الأرنب الأسود والأرنب الأبيض والتعلب المكار

الأرنب الأسود والأرنب الأبيض

قبل ما نحكي لازم نقول ان القصة دي فيها مجموعة نصائح مهمة لو بنحكيها للعيال نركز على اللي يهمنا يعني مثلا( تلاقي الأرنب بيعترض على الأكل) وقبل كدة مغرور  بجماله و (بيزعل اخوه ).

تلاقي مثلا   ( الأرنب الأبيض بيقول عارف ومش راضي يسمع من ماما ويتعلم) وكمان لما خد الفلوس و (بعد عن المحلات المعروفة عشان مقفولين أو مش فيهم طلبه) .

ده غير كمان الكارثة اللي لازم نهتم بيها وهي ( لما الثعلب قال له تعال معايا، ومش تخاف ماما وبابا معزومين عندي في البيت).

القصة من الأخر فيها كتير من مشاكل الأطفال المعاصرة أقرأها واحكيها لأولادك باحاسيسك وبمشاعرك عشان يحسو بيها.

الأرنب الأبيض مع أخوه في البيت

واحد أبيض : مغرور و مش بيسمع الكلام

والتاني أسود: مطيع وبيسمع الكلام

الأبيض: ما تلعبش معايا.. انا مش قلت لك كده من زمان

ليه طايب مش أنا أخوك حبيبك

لا انت اسود وسخ ومش نضيف روح استحمي وتعالى

انا لوني كدة استحميت كتير خالص ومش بيطلع

انا ماليش دعوى انا مش بحب العب معاك وانت وسخ كدة واسود

ماما.. ماما ( الأرنب الأسود يستنجد بماما

وبعدين معاك يا أبيض خمسين مرة أقول لك هو لونه كده ..طالع لبابا الله يرحمه

الله يرحمة ..انا ما شفتش حد وسخ خالص كده يلعب معايا

يا حبيبي دي مش وساخة افهم بقى تعبتوني

انا ماليش دعوى.. انا مش بحب العب معايا ..ها اطلع العب مع أصحابى واياك تيجي وراي.. مش حبكت يعني اول ما العب معاهم تيجي تلعب

مرت الأيام وبعد كام يوم.. ماما جاءت من بره بتنادي على العيال

ايه اللي مسكاه ده يا ماما ؟

شويه صور للتعلب المكار والحرامي والديب

مين دول؟

دول الوحشين اللي مش بيحبونا

ما لكش دعوى انت انا بكلم ماما.

ايوه يا أبيض ..هو سمعني كذا مره وانا بتكلم عليهم

ما انا عارف هما الوحشين اللي بيكرهونا

شاطر..تعالو بقة ونادي علي أصحابك عشان تشوف الصوره

طيب..ماشي

وبعد  أكثر من ½ساعة ..فين الأبيض كل ده بينادي على أصحابكم.. تعالى انت يا أسود 

بص ده الحرامي بيعمل نقسة غلبان ويقول لك تعالى اديك حاجة حلوه لكن هو شرير عاوز يدبحك..سامع، أما ده الثعلب المكار ده برده لئيم ومكار بيحب ياكل الأرانب لو جري وراك احفر في الأرض بسرعة زي ما وريتك وامشي تحت الأرض بعيد بعيد خالص وبعدين اطلع من الناحية التانية…تعالى أوريك تاني. 

طب الأبيض لسه ما جاش

اعمله ايه يا عني تعالي انت دلوقت وهو بعدين لما ربنا يهديه

وبعد ساعات جاء الأبيض ودخل ينام

كنت فين دي ماما علمتني حاجات كتير ..علمتني التعلب والحرامي وازاي اهرب من…

عارف..عارف..انا عارف كل ده

انت تعرف تهرب من الثعلب

طبعاً يا بني وببساطة..سيبني أنام بقة

في الصباح جاءت ماما بالطعام ( غلة وعيش) جلس الأسود يأكل أما الأبيض

ايه ده!! انا مش عايز ده!! 

ثم راح يبكي بصوت علي مزعج يطلب برسيم، ووسط الالحاح والصراخ أعطت ماما للأبيض مال حتى يشتري القليل من البرسيم له ولاخيه.

لا .. انا ها اشتري لنفسي بس

لا ها تدي اخوك حبيبك ..جدع

برده لا!! .. ثم خرج مسرعاً إلى الشارع ليشترى البرسيم، فكان هناك مكانين قريبين يعتادوا الشراء منهم فقط..أما الأرانب الكبيرة هي التي تبعد وتشتري من الأماكن البعيدة، ماما  كتير  كانت بتحذر   دايماً  ما ينفعش  تروح  بعيد  إلا لما يكون معاك حد  كبير.. الأرنب الأسود كان حلو و بيسمع الكلام، لكن الأبيض  كان  عندي خالص وفاكر نفسه كبر و بقى زي بابا ويعرف يروح  كل الأماكن اللي  بيروحها  بابا.

