يوميات مامت مراهق🤦🏻♀️🙅🏼♀️
حبايبنا الامهات العسولات المطحونات اهلا بيكم في عالم المراهقين
لو عندك ولد 😔او بنوته في سن من 12سنه وانت طالعه بقي اللهم بارك تعالي انضمي لي كوبايه النسكافيه الحلوه بتاعتك وتعالي نرغي شويه
اولا لازم لازم تتاكدي اني المرحله دي مش حتمر علي خير وسلام الا اذا اتبعتي اجرءات السلامه😂 اللي حقولك عليها دي ورقه وقلم واكتبي معايا ياست الكل:
1-اللي بنحكي عليه ده فلذة كبدك اللي طبعا عاوزاه احلي وافضل منك بمراحل يعني ده مشروعك الاول في الحياه لو نجحتي انك تربيه كويس وتطلعيه انسان صالح فالمجتمع كله حيسقفلك ويدعيلك لان بصراحه العاهات اللي بنشوفها حاليا من شخصيات غير سويه حوالينا سببها الاوحد تربيه الاهل فالصبر ثم الصبر لان ده مشروعك زي ما قولنا
٢-انسي طريقه والدتك ووالدتي احنا في عصر غير كل العصور اللي فاتت عشان كده لازم دايما تكوني مواكبه اخر التطورات حواليك وياريت بلاش نتهكم عليهم لان مش ذنبهم هما بيقلدوا اللي حواليهم وخلاص
٣-الاستعانه بخبرات امهات من نفس العصر يعني اوللدهم يكونو اكبر من اوللدك بسنه مثلا تسالي دايما لما ابنك مر بالموقف الفلاني عملتي ايه وجاب نتيجه ولا لا وطبعا الطريقه دي مش حتنفع مع كل الشخصيات لكن يكفي شرف المحاوله 🙈
٤-الاستماع ثم الاستماع اول لما ابنك يدخل عليك حسيسيه ازاي كنت قاعده مستنياه وانك منتظره جدا انه يحكيلك عاللي حصل في يومه حتسمعي كلام فارغ خاصة لو بنوته ♥ اسمعيه وخلاص 🎧
٥-مفيش مانع من مشاركة بعض الانشطه معاهم زي تطبيق معين عالتليفون او لو العاب او مشوار للابن ده مخصوص يعني تعالي يا حبيبي انا عازماك النهارده نخرج نتمشي شويه مع بعض
٦-الصبر الصبر معلش 😂
٧-اسناد مهام تحسسه بالمسؤليه وانه محدش بيعرف يعمل المهمه دي بنجاح غيره 💪💪
٨-مشاركة زيارات للعائله وصلة الارحام لازم في جدولكو الاسبوعي
٩-يلا نتصور سيلفي بيحبوها جدا جدا🤷🏻♀️
١٠-ياسلام لو تشغليه في رياضه اي رياضه المهم يتحرك ويطلع الطاقه اللي عنده
١١-وأمر أهلك بالصلاة واصطبر عليها دي حاجه ثابته عندي وديكتاتوره فيها الصلاه في ميعادها لان ده فرض وباب للفضفضه مع ربنا وبركه للبيت
١٢-راجعي رقم ٦تاني مهو الموضوع فعلا محتاج صبر جدا
١٣-الجانب الدراسي بلاش نضغط علي اولادنا. فيه اولاد من صغرهم قدراتهم في التعليم ضعيفه حنشجع ونكافئ لكن بلاش مقارنه وبلاش سخريه والشطار حنستمر في دعهم طبعا
١٤-الصاحب ساحب دوري علي اصحاب اولادك
لو حصلت صاحبيهم انت كمان
١٥-طبعا لازم تعلميهم يتقبلوا التغيرات الفسيولوجيه والنفسيه اللي بتحصلهم يعني لو بنوته ياريت كمان من سن ١٠سنوات تبدأي تتكلمي معاها عن علامات البلوغ وعن التغيرات اللي بتحصل في جسمها وكمان لازم تعلميها العنايه الشخصيه والنضافه 🌸
١٦-اندهي علي ابنك او بنتك اخترعي اي موضوع وقوليله عاوزه اخد رايك في الموضوع ده انا محتاره انت رايك ايه…….
مش عاوزه اقولك عالثقه اللي حيحس بيها أكيديله دايما انك بتثقي في رايه
١٧-اديله الحريه بس مع التجربه يعني عرفيه انك حتسيبيه المره دي يجرب لكن هو بنفسه اللي حيجي يحكيلك ويقولك كان معاه حق في اختياره ولا لا وطبعا ده لو حاجه مش حتسبب لهم اي ضرر
١٨- كلمات ثلاثه بتبدا بحرف الحاء (حب وحضن وحنيه)بيعملوا المعجزات علموا ولادكم يظهروا حبهم ليكم ولاخواتهم ولاصحابهم
١٩-افتكري انها مرحله وحتعدي بس هي صعبه ومتعبه لكن بالدعاء كل الامور بتتحل وبتعدي بامر الله
٢٠-صدقه بسيطه تخرجيها بنيه صلاح الابناء بتفرق كتيير
وفي الاخر اعاننا الله علي هذه المهمه الصعبه وجزيتم خيرا 🌸🌸
