاني اعطت روما اشارة لفؤاد وخبرتو بوصول دون للموقع
رن تلفون كريم..: ايوة
فؤاد: ممتاز .. بشكرك على تعاونك معنا .. ضل اخر مرحلة ..رح توقف سيارة قدام السيارة الموجود فيها دون .. بتنزلو بكل هدوء ورح ينتهي كل شي
كريم: واللواء
فؤاد: كلمتي سيف ورح تستلم اللواء بعد ساعة .. يلا نفذ
كريم: دون ما رح ينزل قبل ما يكون اللواء عندي
دوى صوت انفجار تاني بالقاعة
فؤاد : بتحب اطبق الفندق على راسك .. لاحظ انها لهلق قنابل صوت بس
وصلت السيارة
فؤاد : افتح كاميرا بسرعة
فتح كريم الكاميرا بالتلفون وطلعت صورة اللواء وواحد ملثم جنبو مصوب المسدس على راسو
فؤاد: اي حركة غبية منك رح اعطي امر بتفجير راس اللواء وبعدها الفندق
اعطى كريم اشارة للعناصر لحتى ينزلو دون
نزل دون وابتسامة عريضة على وجههو وقف جنب السيارة الخاصة فيه بكل ثقة بعد ما فكو الاصداف عن ايده ورجليه
اطلع على كريم ..: بتمنى اني ما كنت ضيف تقيل عليكن
رفع ايدو واعطى تحية وركب بالسيارة وانطلقت بكل سرعتها
كريم: دون صار بالسيارة .. ابطل مفعول القنابل بسرعة
فؤاد : اكيد .. تحياتي حضرة المقدم
وفجأة دوى صرت انفجار تاني وثالث بالقاعة
بس كانت قنابل صوت فقط وما وقع اي اصابات وباقي القنابل تبطل مفعولها
عالطرف التاني ركزت روما عينها بالمنظار واخدت اخر نظرة ..: تم
سحبت البنديقة وحطتنها بشنطة الجيتارة ونزلت بكل هدوء
وصلت للكراج حطت البندقية بشنطة السيارة وانطلقت بكل سرعتها..
#يتبع ..