رايح  فين يا أرنب 

رايح اشتري برسيم طب نمشي  مع بعض عشان انا كمان رايحة أجيب برسيم وغلة.

ماشي..  يا بطة.. انا ها أوريكي واحد قريب خالص وعنده كل حاجة.

ايه د ه!  ياخبر ده المحل   مقفول!!

عادي تعالى نروح للتاني 

انا لسة جاي مافيش برسيم

طب بكره بقى

لا..لا..لا.. انا عايز برسيم

طب ها نعمل ايه يعني..بتصرخ ليه! وانا مالي.. انا ها أروح اقول لماما واديها الفلوس

لا.. انا مش ها اروح ها أروح للراجل البعيد اللي بيروحة بابا أنا عارفة

لا يا أبيض ماينعش.. طب انا ها اقول لماما

قولي لها ..انا كبرت طب حتى بصي فرفع الأرنب جسمه لفوق ووقف على  رجله عشان يوريها انه طول

خرج الابيض من منطقتة اللي بيعرفها ومتعود عليها و دلوقتي ..هو بيسأل فين الراجل بتاع البرسيم اللي جاب منه بابا امبارح ؟ لما كنت معاه.. اه انا امشي كده..لا.شمال ..يمكن يمين

وهكذا حتى ابتعد الأرنب الوحش عن المكان، وتاه.. هو دلوقتي مش عارف يرجع.

الأرنب الأبيض تايه ومش عارف يرجع

 طب وبعدين.. انا عاوز اروح..عاوز ماما..ماما.. بابا اه اه اه..عاوز اروح .وفضل يبكي جامد خالص ويصرخ لكن ما فيش حد سامعة لغاية ما

عدي علية العجل وسأله: مالك !

عايز ماما تعرف ماما ؟

لا طبعاً انت صغير خالص انا كبير خالص روح دور على ماما في حتة تانية.

مشي الأبيض وهو بيعيط لغاية ما شاف الخروف، جري عليه وقال له انت لابس زي بابا و بتاكل غله وبرسيم زينا .. انت أكيد عارف ماما.

امشي ياد ابعد انا لابس صوف وانت لابس فرو.. ميذ !

يعني ما تعرفش ماما

لا طبعا ..امشي يالا..ابعد عن أكلي

انا جعان

وانا مالي.

انت عندك برسيم و انا كنت عاوز برسيييم لما ماما حطت الف.

 انت ها تحكي قصة حياتك..ابعد بقول لك احسن انطحك بقرني واعورك جامد.

   جري الأرنب وهو خايف وجعان ..فين ماما؟ فين بابا؟ فينك يا اخويا يا حبيبي؟.. انا جعان أكل أي حاجة يا ماما ..انا أسف..مش ها اعمل كده تاني.

فضل الأرنب على الحال ده لغاية ما شاف الحمار من بعيد

انت الحمار صح انا عارفك كنت بتيجي عندنا مع صاحب العشة وشايل برسيم كتير خالص.

مش واخد بالي يا ابني ..اه ممكن يكون ابن عمي أصل احنا كتير خالص وشبه بعض و كلنا بنشتغل نفس الشغلانه ها..ها .. على طول تلاقينا بنشيل أما على ضهرنا أو اللي فينا ربنا كرمه تلاقيه بيجر عربية، بس ساعات العربية بتبقى أصعب بيحطو عليها حاجات تقيله، لا يا عم اشيل على ضهري أحسن، وبعد شويه نزل الحمار رأسه لغاية الأرنب وقال له..انت مين ؟

انا الأرنب.. انا جعان خالص

ياه كل يا حبيبي انت بتاكل زي كده

اه..اه.. يعني ممكن أكل معاك

كل طبعاً بس بسرعة قبل ما يجو اخواتي و البقر عشان ها يدهسوك برجليهم وممكن انا اموتك غصب عني عشان انت صغير قوي .

طيب انا ها أكل بسرعة خالص

شوية كدة وسمع الأرنب أصوات غريبة خاف و خاف أكتر لما سمع صاحبه بينهق ويرفس، راح بعد وجري ..جري ..جري وهو خايف فيه حيوانات كبيرة وضخمة بيجرو وداخلين ، الأرنب فضل يجري وهو بينادي على ماما وبابا وبيعيط. الشمس قربت تمشي والدنيا ها تليل.. تعمل ايه يا مسكين ..اه اقول ايه ما انت مش بتسمع الكلام، لو كنت سمعت كلام البطة وروحت مش كان بقى أحسن، اه الأسود الحلو مش لونه أسود لكن حلو، بيحب كل الناس وعمره ما زعل حد، وبياكل الموجود ماما تحط الأكل ياكل مش بيدلع و كمان بيسمع كلام الكبار قالو لما تلاقي المحل مقفول روح وما تبعدش, اه اديك ما.

