مذكرات آدم المصري: بلا هوية - حلقة ٤

= لاحظ إني سايبك براحتك لحد دلوقتي، مع إني من حقي أفهم .. مش كدة و لا إيه؟
- تفهم إيه؟
= آدم إنتا مقولتش حاجة لحد دلوقتي!
- يا دكتور متتعبش نفسك .... أنا مش هقول غير اللي أنا عايز أقوله .. أشغل دماغك و حاول تجمع كل حاجة من اللي أنا بقوله بس ..
= علي الأقل أعرف هي مين؟
- بالبساطة دي؟
= هو صعب أوي كدة؟
- مش صعب .. بس ليه بتحكم علي نفسك بالموت من دلوقتي؟ .. ليه عايز اكتب كلمة النهاية من قبل ما نبتدي و لا تسمعني للآخر ..
= ممممممممم كمل آدم .. كمل
- أنا محتار أوي .. ما بقتش عارف أي حاجة في أي حاجة .. تعبت .. زهقت .. أوقات كل حاجة من ناحيتها بتقولي قرب .. كل حاجة يا دكتور من غير أي مبالغة .... و لما بستجيب .. و أقرب .. بلاقي الصدمة مستنياني .. في كل مرة بقرب بلاقي هي هي الصدمة مستنياني .. و بلاقي العكس تماماً .... طب إزاي؟! .. و ليه؟!! ..
= طالما حصلت أكتر من مرة .. يعني المفروض تكون فهمتها .. ليه بتكرر التجربة و تقرب منها في كل مرة طالما النتيجة واحدة؟! ..
- مش بإرادتي .. صدقني غصب عني .... رغم إن ده بيموتني، ده غير لومي لنفسي و ندمي الكبير كل مرة .... إلا إني مش قادر .. مش قادر أقاومها
= خلاص .. استسلملها
- رغم الضياع اللي أنا فيه إلا إنها الملاذ الوحيد ليا عشان ألاقي نفسي .. بس للأسف
= ليه للأسف؟!
- حتي الملاذ الوحيد في حياتي موجود في خيالي و بس، و البوح بيه من الحرمانيات
= إيه كل اللي انتا فيه ده!
- أنا ميت مستني بس تصريح الدفن، و الموت ما بيجيش مرتين يا دكتور

= إيه كل اللي انتا فيه ده!
- أنا ميت مستني بس تصريح الدفن، و الموت ما بيجيش مرتين يا دكتور
= بتشوفها
- يعني
= يعني إيه يعني؟
- بحلم
= بتحلم بإيه؟
- بيها
= و يا تري حلمت بإيه؟
- حلم برئ ممنوع أحكيه
= يعني إيه برئ ممنوع أحكيه؟!! و ليه أغلب كلامك مش كامل؟!
- هههههههههههههه
= بتضحك ليه؟!!!! ضحكني معاك 
- عشان إجابة السؤالين واحدة
= واحدة إزاي؟
- مش انا قلتلك
= مممممممم قلت إيه؟! .. آسف معلش قول تاني .... أنا بحاول أفهمك و الله من أقل كلام ممكن تقوله، عشان مش عايز أضغط عليك
- عشان من مصلحتك و مصلحتي إنك متعرفش تفاصيل .. و إنك متسمعش أكتر من اللي أنا محتاج أحكيه .. و إني مينفعش أقول أكتر من اللي أنا محتاج أقوله زي ما قلتلك من شوية
= معناه إيه ده؟!!!
- مش مهم معناه إيه يا دكتور .. مش مهم خالص
= أمال إيه المهم آدم؟!
- المهم إني حاسس بيها بجد .. عايز أعمل عشانها أي حاجة .... و مش عارف أعمل إيه
= انتا عايز إيه منها؟
- بحبها
= قلتلها؟
- يوم ما كنت هقولها يوم ما فقدتها
= تقدر توضح أكتر!!
- يومها كان كل شئ بيوحي بإنه هيكون يوم جميل .. كنت محتاج لحد أتكلم معاه و هي كمان كانت محتاجة حد يسمعها .... كان كل حد فينا مسلم نفسه للتاني بتلقائية شديدة .. عجيبة.. لدرجة إني بدل ما كنت محتاج أحكي لقيتني حابب أسمعها .. و هي كمان كانت حابة تسمعني بعد ما كانت محتاجة تفضفض ....
= و بعدين؟
- و لا قبلين .........
= كمل آدم، سكت ليه؟!
- هتصدقني؟
= طبعاً هصدقك ..
- كل حرف و كل كلمة و كل إحساس من يومها لحد النهاردة مكتوم جوايا .... بمعني أدق أنا لسة الزمن واقف بيا عند اليوم ده
= ليه؟
- عشان في لحظة كل ده اتبخر و اللي كان ممكن بقي مستحيل
= ليه مستحيل آدم؟
- حتي إجابتي علي سؤالك ده هي المستحيل بعينه
= ليه آدم؟! ليه؟!!
- عشان أنا هعيش و أموت من غير ما أجاوب علي السؤال ده
= و الموضوع ده كان من قد إيه تقريباً؟
- من ...... من ٥٢٠ يوم و ٩ ساعات و عشرين دقيقة و ٢٣ ثانية بالظبط
= ايه ده؟ انتا حاسبها باليوم و الساعة و الثانية!!
- اه .. عشان من يومها و أنا من غير أمل .. من غير روح  .. من غير هوية .... من يومها و أنا مفتقدها .. و مفتقد نفسي .. أنا بحسب العمر اللي راح من غيرها .... من غير ما تكون معايا أو حتي أشوفها ....

تابع