فاتو ايماات نفاسي
فاتو ايماات نفاسي خلصتهم وكل يوم نتعلقو بأدم طايح كثر من النايض ونريقو عليه سيرتو انا وفيصل تقول غير حنا لي ضنينا وزدنا جيحنا عليه كون نصيبوه ميرقدش ويقعد غير يلعب معانا ، حتى كي تقمطو ماما يروح ينحيهالو ويحكملو يديه ويلعب بيه وانا نحب نفتحلو عينيه ديما مغمضهم وكي يحلهم يبانو زروقة وماما تعيط علينا بسيف باش نحينا هذي الطبيعة قاتلنا مش مليحة هذي العقلية بنكم ميكبرش متخلوه يرقد متخلوه في حالو، كمل الكونجي تاع فيصل ولازم عليه يروح كره حياتو ماجا يروح بسيف حتى
ولاو يعيطولو بسيف باه دار الكوراج وراح يخدم ، مع لحق بدا يكره فيا معاه كل دقيقة يقولي صوريه ابعثيهلي نشوفو واذا كنت نحكي معاه ويبكي يقولي واشبيه واش درتيلو هبلتني عقليتو جديدة هاذي تقولي ماما ساعفيه راه محروم ويتيم وحاب يعوض الفراغ بضنايتو بقيت نصبر فروحي غير بهدرتها ، كي شفت روحي ريحت شوي عدت نروح نقرا ونخلي ادم عند ماما تلمو عليا بزااف وضغط نتاع القرايا ولحق وقت لكنطرول بقيت نوجدلو نقرا ليل مع نهار باش نطلع العام وماما تجيبلي ادم غي كي يجوع نرضعو من صدري
سلمو عليا وشراكي وش حوالك بقيت نجاوب فيهم بالبارد سيرتو خلود منحملهاش وجامي اذا طمنتلها بقيت نشوف فطفلة لي معاها _اه معرفتكش بيها هذي ختي رونق راهي تقرا هنا في إيكول قدامك كاشما تحتاجي ولا قوليلها بحكم دايرة اقامة هنا مع صحباتها ، تبسمت تاع فوق القلب و قتلهم معليش ونضت جيت رايحة عاودو حكموني بالهدرة بقيت نليكيدي فيهم مرتحتلهمش كامل حتى حتى جا خويا قلت فقلبي جابك ربي نضت طول قتلهم انا نروح خويا جا ، رجعت لدار لقيت ادم يبكي رضعتو وعطيتو لماما
ورجعت للاشومبر حطيت نقرا ، من نهار تلاقيت بهذيك رونق وليت مل يوم نلقاها عند الباب تجي تسلم عليا وتروح وليت نتجنبها قد مانقدر شنفت عليها طلقت الصماطة ووالو وجها قصديرة حتى كي قلت لفيصل عليها قالي اتجنبيها ومداسريهاش اقري واخرجي منا ولجاي نقللك من دار للقرايا ولعكس مضاليش تخالطيلي في البنات وديري في الشبهات على عمرك ضال يوصي فيا هااك وتالمو يضال يحذر فيا وليت ندير الحذر من كامل الجيهات....
وحد نهار خلصت قرايتي على 16:00 وفيصل كان فذاك نهار مروح، عيطلي _عمري راني وصلت متروحيش ضك نجي نديك_ايه صحة راني نستنا فيك ، قعدت نستنا فيه حتى جا داني لدار دخلنا لقينا ادم راقد عيطت لماما مجاوبتش رحت للاشومبر تاعها لقيتها متكسلة فبلاصتها رحت نوضتها و سقسيتها على صحتها تهدر غير بلعقل الهدرة وزالة عليها معجبتنيش طول رفدها فيصل وعيط لخاوتي وبابا لحقوه لسبيطار ، هوما راحو وانا بقيت في دار مع وليدي قاعدة ونار شاعلة فقلبي هازة ادم يبكي معرفتش نسكتو تالمو عقلي عند ماما رايحة نهبل ياريتني رحت معاهم ، طولو بزااف من ربعة نتاع العشيا وراهي 12 نتاع ليل
قاعدة غير نعيطلهم واحد ماريبوندا عليا وقلبي ياكل فيا ومزير ومش مطمنا طووول ، درت بزااف اسئلة في راسي بقيت نهدي في روحي وندعي ميصرا والو حتى دخل عليا فيصل وبابا ومهدي وجوهم كحل جا ليا بابا حكمني من يدي وعندو هدرة حاب يقولها ومعرفش مين يبدا وعينيه معمرين دمووع شفت لمهدي نلقااه مهبط راسوو وفيصل جاي لجيهتي هز عليا ادم حطو فبلاصتو و حكمني قعدني قالي منال نعرفك كورااج ومرا فحلة وتأمني بقدر الله خيره وشره وربي دار الموت والحياة وحنا فى هذي دنيا زايرين ورايحين لدار الحق الحياة ممر وليست بمقر يماك دايم الله في ملكو ربي يرحمها كي قال هكذا شغل واحد صرعني
لراسي ديكلونشيت مدرت حتى ردت فعل مقدرتش نستوعب واش راه يقول جاني وحد الهدووء حسيت روحي راني نووم مش في الوااقع كي شافوني هااك بقاو يهدرو معيا بصح لا ردة فعل مني بقيت نسمع فهدرتهم بعيييدة وغير صوت فداخلي يقول لالا غير ماما لالا انا ماصدقتها رجعت لالا ماما مديريهاش بيا ،معرف كيفااه لبسني وخرجوني روحنا للولاية نتاعنا وصلنا للباطيمات نلقى ملاك متغاشية في الدار مع لافامي هذو وقتاه وصلو بهذي السرعة خبر الفاجعة بلخف يلحق كي لمحتني ملاك ناضت تجري تحضنتني وتبكي وتعدد وانا في عالم اخر حابة نعيط حابة نفرغ قلبي حابة نصدق واش سمعت مي مقدرتش تقيدت
كومبلي دموعي جافين مطحوش الهدرة والقوة كامل مبلوكيين غير مصدومة ونشوف بالعين ولهدرة فراسي تاع مكاش منها ماما تروح وتخليني، نمشي جسد بلى روح صراع بين نفسي وعقلي حابة نصدق ومنيش قادرة جاتني صدمة قوية لي خلاتني منبكي منعيط شعور الفاجعة فيا، ملاك طيح وتنوض مقدرتش فقدت السيطرة على روحها داوها لسبيطار بااه يدرولها الكالمو و تتكالمى قعدت غير نتيه وغايسة كيفااه برك صباح خليتها راقدة وادم في حضنها وضك يجو يقولولي ماماك توفات معرف كيفاه
طلع علينا نهار وبداو الغاشي يجو يعزو لحق وقت العصر راح يدفنو فيها وكانو يستناو في مراد باش يهبط ويحضر بدفينة جابوها حطوها تحت عيطولنا نشوفوها خرجني فيصل مع خاوتي وبابا فتحت عليها لغطى وشفتها ثم وباه فقت مع روحي وتأكدت صح بلي توفات كي شفتها هااك في صندوق عيطت
عيطة وحدة يااا ميمتي وين رايحة ومخليتني يا لغالية مزلت مشبعتش منك ومن ريحتك ، بقيت نشوف فيها ونبكي بانتلي راقدة ماشي قاع ميتة حكمتني هستيريا عليها وانا نبكي كليت روحي عليها خسرتها زوج مراات في حياتي وهذي الخسارة للابد متزيديش باش تولي.
