الاسرة الصالحة والتربية الصالحة
بنت تزوَّجت في عمر التلاتين وعشان سنها وفرصتها في الزواج قلت، وقعت في بيت مش ملتزم!
ولكن جوزها كان ملتزم اللهم بارك، المهم إنها انجبت ولد وبنتين واتّفقت هي وزوجها على إن كل واحد فيهم هيتولّى مسؤولية تربية فرد فيهم، يعني الأمّ هتربي الولد .. والأبّ هيربّي البنات وهكذا..
بس طبعًا في مشاركة.
والتربية هنا مش بس تربية معنوية ونفسية وعاطفية وهكذا.. لأ.. تربية كاملة وأهمها هي التربية العِلمية والعملية
الزوجة بدأت مع ابنها من الصفر حرفيًا، وكانت بتخاف تنزله الشارع ليتهدّ كل اللي بتحاول تبنيه، فكانت بتكثرّث حياتها كلها ليه وبتخليه ياخد التعليم منازل واللهم بارك بركة القرآن كانت واضحة جدًا عليهم فكانوا بيطلعوا من الأوائل، يعني أفضل من ألف طالب في المدارس..
الولد حاليًا بقى عنده 12 سنة، اللهم بارك يا إسراء هو واخد إجازة حفص، وحاليًا ماشي في القراءات العشر، أُجيز في الأربعون النووية ورياض الصالحين وماشي في صحيح مُسلم!
والدته في البداية كانت مش شايفه ثمرة لده، وكانت طول الوقت بتسمع كلام من نوعية ( انتِ هتفضلي مقعدّاه قدام العلم كده ) ؟
مبدأتش تشوف ثمرة ده غير لما جه رمضان اللي قبل اللي فات ليها - يعني وقتها كان عنده عشر سنين - وقالها : هو يا أمي الناس اللي مبتتعايش بين القرآن والحديث والسُّنّة وكده .. عايشه إزاي ؟
فبدأت أمّه تسمع ليه وتسأله عن شعوره .. وبتقول :
رمضان ده صلّى بالناس في العشر الأواخر.
أمّه قررت بعد رمضان ده إن لازم يروح معسكر تدريبي..
- تدريب على إيه يا حبيبي؟
- على الدعوة إلى الله.
- هاه!
وعلى يد د.عبدالرحمن السميط.. في أعماق القارة المنسية.
ومن بعد العيد وهو في المعسكر ده .. كله إيمانيات لدرجة إن لما والدته بتكلّمه بتحس برائحة الإيمان في حديثه.. قالها أخر مرة : أنا هستوحش لو تركت البيئة دي!
يعني هيشوف نفسه وحش لو ساب المعسكر ده ♥.
فمامته قررت توديه للشيخ مصطفى العدوي بقى.. قالتله بعد العيد الجاي هوديك تدرس على يدّ الشيخ مصطفى العدوي..
وتكمّل هناك وبالفعل خلاص هيدرس على يدّ الشيخ، مامته بتقول إنه في يوم نزل قعد مع صحابه وكده.. وهم فضلوا يتكلموا عن الفيس والواتس والبلاستيشن و و و
فبيسألوه وانت عملت ايه في الأجازة! قالهم خدت الإجازة واتعلمت من الإمام مسلم كذا وكذا...
رجع لأمه بعدها يقولها : أنا أسف على كل لحظة قولتيلي فيها تعالى نتعلم حاجة جديدة وقولتلك كمان شوية.. هما شايفين إنهم فرحانين باللعب اللي بيعملوه ده.. بس يا أمي السعادة الحقيقية في القرآن والسنة..
أما بالنسبة للبنت فهي أصغر ... بس حاليًا من شهر - على ما أتذكر - أخدت الإجازة وبدأت في القراءات العشر ، والدها هو اللي أجازها برغم انها أصغرمن اخوها بكتير بس خدت الإجازة ♥
وكمان بقى جانب الجزء العملي واضح جدًاااا في شخصيتهم، بتحسي إن في حد من السلف أمامك والله..
لدرجة إن هما بيستوحشوا لما يلاقوا حد بيعصي الله.
يا أخي جيل كده خارج وسط الفتن .. في بيئة مش ملتزمة.. وخارج بالشكل ده!
عارف يعني إيه فجر وان لازم يتصلى في وقته، ويعني ايه قرآن وورد ويعني إيه سُنّة.
بنت بتحكي وبتقول:
تدخلي شقتهم، كلها حب ، ودفء وسكن وسكينة، لا فيها أغاني تعكّر صوف ذهنك.. ولا أفلام ولا مسلسلات ولا صوت عالي ولا فلان أحسن مني ولا فلان عمل ولا.. ولا ولا.. يا إما الأم بترتل قرآن يا إما الولد والبنت بيرتّلوا يا إما الأب بيرتّل..
الأم كل حياتها زوجها وأولادها فقط..
الزوج هو حبيبها وصاحبها وكل شيء وصدقًا هو سندها في النقطة دي وهما ملاقوش ثمرة ده غير بعد كام سنة ♥.
حسيت وقتها إن فكرة خروج طفل سوي وعالِم في الزمان ده مش معجزة زي ما بيتقالنا.. مش صعب زي ما بيفهّمونا .. مش ذنبنا إن عيونكم دايمًا طول الوقت على أطفال التيك توك اللي أهلهم متربّوش فمعرفوش يربّوا ..
الأمر محتاج تربية إيمانية للأب والأم ...
إنما مش مستحيل يعني!
جلس ابن الباز للفتوى وهو ابن الثمانية عشر عامًا بعد أن أصرّت أمّه على تعليمه وهو ابن العشر سنوات.
لولا أن سخّر الله [ أم أيمن ] ما كان [ أسامة ] ، ولولا [ أسماء ] ماكان [ ابن الزبير ]، ولولا [ هِند ] ما كان معاوية.
كان معاوية يقف في وسط الرجال والقادة والخلفاء ويقول أنا ابن هِند، أنا صناعة هِند.
سورة النِّساء ماسميت بالنِّساء إلا لعظيمِ فعل النساء في بناء الأمم ، و ﺍﻷﻧﻔَﺎﻝ ﻭ ﻣُﺤﻤَّﺪ ﻧﺰﻟﺘَﺎ ﻟﻴﺼﻨﻌَﺎ ﺃﻟﻒ ﺃﻟﻒ ﺭﺟﻞ ..
فاصنعن لنا قادة ...فقد سئمت الأمّة أرباب المياعة والبلادة والخلاعة.
لو كان الذي يَسْكُنُ فيك هو هَمُّك لَهَانَ الأَمْر.. لكنّها أُمَّة كاملة!
ينامُ الجسدُ منك والقَلبُ مُنْشَغِلٌ.. وَالعَقْلُ يَبْنِي أَلْف حكايةٍ وغاية!
لو كُنت وحْدك لهانتْ.. لكنّها أُمَّة يا فَتىٰ..
استبدل حياة السوشيال بحياةٍ حقيقيةٍ مَليئة بجلسات السحر وذكر الله والتدبر في ملكوته، أن تعيش حياةً بسيطةً -بصفوها وكدرها- لا يعلم تفاصيلها إلا أنتم!
الأسرة الصالحة بتطلع مجتمع كامل مليان خير فلو مش هتقدر تعمل أسرة زي دي حاول جزء منها ♥
دُمتم بخير ♥🌿.