وصل التعلب عند الأبيض

علشان ما سمعتش الكلام و مشيت بعيد بعيييد خالص.

 شوف ايه اللي ها يحصل لك ؟

يا خبر مين ده.. مين اللي جاي عند الأرنب الأبيض ده..ده التعلب الحمامة جارت الأرنب كانت فوق الشجرة وبتستعد عشان تروح بيتها شافت الثعلب وهو رايح ناحية الأبيض، جريت بسرعة خالص عشان تنبه ماما وبابا وتقول لهم على اللي حصل واللىي شافته، جريت الحمامه بسرعه على البيت لكن جناحها صغير لسه بدري عقبال ما توصل، وسابت التعلب رايح ناحية الأبيض، هو الأبيض عارف شكل التعلب ؟ لا.. برافو عليكم، أصل الأسود قعد جنب ماما وفهم واتعلم لكن الأبيض قال ( عارف..عارف) وسابها ومشي

يا حبيبي.. ازيك..وحشني خالص

انت تعرفني 

طبعاً يا حبيبي يا أرنوب انا بحبك خال ( أصل الثعلب مش كذاب هو فعلاً بيحب لحم الأرانب خالص وبيحب ياكلهم واكل كتير من اخوات الأبيض، وقرايبة).

طب وديني البيت انا عاوز أنام عند ماما.

انا ها اوديك بيتي عشان ماما وبابا جاين عندي

صحيح..فرح الأرنب المسكين وصدق التعلب المكار.

اه يا أرنب اه.. مش لو كنت سمعت الكلام كان زمانك دلوقتي عرفت انه عدوك وبيضحك عليك.

الثعلب ماشي والأرنب وراه زي العبيط الحيوانات كلها مستغربه.. لغاية التعلب ما دخل البيت بتاعه والأرنب دخل وراه.

 الحمامة وصلت لبيت الأرنب 

وصلت الحمامة و صرخت التعلب ها ياكل الأبيض.. التعلب راح للأبيض ..التعلب.. التعلب

 خرجت الحيوانات ووقفو يسمعو.. التعلب يا خبر راح المسكين 

لا أرجوكم ..ابني..ابني

طب روح انت ياوزة تقدري علي التعلب 

لا.. طبعا..خلي الرومي يروح أقوى مني

لا..لا.. أقوى مين انا ما انفعش

انتم ها تتعزمو ..لازم حد ينفع..لازم يكون فيه حل

الأبيض في بيت التعلب

اهلا بيك يالذيذ يا غالي

امال فين ماما

ماما..اه ..اه هما جاين دلوقتي بس انت تعالى جنبي ما تتعبنيش

انت اسمك ايه

انا ..انا التعلب يا أرنوبي انت يا طعم

التعلب يا خبر انت المكار ..انت عدوي وعايز تاكلني

الله ما كنا حلوين .. بتجري ليه جامد كدة.. شكلك عمرك ما قعدت مع ماما و الا بابا عشان كدة ما عرفتنيش والله ده مش زنبي !1

دخل الأرنب المسكين في حفرة صغيرة صنعها بسرعة..لكن الحفره صغيرة وممكن التعلب يجيبه، اه تستاهل انت لو كنت سمعت اللي بتقولو ماما ومش بتقول( عارف..عارف) كان زمانك عمل الحفرة طويلة وخرجت من تجت و عديت فوصلت بره البيت خالص وهربت.

ايه دة انت فين..فين يا عمري.. هاها والله دمك خفيف، ياراجل دي حفرة بردة، ياللا ..انت مسلي وانا مش جعان..فضل التعلب يضحك على الأرنب وهو بيخرج من حفرة ويدخل التانية، لغايه ما قال خلاص انا جعت ..انا ها اجيبك. 

التعلب و الكلب

  في بيت الأرنب والجيران والأصدقاء بيدورو علي حل يخوف التعلب،  سأل أحدهم الحمامة عن مكان الأرنب الأبيض ردت وقالت انها شافته خارج من مزرعة جدو علي فقال الحمار على الفور هناك في كلب كبير عشان يخوف التعلب، اه صحيح انا شفته، تمام نروح بسرعة نجيبة، يالا طيب اللي عايز يجي يركب على ظهري عشان ها اجري بسرعة وانت ياحمامة ورينا المكان، وبعد ما وصلو نادو علي الكلب وعلى طول الكلب الطيب وافق ومش بس كدة ده اتفق مع أصحابة الكلاب و جريو وهما بيهوهو ناحية التعلب، التعلب كان لسه ها يمسك الأرنب عشان ياكله سمع صوت الكلاب الكتير خالص راح ساب الأرنب وخرج من البيت، والكلاب وراه وهو يجري والكلاب وراه لغاية لما خرج خالص من البلد، وبكده رجع الأرنب الأبيض لماما وبابا ورجع بيته واصحابة لكن وهو حلو و مش مغرور وكمان بيسمع الكلام.